Maliko 3
3
Yesu angumuponetsa munu Siku ya Weselo
Matayo 12:9-14; Lukasi 6:6-11
1Siku yinji ya Weselo Yesu akinjilaje kaha mu Nyumba ya kitang'anila Vayawudi, na mumo mwavaga na munu munya liwoko lyo lipotsile. 2Mafwalisayo vamwinga vavaga hono vansaka chambutso cha kumuhijila Yesu, ihyo vamuhimaga Yesu valole manyi akumuponetsa munu uyo mu Siku ya Weselo. 3Yesu akamulonjelaje munu yula munya liwoko lyo lipotsile kuta, “Utse iha hagati ha vanu veka.” 4Yesu akavaputsaje vanu vala, “Mbe, Chinu chachi chinofu chochin'ganika kuditwa Siku ya Weselo, kudita ndongwa nofu awu ntsibi? Mbe, tun'ganika kukulusa vanu awu kuvakopola?” Lechelelo vanu vala vakakatukaje myee! 5Yesu akavalavaje vanu chila lubali kwa lilakali, akavang'ung'utilaje kwasawuli vavaga valihela litumbilo. Kahi akamulonjelaje yula munya liwoko lipotsile, “Golole liwoko lyako.” Yula munu akagololaje, nalyo liwoko likavaje lyumi nachene! 6Ihyo Mafwalisayo vakahumaje kivala kwa Nyumba yila ya kitang'anila Vayawudi, vakakong'anaje hamwe na vatantsi va Helode na vakalonganaje hila fyo vafuluche vamukopole Yesu.
Vanu wolofu vangumufwata Yesu
7Yesu hamwe na vadahitswa vake vakabitaje mbaka mu lubali lwa lilamba lya Galilaya, na vanu wolofu kuhuma ku Galilaya na ku Yudeya hovavaga kuhulika ndongwa tseka tso avaga an'dita Yesu vakamufwataje. 8Vanu vanji wolofu vakatsaje kuhuma ku Yudeya, na ku Yelusalemu, na ku Idumaya, na kumwambu gwa lulenga lwa Yolidani, na vanji vahumye kubehi na muji gwa Tilo na muji gwa Sidoni. 9Yesu akavalonjelaje vadahitswa vake vamuvichile chang'ani mutumbwi mudodo ili injile vanu valeche kumutifya kwasawuli ya vanu vavaga wolofu. 10Vanu vala vamutifyaga Yesu kwasawuli avaga avaponitse vatamwa wolofu, na ihyo vatamwa vanji vikunugintsaga ili vamudometse. 11Vanu yo vavaga na misoka ho vavaga kumuwona Yesu vitotsaga hasi halutalo hake, na kukola na kulonga, “Heve uli mwana va Mulungu.” 12Lechelelo Yesu akajilemetsaje jila misoka jileche kihala kuta mwene yo nani.
Yesu anguvahagula vatumi kumi na vavili
Matayo 10:1-4; Lukasi 6:12-16
13Hambele Yesu akakwinaje ku chidunda, na akavachemaje vala yo anguvagana mwene, nawo vakabitaje kwa Yesu. 14Akavahagulaje vanu kumi na vavili yo avachemile vatume. Kahi akavalonjelaje, “Ntsivahagwe henye muve hamwe na heni, ili ntsivatume kuvikula Ndongwa Nofu ya Mulungu. 15Akavapelaje wuvetso wa kujivinga misoka.” 16Iva wo vanu kumi na vavili yo avahagwe Simoni, yo Yesu amupelye litawa lya Petulo, 17na Yakobo na Yohana yo vavaga vana va Tsebedayo, iwo yo Yesu avachemile litawa lya Boanelije, linya mana ya, “Vana va Chibumo,” 18na Andeleya, na Filipo, na Batolomayo, na Matayo, na Tomasi, na Yakobo mwana va Alufwayo, na Tadeyi, na Simoni yo avaga mutova ligalu va inyi yake, 19na Yuda va ku Isikaliyoti yula yo hambele amugaluche Yesu.
Yesu yo muvina kulutila Balitsebuli
Matayo 12:22-32; Lukasi 11:14-23; 12:10
20Kaha Yesu ho avaga kwinjila mu nyumba, vanu wolofu vakakong'anaje kaha, mbaka Yesu hamwe na vadahitswa vake vakalemwaje kulya kwasawuli avatangaga vanu. 21Vang'olotse Yesu hovavaga kuhulika ihyo vakatsaje kumutegula, kwasawuli valongaga kuta, “Apasile chijeni.” 22Vadahitsi vamwinga va malajitso ga Musa yo vatsitse kuhuma ku Yelusalemu vakalongaje, “Yesu anlongotswa na Beelitsebuli livina lya misoka, na angujivinga misoka kwa wuvetso wa ilyo livina lya misoka.” 23Duve Yesu akavaputsaje kwa muhwano guno, “Mbe, Lihoka lifuluche ndawuli lihetse lyene? 24Manyi wuntsajila wumwe wigavite, wuntsajila uwo siwufuluche wime. 25Kaha manyi kuve na vanu va kaye yimwe vigavite, kaye iyo yikwananjika. 26Ihyo manyi wuntsajila wa Lihoka wigavite wukwima chinya ndawuli? Wukwananjika na wukuduga. 27Kuduhu munu yo afuluche injile mu kaye ya munu munya ludalu na kutegula finu fyake bila kulongola kumuwopa. Mbaka ho akumuwopa ho akuvetsa kumusukula finu fyake. 28Ntsinguvalonjela nachene, Mulungu afuluche amuhulumile munu ndongwa ntsibi tsotsive tso akudita, 29lechelelo munu yo angumuliga Muhe va Mulungu, uyo siafuluche ahulumilwe. Kwasawuli akuva adisile wubi wa siku tseka.” 30Yesu alontsile ndongwa itso kwasawuli vali vamulonje kuta, “Mwene anlongotswa na Balitsebuli livina lya misoka.”
Vang'olotse va Yesu va wukweli
Matayo 12:46-50; Lukasi 8:19-21
31Vakatsaje yuve na vang'olotse va Yesu. Vakimaje kivala na kumutuma munu akavachemele Yesu. 32Nawo vanu wolofu vavaga vichite kwa kumpilima vangumuhulikitsa Yesu, nawo vanu vala vakamulonjelaje, “Yuwo na vang'olotso na vahatsawo vali kivala vangukusaka!” 33Yesu akavalonjelaje, “Yuvangu na vang'olontsangu yo vanani?” 34Yesu kapugasaje na kuvalola vanu yo vichite chila lubali na kulonga, “Mulave! Iva yo vayuvangu na vang'olotsangu va wukweli. 35Munu yoyuve yo an'dita ndongwa tso an'gana Mulungu, uyo yo mung'olotsangu, na yo muhatsavangu, na yo yuvangu.”
Právě zvoleno:
Maliko 3: SBV
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
The New Testament in Sagala Language @The Word for The World International and Sagala Language translation. All rights reserved.