Matthieu 16
16
Pharisienge se Saddusienge deji Jésu kade ra nyankɔbe ade an-in
(An-in Marc 8.11-13; Luc 12.54-56 tɔ)
1Pharisienge se Saddusienge reei ra Jésu’t nain kêm’n. Ei deji nin le kade ra nyankɔbe ke gai ke in danrán ade n’an-in tá n’a n’geri titeke è Nube kuwe á ule’n. 2Nè è ile de dè’t ede nè:
– Loo ke loo sɔl ɓá ɓaa, sei tami edi nè: «Barè loo à in ɗáng-ɗáng tede kàde danran ker siw.» 3Loo ke loo ar yerer ɓaa, sei tami edi nè: «Ɓila ndi à ede, tede kàde danran tile guri-guri.» Sei geri loo kɔr kum nyange ke kàde danran’t, nè ké sei asi kɔri kum nyange ke ɗarinè nga lé wa? 4Sei dooge ke njé kêm majelége se njétur gide si kade Nube ke ɗarinè i ndii dè nang nè nga, i sangi le kan-in nyankɔbe. Nè nyankɔbe karé ke rang géa a an-in lé. Jonas njèribe-dè-tà ke tà Nube’t ke è nyankɔbe ke ndɔ ke an-in kété ɓá non kuwe ase.
Loo ke Jésu tam tà nè nga bè ɓaa, è inye de ɔte aw.
Jésu ndeje njékuwe-girnge le kade ei njékede gosge tite Pharisienge lé
(An-in Marc 8.14-21 tɔ)
5Loo ke njékuwe-gir-Jésuge ali ba awi gide ke nú’t ɓá ɓaa, kêm de wei nal dè kɔi mapa ji de’t. 6Jésu ede de ede nè:
– Kêm si dè ra si’t, undei kumkunju dè ra si’t le kade sei njékede gosge tite Pharisienge se Saddusienge bè lé.
7Njékuwe-gir- Jésuge murin tà kêm de’t edi nè:
– N’tam bè tede mapa ke j’inyei nang anje kɔi ji jéi’t.
8Nè Jésu ger mbak, è deje de ede nè:
– Sei nga kundekêm le si tin lé. Ké bain á i murin tà kêm si’t edi nè è tede mapa á sei ɔyi ji si’t lé á m’tam’n se si wa? 9Ké kum si gang dè’t lé ɓai wa? Mapa ke mi ke ndɔ ke i noboi dooge aru dɔg loo mi nga, ké kêm si olé dè’t lé wa? Ké ndɔ ke i tanni gute nyon-nyon mapa ke nain janga kandang wa? 10Ké kum si gang dè’t lé ɓai wa? Mapa ji sejimute ke ndɔ ke i noboi dooge aru dɔg loo sɔ nga, ké kêm si olé de’t lé ɓai wa? Ké ndɔ ke i tanni gute nyon-nyon’n ke nain janga kandang wa? 11Ma m’ede sei m’ede nè: Undei kumkunju dè ra si’t le kade sei njékede gosge tite Pharisienge se Saddusienge lé á m’tam bè m m’tam se si tede mapa ke sei ɔyi ji si’t lé nga lé. Ké bain á kum si gang dè tà’t nè nga lé sár wa?
12Ke loon’t nè ɓita kum de gang dè’t ade dé ger titeke tà ke Jésu tam nga ɔje dè pululu karè lé nè è tà ke ɔje dè kede gos titeke Pharisienge se Saddusienge rai.
Pierre tam ndàt ede nè Jésu è Ngonn Nube
(An-in Marc 8.27-30; Luc 9.18-21 tɔ)
13Loo ke Jésu ree tee ɓee-bò’t le Philippe ke ri’n nè Césarée ɓaa, è deje njékuwe-girnge ede nè:
– Man ke m’ee Ngonn doo nga ké dooge tami edi nè man nan wa?
14Dé d’ile’n dè’t d’ede nè:
– Njé ke nange tami edi nè: i i Jean ke njèkule dooge manné njonm, njé ke nange tami edi nè: i i Elie, njé ke nange ke rang edi nè: i i Jérémie éké njèribe-dè-tà ke tà Nube’t karé.
15Jésu tel deje kuwe ɓai ede nè:
– A ɓaa sei, ké i tami edi nè man m’ee nan wa?
16Simon Pierre in ile jésu dè’t ede nè:
– I i Krist, Ngonn le Nube ke njèndi kumgajer.
17Jésu ede Pierre ede nè:
– Simon, ngonn Jonas, rai neli tede è doo ndul á ade kumi gang dè tà’t nè nga lé. Nè è Bɔ’m ke danrán kuwe ade kumi gang dè tà’t nè nga. 18Nè man m’edi titeke i i Pierre, dè kuberi her ke m’an m’unde njékebe nange le’m dè’t. Tɔgmong le yo ase ra se de nyan karé lé. 19M’a m’adi tɔgmong kɔr tà rebe Konɓee ke danrán. Nyan ke i ɔge ra dè nang nè nga ɓaa, d’a d’ɔge ra danrán tɔ. Nyan ke i inye loo ade dé ra dè nang nè nga, d’a d’inye loo kade dé ra danrán tɔ. 20Jésu on njékuwe-girnge njanm-njanm le kade edi doo karé tite ke n’ee Krist nga lé.
Jésu tel ede de tà kwei se kunde loo tee le’n dann njé ke koo’t
(An-in Marc 8.31—9.1; Luc 9.22-27 tɔ)
21Unn gir kêm ndɔn’t nè nga, Jésu-Krist ede njékuwe-girnge ede nè:
– Gar-gar m’a m’aw ke kêm ɓee-bò ke Jérusalem. Ngatɔgege se maw njékuje nyan-mesege a, se njéndang magtubge a tɔ, à rai se’m nyantosowur. D’ade tɔl’m nè ndɔ ke njékon’t mute ɓaa, m’a m’unde loo tee dann njé ke koo’t.
22Pierre ɔr Jésu njɔl se kar’n aw se’n in se’n dè tà’t nè ede nè:
– Kuwe-ɓee, maje kade Nube ngonmi ade nyan nè nga tee dèi’t lé.
23Nè Jésu tel mer Pierre ede’n ede nè:
– Njèban, ɔte tam’t kɔke. I tel i jig ke le tuge’m kile’m dann kaiya’t, tede tàgir lei in ra Nube’t lé, nè in ra dooge’t.
24Taɓai Jésu ede njékuwe-girnge ede nè:
– Ke nè á doo karé ndige kunn rebe goom’t ɓaa, maje kade inye go tàgir ke ɔje dè ra’n kɔke a, maje kade uwe dè nja ra’n se ndɔge malang le kwei titeke man m’ra’n bè ɓita unn dè nja’m têr-têr ɓai. 25Nanan ke ndige kaje ra’n ɓaa à ile ra’n kɔke salang. Nè nanan ke ile ra’n kɔke salang tede’m man ɓaa à ndi kumgajer kuwe. 26Ke nè á doo karé inge nyan malang ke dè nang nè, nè ile ngarankum ra’n kɔke salang ɓaa, ké ri á è soon’t wa? 27Ndɔ karé ke man ke m’ee Ngonn doo nga, m’a tel ree se dooge le’m ke danran dann ndubra’t le Bɔ’m ɓaa, kêm ndɔn’t nè nga m’a m’uge nanan géa se goo nyan ra’n ra’n. 28Kerɔte kuwe, man m’ede sei ndàt, njé ke nange dann dooge ke ndii nè nga à an-in Konɓee le’m man Ngonn doo se kum de pa ɓita à weii ɓai.
Právě zvoleno:
Matthieu 16: GUL04
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Magtub Mann-ra ke Kige ©Alliance Biblique du Tchad, 2004