Pe eya 2
2
1A go no ge Dok ne á dol digi ma ne suwar ma ne kaŋ ge ne nama pul zi ma pet. 2Swaga ge Dok ne á ne na temel kerra ma go pet ɗe, dam ge ɓyalar go, ɗigli tene#Ibr 4:4.. 3Dok é na wak busu dam ge ɓyalar pal, mbege na ne nà sḛ pe, ago, dam mbe no go, na sḛ ɗigli tene ne kaŋ dolla ge na ne dó ma go pet#Wat 20:11, Ibr 4:4,10.. 4No a pe dolla ge digi ma ne suwar ne ne.
Gaaso ge Eden ne
Swaga ge Dok Bage ɗiŋnedin ne ke suwar ma ne digi ɗe, 5uwara ko sugur a̰me gale ne be pyarra suwar pal to. Ago Dok Bage ɗiŋnedin gale ne be swar mam ya suwar pal to, ndu a̰me gale ne go ge ba mbo gar kaŋ to me. 6Ago mam ka vate ne suwar se digi, ka saŋge swarra ya se luwaɗe suwar pet.
7Dok Bage ɗiŋnedin ke ndu dasana ne suwar lugɗum, uusi o̰yom ge ndwara na vo̰r zi, ndu dasana ɓol ndwara na zi#1Kor 15:45.. 8Go̰r go, Dok Bage ɗiŋnedin é gaaso Eden go, le ge ham ge pe ya, é ndu dasana ge na ne ke na, na zi. 9Dok Bage ɗiŋnedin e uwara ma pe hini hini pyarra ne suwar se ya digi gaaso zi, a kat siŋli, nama zamma kat tuli me. Dol uwara ge ndwara ge gaaso pul zi ŋga, dol uwara ge ne e naa kwa varse kwaɗa ma ne sone buwal me.
10Maŋgaɗam a̰me ka sorra ne suwal Eden ya mbo ya gaaso pe zi. Ne swaga mbe go, varse tene se pe anda. 11Ge zḛ ge, na dḭl Pichon, a na ge ne koŋle suwal ge Havila se ne mwaɗak. A ɓol dinar ya suwal mbe go. 12Na dinar a siŋli ge be to, da ne sugur bedeliyom ge hur tuli, ne njal sergeleŋ Onis ma me. 13Ge azi dḭl Gihon, a na ge ne koŋle suwal Kuch se ne mwaɗak. 14Ge ataa dḭl Tigre, a na ge ne sor ne suwal Asur le ge ham ge go ne, ge anda dḭl Efrat.
15Dok Bage ɗiŋnedin her ndu dasana, e na gaaso Eden zi, ndwara gar na, ne koy na me. 16Hon ndu dasana na wak go: «Za uwara ge daage pet ge ne gaaso zi, 17amma za uwara ge ne e naa kwar varse kwaɗa ma ne sone buwal to bat, ago dam ge mo ne mbo zam na ya, mo mbo sú ŋgat.»
18Dok Bage ɗiŋnedin jan go: «Be ke kwaɗa ndu dasana kat hini ɗu to, mbi mbo ke na ndu ge mbarra dimma ne na go.» 19Dok Bage ɗiŋnedin ke kavaar ge ful zi ge ma ne njoole ma pet ne suwar, pole nama ya ndu dasana ta, ndwara kwar go na hon nama dḭl má̰ gyana de. Ne da pe kavaar ge daage pet ndu dasana na ho̰ nama dḭl. 20Ndu dasana hon kavaar ge ga̰l ma ne ge jabso ma ne njoole ma pet dḭl, ɗaŋ ɗe, ɓol na kon ge mbarra dimma ne na go to. 21Swaga mbe go no, Bage ɗiŋnedin é ndu dasana son dam vop, ndage na ziyar-wak-kal a̰me ɗu, gwan ne na sḛ duur na byalam go. 22Dok Bage ɗiŋnedin ke ndu gwale ne ziyar-wak-kal ge na ne ndage na ne ndu dasana zi ya, gene na ya na ta. 23Swaga ge ndu dasana ne kwa na, jan go:
«No, a kal ge mbi kal ma ne ne,
sḛ duur ge mbi sḛ duur ne ne.
A mbo tol na dḭl ndu gwale,
ago, a ndage na da ne ndu son zi ya.»
24Ne da pe no ɗe, ndu son mbo ya̰ na bá ma ne na ná#2:24 Hada ge Yahud ma ne zi zaman mbe go, ago ndu son ya̰ na bá ma yàl gale ɓya, ba ɗage kat yàl. A mḛ bama koo fare janna ge pe dolla ne pal., mbo mbarge ne na gwale, a mbo gá sḛ duur ge ɗu#Mat 19:5, Mar 10:7-8, 1Kor 6:16, Efe 5:3..
25Ndu son ma ne na gwale jwak, a ka swala, amma saaso be ka ke nama to bat.
Právě zvoleno:
Pe eya 2: FGN2013
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
La Bible en langue Kim © Alliance Biblique du Tchad, 2013.