संत.जोहन 6
6
पाँच हजार हेरेल के खिखियाव
(संत.मत्ती 14:13–21; संत.मरकुस 6:30–44; संत.लुकास 9:10–17)
1नोःआँ तयोम ईसु गलील रेनअः डाहा होना पखा सेन नेनाय, जेके तिबेरियस डाहा होः कंहड़ी याकु। 2तेकर मियांड बड़े तुन्दरा होड़ हुनी तयोम ओतोङ लियाकु, एता लःअय ची चिनहा-छकरीत काम के नेल थिलाअकु जे बेमराहाकु लःअय कामी केनाय। 3ईसु टुंगरी रे रकाःब नेनाय आउर होनाःड़े चेला ताय लोः दुड़ूः नाय। 4जाहुदीकु आला पासका परब हेनाःड ताही नेना। 5ईसु अपन बोहोअ बिरिःड लःअय दो मियांड बड़े तुन्दरा होड़ के अपन पखा हिजोअ नेल लिकुआय, हुनी फिलिप्पुस के बेता लियाय “आबु नुकू के खिखियाव लःअय ओका तरअः लाःड किरिङेआबु?” 6हुनी नोःआँ बात फिलिपुस के प-परीकछा लःअय कंहड़ी लःअय, हुनी दो ईङ एतानीईङ के पाड़ी केनाय गी। 7फिलिप्पुस हुनी के कंहड़ी रूवाड़ोअ लियाय “बार साय चाँदी ठर्ड़रा#6:7 बार साय चाँदी ठर्ड़रा मियांड चाँदी ठर्ड़रा मुसिङ दिन भाईर रअः बनहींयारी ताही नेना। रअः लाःड होः हुंकू के कटी-कटी जामे के खिखियाव लःअय एरे पुराआ।” 8हुनी आलकु चेला मेसे मियांड सिमोन पतरस आली बोकोते अंध्रियस हुनी के बेता लियाय। 9“नोआँड़े मियांड कोड़ा एड़े जाव रअः पाँच गोड़ ला:ड आउर बरिया हाकु एदान किना, बकिर नुमिन होड़ लःअय एतान हुयाव कोआ?” 10ईसु बेता लिकुआय “होड़कु के दुड़ूः गुलताकुपे” होना ठाँव रे मुरुक बीर ताहिना। हुंकू होड़ दुड़ूः नाकु। हुंकू मेसे हेरेलकु आला गनती पाँच हजार लकान ताहिना। 11ईसु ला:ड इदी लःअय आउर धन्यवाद रअः बिनती केते दुड़ूः उनकु रे हुंकू आला मन मोताबिक हाटिङ ची लिकुआय, आउर हिना लकान हाकु के होः हाटिङ ची लिकुआय। 12जब होड़कु जोम केते बीअ नाकु, दो हुनी चेला ताय के बेता लिकुआय “सरेःग ओना खांड़ा के हालाङेपे जेकर से आलु सिथिया कोओ।” 13हिना लःअय चेला ताय हालांग लअकु आउर जाव रअः पाँच गोड़ ला:ड रेनअः खांड़ा तरअः जे जोम केते बंचाव थिना, बारह दाऊड़ा पेरे:ग लअकु। 14तब नोःआँ चिनहा-छकरीत काम होना के हुंकू होड़ नेल केते कंहड़ीः दाकु “सथेगी नुई आगमजानी हेके, जे दुनिया रे हिजोई थिनाय।”
15ईसु नोःआँ पाड़ी केते ची हुंकू ईङ के राजा बा-बनाव लःअय सस:ब नामाकु, हुनी फिन टुंगरी रे एकले सेनोः नाय।
ईसु डाहा रे डिडोगाय
(संत.मत्ती 14:22–33; संत.मरकुस 6:45–52)
16जब आयुःब ना दो हुनी आलकु चेला ताय डाहा दौंड़ी हीःग नेनाकु। 17हुंकू डोंगा रे रकाःब केते कफरनहुम पखा डाहा परोमोअ केनाकु निदा हुयाव चुकाव थिना आउर ईसु हुमिन जगुत हुंकू दुबाःड़े काय हीःग थिना। 18गर्ड़रा रअः चलते डाहा रे हलका मुरुक जोड़ बिरिडोअ केना। 19बार कोस लकान चचलाव तयोम, ईसु के समुदर रे दंड़ान तेकर डोंगा पखा हेनाःड हिजोअ नेल लियाकु, आउर बोरोअ नाकु। 20बकिर ईसु बेता लिकुआय “ईङ हेके आलपे बोर” 21हुंकू ईसु के रिझ रअः मारे डोंगा रे रका:ब लियाकु आउर डोंगा, जे ठाँव रे सेनोः नाम केनाकु होना ठाँव रे सेन सोदोर ना।
होड़कु रअः ईसु के ददांड़ा
22दोसरा हिला हुंकू तुन्दरा होड़ जे डाहा होना पखा ताही नेनाकु, हुंकू मियांड ठुका डोंगा ताही नेना होना के नेल थिलाअकु, आउर ईसु अपन चेलाकु लोः होना डोंगा रे काय रका:ब थिना, हुनी आलकु चेला ताय एकला सेन थिनाकु। 23तब एटाअ डोंगा तिबेरियस तरअः होना ठाँव हेनाःड हीःग नेना, जे एड़े परभु आला धन्यवाद रअः बिनती तयोम होड़कु ला:ड जोम थिलाआकु। 24तुन्दरा होड़ नेल लअकु ची नोआँड़े ईसु एदानिया आउर ना चेला, हिना लःअय हुंकू होः डोंगा रे रकाःब केते ईसु के दांड़ा यअते कफरनहुम सोदोर नेनाकु।
ईसु जिनगी रिनी ला:ड
25हुंकू डाहा के परोम लअकु आउर ईसु के होनाःड़े नाम केते हुनी के बेता लियाकु, “गुरू आम उकिन बेरा नोआँड़े हीःग नेनाम?” 26ईसु हुंकू के बेता लिकुआय “ईङ आपे के सचे कंहड़ीओ दिपीईंग, आपे ईङ के चिनहा-छकरीत काम नेल थिलाआपे हिना लःअय कापे नाम दीङा, बकिर निआँ लःअय ची आपे ला:ड जोम केते बीअ थिनापे। 27नसोअ घोटो लःअय कोवान बकिर होना घोटो लःअय मेहनाईतेपे, जे का-अन्तोः जिनगी जगुत बनाल ताहिनोआ, जेके मनवा होपोन आपे के एम केआय, एता लःअय ची बाबा परमेसर अपन मरका हिनी रे लगाव तदाय।” 28होड़कु हुनी के बेता लियाकु “परमेसर आला काम के का-कामी लःअय आले एताने आले।” 29ईसु हुंकू के कंहड़ी रूवाड़ोअ लिकुआय “परमेसर आला काम नोःआँ हेके ची आपे हुनी रे जेके हुनी कुलगोःड तदियाय बिसवासेपे।” 30होड़कु हुनी के बेता लियाकु “आम आले के एतान चिनहा देखाव दाड़ीआम, जेकर से नेल केते आले आम रे बिसवासे-आले आम एतान काम देखाव केआम? 31#उइठ 16:4,15; सिरिंग 78:24आले आलकु पुरखाकु बुरु रे मना जोम लअकु, जे लकान लिखा लअः एदनाआ, हुनी हुंकू के जोजोम लःअय सिरमा तरअः ला:ड एमा लिकुआय।”
32ईसु हुंकू के बेता लिकुआय, “ईङ आपे के सचे-सचे कंहड़ीओ दिपीईंग, हुनी मुसा काय थिना जे आपे के जोजोम लःअय सिरमा तरअः लाःड एमा थिलेपेआय, बकिर बाबातिङ एदानिया जे आपे के सिरमा रेनअः साथे ला:ड एमेआय।
33“एता लःअय ची परमेसर आला ला:ड दो होना हेके जे सिरमा तरअः अड़गु केते दुनिया के जिनगी एमेआय।”
34होड़कु ईसु के बेता लियाकु “हे परभु” “आम आले के जामा बेरा हिना ला:ड एमा लेमे।”
35ईसु हुंकू के बेता लिकुआय “जिनगी रेनअः ला:ड ईङ हेके। जे ईङ दुबाःड़े हिजोआय, हुनी ओका हिला होः एरे रांगेगोआ, आउर जे ईङ तेंग रे बिसवासेआय हुनी कहियो ऐरे तेताङोआ। 36सेरे होः जे लकान ईङ आपे के बेता ताही लेपेईंग, ईङ के नेल केते होः कापे बिसवासेआ। 37जेके आपा ईङ के जिमाऊयङाय, हुंकू जामा ईङ दुबाःड़े हिजोआकु, आउर जे ईङ दुबाःड़े हिजोआय हुनी के ईङ ओका हिला होः इरिंग उड़ूंगिया। 38एता लःअय ची ईङ अपन मरजी कोवान, बकिर जे ईङ के कुलगोःड तदिङाय, हुनी आला मरजी पुपुरा लःअय सिरमा तरअः अड़गु तानिङ। 39जे ईङ के कुलगोःड तदिङाय हुनी आला मरजी नोःआँ हेके, ची जेके हुनी ईङ के जिमाओ तदिङाय, ईङ हुंकू मेसे मियांड-मिन के होः आलुईंग नास चिकुईंग, बकिर हुंकू जामा के आखरी हिला फिन जिवीःड कुईंग। 40एता लःअय ची बाबा तिंग आला मरजी नोःआँ हेके, ची जे होः होपोन के चिनहा केते हुनी रे बिसवासेआय, हुनी के का-अन्तोः जिनगी भेटाआ। ईङ हुनी के आखरी हिला फिन जिवीःड-बिरिःड कियीङ।”
41“जे सिरमा तरअः अड़गु ओना होना ला:ड ईङ हेके” मेन केते ईसु कंहड़ी थिलाआय, हिना लःअय जाहुदीकु हुनी के कुड़कुड़ाअ केनाकु 42तेकर हुंकू कंहड़ी लअकु “नुई जोसेफ आली होपोन ईसु नलागे एतान जेकर एंगा-आपा के आबु पड़ीआबु? दो हुनी ईङ सिरमा तरअः अड़गु तानिङ एता लकान कंहड़ी सकायाय।” 43ईसु हुंकू के कंहड़ी रूवाड़ोअ लिकुआय “आपे-आपे आलपे कुड़कुड़ाअ। 44जाहें ईङ दुबाःड़े तब तक ईरकु हीःग दड़ीआ, जब तक ची बाबा जे ईङ के कुलगोःड तदिङाय हुंकू के आलुई ओरकु, आउर ईङ हुंकू के आखरी हिला जिवीःड बिरिःड किकुईंग। 45#जसा 54:13आगमजानीकु लिखा तदाकु, परमेसर हुंकू जामा के सिखाव किकुआय, जे परमेसर आला सिकछा आयुमेआय आउर हुनी तरअः सिखाआय हुनी ईङ दुबाःड़े हिजोआय। 46जाहें आपा के नेल तदियाय नोःआँ आलपे सोंचाय, जे परमेसर पखा तरअः हीःग तनाय, हिनी गी आपा के नेल तदिङाय।
47“ईङ आपे के सचे बेताः दिपीईंग ची, जे बिसवासेआय, का-अन्तोः जिनगी हिनी आला हेके। 48जिनगी रेनअः ला:ड ईङ हेके। 49आपे आलकु पुरखाकु बुरु रे मना जोम लअकु, सेरे होः हुंकू गोएःग नाकु। 50सिरमा तरअः अड़गु ओना लाःड नोकाना ची जदि जाहें जोमेआय दो हुनी एरे गोजोआ। 51जिनगी रेनअः ला:ड जे सिरमा तरअः अड़गु ओना ईङ हेके। जदि जाहें नोःआँ ला:ड के जोमेआय, दो जुग-जुग जिवीःड ताही कोआय। आउर होना ला:ड जेके ईङ एमेईंग होना ईङ आला सिकार हेके, निआँ तरअः दुनिया जिवीःड ताही कोआ।”
52नोःआँ चलते जाहुदी आकु-आकु रेना-टेटायोअ तानाकु “नुई होड़ एता लकान अपन सिकार जोजोम लःअय एम सकायाय?” 53हिना लःअय ईसु हुंकू के बेता लिकुआय “ईङ आपे के सचे कंहड़ीओ-दिपीईंग ची जदि आपे मनवा होपोन आला सिकार एरपे जोमेआ, आउर हुनी आला मयोम एरपे नुयाँ, आपे रे जिनगी कनोआँ। 54जे ईङ आला सिकार जोमेआय आउर ईङ आला मयोम नुङाय, का-अन्तोः जिनगी हिनी आला हेके, आउर ईङ आखरी हिला फिन जिवीःड कियीङ। 55एता लःअय ची ईङ आला सिकार सचे जोजोम वाला जिनीस हेके, आउर ईङ आला मयोम सचे नुनू वाला हेके। 56जे ईङ आला सिकार जोमेआय आउर ईङ आला मयोम नुङाय, हुनी ईङ रे डेरायाय आउर ईङ हुनी रे डेरायीङ। 57जे लकान जिवीःड आपा ईङ के कुलगोःड लिङाय आउर ईङ आपा रअः चलते जिवीडींग, हिना लकान जे ईङ के जोमीङाय ईङ चलते जिवीःड ताही कोआय। 58निआँ होना लाःड हेके जे सिरमा तरअः अड़गु ताना, नोःआँ होना ला:ड लकान नलागे जेके आपे आलकु पुरखाकु जोम थिलाअकु, हुंकू दो गोएःग नाकु, बकिर जे नोःआँ ला:ड जोम एका केआय, हुनी जुग-जुग जगुत जिवीःड ताही कोआय।”
59नोःआँ जामा बात ईसु कफरनहुम रेनअः मियांड बिनती ओड़ाअ रे उपदेस एमोअ बेरा कंहड़ी लःअय।
का-अन्तोः जिनगी रेनअः वचन
60हुनी आलकु ढेर चेलाकु नोकान आयुम लअकु तेकर कंहड़ी लअकु। “नोःआँ दो कठोर बात हेके, नोःआँ के ओके मनाव दाड़ी कोआय।” 61नोःआँ पाड़ी केते ची चेला तिंग कुड़कुड़ाअ तानाकु, ईसु हुंकू के कुली लिकुआय “नोःआँ बात रे आपे के ठोकोर आदायोः ताना एतान? 62जदि आपे मनवा होपोन के जे एड़े पहिल ताही नेनाय, होनाःड़े तेंग सेनोः नेलीयापे, दो एतान कोआ? 63आतमा गी जिनगी एमेआय, होड़ो तरअः एतान फयदा होः का हुयाआ। ईङ आपे के जे बचन एम तदिङ, होना आतमा आउर जिनगी हेके। 64सेरे होः आपे मेसे ढेर होड़ काकु बिसवासेआ।” ईसु दो पहिल तरअः गी ओके-ओके काकु बिसवासेआ, आउर ओके ईङ के सःब चि किङाय सेके पाड़ी केनाय। 65ईसु बेता लिकुआय हिना लःअय ईङ आपे के नोःआँ कंहड़ी लाईङ ची “जाहें ईङ दुबाःड़े तब तक एरे हिजोअ दड़ीआ, जब तक हुनी के आपा तरअः नोःआँ बराकाईत आलुई एमाई।”
पतरस आला बिसवास
66नोःआँ तयोम ढेर चेलाकु आलगेअ नाकु, आउर हुंकू कहियो हुनी लोः काकु सेन नेना।
67हिना लःअय ईसु बारहों के बेता लिकुआय, “एतान आपे होः सेनोः जुनोः चहाअ तनापे?”
68 #
सं.मत्ती 16:16; सं.मर 8:29; सं.लुका 9:20 सिमोन पतरस हुनी के कंहड़ी रूवाड़ोअ लियाय “हे परभु आले ओके दुबाःड़े सेनाले? का-अन्तोः रेनअः जिनगी दो आम दुबाःड़े एदनाआ 69आले बिसवासेआले आउर आम गी परमेसर आली पबितर होड़ हेके सेके पाड़ी केदाले।”
70ईसु हुंकू के बेता लिकुआय “ईङ आपे बारहों के काईंग निबाड़ ताडपेआ एतान? सेरे होः आपे मेसे मियांड सैतान एदानिया”, 71नोःआँ हुनी सिमोन इसकारयोती आली होपोन जहुदा रअः बारे कंहड़ी थिलाआय, एता लःअय ची हिनी जे हुनी के सा:ब चिई वाला ताही नेनाय। आउर हुनी बारहों झन मेसे ताही नेनाय।
Právě zvoleno:
संत.जोहन 6: ASR
Zvýraznění
Sdílet
Porovnat
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2023 NLCI CC BY-NC-ND 4.0