Valumi 5
5
Kuva na wusichimafu na Mulungu
1Kwakuva mwanga tudisilwe vawuya kwa kumutumbila Mulungu, ihyo tunawo wusichimafu na Mulungu kukolela kwa Mutwa vetu Yesu Chilisito. 2Kwa kumutumbila Yesu, Mulungu atupelye wuwuya wake, nambe sambi tungikala mu wuwuya uwo, tunsangalala hilo kwasawuli tuna lihuvilo. Ihyo duve tuna luhuvi lwa kihantsa na Mulungu mu wumelemo wake. 3Si ihyo hela, kaha tun'sangalala na mu ng'odeko kwasawuli tuntsela kuta ng'odeko tsiletaga wukangatso, 4nawo wukangatso wutuditaga tuleche kuva na muloto na uko kuleka kuva na muloto kutuditaga tuve na lihuvilo. 5Lihuvilo ilyo silifuluche litudite tugotsole! Kwakuva Mulungu mwanga avisile wugano wake mu numbula tsetu kukolela kwa Muhe vake yo atupelye.
6Hotwavaga tung'acha tunlemwa kikulusa tuvene, hala luvala holwavaga kukwila Chilisito akafyaje kwasawuli ya hetwe wo tu vanya ndongwa ntsibi. 7Siyo lulongwa lupefu kwa munu kufwa kwasawuli ya munu munya wuwuya, ila munu afuluche ajele kufwa kwasawuli ya munu munofu. 8Lechelelo Mulungu atulaje kuta angutugana, luvala lula ho twavaga tung'acha tuvanya ndongwa ntsibi, Chilisito akafwaje kwasawuli ya hetwe. 9Duve, sambi tudisilwe kuva vawuya halutalo ha Mulungu kwa danda ya Chilisito, ihyo kukolela kwa mwene Chilisito akutukulusa na mbipo ya Mulungu. 10Hala ho twavaga tung'acha tuntelana na Mulungu akatuhetselaje wula wutelani kwa chifo cha Mwanage. Ihyo sambi tupatine na Mulungu na tun'tsela nachene kuta tukukuluswa kwa wumi wake. 11Lechelelo kulutila ifyo fyeka, tuna wusangalo kukolela kwa Mutwa vetu Yesu Chilisito yo atudisile tupatane na Mulungu.
Adamu na Chilisito
12Kukolela kwa munu yumwe ndongwa ntsibi tsikinjilaje mu inyi, natso tsikambutsaje chifo. Ihyo chifo chikatagalilaje kwa vanu veka, kwasawuli vanu veka vadisile ndongwa ntsibi. 13Kwasawuli malajitso ga Musa hogavaga gang'ali kutsa, ndongwa ntsibi mwanga tsavaga kotsili. Nambe ihyo ndongwa ntsibi sitsivalilwaga manyi kuve kuduhu malajitso igo. 14Nambe ihyo, luhuma chipindi cha Adamu mbaka chipindi cha Musa, chifo chikatagalilaje kwa vanu veka, mbaka kwa vanu vala wosi vadisile ndongwa ntsibi kota hila fyo adisile Adamu hala ho alemile kumuhulikitsa Mulungu.
Adamu avaga muhwano gwa Chilisito yo atsitse hambele. 15Lechelelo lulongwa lubi lo aludisile Adamu silufuluche lwihwane na lusungu lwa Mulungu. Nayivaje kwa lulongwa lubi lwa munu yumwe lukambutsaje chifo kwa vanu veka, ho hihyo kwa wuwuya wa munu yumwe yo Yesu Chilisito, Mulungu akalutitsaje lusungu na chifunje chake kwa vanu wolofu. 16Kanji kuna wulekanifu hagati ha chifunje cha Mulungu na lulongwa lubi lwa munu yumwe yo Adamu. Kwasawuli Mulungu akahitsile chila cho adisile munu yumwe, lechelelo kwasawuli ya ndongwa ntsibi tsa vanu wolofu, Mulungu akavapelaje chifunje chake cha kuvadita vanu vave vawuya halutalo hake. 17Wukweli kwa kukolela lulongwa lubi lwa munu yumwe, chifo chikatagalilaje kwa vanu veka kwasawuli ya munu uyo. Lechelelo nachene chinu cho adisile yula munu yumwe Yesu Chilisito chinofu ndalahela, vanu veka wo vankwanuchila lusungu ulo lwa Mulungu na chifunje chake cha kuva vawuya halutalo ha Mulungu, nawo vakutavala mu wumi kukolela kwa munu yumwe yo Yesu Chilisito.
18Enaa, kota hila lulongwa lubi lwa munu yumwe lukaletaje wuhigo wa chifo cha vanu veka, ho hihyo kwa wuwuya wa munu yumwe vanu veka vampata wumi na kidichilwa halutalo ha Mulungu. 19Kaha kota hila kwa munu yumwe fyo alemile kuhulikitsa, vanu wolofu vakaditwaje vanya ndongwa ntsibi. Hohihyo kwa kuhulikitsa kwa munu yumwe, vanu wolofu vakuditwa vave vawuya halutalo ha Mulungu.
20Malajitso ga Musa hogavaga kutsa gakambutsaje ndongwa ntsibi tsive ntsolofu, lechelelo hala ndongwa ntsibi hotsavaga kulutila kuva ntsolofu nalo lusungu lwa Mulungu lukalutilaje ndalahela. 21Kota hila ndongwa ntsibi fyo tsikambutse chifo kwa chila munu, ho hihyo na lusungu lwa Mulungu lun'tavala kwa kuvadita vanu vave vawuya na kuvaletela wumi wugaya wudugo kukolela kwa Chilisito Yesu Mutwa vetu.
Právě zvoleno:
Valumi 5: SBV
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
The New Testament in Sagala Language @The Word for The World International and Sagala Language translation. All rights reserved.