संत.जोहन 18
18
ईसु के ससःब
(संत.मत्ती 26:47–56; संत.मरकुस 14:43–50; संत.लुकास 22:47–53)
1ईसु नोःआँ कंहड़ी केते अपन चेलाकु लोः किदरोन झारी रअः होना पखी सेन नेनाय। होनाःड़े मियांड बाखड़ी ताही नेना, होना रे हुनी आउर चेला ताय सेन नेनाकु। 2हुनी के ससःब चिई जहुदा होः होना ठाँव के पाड़ी केनाय, एता लःअय ची ईसु अपन चेलाकु लोः होनाःड़े सेनोः केनाय। 3हिना लःअय जहुदा, पलटनकु आला मि-खुड़हा आउर बड़े पुरोहित आउर फरीसीकु पखा तरअः कुलगोःड उनकु, आउर बड़े विनती ओड़ाअ रिनकु सिपाहीकु लोः होनाःड़े हीःग सोदोर नाय। हुंकू अपन लोः लालटेन, मुर आउर हांथेयार इदी थिलाअकु।
4ईसु ईङ रे एतान-एतान बिताव कोआ जामा के पाड़ी केते मड़ांग सेन केते “आपे ओके के नाम तनापे?” बेता लिकुआय।
5हुंकू हुनी के कंहड़ी रूवाड़ोः लियाकु “नासरत रिनी ईसु के।”
ईसु हुंकू के बेता लिकुआय “ईङ हिनी हेके।” हुनी के ससःब चिई जहुदा होः हुंकू लोः तिंगु ताही नेनाय। 6जब ईसु हुंकू के “ईङ हिनी हेके” बेता लिकुआय, दो हुंकू ओत रे उतना नुर नाकु।
7ईसु फिन हुंकू के कुली लिकुआय “ओके के नाम दियापे?”
हुंकू बेता लियाकु “नासरत रिनी ईसु के” 8नोःआँ रे ईसु बेता लिकुआय “ईङ आपे के कंहड़ी चुकाव तानिङ ची ईङ हिनी हेके, जदि आपे ईङ के नाम तनापे दो नुकू के सेन चाकुपे।” 9नोःआँ, निआँ लःअय हुयाव नेना ची हुनी आला वचन पुरा हुयाव जुनोः, जे हुनी कंहड़ी थिलाआय, “जे आम ईङ के एमा थिलङाआम हुंकू मेसे मियांड-मिन के होः काईंग आःड लिकुआ।”
10हिमीन बेरा सिमोन पतरस अपन तलवाईर ओर लःअय आउर बड़े पुरोहित आली बंधाउवा रे चलाव केते, हुनी आला जोम लुतूर के मांअ खांड़ा केदाय। हुनी बंधाउवा आला नुमू मलखुस ताही नेना। 11#सं.मत्ती 26:39; सं.मर 14:36; सं.लुका 22:42तब ईसु पतरस के बेता लियाय, “अपन तलवाईर, तलवाईर दोदोहो वाला ठोंघा रे दोहोय मे जे कटोरा आपा ईङ के एमा तदिङाय एतान ईङ होना के एरिङ नुयाँ?”
हन्ना मड़ांग रे ईसु
12तब पलटन, आउर जाहुदीकु आलकु अगुवा, आउर जाहुदीकु आलकु बड़े बिनती ओड़ाअ रिनकु सिपाहीकु ईसु के सःब केते तोल लियाकु, 13आउर हुंकू पहिल हन्ना दुबाःड़े इदी लियाकु, जे कैफस आली होंयहार ताही नेनाय। आउर कैफस होना बरीस रिनी बड़े पुरोहितकु आली महापुरोहित ताही नेनाय। 14#सं.जोह 11:49,50नुई हिनी कैफस ताही नेनाय, जे जाहुदी होड़कु के नोःआँ बढ़ियाँ एदनाआ ची जामेकु लःअय मियांड ठुका मनवा गोजोय मेन केते सलाह एमा थिलकुआय।
पतरस आला काईंग पाड़ीआ मेन
(संत.मत्ती 26:69,70; संत.मरकुस 14:66–68; संत.लुकास 22:55–57)
15सिमोन पतरस आउर एटाअ चेला ईसु तयोम-तयोम सेन नेनाकिन। नुई चेला बड़े पुरोहित आली जान-चिनहार थिनाय हिना लःअय हुनी ईसु लोः बड़े पुरोहित आला राच रे सेन नेनाय। 16बकिर पतरस बाहरी दुवार दुबाःड़े तिंगु थिनाय। हिमीन रे हुनी एटाअ चेला जे बड़े पुरोहित आली जान-चिनहार थिनाय फिन बाहरी उडुंग केते, आउर ओड़ाअ होरहोई लाईं तरअः कंहड़ी केते पतरस के भीतरी आगु लियाय। 17हुनी धाँगड़ीन जे ओड़ाअ होरहोई लाईं थिनाय, पतरस के बेता लियाय “आम ओका होः दो हुनी आली चेला नलागे?” हुनी बेता लियाय “ईङ नलागे” 18ठांड़ रअः चलते बंधाउवा आउर सिपाहीकु सेंगेल जुल केते जिरोगोअ केनाकु पतरस होः तिंगु केते हुंकू लोः सेंगेल जिरोगोअ केनाय।
ईसु बड़े पुरोहित दुबाःड़े
(संत.मत्ती 26:69,70; संत.मरकुस 14:66–68; संत.लुकास 22:55–57)
19बड़े पुरोहित ईसु के हुनी आलकु चेला आउर उपदेस रअः बारे कुली-गथा लिकुआय। 20ईसु हुनी के कंहड़ी रूवाड़ोः लियाय “ईङ दुनिया तरअः खुलाम-खुला बात लाईङ, ईङ बड़े बिनती ओड़ाअ आउर बड़े बिनती ओड़ाअ रे जे एड़े जामा जाहुदीकु जवारोआकु, जामा बेरा उपदेस एमा लिकुईंग, आउर सिड़िःग-सिड़िःग एतान होः काईंग कंहड़ी तदा। 21नोःआँ ईङ के एतान लःअय कुलीअ दिङाम, उपदेस आ-आयुमकु के कुली कुमे, हुंकू पड़ीआकु ईङ एतान कंहड़ी तदिङ सेके।” 22जब हुनी नोकान कंहड़ी लःअय दो बड़े विनती ओड़ाअ रिनकु सिपाही मेसे जे हिनाःड़े तिंगु थिनाय, ईसु के चाटकांड़ केते बेता लियाय “एतान आम बड़े पुरोहित के नोकान जबाप एमाई-याम?” 23ईसु हुनी के कंहड़ी रूवाड़ोः लियाय “जदि ईङ गलती कंहड़ी लाईङ दो होना गलती रअः गोवाही एम मे, आउर जदि ईङ ठीक कंहड़ी तदिङ दो आम ईङ के एतान लःअय चटकाड़ीङाम?” 24कैफस नोःआँ तयोम हन्ना तोल उनी ईसु के बड़े पुरोहितकु आली बड़े पुरोहित कैफस दुबाःड़े कुलगोःड लियाय।
पतरस आला फिन काईंग पाड़ीआ मेन
(संत.मत्ती 26:71–75; संत.मरकुस 14:69–72; संत.लुकास 22:58–62)
25जब सिमोन पतरस तिंगु केते सेंगेल सेकाअ केनाय दो हुंकू हुनी के कुली लियाकु, “एतान आम होः हुनी आलकु चेला मेसे हेके?” हुनी “ईङ नलागे” बेता लिकुआय।
26बड़े पुरोहित आली मियांड बंधाउवा थिनाय। हुनी, जेकर लुतूर के पतरस मांअ खांड़ा थिलाआय जे हुनी आली गुतिया ताहिनाय, हुनी बेता लियाय “एतान आम के हुनी लोः बाखड़ी रे काईंग नेल थिलमेआ?” 27पतरस फिन “काईंग पाड़ीआ” मेन लःअय आउर हिमने रेगी सीम राअः केदाय।
पिलातुस मड़ांग रे ईसु
(संत.मत्ती 27:1,2,11–14; संत.मरकुस 15:1–5; संत.लुकास 23:1–5)
28तब हुंकू ईसु के कैफस दुबाःड़े तरअः राजपाल हाकिम आला बंगला ओड़ाअ इदी लियाकु निदवा बेरा ताही नेना। हिना लःअय बंगला भीतीर काकु बोलो नेना जेकर से आलकु असुध कोअ बकिर पासका रअः भोज के जोम दड़ीकु। 29तब पिलातुस बाहरी हीःग केते भेंट नेनाय आउर बेता लिकुआय “आपे नुई होड़ रे एतान दोस लगाव दापे” 30हुंकू हुनी के बेता लियाकु, “जदि नुई बुराई काम ककामी वाला एरे ताही कोआ रेदो, आले हुनी के आम तीः रे ऐरले जिमाओ केमेआ” 31पिलातुस हुंकू के बेता लिकुआय “आपे-गी नुई के इदी केते अपन कनहुन रअः मोताबिक हुनी आला फैसलाय पे।” जाहुदीकु हुनी के बेता लियाकु “आले के जाहें आला जीव ईइदी रअः हुकूम कनोआँ।” 32#सं.जोह 3:14; 12:32नोःआँ निआँ लःअय हुयाव नेना ची ईसु आला होना कंहड़ी पुरा जुनोः, जे हुनी नोःआँ पता एम केते कंहड़ी थिलाआय ची आएंग आला मराईन एता लकान हुयाव कोआ।
33तब पिलातुस बंगला रे भीतरी बोलो केते ईसु के रा-राअः कुलगोःड लिकुआय, आउर हुनी के कुली लियाय “आम जाहुदीकु आली राजा हेके एतान?” 34ईसु कंहड़ी रूवाड़ोः लियाय “एतान आम नोःआँ अपन पखा तरअः कंहड़ीः दाम चाहे एटाअ होड़कु आम के ईङ बारे नोःआँ कंहड़ी तदाकु?” 35पिलातुस कंहड़ी रूवाड़ोः लियाय “एतान ईङ जाहुदी हेके? आम आलकु जाईत गी आउर महापुरोहितकु आम के ईङ आला तीः रे जिमाओ तदिङाकु। आम एतान तदाम?” 36ईसु कंहड़ी रूवाड़ोः लियाय “ईङ आला राईज नोःआँ दुनिया रेनअः नलागे। जदि ईङ आला राईज नोःआँ दुनिया रेनअः ताहिकोआ रेदो ईङ आलकु से-सेवा कु लड़ाव कोआकु आउर ईङ जाहुदीकु आला तीः रे इरिंग सोंपाव कोआ, बकिर ईङ आला राईज नोआँड़े रअः नलागे।” 37नोःआँ रे पिलातुस हुनी के बेता लियाय “दो आम राजा हेके?” ईसु कंहड़ी रूवाड़ोः लियाय “आम गी कंहड़ीः दाम ईङ राजा हेके। ईङ निआँ लःअय जनमाव निनिंग आउर निआँ लःअय दुनिया रे हीःग तानिङ ची सचाई रेनअः गोवाही एमा कुईंग। जे होः सचाई रिनकु हेके हुंकू ईङ आला आयुमेआकु।” 38पिलातुस हुनी के बेता लियाय “सचाई एतान हेके?”
ईसु के मराईन डांड़
(संत.मत्ती 27:15–31; संत.मरकुस 15:6–20; संत.लुकास 23:13–25)
हुनी नोःआँ कंहड़ी केते फिन बाहरी सेन नेनाय, आउर जाहुदीकु दुबाःड़े सेन केते बेता लिकुआय “ईङ दो हुनी रे एतान दोस होः काईंग नामेआ। 39बकिर आपे लःअय पासका परब रअः मोका रे मियांड कैदी के बाबाई रअः दसतुर एदनाआ। एतान आपे चहाअ तनापे ची ईङ जाहुदीकु आली राजा के बाई गुल ताईंग?” 40नोःआँ रे गुल बिरिःड लअकु “नुई के कोवान, बकिर बराबस के बाई में” बराब्बस मियांड डाकु थिनाय।
Právě zvoleno:
संत.जोहन 18: ASR
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 NLCI CC BY-NC-ND 4.0