لُوقا 12
12
الكلام البُخُصّ النِفاق
1وَ عَدَدْ النَّاسْ الْجَايِينْ لِعِيسَى زَادْ بِلْحَيْن وَ بِقَوْا عَشَرَاتْ الْآلَافْ لَحَدِّي قَاعِدِينْ يِلْعَاصَرَوْا. وَ عِيسَى حَجَّى لِتَلَامِيذَهْ أَوَّلْ وَ قَالْ: «أَنْقَرْعُوا مِنْ تَوَّارَةْ الْفَرِيزِيِّينْ أَشَانْ مَا تَبْقَوْا مِثِلْهُمْ. النِّفَاقْ قَاعِدْ فَوْقهُمْ مِثِلْ التَّوَّارَةْ قَاعِدَةْ فِي الْخُبْزَةْ. 2وَ مَا فِي شَيّءْ مُلَبَّدْ الْبَعَدَيْن مَا يِنْكَشِفْ وَ مَا فِي سِرّ الْبَعَدَيْن مَا يِنْعَرِفْ. 3أَشَانْ دَا، أَيِّ كَلَامْ الْقُلْتُوهْ فِي اللَّيْل، يِنْسَمِعْ فِي النَّهَارْ. وَ الْكَلَامْ الْحَجَّيْتُوهْ بِعَشِيرْ دَاخَلْ فِي الْبَيْت، يِبَلُّغُوهْ بَرَّا فِي الشَّوَارِعْ.
4«يَا رُفْقَانِي، نِأَوْرِيكُو مَا تَخَافَوْا مِنْ النَّاسْ الْيَقْدَرَوْا يَكْتُلُوكُو وَ لَاكِنْ مَا يَقْدَرَوْا يِسَوُّوا لَيْكُو زِيَادَةْ مِنْ دَا. 5نِأَوْرِيكُو يَاتُو الْوَاجِبْ تَخَافَوْا مِنَّهْ. أَخَافَوْا مِنْ اللّٰهْ. هُو يَقْدَرْ يَكْتُلْكُو وَ بَتَّانْ عِنْدَهْ قُدْرَةْ أَشَانْ يَرْمِيكُو فِي جَهَنَّمْ. أَيْوَى، هُو بَسْ الْوَاجِبْ تَخَافَوْا مِنَّهْ.
6«تَعَرْفُوا كَدَرْ يِبِيعُوا خَمْسَةْ طُيُورْ دُقَاقْ بِرِيَالَيْن. وَ لَاكِنْ نُقُولْ لَيْكُو كَدَرْ اللّٰهْ مَا يَنْسَى أَيِّ وَاحِدْ مِنْهُمْ. 7وَ إِنْتُو كُلَ، اللّٰهْ قَاعِدْ يِفَكِّرْ فَوْقكُو وَ يَعَرِفْ عَدَدْ صُوفْ رَاسْكُو. أَيِّ وَاحِدْ مِنْكُو مُهِمّ زِيَادَةْ لِلّٰهْ مِنْ طُيُورْ كَتِيرِينْ. وَ خَلَاصْ، مَا تَخَافَوْا مِنْ النَّاسْ.
8«وَ أَنَا، إِبْن الْإِنْسَانْ، نُقُولْ لَيْكُو كَدَرْ أَيِّ نَادُمْ الْيَشْهَدْ لَيِّ قِدَّامْ النَّاسْ، أَنَا نَشْهَدْ لَيَّهْ قِدَّامْ مَلَائِكَةْ اللّٰهْ. 9وَ لَاكِنْ أَيِّ نَادُمْ الْيَنْكُرْنِي قِدَّامْ النَّاسْ، أَنَا كُلَ نَنْكُرَهْ قِدَّامْ مَلَائِكَةْ اللّٰهْ. 10وَ أَيِّ نَادُمْ الْيُقُولْ كَلَامْ ضِدّ إِبْن الْإِنْسَانْ، اللّٰهْ يَغْفِرْ لَيَّهْ. وَ لَاكِنْ اللّٰهْ مَا يَغْفِرْ لِلنَّادُمْ الْيِحَجِّي كَلَامْ كُفُرْ فِي الرُّوحْ الْقُدُّوسْ.
11«وَ وَكِتْ يَكُرْبُوكُو وَ يِوَدُّوكُو قِدَّامْ مَسَائِيلْ بُيُوتْ الصَّلَاةْ وَ قِدَّامْ الْكُبَارَاتْ وَ الْحُكَّامْ، مَا تِهِمُّوا لِلْكَلَامْ التُّقُولُوهْ وَ لَا كِكَّيْف تُرُدُّوا لَيْهُمْ. 12أَشَانْ فِي الْوَكِتْ دَاكْ، الرُّوحْ الْقُدُّوسْ يِعَلِّمْكُو الْكَلَامْ الْوَاجِبْ تُقُولُوهْ.»
مَثَل الغني الجاهِل
13وَ نَادُمْ وَاحِدْ فِي أُسْط النَّاسْ الْمَاشِينْ وَرَاءْ عِيسَى نَادَاهْ وَ قَالْ: «سَيِّدْنَا، أَجْبُرَهْ لِأَخُويِ أَشَانْ يِقَسِّمْ مَعَايِ وَرَثَتْنَا.» 14وَ عِيسَى رَدَّ لَيَّهْ وَ قَالْ: «يَا رَاجِلْ! فِي فِكْرَكْ اللّٰهْ جَعَلَانِي فَوْقكُو أَشَانْ نَقْطَعْ لَيْكُو الشَّرِيعَةْ وَ نِفَرِّقْكُو وَلَّا؟» 15وَ عِيسَى حَجَّى لِلنَّاسْ وَ قَالْ: «أَنْقَرْعُوا وَ أَوْعُوا بَالْكُو مِنْ أَيِّ شَيّءْ هَنَا طَمَعْ. أَشَانْ حَيَاةْ الْإِنْسَانْ مَا تَمْشِي حَسَبْ كَتَرَةْ مَالَهْ.»
16وَ حَجَّى لَيْهُمْ بِمَثَلْ وَ قَالْ: «يَوْم مِنْ الْأَيَّامْ، فِي نَادُمْ غَنِيْ وَ زِرَاعْتَهْ وِلْدَتْ لَيَّهْ غَلَّةْ كَتِيرَةْ بِلْحَيْن. 17وَ سَأَلْ نَفْسَهْ وَ قَالْ: ‹هَا. نِسَوِّي شُنُو؟ مَا فَضَّلْ لَيِّ بَكَانْ نَخْزِنْ فَوْقَهْ غَلِّتِي.› 18وَ قَالْ: ‹خَلَاصْ. نَعَرِفْ الشَّيّءْ النِّسَوِّيهْ. نِكَسِّرْ دَبَنْقَاتِي وَ نِسَوِّي فِي بَدَلْهُمْ دَبَنْقَاتْ كُبَارْ مِنْهُمْ. وَ فَوْقهُمْ نُصُبّ كُلَّ غَلِّتِي وَ كُلَّ خُمَامِي. 19وَ نِحَجِّي لِنَفْسِي وَ نُقُولْ: ”يَا نَفْسِي! عِنْدِكِ مَالْ كَتِيرْ مَضْمُومْ الْيِطَوِّلْ سِنِينْ. نِنْجَمَّ بَسْ وَ نَاكُلْ وَ نَشْرَبْ وَ نَفْرَحْ.“› 20وَ لَاكِنْ اللّٰهْ نَادَاهْ وَ قَالْ: ‹يَا الْجَاهِلْ! فِي اللَّيْلَةْ دِي بَسْ، نِشِيلْ رُوحَكْ. وَ الْخُمَامْ الْجَهَّزْتَهْ لِنَفْسَكْ دَا، يَبْقَى هَنَا يَاتُو؟›»
21وَ عِيسَى قَالْ بَتَّانْ: «وَ يَبْقَى مِثِلْ دَا لِأَيِّ إِنْسَانْ الْيُضُمّ مَالْ لِنَفْسَهْ وَ لَاكِنْ مَا عِنْدَهْ كَنْز قِدَّامْ اللّٰهْ.»
الكلام البُخُصّ الهمّ
22وَ عِيسَى حَجَّى لِتَلَامِيذَهْ وَ قَالْ: «فِي شَانْ دَا، نُقُولْ لَيْكُو مَا تِهِمُّوا لِحَيَاتْكُو فِي شَانْ الْأَكِلْ وَ لَا لِجِسِمْكُو فِي شَانْ الْخُلْقَانْ. 23أَشَانْ الْحَيَاةْ مُهِمَّةْ مِنْ الْأَكِلْ وَ الْجِسِمْ مُهِمّ مِنْ الْخُلْقَانْ. 24فَكُّرُوا فِي الْغُرَابْ. هُو مَا يِتَيْرِبْ وَ لَا يَقْطَعْ غَلَّةْ وَ مَا عِنْدَهْ دَبَنْقَةْ وَ لَا مَخَزَنْ وَ لَاكِنْ اللّٰهْ يِعَيِّشَهْ. وَ أَكِيدْ إِنْتُو مُهِمِّينْ لِلّٰهْ زِيَادَةْ مِنْ الطُّيُورْ.
25«وَ كَنْ نَادُمْ مِنْكُو يِهِمّ كَتِيرْ، الْهَمّ دَا مَا يَقْدَرْ يِزِيدْ عُمْرَهْ بِسَاعَةْ وَاحِدَةْ كُلَ. 26وَ كَنْ إِنْتُو مَا تَقْدَرَوْا تِسَوُّوا شَيّءْ صَغَيَّرْ مِثِلْ دَا، مَالَا تِهِمُّوا لِشَيّءْ آخَرْ؟
27«شِيفُوا النُّوَّارْ وَ فَكُّرُوا كِكَّيْف يُقُمّ. مَا يَخْدِمْ وَ مَا يِسَوِّي كِسْوَةْ. وَ لَاكِنْ نُقُولْ لَيْكُو أَكِيدْ الْمَلِكْ سُلَيْمَانْ ذَاتَهْ فِي دَرَجَتَهْ الْكَبِيرَةْ أَبَداً مَا لِبِسْ خَلَقْ جَمِيلْ مِثِلْ جَمَالْ النُّوَّارْ دَا. 28وَ كَنْ اللّٰهْ يِلَبِّسْ الْقَشّ بِالنُّوَّارْ مِثِلْ دَا وَ الْقَشّ دَا قَاعِدْ الْيَوْم وَ أَمْبَاكِرْ يَزْقُلُوهْ فِي نَارْ الْفُرُنْ، أَكِيدْ بِزِيَادَةْ هُو يِلَبِّسْكُو إِنْتُو. شِدُّوا حَيْلكُو إِنْتُو الْإِيمَانْكُو لِسَّاعْ ضَعِيفْ.
29«وَ بِمِثِلْ دَا، مَا تَسْأَلَوْا نُفُوسْكُو فِي الشَّيّءْ التَّاكُلُوهْ وَ تَشَرْبَوْه وَ مَا تِهِمُّوا لَيَّهْ. 30كُلَّ النَّاسْ الْمَا مُؤمِنِينْ خَاطِّينْ بَالْهُمْ فِي الْأَشْيَاءْ دَوْل وَ أَبُوكُو اللّٰهْ يَعَرِفْ كَدَرْ إِنْتُو تِدَوْرُوهُمْ. 31وَ خَلَاصْ، خُطُّوا بَالْكُو فِي مَمْلَكَةْ اللّٰهْ بَسْ وَ اللّٰهْ يَنْطِيكُو الْأَشْيَاءْ دَوْل.
32«يَا غِنَيْمَاتِي، مَا تَخَافَوْا. أَبُوكُو اللّٰهْ عِنْدَهْ نِيَّةْ يَنْطِيكُو الْمَمْلَكَةْ. 33بِيعُوا خُمَامْكُو وَ أَنْطُوهْ صَدَقَةْ لِلْمَسَاكِينْ. وَ بَيْدَا، تِسَوُّوا لِنُفُوسْكُو جُزْلَانْ الْأَبَداً مَا يَتْلَفْ. وَ خَلَاصْ، تُضُمُّوا مَالْكُو فِي بَكَانْ اللّٰهْ فِي السَّمَاوَاتْ. الْمَالْ دَا مَا يَفْشُلْ. وَ السَّرَارِيقْ مَا يِقَرُّبُوا لَيَّهْ وَ الْأَرْضَةْ مَا تَاكُلَهْ. 34أَشَانْ الْبَكَانْ الْمَالَكْ قَاعِدْ فَوْقَهْ، دَا بَسْ الْبَكَانْ الْقَلْبَكْ قَاعِدْ فَوْقَهْ.
أمْثال العبيد الجاهِزين
35«أَقْعُدُوا جَاهِزِينْ لِلْخِدْمَةْ صَلَبَاكُو مَرْبُوطِينْ وَ فَوَانِيسْكُو مُوَلِّعِينْ. 36أَبْقَوْا مِثِلْ عَبِيدْ فِي بَيْت سِيدْهُمْ الْقَاعِدِينْ يَرْجَوْه. سِيدْهُمْ يِقَبِّلْ مِنْ عَازُومَةْ الْعِرِسْ. وَ هُمَّنْ يَقْعُدُوا جَاهِزِينْ أَشَانْ يُفُكُّوا لَيَّهْ الدَّرِبْ بِسُرْعَةْ وَكِتْ هُو يَجِي يُدُقّ الْبَابْ. 37مَبْرُوكْ لِلْعَبِيدْ السِّيدْهُمْ يَلْقَاهُمْ وَاعِيِّينْ وَكِتْ هُو يَجِي. نُقُولْ لَيْكُو الْحَقّ، سِيدْهُمْ ذَاتَهْ يَرْبُطْ صُلْبَهْ وَ يِقَعِّدْهُمْ قِدَّامْ الصُّفْرَةْ وَ يَنْطِيهُمْ الْأَكِلْ. 38مَبْرُوكْ لِلْعَبِيدْ دَوْل كَنْ سِيدْهُمْ يَجِي فِي لُبّ اللَّيْل وَلَّا بِوَرَدَّيْ وَ يَلْقَاهُمْ جَاهِزِينْ.
39«وَ بِمَثَلْ آخَرْ، أَعَرْفُوا كَدَرْ كَنْ أَوَّلْ سِيدْ الْبَيْت عِرِفْ فِي السَّاعَةْ كَمْ فِي اللَّيْل السَّرَّاقْ يَجِي، هُو مَا يِخَلِّي السَّرَّاقْ يَدْخُلْ فِي بَيْتَهْ. 40وَ خَلَاصْ إِنْتُو كُلَ أَقْعُدُوا جَاهِزِينْ أَشَانْ أَنَا إِبْن الْإِنْسَانْ نِقَبِّلْ فِي يَوْم وَاحِدْ الْمَا تَرْجَوْنِي فَوْقَهْ.»
41وَ بُطْرُسْ سَأَلَهْ وَ قَالْ: «يَا سَيِّدْنَا! إِنْتَ قُلْت الْمَثَلْ دَا لَيْنَا أَنِحْنَ بَسْ وَلَّا لِكُلَّ النَّاسْ؟» 42وَ الرَّبّ عِيسَى قَالْ: «يَاتُو مِنْكُو الْيَبْقَى مِثِلْ الْوَكِيلْ الْأَمِينْ وَ الْفَاهِمْ؟ سِيدَهْ يِكَلِّفَهْ فِي كُلَّ عَبِيدَهْ أَشَانْ يَنْطِيهُمْ الْأَكِلْ فِي وَكْتَهْ. 43مَبْرُوكْ لِلْعَبِدْ دَا كَنْ سِيدَهْ يَجِي مِنْ السَّفَرْ وَ يَلْقَاهْ يَخْدِمْ خِدِمْتَهْ. 44بِالصَّحِيحْ، نُقُولْ لَيْكُو هُو يِدَرِّجْ الْعَبِدْ دَا مَسْؤُولْ فِي كُلَّ شَيّءْ الْعِنْدَهْ. 45وَ لَاكِنْ أَكُونْ الْعَبِدْ دَا يُقُولْ فِي قَلْبَهْ: ‹هَا! سِيدِي يِطَوِّلْ وَ مَا يَجِي عَجَلَةْ.› وَ أَشَانْ دَا، هُو يُقُمّ يُدُقّ الْعَبِيدْ وَ الْخَدِيمْ وَ يَبْدَا يَاكُلْ وَ يَشْرَبْ وَ يَسْكَرْ. 46أَكِيدْ سِيدْ الْعَبِدْ دَا يَجِي فِي يَوْم وَاحِدْ الْعَبِدْ مَا جَاهِزْ يِلَاقِيهْ وَ فِي سَاعَةْ الْهُو مَا يَعَرِفْهَا. وَ سِيدَهْ يِعَاقِبَهْ وَ يُخُطَّهْ مَعَ الْعَاصِيِينْ.
47«وَ الْعَبِدْ الْعِرِفْ الشَّيّءْ السِّيدَهْ يِدَوْرَهْ وَ مَا جَاهِزْ لِجَيْتَهْ وَ مَا سَوَّى الشَّيّءْ السِّيدَهْ يِدَوْرَهْ، الْعَبِدْ دَا يَفُرْشُوهْ فَرِشْ شَدِيدْ. 48وَ لَاكِنْ الْعَبِدْ الْمَا عِرِفْ الشَّيّءْ السِّيدَهْ يِدَوْرَهْ، وَ سَوَّى شَيّءْ الْوَاجِبْ يَفُرْشُوهْ بِسَبَبَهْ، الْعَبِدْ دَا يَفُرْشُوهْ شِيَّةْ بَسْ. وَ أَيِّ نَادُمْ اللِّقِي كَتِيرْ، يَطُلْبُوا مِنَّهْ كَتِيرْ. وَ أَيِّ نَادُمْ الْكَلَّفَوْه بِشَيّءْ زِيَادَةْ، يَطُلْبُوا مِنَّهْ زِيَادَةْ.
الفُرْقة في و السلام ما فيه
49«أَنَا جِيتْ أَشَانْ نُصُبّ نَارْ فِي الْأَرْض وَ نِتْمَنَّى بِلْحَيْن كَدَرْ النَّارْ دِي أَوْقَدَوْهَا خَلَاصْ. 50وَ فِي غَطِّسِينْ شَدِيدْ الْوَاجِبْ يِغَطُّسُونِي بَيَّهْ وَ قَلْبِي مُعَلَّقْ بِلْحَيْن لَحَدِّي الْغَطِّسِينْ دَا يِتِمّ. 51وَ فِي فِكِرْكُو أَنَا جِيتْ أَشَانْ نِجِيبْ السَّلَامْ فِي الْأَرْض وَلَّا؟ لَا، مَا كَيْ. نُقُولْ لَيْكُو أَنَا جِبْت الْفُرْقَةْ. 52أَشَانْ مِنْ الْيَوْم وَ قِدَّامْ، الْبَيْت الْعِنْدَهْ خَمْسَةْ نَاسْ، التَّلَاتَةْ يِخَالُفُوا الْإِتْنَيْن وَ الْإِتْنَيْن يِخَالُفُوا التَّلَاتَةْ. 53يِلْخَالَفَوْا أَمْبَيْنَاتْهُمْ. الرَّاجِلْ يِخَالِفْ وِلَيْدَهْ وَ الْوِلَيْد يِخَالِفْ أَبُوهْ وَ الْمَرَةْ تِخَالِفْ بِنَيِّتْهَا وَ الْبِنَيَّةْ تِخَالِفْ أَمَّهَا. وَ أَمّ الرَّاجِلْ تِخَالِفْ مَرِةْ وِلَيْدهَا وَ الْمَرَةْ تِخَالِفْ أَمّ رَاجِلْهَا.»
علامات الزمن الحاضِر
54وَ عِيسَى حَجَّى بَتَّانْ لِلنَّاسْ الْكَتِيرِينْ الْجَوْا لَيَّهْ وَ قَالْ: «كَنْ تِشِيفُوا السَّحَابْ جَايِ مِنْ الْغَرِبْ،#12:54 الْغَرِبْ: في البكان العِيسَى قاعد يحجّي فَوْقه دا، الألْمي يجي دايْماً من الغرِب. عَجَلَةْ كَيْ تُقُولُوا أَلْمِي يُصُبّ وَ خَلَاصْ أَلْمِي يُصُبّ. 55وَ كَنْ تِشِيفُوا الرِّيحْ تُسُوقْ مِنْ الْوَطِي، تُقُولُوا الْوَطَاةْ تَبْقَى حَامِيَةْ بِلْحَيْن وَ خَلَاصْ الْوَطَاةْ تَبْقَى حَامِيَةْ. 56يَا مُنَافِقِينْ! تَعَرْفُوا كِكَّيْف تَفْهَمَوْا عَلَامَاتْ هَنَا الْأَرْض وَ السَّمَاءْ. وَ كِكَّيْف مَا تَقْدَرَوْا تَفْهَمَوْا عَلَامَاتْ الزَّمَنْ الْحَاضِرْ؟
57«مَالَا مَا تَقْدَرَوْا تِمَيُّزُوا الشَّيّءْ الْوَاجِبْ تِسَوُّوهْ؟ 58كَنْ إِنْتُو مَاشِينْ فِي بَكَانْ الْقَاضِي، جَاهِدْ أَشَانْ تِسَّامَحَوْا مَعَ خَصِيمَكْ وَكِتْ إِنْتُو لِسَّاعْ فِي الدَّرِبْ. وَ دَا كَنْ مَا تِدَوْر هُو يُسُوقَكْ لِلْقَاضِي وَ الْقَاضِي يِسَلِّمَكْ لِلْعَسْكَرْ وَ الْعَسْكَرْ يِدِسُّوكْ فِي السِّجِنْ. 59نُقُولْ لَيْك إِنْتَ مَا تَمْرُقْ إِلَّا كَنْ كَفَّيْت كُلَّ الْقُرُسْ الْيِدَوْرُوهْ مِنَّكْ.»
Právě zvoleno:
لُوقا 12: ع.د.ت19
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
La Bible en arabe tchadien © Alliance biblique du Tchad, 2019