Maliko 1
1
Yohana Mubatitsi anvikula kutsa kwa Yesu Chilisito
Matayo 3:1-12; Lukasi 3:1-18; Yohana 1:19-28
1Uguno go mwantso gwa Ndongwa Nofu tsa Yesu Chilisito, Mwana va Mulungu. 2Ndongwa itso tsikantsitse kota fyoandiche Isaya Muloli va Mulungu. “Mulungu alontsile hino,
Ntsingumutuma jumbe vangu halutalo hako yo akugolola ndongwa tsako.”
3“Munu anchema kuhuma ku mbuga kuta,
Mumuwuyapile Mutwa ng'asi
na mwiviche chang'ani kumwanuchila Mutwa ho akuva akutsa.”
4Jumbe uyo avaga Yohana Mubatitsi yo ahumye ku mbuga na kuvavikulila vanu kuta, van'ganika valeche ndongwa tsawo ntsibi na kumupituchila Mulungu na kubatitswa, na Mulungu akuvahulumila. 5Vanu luhuma chila hono ha inyi ya Yudea, na vala wo vikalaga ku muji gwa Yelusalemu vabitaga kumuhulikitsa Yohana. Vakamusukaje Mulungu avahulumile ndongwa tsawo ntsibi na kutsileka, na vabatitswaga na Yohana mu lulenga lwa Yolidani. 6Yohana avaga afwite mugolole go guhonilwe kwa mibahila ja linyama lyo linchemwa ngamiya, kaha avaga afwite luleheje lwa nyingo mu chigudi. Chilyo chake chavaga wuchi wa kumuhulo na mipantsi jo jinchemwa ntsije. 7Nayo Yohana akavavikulilaje vanu kuta, “Halutalo hangu akutsa munu muvina kulutila heni, ho ihyo heni sifuluche mbopole ndejesi tsa ndatu mu magulu gake. 8Heni tsinguvabatitsa kwa malenga, lechelelo mwene uyo akuvabatitsa kwa Muhe va Mulungu.”
Yesu am'batitswa na kujelwa
Matayo 3:13-4:11; Lukasi 3:21-22; 4:1-13
9Chipindi chicho Yesu akatsaje kuhuma ku muji gwa Natsaleti go gwavaga ku Galilaya akafikaje kwa Yohana, nayo Yohana akamubatitsaje mu lulenga lwa Yolidani. 10Luvala lulo Yesu ho avaga kuhuma mu malenga, akawonaje kilanga kwa Mulungu kudinduche na Muhe va Mulungu akamwichilaje kota hila ng'unda. 11Litsi lya Mulungu kuhuma kilanga likahulikwaje linlonga, “Heve yo Mwanangu yo nguganile, yo nganitswe na heve.” 12Luvala lulo Muhe va Mulungu akamulongotsaje Yesu kubita ku mbuga, 13Yesu akavaje uko ku mbuga siku alubayini kuno an'jelwa na Lihoka. Kuko ikalaga hamwe na minyama ja mwijejele, nawo vatantsi va kilanga va Mulungu vavaga vangumutanga.
Yesu anguvachema valova somba vatayi vamufwate
Matayo 4:12-22; Lukasi 4:14-15; 5:1-11
14Hotsavaga kulutila siku nstolofu Yohana akawopwaje mu nyumba ya vawopwa. Yohana hoavaga kuwopwa, Yesu akabitaje ku muji gwa Galilaya kuvikula Ndongwa Nofu tsa Mulungu, 15akavalonjelaje, “Chipindi cho alialontsile Mulungu chifisile, na Chipindi cha Mulungu kutavala. Mun'ganika mupituche na kutsileka ndongwa tsenyu ntsibi, na kutsitumbila Ndongwa Nofu!” 16Siku yimwe Yesu ho avaga an'jenda mulubali lwa lilamba lya Galilaya, akavawonaje valova somba vavili, Simoni hamwe na mung'olotse yo achemwaga Andeleya, vanlova somba kwa nyafu tsawo. 17Yesu akavalonjelaje, “Mutse mufwate, na heni nguvadita muvalete vanu kwa heni kota hila fyo mwalovaga somba.” 18Luvala lulo Petulo na Andeleya vakatsilekaje nyafu tsawo na kumufwata Yesu. 19Yesu ho avaga kubita halutalo chidogo, akavawonaje vana vavili va Tsebedayo, yo vachemwaga Yakobo na muyage Yohana. Nawo vavaga mugati mwa mutumbwi gwawo van'wuyapa nyafu tsawo. 20Luvala lulo akavachemaje, nawo vakamulekaje Tsebedayo dadawo hamwe na vakola katsi mu mutumbwi na vakamufwataje Yesu.
Yesu angumuponetsa munu munya lisoka
Matayo 8:14-17; Lukasi 4:31-37
21Hambele Yesu hamwe na vadahitswa vake vakafikaje ku muji gwa Kapelenahumu, na ho yavaga kufika Siku ya Weselo wa Vayawudi, Yesu akinjilaje mu nyumba ya kitang'anila Vayawudi na akantsaje kudahitsa. 22Vanu veka vakapomokaje kwasawuli ya gala madahitso gadahitsaga Yesu, kwasawuli mwene siadahitsaga kota vadahitsi vawo va malajitso ga Musa, lechelelo adahitsaga kwa wuvetso wa Mulungu. 23Luvala lulo ho avaga an'dahitsa, munu yumwe munya lisoka akakolaje, 24akalongaje, “Una chichi na hetwe heve Yesu va ku Natsaleti? Mbe, utsitse kutwananga? Tukutsele kuta heve yo mubagulwa va wiyeka kuhuma kwa Mulungu.” 25Lechelelo Yesu akaling'anulilaje lila lisoka kwa kulilonjela kuta, “Katuche! Uhume mugati mwa munu yuno!” 26Lila lisoka likamutigasaje fikami na likakolaje na kumuhuma. 27Vanu veka yo vavaga mu nyumba yila vakatinukaje na kwiwutsa kuta, “Tsino tso ndongwa tsachi? Mbe, iga go madahitso ga sambi? Munu yuno angujing'anulila misoka najo jingumuhulikitsa!” 28Luvala lulo ndongwa tso adisile Yesu tsikatagalilaje ku muji gweka gwa Galilaya.
Yesu anguvaponetsa vanu wolofu
Matayo 8:14-17; Lukasi 4:38-41
29Luvala lulo hovavaga kuhuma mu nyumba ya kitang'anila Vayawudi, Yesu hamwe na vadahitswa vake yo vachemwaga Simoni, na Andeleya, na Yakobo, na Yohana vakabitaje ku kaye kwa Simoni na Andeleya. 30Yesu ho avaga kufika vakamulonjelaje, “Yuve va mudala va Simoni ana filungo ndalahela na avasise mu chinanda.” 31Yesu akabitaje iho hoali avasise yuve va mudala va Simoni, na kumubata liwoko na kumwinula. Luvala lulo akaponaje na kwantsa kuvatelechela chilyo. 32Hoyavaga kufika mumihe na Siku ya Weselo yavaga kuduga, vanu vakamusindichilaje Yesu vatamwa wolofu na vanu wo vana misoka. 33Vanu wolofu yo vikalaga muji gula vakakong'asikaje hivala ha lwitsi lwa nyumba yoavaga Yesu. 34Nayo Yesu akavaponetsaje vanu wolofu na vanya matamwa ganjiganji. Kaha akajivingaje misoka myolofu, lechelelo kwasawuli jene jatselaga kuta Yesu yo nani, misoka jila sijalontsile chinu chochive.
Yesu anguvavikulila Ndongwa Nofu vanu va ku Galilaya
Lukasi 4:42-44
35Hamilawu iyage, Yesu akilavaje kung'acha kutitu, akabitaje hono ha wiyeka kumusuka Mulungu. 36Hambele Simoni hamwe na vayage vakabitaje kumusaka Yesu. 37Hovavaga kumuwona vakamulonjelaje, “Chila munu angukusaka heve.” 38Lechelelo Yesu akavalonjelaje, “Tubite hono hanji ku miji ja habehi, kuko nako ngavikule Ndongwa Nofu, kwasawuli ntsitsitse kwa lulongwa lulo.” 39Ihyo Yesu akabitaje chila hono ku Galilaya kuvikula Ndongwa Nofu tsa Mulungu, avikwe mu nyumba tsa kitang'anila Vayawudi na kujivinga misoka.
Yesu angumuponetsa munu munya wububa
Matayo 8:1-4; Lukasi 5:12-16
40Munu yumwe yo akodekaga na wutamwa wa wububa akabitaje kwa Yesu, akamufugamilaje na kumusuka, “Manyi ugane ufuluche umonetse ili tsidichilwe mu ntsovelo tsa kumufugamila Mulungu!” 41Yesu akamuwonelaje lusungu munu yula, na akagololaje liwoko lyake akamudometsaje na kumulonjela, “Ntsin'gana upone ili udichilwe mu ntsovelo tsa kumufugamila Mulungu!” 42Luvala lulo munu yula akaponaje wutamwa wa wububa wo avaganawo na kidichilwa na Mulungu. 43Kahi Yesu akamulonjelaje munu yula awuche, na akamufundaje kuta, 44“Lekaje kumulonjela munu yoyuve lulongwa ulu longuditye, lechelelo un'ganika ubite ukilajile kwa muvina va vatawula nambiko, na ukatawule nambiko kwasawuli ya kukwemwa uko kota fyo alialajitse Musa, ili vakulave fyo uponile wutamwa wa wububa.” 45Lechelelo munu yula akawukaje na kwantsa kuvikula ndongwa tsila tsa kukwemwa kwake. Ihyo Yesu injilaga mu muji kwa lufiho na kwikala hono ho hagaya vanu, lechelelo vanu kuhuma chila hono vakatsaje ho ali.
Právě zvoleno:
Maliko 1: SBV
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
The New Testament in Sagala Language @The Word for The World International and Sagala Language translation. All rights reserved.