TƏŊMORFANNE 3
3
Dǝfuu laara zah Masǝŋ ya
1Soo ne yella kal nǝǝ cok mai Dǝɓlii Masǝŋ mo joŋ daŋ. Comki kal ge faa nyi madǝwinni: Masǝŋ faa 'manna ka we re lee kpuu 'wah daŋ ka ko ne?#Caŋ 12:9; 20:2 2Mawin zyii faa nyi ko: Ru gak re lee kpuu 'wah daŋ. 3Amma lee kpuu mai mo kǝsyil 'wahe, Masǝŋ faa: We re ka, we juu ka, ka we wǝ ka. 4So soo faa nyi madǝwinni: Ber o, we ka wǝ ya, 5mor Masǝŋ tǝ ɓe, com mai we ga re, nahnǝn ɓii ga gbǝrri, we ga yea tǝgbana Masǝŋ mai mo tǝ ɓǝ sãh ɓo ne ɓǝɓe' camcam.
6Mawin kwo kpuu ah pǝsãh ka renne, a pǝsãh ka ẽere. So foo ɓǝ ahe, faa: Moo nyi fatan nyi me ɓe, a pǝsãh ka ren ta. Ɓaŋ lee ah re. So nyi wor ah mo no ne ki re ta. 7Ne pel sǝ nahnǝn ɓǝǝ gbǝr gwa daŋ, tahnra, ara ne suu kolle. So sãara goo wuu ge wo ki, saara ge sãhe.
8Ne lil ah mo laara ɓal Dǝɓlii Masǝŋ tǝ kyãh pǝ 'wahe, dǝwor ne mawin ah ɗuura gal ahe, mokra kǝsyil kpuu 'wahe. 9Dǝɓlii Masǝŋ ɗii dǝwor faa nyi ko: Amo kẽne? 10Zyii faa nyi ko: Me laa ɓal ɓo pǝ 'wahe, me ɗuu gal mor me ne suu kolle, mor ah me ge muŋ suu ɓe ɓo. 11So Masǝŋ faa: Azu ye cuu mo mo ne suu kol ne? Wala mo re lee kpuu mai me cak mo tǝ ren ah ko ɓe ne? 12Dǝwor zyii faa: Mawin mai mo nyi nyi me ako ye nyi lee kpuu ah nyi me re. 13So Dǝɓlii Masǝŋ faa nyi madǝwinni: Makẽe mo joŋ ɓii ko ne? Mawin zyii faa: Soo ye kǝǝ me re.#2 Kor 11:3; 1 Tim 2:14
Masǝŋ ŋgoŋ kiita tǝ dǝfuu
14Masǝŋ faa nyi soo: Mor mo joŋ fan maino, mo ga yea ne tǝkẽawãk kǝsyil faɓal daŋ, mo ga ker tǝ sǝrri. Zah'nan ɓo daŋ mo ga lǝǝ ɓǝm sǝrri. 15Me ga kan syiŋ kǝsyil ɓo ne madǝwinni, kǝsyil morsǝ̃ǝ ɓo tǝkine morsǝ̃ǝ ah daŋ. A ga dah tǝtǝl nyi mo, mo ga loŋ morjimɓal nyi ko.#Caŋ 12:17
16Masǝŋ so faa nyi madǝwinni: Me ga ɓoo bone ɓil ɓo moo ga gbǝ daŋ ga pelle, mo ga bem wee ne bone, mo ga byak fan gin mor jol wor ɓo, ako ye ga kaa swah tǝ ɓo.
17So faa nyi dǝworre: Sǝr ga yea ne tǝkẽawãk mor ɓǝ ɓo, mor mo laa zah mawin ɓo, mo re lee kpuu mai me cak mo tǝl ah ka mo re ka ta. Zah'nan ɓo daŋ mo ga lwaa farel ɓo gin mor sǝr ne bone.#Yahu 6:8 18A ga ciŋ waa tǝkine sãhm nyi mo, mo ga re goo. 19Mo ga re farel ɓo ne tǝyim zahpel ɓo ŋhaa mo pii soo ga mor sǝr ne sõo, mor bǝǝra mo gin mor sǝrri. Amo ye vuuri, mo pii soo ga pǝ vuu faɗa.
20Adam#3:20 Adam, tǝgba faa: dǝfuu. ɗii mawin ah ne Ewa#3:20 Ewa tǝgba faa: cee., mor ako ye mah dǝfuu daŋ. 21Dǝɓlii Masǝŋ cur fan wo suu ne wak ɓaa nyi Adam ne mawin ahe.
Masǝŋ nĩi Adam ne Ewa gin pǝ 'wah Eden ge lalle
22So Dǝɓlii Masǝŋ faa: Ẽe ɗǝ, dǝfuu ciŋ ɓo tǝgbana na o, tǝ ɓǝ sãh ne ɓǝɓe' ɓe. Zǝzǝ̃ǝko mo nyenko jol ka ɗǝǝ lee kpuu ma nyi cee ren ka yea ne cee ga lii kao.#Caŋ 22:14 23Dǝɓlii Masǝŋ nĩi ko gin pǝ 'wah Eden, ka mo pǝǝko sǝr mai mo bǝǝ ko gin gŋ.
24Dǝɓlii Masǝŋ nĩi Adam naiko, so rǝk cerubim#3:24 Cerubim: mo ẽe gloser. nǝfah kǝmorcomzah'nan pǝ 'wah Eden ne kafahe ma ne tǝrĩi wii, ka mo yim gŋ ka byak fahlii ga wo kpuu ma nyi cee.
Právě zvoleno:
TƏŊMORFANNE 3: MUAR
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Moundang © Alliance Biblique du Tchad, 1996.