Jean 5
5
Jesus mi sut ma gugutud’a
1Bugol ahle ndazina, vun tilâ hi Juif-fîna mi nga; Jesus mi djak i Jerusalem. 2Gringâ mi nga avo Jerusalem, a ve nga azangâ vahl avunamu, ni ma a yum ki vun Hebre-na ala Betesda-na, mi ni go ki vun agre’â hi tumiyônina. 3Ad’u azang máma suma tugud’eid’a ablaud’a a nga burâ kä ad’umu, ni suma duka ki suma dileîd’a ki suma gugutud’a. [Azi nga djup gizeîd’a hi mbinid’a. 4Kayam malaikana hi Salad’ina nga mi tchuk asem kä aduk mbina burâ tutu á gizeî mbina. Bugol gizeîd’a hi mbinid’a, sama surop kä avo’â, mi sut tei kur tugud’ei mam mba lumba.] 5Ata yi máma, sana nga, ni ma le tugud’eid’a bizad’a dok hindi yam klavandina. 6Kid’a Jesus golom mi nga burâ kä d’a, mi wala mi nga kua ni dedei, mi dum ala: Ang min tchol akulo zu?
7Sama tugud’eid’a mi hulong dum ala: Bäna, ata yima a nga gizeî mbinina, an nga ki sama gan kuana d’i. Wani ata yima an nga ni i tua na, sama dingâ mi ge wa tam kä avoron da’.
8Jesus mi dum ala: Ang fagakulo! Ang hle zlat mangâ, ang iya. 9Ata yi máma na wat, sa máma mi tchol akulo, mi hle zlat mama, mi iya.
Bur máma ni bur ma sabatna. 10Kayam ndata, Juif-fâ a de mi sama Jesus mi tcholom akulona ala: Ini ni bur ma sabatna. Gat meid’a arang nga lovota á hle zlat mangâ d’i.
11Mi hulong dazi ala: Mam ma tcholon akulona, mi dan ala: Ang hle zlat mangâ, ang iya. 12Azi djobom ala: Sama dang ala: Ang hle zlat mangâ, ang iya na ni nge ge? 13Wani sama sut tei kur tugud’ei mambina, mi we nga sama mi sud’uma d’i, kayam Jesus mi nde woi ata yi máma, kayam ablau suma a nga kua.
14Bugol ahle ndazina, Jesus mi fum kur gong nga kud’ora hAlonid’a, mi dum ala: Gola! Ang sut wa da’. Ang dok le tcho d’uo d’a, kayam vama tcho ma kal ma wana mi lang nguo d’a.
15Sa máma mi i de mi Juif-fâ ala: Ni Jesus ba, mi sud’unu. 16Kayam ndata, Juif-fâ a nde hal Jesus ki zlad’a, kayam mi lahle ndazina ni kur bur ma sabatna.
17Jesus mi hulong dazi ala: Abun nga mi le sunda teteu, an nga ni le sunda hina mi.
18Kayam ndata, Juif-fâ a nga halam ngola á tchum mbei ni kayamba mi b’la’î bur ma sabatnid’a hol li, wani nga mi yi Alona ala Abumu, nga mi mbut tam dedege d’igi Alona na mi.
Ad’enga hAlona Goromid’a
19Jesus mi hulong dazi ala: Gagazi, an nga ni dagiya, an Alona Goroma ni ndak á le va yam tan ndi, wani an le ni vama an wAbun nga mi luma hol, kayam ahlena pet suma mam nga mi lazina, an Goroma nga ni lazi mi. 20Kayam Abun le kanu, mi tagan ahlena pet suma mam nga mi lazina, kayam mam mba mi tagan sun nda ngol la kal la wanda, kayam agi mba lagi atchap kad’u. 21D’igi Abun nga mi tchol suma matna akulo nga mi hazi arid’a na, an Goroma nga ni harid’a mi suma an minizina hina mi. 22Kayam Abun nga mi ka sariyad’a yam sa d’i, wani mi he wa sariyad’a pet abo an Goroma, 23kayam suma pet a he ngola mi an Goroma, d’igi a he ngola mAbun na mi. Sama he nga ngola mi an Goroma d’uo na, mi he nga ni ngola mAbun ma sununïna d’uo mi.
24Gagazi, an nga ni dagiya, sama le mi hum zla manda, le mi he gagazid’a yam Ma sununïna ni, mi nga kari d’a didinda. Sariyad’a mba d’i vum mbi, wani mi nde woi kur matna, mi i kur arid’a. 25Gagazi, an nga ni dagiya, yina nga mi mba, ki tchetchemba mi mba wa, ata yi máma, suma matna a mba hum del an Alona Goroma; azi suma a huma, a mba kak karid’a mi. 26D’igi Abun tamba ni sala arid’a na, mi tinin an tan Goroma ni sala arid’a mi. 27Mi had’enga mi an Goroma á ka sariyad’a, kayam an ni Gor Sana. 28Agi lagi atchap kayam ndata d’i, kayam yina nga mi mba, ata yi máma, suma mat suma a nga kur zulina pet, a mba humun delenu, 29a mba buzuk keyo. Suma a le djivid’ina a mba tchol akulo á i kur arid’a, suma a le tchod’ina a mba tchol akulo á i kur sariyad’a mi.
Kuk ka ad’enga hi Jesus-d’a
30Jesus mi dazi kua ala: An nga kad’enga á le va yam tan ndi. D’igi an hum na, an nga ni ka sariyad’a hina mi. Sariya d’a an kata ni d’ingêr, kayam an nga ni le ni min manda d’i, wani an le ni minda hi mam Ma sununïna.
31Le an le ni glangâsâ yam tanu ni, glangâs mana ndak ki. 32Sama ding ma le glangâsâ kana mi nga. An we glangâs mam ma nga mi lum kana ni gagazi. 33Agi sunugi gen Jean ma le suma batemba. Mam le glangâsâ ni yam gagazid’a mi. 34An nga ni hal glangâsa hi sa d’i, wani an dagi hina kayam agi fagi suta. 35Jean ni lalam mba nga d’i ngal la nga d’i b’od’a mi. Agi lagi furîd’a kur b’o mata ndjö. 36Wani an nga ki glangâs ma ngol ma kal ma hi Jean-nina, kayam sun nda Abun handjid’a, an nga ni ndagat vunad’u. Sun nda an lata nga d’i le glangâsâ kan ala nAbun ba, mi sununïya. 37Abun ma sununïna, mi le wa glangâsâ kanu. Agi humum nga delem yagi tu d’i, agi wum nga iram mbuo mi. 38Zla mamba nga kaka kurugi d’i, kayam agi nga hagi gagazid’a kan an ma mi sununïna d’i. 39Agi nga fegegi kur mbaktumba hAlonid’a, agi nga djib’eregi ala ni kurut ba, agi nga kari d’a didinda. Ni ndat ba, nga d’i le glangâsâ kanu. 40Wani agi min mbagi geven ndala agi fagi arid’a d’a d’i.
41An nga ni hal subura hi sumid’a d’i. 42Wani an wagiya, od’a hAlonid’a nga kurugi d’i. 43An mba ki simiyê Abunu, wani agi van nga atagi d’i. Le sama dingâ mi mba ki simiyêm mam tamba ni, agi mba vum atagiya. 44Agi suma halagi ni subura hi sumid’a, agi nga halagi subur ra tcholï ata Alo ma tu gid’engîd’a d’i. Ni nana ba, agi ndak á hagi gagazid’a ge? 45Agi djib’eregi ala ni an ba, mba ni kal kagi avok Abunu d’i. Mam ma kal kagina ni Moise, mam ma agi tinigi hurugi kama. 46Ladjï agi hagi gagazid’a yam Moise-zu ni, agi mba hagi gagazid’a kan mi, kayam mam b’irin zlan kur mbaktum mamba. 47Wani le agi hagi gagazid’a yam zla d’a mi b’irita d’uo ni, ni nana ba, agi mba hagi gagazid’a yam zla man nda ded’a ge?
Právě zvoleno:
Jean 5: BA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Azumeina Bible © Alliance Biblique du Tchad, 1999.