LUK 17
17
येशुनदी रव्वा वचनलु मत्त
मत्तय 18:6-7; मार्क 9:42
1मंग येशुड वान शिष्यलान आन्या, “मंदी पापलु शेशार इल्लोनी माटलु आय्यीच, पण यवार इचांग आय आय्यी, वानदी यंता दुर्दशा आय्यी! 2यवाड इ शिन्नावोरलोन वगान पाप शेशेदेंक आंचताड, वान गोंतुला इसरायदी फेद्दा राय कट्टी वान समुद्रला येशेद इदी वान इचांग शिंगार उंडाद. 3नु स्वतान सांभाळी! जर नी तम्मुड पाप शेस्ताड, तर वान बेद्री, इंगा जर वाड पश्चात्ताप शेस्ताड तर वान क्षमा शेय. 4जर वाड फगुलाला योड तुकुल नी विरुद्धला पाप शेस्ताड इंगा योड तुकुल पण नी तीकुड वच्ची, निन्नु आनी की नाक पश्चात्ताप आयनाद, तर वान क्षमा शेय.”
5मंग प्रेषितलु प्रभु येशुन आनीर, “माद विश्वास वाढायमत.” 6प्रभु येशुड आन्या, “मी लोना जर मोहरी दाना इंता विश्वास उंटे, तर इ फत्ती शट्टुन, नु मुळ्ळा सकट फिकीगास समुद्रला आंट,' इल्ला मीर आनीन नग्रेम आदी मिद इनी.
7 मी दिंटल्योन्केल यवाड इल्ला उंडाड की, यवान नोकर नांगरास्ताड लेकाते मेंढऱ्याल साकताड, इंगा वाड यप्पुड शेल्लोन्केल वच्ची, तर वान आनी, ‘लग्गान वच्ची रोट्या तिनेदेंक कुसुन.’ 8उलटा 'ना इचांग सदरी फेट, ‘नाद तिनेद तागेद आय्यी नंताक नडमुल कटकेन नाद सेवा शेय, इंगा मंग नु तिन इंगा ताग,’ इल्ला वाड वान आनाक फोई येम? 9मीर शप्पीनेय फनुल नोकर शेशा आंका मीर वानकी धन्यवाद इस्तार येम? 10इल्ले मीर पण, मिक शप्पीनेय आन्नी फनुल शेशीनेंका मिम निरुपयोगी नोकरलु उंडाम, मिम माद कर्तव्य पुर्ण शेस्तीम, इल्ला आनना.”
फदी कुष्ठरोग्याल
11येशुड यरुशलेम शहर तीकुड फोयेताप्पुड, शोमरोन इंगा गालील प्रांतलोन सीमा लोन्केल फोयतुन्या. 12वाड वगा उळ्योंग फोयेताप्पुड वानकी कुष्ठरोग आयनोर फदी मन्सुल भेटाशीर#लेवी 13:46. 13इंगा कीरलीगास आनीर “हे येशु, हे प्रभु, मा मिंदा दया शेय.” 14यप्पुड येशुड कुष्ठरोग्यालनी सुशा, आप्पुड वाड वारनी आन्या, “फोंडा इंगा स्वतान याजककी सुपना.” मंग इल्ला आय्या की, वार फोयेताप्पुडे शुद्ध आय फोईर.#लेवी 14:2-3. 15वार दिंटल्योन्टोड वगाड सुशा की मनाम बागा आयनाम, इल्ला सुशी वाड बेग्गे कीरलुकेन परमेश्वरदी गौरव शेस्केन वापस वच्या. 16वाड येशुन काळा देगार किंदा बोरकाला फड्या इंगा वानी काळ मोक्या. वाड वगा शोमरोनी मनशी उंड्या. 17येशुड वान आन्या, “फदी मंदी शुद्ध आयतीर गरा? बाकीचे नऊ मंदी यंदु उंडार?” 18इ अनोळखी मनशीन इडशी इंगा यवारुच परमेश्वरदी गौरव शेशेदेंक वापस दालेद येम? 19येशुड वान आन्या, “लेय, फो, नीद विश्वास निन्नु बागा शेशीनाद.”
परमेश्वर राज्यद आगमन
20परुशी मंदी येशुन आडगीर, परमेश्वरदी राज्य यप्पुड वच्ची, येशुड वारकी उत्तर इच्या, “परमेश्वरदी राज्य कमशेद स्वरुपला दाद. 21सुडना, आदी इंदु उंडाद लेकाते आंदु उंडाद! इल्ला मंदी आनाक फोयार, येनटीक की परमेश्वरदी राज्य मी नडमा उंडाद.”
22मुंदारकी वाड शिष्यलान आन्या, “इल्लोनी दिनमुल वच्चेय उंडाय की, मनशी कोडकु दिनमुला लोन्केल वगा दिनमु सुशेद मिद इच्छा आय्यी, पण आदी दिनमु मिक कमसाक फोई. 23मंदी मिमलान आन्यार, ‘सुड, वाड आंदु उंडाड सुड, वाड इंदु उंडाड.’ तर आप्पुड मीर नन्नु सुशेदेंक वार यंका फोकुंडा. 24येनटीक की यल्ला विज मोडामला वगा कोपऱ्याकेल इंगोगो कोपऱ्या नंताक चमकास्ताद, आल्ले मनशी कोडकु पण वान दिनमुला वच्ची. 25पण पहिला वाड दुख भोगाशी इंगा इदी पिढी वान नाकारीच्ची, इदी आय्यीच. 26यल्ला नोहान दिनमुलाला आय्या, आल्ले मनशी कोडकु दिनमुलाला पण आय्यी.#इब्री 4:7; मत्तय 24:37-39; उत्पत्ती 6:5-12. 27नोहाड जहाजलोंग फोया इंगा जलप्रलय वच्ची आंदारदी नाश शेशा. आ दिनमु नंताक मंदी तिनदुर, तागदुर, फेंडली शेस्कुंदुर इंगा फेंडली शेशी इद्दुर. 28इंगा यल्ला लोट दिनमुलाला आयन्या, आल्ले आय्यी, आंटे आ मंदी तिनदुर, तागदुर, कोन्केन तिस्कुंदुर. आम्मुदुर. लागवड शेयदुर. इंडलु कटदुर. 29पण यबद लोट सदोम इडशी बैटीक यल्या आबदे ‘मोडामलेल आग्गी इंगा गंधकदी वाना फडी आंदारदी’ नाश आय फो.#उत्पत्ती 19:24; योहान 1:7; २पेत्र 2:6. 30मनशी कोडकु वच्ची, आबद पण इल्ले आय्यी 31आबद यवाड इल्लु मिंदा उंडी, वाड वानदी सामान येकेन फोयेदेंक किंदीक इंटल्योंग फोवाराद. आल्ले यवाड शेल्ला उंडी वाड वानदी सामान येकेन वच्चेदेंक इल्लुक फोयेदेंक वापस यल्लाराद. 32लोट वडतीद ध्यानाम शेयना.#उत्पत्ती 19:17,26. 33यवाड स्वताद जेम वाचाय मतेदेंक सुशी, वाड वानदी जेम गमाय मतकुनी इंगा यवाड स्वताद जेम गमायमती, वाड स्वताद जेम वाचायमती. 34निन मिक शपतान, आ मोब्बुला वगा मंचाम मिंदा इद्दार उंड्यार, दांटल्योन्केल वगान तिस्कुनेदेंक वच्ची इंगा वगान आंदे फेट्टेदेंक वच्ची. 35इद्दार आंड्योर कुडी इसुर तुन्याला, वगादान तिस्कुनेदेंक वच्ची इंगा वगादान आंदे फेट्टेदेंक वच्ची. 36शेल्ला इद्दार मन्सुल उंड्यार, वगान तिस्कुनेदेंक वच्ची इंगा इंगोगोन फेट्टेदेंक वच्ची.” 37शिष्यल वान आडगीर, हे प्रभु, इदी यंदु आय्यी? येशुड उत्तर इच्या, “यंदु फिनग्याल उंडाय, आंदु गेद्दाल जमा आय्यी.”
Právě zvoleno:
LUK 17: WNT
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas