Maliko 9
9
1Yesu akawilaje kuvalonjela, “Ntsinguvalonjelani wukweli, kuna vanu vamwe yovali hano yo sivakufwa mbaka ho vakuwuwona Wuntsajila wa Mulungu hila ho wunkutsa kwa wuwetso.”
Yesu an'woneka mu wumelemo wake
Matayo 17:1-13; Lukasi 9:28-36
2Hotsavaga kulutila siku sita, Yesu akavategulaje Petulo, na Yakobo, na Yohana akakwinaje nawo kuchidunda chitali, na vakavaje valiyena. Kuko, Yesu akagalukaje kumiho kuno vangumulava, 3na myenda joafwite jikamelemaje na kuva myelu tswee! Kuduhu munu yoyuve va muinyi yoafuluche kufuva jive kota fyojili. 4Luvala lulo vala vadahitswa vadatu vakavawonaje Eliya na Musa valoli va Mulungu, vakantsaje kulongana na Yesu. 5Petulo akamulonjelaje Yesu, “Mudahitsi, yikuva finofu hetwe twikale hono hano. Chiba tutsenje fyuwo fidatu, chuwo chimwe chive cha heve, na chimwe cha Musa, na chinji chive cha Eliya.” 6Petulo akahabukaje chinya ihyo kwasawuli siatselaga alonje chinu chachi, kwasawuli mwene na vayage vali na mutinuko ndalahela. 7Simusika likahumilaje lifuluka likavagubikaje, na litsi lya Mulungu kuhuma mu lifuluka likalongaje, “Uyu yo Mwanangu yo ntsimuganile. Mumuhulikitsaje!” 8Baho baho hovavaga kupugasa, sivamuwene munu yunji yoyuve, lechelelo Yesu ng'ani alihamwe nawo. 9Hovavaga vankwika kuchidunda, Yesu akavafundaje kwa kuvalonjela kuta, valekaje kumulonjela munu yoyuve ndongwa tso vatsiwene, mbaka mwene Mwana va Munu hoakuva atsilipuche. 10Ihyo vakatsivikaje ndongwa itso mu numbula tsawo, lechelelo vakavaje vanlongana vene kwa vene kuta, “Kutsilipuka cho chinu chachi?” 11Vadahitswa vakamuputsaje Yesu, “Kwasawuli yachi vadahitsi va malajitso ga Musa valongaga, yin'ganika Eliya muloli va Mulungu amulongole Chilisito?” 12Yesu akavalonjelaje, “Ena, yin'ganika Eliya alongole kutsa ili aviche finofu chila chinu. Lechelelo kwasawuli yachi yandikwe mu Mandiko mahagulwa kuta, mwene Mwana va Munu an'ganika kukodwa ndalahela na kubedalwa? 13Lechelelo ntsinguvalonjelani henye, Eliya mwanga atsitse, nawo vamuditye fyo van'gana vene, na kota hila fyo yandikwe mu Mandiko.”#9:13 Eliya mwanga antsintse, Yesu anhwanitsa Eliya na Yohana mubatitsi adisile katsi yo vihuvilaga Vayawudi kuta Eliya akudiyidita, katsi iyo yavaga ya kumuditila Yesu ng'asi changa'ani
Yesu angumuponetsa mukwamitsi munya lisoka
Matayo 17:14-21; Lukasi 9:37-43
14Yesu hamwe na vadahitswa vala vadatu hovavaga kuwuya kuhuma ku chidunda, vakavawonaje vanu wolofu vavapilime vala vadahitswa vanji, na vadahitsi vamwe va malajitso ga Musa valonganaga nawo. 15Luvala lulo vala vanu wolofu vaveye kumuwona Yesu vakatinukaje ndalahela na vakamubilimilaje kumusamusa. 16Yesu akavaputsaje vadahitswa, “Munsumwana chinu chachi na iva?” 17Munu yumwe kuhuma ha vanu vala akamulonjelaje Yesu, “Mudahitsi, ntsikanguletye mwana vangu ana lisoka lyo lingumudita alemwe kulonga. 18Chila chipindi ho lingumutachila limugwisaga hasi na kumuhumya mifulo kumulomo, na kugwegwetsula mino na kukala ngwaa! Ntsivalonje vadahitswa vako valihetse, valemulwe!” 19Yesu akavalonjelaje, “Henye vanu va chilelo cho chigaya litumbilo! Ngikala na henye mbaka hanili? Nguvafumilila mbaka hanili? Mundetele heni mukwamitsi uyo!” 20Nawo vakamuletelaje yula mukwamitsi, lechelelo lisoka lila lyavaga kumuwona Yesu, likamutovaje chinjilisa mukwamitsi yula na kumugwisa hasi, akagalawukaje hasi na kuhuma mifulo ku mulomo. 21Yesu akamuputsaje dade va mukwamitsi yula, “Mbe, mwanago aveye hino kuhuma hanili?” Akamulonjelaje, “Kuhuma ha wana! 22Mala ntsongofu limutotsaga mu moto awu mu malenga ili limukopole. Lechelelo manyi unvetsa kudita chinu chochive tunsuka utuwonele lusungu na kututanga.” 23Yesu akamulonjelaje, “Kwasawuli yachi unlonga kuta manyi unvetsa! Fyeka fivaga kwa munya litumbilo.” 24Luvala lulo dade va yula mukwamitsi akakolaje kwa kulonga, “Ntsinalyo litumbilo! Lechelelo unanje ntsive na litumbilo likomi!” 25Yesu avaga kuwona vanu wolofu vankong'ana, akaling'anulilaje lisoka lila, “Heve lisoka yo ungumudita mukwamitsi yuno ave na wudibafu na wububwi, umuhume mukwamitsi yuno na uleche kumwinjila kaha!” 26Lisoka lila likakolaje na kumutova chinjilisa, na likamuhumaje mukwamitsi yula. Mukwamitsi akavaje kota afweye, ihyo vanu wolofu vakalongaje kuta, “Afweye!” 27Lechelelo Yesu akamubataje liwoko na kumwinula, nayo akimaje. 28Yesu ho avaga kwinjila mu nyumba, vadahitswa vake hovavaga valiyena vakamuputsaje, “Kwasawuli yachi hetwe tulemulwe kulihetsa lisoka lila?” 29Yesu akavalonjelaje, “Lisoka linya hila silifuluche lihume, lechelelo kwa kulongola kumusuka Mulungu tandi.”
Yesu an'wila kulonga fyo akukopolwa na kutsilipuka
Matayo 17:22-23; Lukasi 9:43-45
30Yesu hamwe na vadahitswa vake vakawukaje hono iho, vakakolelaje ku Galilaya. Yesu siaganaga munu yoyuve atsele kovali, 31kwasawuli avaga avadahitse vadahitswa vake. Avaga avalonje kuta, “Heni Mwana va Munu ngupitukwa na kibatika mu mawoko ga vanu nawo vakung'opola, lechelelo siku ya kadatu kuhuma ng'opolwe, ngutsilipuka.” 32Lechelelo vadahitswa vake sivalutselye lulongwa ulo loalontsile Yesu, na vakavaje na muloto kumuputsa.
Nani yo akuva muvina
Matayo 18:1-5; Lukasi 9:46-48
33Yesu na vadahitswa vake hovavaga kufika ku Kapelinaumu na kwinjila mu nyumba, Yesu akavaputsaje vadahitswa vake, “Chichi cho mwisumanije kung'asi kula?” 34Lechelelo vene vakakatukaje, kwasawuli mung'asi vasumanaga kuta nani yo akuva muvina hagati hetu. 35Yesu akikalisaje hasi, akavachemaje vadahitswa vake kumi na vavili na kuvalonjela, “Manyi munu yoyuve an'gana ave mulongola, an'ganika ave va mwiso na ave mutantsi va veka.” 36Ihyo Yesu akamutegulaje mwana mudodo na kumwimya hagati hawo, akamukumbanitsaje na kuvalonjela, 37“Munu yoyuve yo akumulibulitsa mwana yumwe mudodo kota vana iva kwasawuli yangu, akuva andibulitse heni. Nayo yoyuve yo akundibulitsa heni, akuva amulibulitse Mulungu yo anumile.”
Munu yosinambe tutelane alilikuga na hetwe
Lukasi 9:49-50
38Yohana akamulonjelaje Yesu, “Mudahitsi, tumuwene munu yumwe angujing'anulila misoka kwa Litawa lyako, hetwe tukamulemetsaje kwasawuli mwene siali likuga na hetwe.” 39Lechelelo Yesu akalongaje, “Mulekaje kumulemetsa munu yo an'dita kota ihyo. Kuduhu munu yoyuve yoafuluche adite ndongwa tsinya mitinuso kwa Litawa lyangu, kaha luvala lulo antse kundonga fibi. 40Munu yoyuve yosinambe atelane na hetwe ali lubali lwetu. 41Nachene ntsinguvalonjelani kuta, manyi munu yoyuve avapele chikombe cha malenga ga kung'wa kwasawuli henye mu vanu va Chilisito, nachene munu uyo akwanuchila ngweko kwa Mulungu.”
Finu fyo finkwambutsa munu adite ndongwa ntsibi
Matayo 18:6-9; Lukasi 17:1-2
42Lechelelo manyi munu yoyuve yo akumwambutsa yumwe va vadodo iva adite ndongwa tsibi, yikuva chiba munu uyo vamuwopeletse lwala lukomi musingo yake na kutotswa mu bahali. 43Manyi liwoko lyako likwambutse kudita ndongwa ntsibi, chiba ulidumule. Yikuva chiba heve winjile ku wumi wowugaya wudugo kuno ulihela liwoko limwe, kuliko kuva na mawoko gavili lechelelo ubite ku moto go sigutsimaga. 44Kuko kojili mifuntsa josinambe jilalile na moto, na kaha ugo moto gwene sigutsimikaga. #9:44 Bibiliya ntsinji tsa katali tsilihela misitali jino ja 43 na 44 45Manyi ligulu lyako likwambutse kudita ndongwa ntsibi, chiba ulidumule. Yikuva chiba heve winjile ku wumi wa Mulungu kuno ulihela ligulu limwe, kuliko kuva na magulu gavili lechelelo ubite ku moto go sigutsimikaga. 46Kuko kuna mifuntsa josinambe jilalile na moto, na kaha ugo moto gwene sigutsimikaga. 47Manyi liho lyako likwambutse kudita ndongwa ntsibi, chiba ulikolopole. Yikuva chiba heve winjile ku wumi wo wugaya wudugo kuno ulihela liho limwe, kuliko kuva na miho gavili, lechelelo ubite ku moto go sigutsimikaga. 48Kuko kuna mifuntsa josinambe jilalile na moto, na kaha ugo moto gwene sigutsimikaga. 49Mulungu akumulutitsa chila munu mu ng'odeko, kota hila vanu fyo vabakaga mwino mu nyama kabla ya kuyilalitsa. 50Mwino guvaga munofu hala hogung'acha na lwiha, lechelelo manyi guyatse lwiha lwake gukubadilwa na chinu chachi? Nanye muvaje kota mwino gogunkola, mwelewane henye kwa henye.
Právě zvoleno:
Maliko 9: SBV
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
The New Testament in Sagala Language @The Word for The World International and Sagala Language translation. All rights reserved.