प्रेरित.कामी 12
12
पतरस आला जेहेल तरअः उड़ूंगोः
1हिना बेरा राजा हेरोद कलीसिया रिनकु थोड़ेक होड़ के स-सताव लःअय तीः लगाव लःअय। 2हुनी जोहन आली बोको याकुब के तलवाईर तरअः मांअ गोएःग ची लिकुआय। 3तेकर हुनी नेल लिकुआय, ची जाहुदीकु नोकाने रे खुसोआकु दो, पतरस के होः सःब लिदयाकु। बे-आमचुर लाःड रेनअः परब बेरा नोःआँ बात हुयाव ताही नेना 4#उइठ 12:1–27हुंकू हुनी के सःब केते जेहेल रे लगाव लियाकु, तेकर चाईर-चाईर झन सिपाहीकु रआ चाईर पहरा रे दोहो लियाकु। नोःआँ विचार रे ची पासका परब तरअः तयोम, हुनी के होड़कु मड़ांग रे आ-आगु नाम केनाय। 5जब पतरस जेहेल रे ताही नेनाय, दो कलीसिया हुनी लःअय जीव-जान लगाव केते परमेसर तरअः बिनती केनाकु।
6जब हेरोद हुनी के होड़कु मड़ांग रे आआगुई ताही नेनाय, होना पहिल निदा पतरस बरिया हांथकड़ी रे तोल उनी बरिया सिपाही किन ताला रे निन्दोः केनाय, तेकर प-पहराकु दुवार रे जेहेल रेनअः पहराय केनाकु 7तेकर परभु आली मियांड सिरमादूत हीःग केते तिंगुः नाय, तेकर होना कुड़िया रे मरसल ना। तेकर पतरस आला पंजरा के थपथपाव केते, हुनी के बिरिःड लियाय, तेकर बेता लियाय, “जल्दी बिरिःड-भागोअ मे!” तेकर हेने घड़ीक हुनी आला तीः तरअः हांथकड़ी राड़ा केते नुर ना। 8तब सिरमादूत हुनी के बेता लियाय, “मयांग ताम के तोलेमे तेकर खड़पा सोलोंगेमे।” तेकर हुनी हेंकान लःअय, फिन हुनी के सिरमादूत, “अपन गेन्दरअ सोलोंग केते ईङ तयोम हिजोअ मे” मेन केते बेता लियाय। 9पतरस उडुंग केते हुनी तयोम ओतोङ लियाय, बकिर नोःआँ काय पाड़ी केना ची जे कुछ सिरमादूत ईयाः दाय होना सचे हेके, चाहे ईङ सपना नेल दिंग मेन खेअ समझाअ केनाय। 10हुंकिन पहिल प-पहराकु के तेकर दुसरा प-पहराकु के परोम केते, होना मेड़हेःड रेनअः सिनिङ जगुत सोदोर नकीन, जे सहर पखा इईदी आय। होना हुंकिन लःअय आएंग हारते उघड़ाव ना, हुंकिन बाहरी उडुंग नाकिन तेकर मियांड खिरकी रेगी सेन नेनाकिन तेकर सिरमादूत हुनी के तुरते बाई केते सेनोः नाय।
11तब पतरस के होस हीःग ना, तेकर कंहड़ीः दाय, “नहाअः दो ईङ सचे फहाम किदिंग! ची परभु अपन सिरमादूत कुलगोःड केते ईङ के हेरोद आला कबजा तरअः छोड़ाव लिङाय, तेकर जाहुदी होड़कु आला जामा आसरा के टोटाअ केदाय।”
12जब आएंग अपन दसा बढ़ियाँ से पाड़ी केते, हुनी मरियम ओड़ाअ हीःग नेनाय, जे जोहन आली एंगाते थिनाय, जोहन के मरकुस बेताई केनाकु, होनाःड़े ढेर होड़ जवार केते बिनती केनाकु। 13पतरस बाहरी दुवार के ठोक-ठोकाव लःअय दो रूदे नुमू रिनी मियांड धाँगड़ीन नेनेल लःअय हीःग नेनाय। 14पतरस आला सबद आरखाव केते रिझते दुवार काय उघड़ाव लआ, तेकर पतरस सिनिङ दुबाःड़े एदानिया तिंगु तनाय नोःआँ खभाईर एमोअ लःअय नीर यआते भीतरी हीःग नेनाय। 15हुंकू हुनी के बेता लियाकु, “आम बायाव तनाम एतान!” बकिर हुनी ढिड़ केते, साथेगी मेन केते बेता लिकुआय। तब हुंकू, हुनी आली सिरमादूत ओका हेके हुई मेन केते कंहड़ी लअकु।
16बकिर पतरस ठोक-ठोकाव दिगीआय, जब हुंकू सिनिङ के खोलाव लअकु दो हुनी के नेल केते मोकाव चबाअः नाकु। 17हुनी तीः रे सिड़िग्या ताहिनापे मेन केते बेता लिकुआय, तेकर हुंकू के एता लकान परभु हुनी के जेहेल तरअः बाहरी आगु लियाय के उदूओ लिकुआय। फिन “याकुब तेकर बोकोकु नोःआँ बात रेनअः खभाईर के उदूः कुपे बेता लिकुआय,” तब उडुंग केते, एटाअ एड़े सेनोः नाय।
18निदवाः ना दो सिपाहीकु मुरुक घबराव केते, पतरस आखिर एतान नाय हुई, मेन केते सोंच रे पड़ाव नाकु। 19हेरोद पतरस आला मुरुक जाँच पड़ताल चिलिकुआय, बकिर हुनी आला ओकाःड़े होः पता का चलाव नेना, दो हुनी सनतरी कु के कुली गथा केते, सनतरी कु के गोगोएःग लःअय हुकूम एमा लिकुआय।
तेकर हुनी, जाहुदिया के बाई केते कैसरिया रे सेन केते हिनाःड़े ताहिन एहेःब लःअय।
हेरोद आला गोजोअः
20हेरोद थोड़ेक दिन तरअः सूर तेकर सैदा रिनकु होड़ तरअः मुरुक खिसोअ केनाय, हिना लःअय हुंकू मिजुट केते हेरोदेस आला दरबार के देख-भाली बलासतुस दुबाःड़े हीःग नेनाकु। आउर मनाव-बुझाव लियाकु जेकर से ची हुनी हेरोदेस लोः मेमेल चहाअ केनाकु कु। एता लःअय ची राजा आला राईज तरअः हुंकू के अनाईज आउर जोजमअ जिनीस भेटाअः केना।
21ठहराव लआ दिन हिला हेरोद राजा, राजाकु आला गेन्दरअ सोलोंग केते राईज गद्दी रे दुड़ूः नेनाय, तेकर होड़कु के भासन एमाअ दिकुआय। 22तब होड़कु “नोःआँ दो होड़ आला कोवान परमेसर आला सबद हेके” गुल बिरिःड लअकु। 23हिमीन बेरा-गी परभु आली मियांड सिरमादूत हुनी के तुरते हुमाअ लियाय एता लःअय ची हुनी परमेसर के काय महिमा लिया, आउर हुनी पिलवाव केते गोएःग नाय।
24बकिर परमेसर आला बचन बढ़ाव आउर फैलाव सेन नेना।
25बरनाबस तेकर साऊल अपन सेवा काम पुराव केते जिरोसलेम तरअः अन्ताकिया हीःग नेनाकिन, तेकर आकिन लोः गाती जोहन के जेके मरकुस बेताई केनाकु आगु लियाकिन।
Právě zvoleno:
प्रेरित.कामी 12: ASR
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 NLCI CC BY-NC-ND 4.0