Pe eya 6
6
Sone zuliya ge naa dasana ma ne
1Swaga ge naa dasana ma ne ɗage zuli ta se suwar pal, a ne tó vya ge gwale ma ɗe, 2Dok vya#6:2 Dok Vya: Na pe wanna haŋle, naa ge temel ge Dok ne ma a ka tol nama Dok vya ma. Ndi Ayu 1:6. ma kwar go, vya gwale ge naa dasana ma ne mbe ma siŋli ge be to, a tal bama gwale ma ne nama buwal zi. 3Swaga mbe go no, Bage ɗiŋnedin jan go: «Mbi gwan ya̰ o̰yom ge mbi ne ge mbi ne ho̰ naa dasana ma na kat nama zi baba to, ago nama sḛ ma su su bàŋ. Ne gá ne zḛ no, nama dam ma suwar pal mbo waɗe del kis para wara azi to.» 4Dam mbe ma zi ya, naa ge don ga̰l gerndeŋ ma ka suwar pal. A swaga ge Dok vya ma ne ka mbo ya ɓan ne vya gwale ge naa dasana ma ne ma go, a ka tol vya ma ne nama no. Zaŋgal, naa mbe ma a ka naa ge pateya ma.
5Bage ɗiŋnedin ndil go, sone ge naa dasana ma ne ke zuli ya gḛ suwar pal, nama dwatɗa ma gá da ne sone kerra pe dam ne dam#Mat 24:37, Luk 17:26, 1Bit 3:20.. 6Bage ɗiŋnedin got tene ne na ne ke ndu dasana suwar pal pe, na dulwak vḛne. 7Bage ɗiŋnedin jan go: «Mbi mbo burmi naa dasana ma, nama ge mbi ne dó nama ne suwar pal uzi, poseya ne kavaar ga̰l ma, ne kavaar ge jabso ma, ne njoole ma pet. Ago, Mbi gó tene ne mbi ne dó nama pe.» 8Amma Bage ɗiŋnedin kwa Nuhu a̰se.
MAANA GE NUHU NE
(6:9—11:32)
Dok jan Nuhu na cé fak ga̰l
9Ndi pehir ge Nuhu ne ma no: Nuhu ka ndu ge dosol, ne ndu ge ɗeŋger Dok ndwara se na kaam ma buwal zi, na zaman go. Nuhu ka mborra poseya ne Dok. 10Nuhu tó vya sonmo ma ataa: Sem, Cham ne Jafet. 11Naa dasana ma hat ta seŋgre Dok ndwara se, a gá ne fare ge birtiŋ ma pe kerra suwar pal. 12Dok ndil go suwar vḛne ya go, naa ge ne suwar pal ma pet nama gá da ne kaŋ kerra ge sone ma pe. 13Swaga mbe go no, Dok jan Nuhu go: «Mbi vin tene ya burmi naa dasana ma pe ne suwar pal uzi. Ne nama pe, kaŋ kerra ge birtiŋ ma zuli ya suwar pal. A ŋgat mbi mbo burmi nama poseya ne suwar uzi. 14Cé tene fak ga̰l ne uwara gofer, mo kun na pul ma varseya se hini hini, mo fat nama ne mboy, pul zi ne go̰r zum me. 15Ndi gyana gyana ge mo ba mbo cer fak ga̰l mbe: Na twala mbo kat tok pyaso ŋgayya kikis ataa, na fiyal tok pyaso ŋgayya wara anuwa̰y, na haal tok pyaso ŋgayya tapolɗu me. 16Mo mbo kulbi fak ga̰l mbe pala se, mo ya̰ swaga ge fak mbe pala ma ne na coŋgo buwal zi tok pyaso ŋgayya ɗu, mo e na wak na ziyar go, mo ke na pul ma jageya ta pala digi ataa me. 17Ndi, Mbi me, mbi mbo e mam yḛreya suwar pal, ndwara burmi kaŋ ge ne o̰y ge ne suwar pal ma uzi pet. 18Amma mbi mbo ke wak tuli ne mo. Aŋ ne mo vya ma, ne mo gwale, ne mo tisi ge gwale ma me. 19Ne kaŋ ge ne o̰y ma pet, mo mbo e nama wat fak ga̰l mbe zi, ne bama pehir ma go mwaɗak, na ká son ɗu ne gwale ɗu me, ne da pe nama má dagre ne mo. 20Njoole ma ne bama hir ma go, ne kavaar ga̰l ma ne bama hir ma go, ne kavaar ge jabso ma, ne ge a ne sar ma ko ge a ne kḛ ma pet ne bama hir ma go, a mbo mbo ya mo ta ndwara ɓol máya. 21Abe kaŋzam ge daage hir pet koyya mo ta, ne da pe aŋ ne nama ba zam.» 22Nuhu ke go no tem dimma ne Dok ne ho̰ na wak go#Ibr 11:7..
Právě zvoleno:
Pe eya 6: FGN2013
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
La Bible en langue Kim © Alliance Biblique du Tchad, 2013.