LUKAS 18
18
Ɓǝ kikiŋ mawin wul ne lakaali
1So Yesu faa ɓǝ kikiŋ mai nyi za syee mor ah ka cuu nyi ra ka mo juura pel cẽecẽe mo gaɓra ka. 2Yaŋ maki ah no lakaali ki no gŋ ka ɗuu Masǝŋ ya, ka gban swãa dǝfuu ya ta. 3Mawin ki no pǝ yaŋ ah ta, a gin wo lakaali ah cẽecẽe a faa nyi ko: Mo ŋgoŋ kiita kǝsyil ɓe ne pa syiŋ ɓe sa. 4Ɓǝ ah nǝn ge, mor lakaali zyii kǝnah ya, so ge faa: Pǝsãhe, me kŋ me ka ɗuu Masǝŋ ya, me ka gban swãa dǝfuu ya. 5Amma mawin wul mai mor tǝ gaɓ zah ɓe ne ɓǝ, me ga zyeɓ ɓǝ ah uu, me joŋ nai ya ɓe, a gin gaɓ zah ɓe ne ɓǝ.
6Dǝɓlii so faa: We laa ɓǝ faa lakaali maɓe' mai mo faa ɗao. 7So Masǝŋ ka zyeɓ ɓǝ zan ah mai moo yera yee wol ah com ne suŋ daŋ ya ne? Ka ga gbah jol ɓǝǝ gwari ya ne? 8Me tǝ faa nyi we, a ga gbah jol ɓǝǝ gwari gwari. Amma ne cok mai We Dǝfuu moo ga ge, a gin lwaa iŋ wo za sǝr no ne?
Ɓǝ kikiŋ Farisiyo ne dǝɓ sǝǝ fanne
9Yesu faa ɓǝ kikiŋ mai kal za mai moo lǝŋra ne suu ɓǝǝ ara njaŋ pel Masǝŋ moo so syẽara za ki. 10Za gwa urra kal ge yaŋ Masǝŋ ka juupel gŋ, dǝɓ maki Farisiyo yo, maki ah dǝɓ sǝǝ fan o.
11Farisiyo ur uu juupel ne tǝtǝl suu ah naiko: Masǝŋ, me joŋ osoko nyi mo mor me ka tǝgbana za ki ya, me ka na za kiŋ nyin wala za faɓe' ne za joŋ ɓǝǝr a, so me joŋ osoko nyi mo mor me ka tǝgbana dǝɓ sǝǝ fan mai ya ta. 12Kǝsyil com 'yak vaŋno me syẽe fan gŋ zah'nan gwa, me nyi patǝ jemma fan mai mee lwaa daŋ nyi mo.
13Dǝɓ sǝǝ fan ge uu pǝɗǝk nje ka gak ɓaŋ nahnǝn ga sǝŋ ya, amma a kǝ̃ǝ jol ga zahzyil a faa: Masǝŋ, mo kwo syak tǝ ɓe, ame dǝɓ ɓe'. 14Yesu so faa: Me faa nyi we, Masǝŋ rwah faɓe' dǝɓ mai ge lalle, amma rwah mǝ Farisiyo ya. Mor koo zune mo yii suu ahe, a leeko, so dǝɓ mo wonsuu ahe, a ga yiira ko.#Mt 23:12; Lu 14:11
Yesu ẽe wee nyeere
(Mt 19:13-15; Mk 10:13-16)
15Za gera nyi Yesu ne wee nyee ka mo juu jol ge wo ɓǝǝra, amma za syee mor ah kwo naiko, so cakra ra. 16Amma Yesu ɗii wee nyee ge wol ah faa: We soɓ wee nyee gera wo ɓe, we cak ra ka, mor Goŋ Masǝŋ a mor za ma na ra. 17Me tǝ faa goŋga nyi we, koo zune mo nyiŋ Goŋ Masǝŋ tǝgbana welaŋn a ɓe, ka gak dan gŋ ya syaŋsyaŋ.
Pa joŋne
(Mt 19:16-30; Mk 10:17-31)
18Dǝɓlii ki kǝsyil Yahuduen fii Yesu: Pa cuu fan sãhe, me ga joŋ ɗii ka me lwaa cee ma ga lii ne? 19Yesu faa nyi ko: Mor fẽe mo ɗii me ne dǝɓ sãh ne? Dǝɓ masãh kǝka sai ako ye Masǝŋ vaŋno syak ah to. 20Mo tǝ ɓǝ lai ɓe, faa: Mo joŋ ɓǝǝ ka, mo i wul ka, mo kiŋ nyin ka, mo gwah ber tǝ dǝɓ ki ka, mo kee pa ɓo ne ma ɓo.#Pǝ̃ǝ 20:12-16; CuuƁ 5:16-20 21Dǝɓ ah zyii faa: Ɓǝ lai mai daŋ me tǝ syee mor ah daga laŋ ɓe. 22Yesu mo laa ɓǝ ah naiko, so faa nyi ko: Fan vaŋno coŋ mo ɓo, mo ge lea fan ne fan ɓo daŋ ka mo wom lak ah nyi za syakke, mo ga lwaa joŋ coksǝŋ ba, ka mo pii soo ge syee mor ɓe. 23Amma ne cok dǝɓ ah mo laa ɓǝ ah naiko, zahzyil nǝǝ ko tǝ ɓǝ ahe, mor a ne joŋ pǝlli.
24Yesu mo kwo zahzyil nǝǝ ko ɓo naiko, so faa: Za joŋ lwaa danra Goŋ Masǝŋ pǝgaɓɓe. 25A pǝgaɓ ka njoŋnjoŋ mo gak pǝ̃ǝ mor baatal, amma ka pa joŋ mo dan Goŋ Masǝŋ o ɓe, a pǝgaɓ kal mai ɓe. 26Za mai mo laara ɓǝ ah faara: Ɓǝ ah mo nai ɓe, azu ye gak ǝ̃ǝ ne? 27Yesu zyii zah ɓǝǝ faa: Fan mai mo pǝgaɓ wo dǝfuu ka wo Masǝŋ pǝgaɓ ya.
28So Petar faa: Mo ẽe ɗǝ, ru soɓ fan ɓuu ru ne daŋ, ru tǝ syee mor ɓo. 29Yesu faa nyi ra: Me tǝ faa nyi we, koo zune mo zol soɓ yaŋ ahe, mawin ahe, wee mamme, pam ne mam tǝkine wee ah mor Goŋ Masǝŋ ɓe, 30a ga lwaa fan ma kal tǝ marai wo sǝr tǝ'nah pǝlli, so pǝ sǝr mai mo tǝ gin laŋ a ga lwaa cee ma ga lii.
Yesu faa ɓǝ wul ah ɓal sai ahe
(Mt 20:17-19; Mk 10:32-34)
31Yesu ɗii za syee mor ah matǝ jemma tǝl ah gwa ge wol ah faa nyi ra: We laa ɗǝ, na tǝ ga Jerusalem, ɓǝ mai profetoen mo ŋwǝǝra ɓo tǝ We Dǝfuu daŋ a ga joŋ o. 32A ga soɓra ko ga nyi za mai mo ye ka Yahuduen a jolle, a ga syakra ko, a ga cuura syak nyi ko, a ga tǝɓra tǝsǝ̃ǝ ga wol ahe. 33A ga loɓra ko ne bǝrǝǝ, a ga ira ko pǝ wulli, fahfal zah'nan sai ah a ga ur gin pǝ wulli. 34Amma za syee mor ah laara mor ɓǝ mai ya, laa mor ɓǝ ah gaɓ ra ɓo, tǝra mor ɓǝ mai Yesu mo tǝ faa nyi ra ya.
Yesu gbǝr nahnǝn nyi rǝ̃ǝ
(Mt 20:29-34; Mk 10:46-52)
35Yesu ge gwari ne yaŋ Jeriko ka rǝ̃ǝ kaa ɓo no kah fahlii tǝ syea fanne. 36Laa za tǝ pǝ̃ǝra, fii ɓǝ ahe. 37Faara nyi ko: Yesu ma yaŋ Nazaret ye tǝ pǝ̃ǝni. 38So rǝ̃ǝ ɓyaŋ ɓǝ faa: Yesu We David, mo kwo syak tǝ ɓe. 39Za ma kal pel laira ko ka mo yeako zah ɓǝ faa ahe, amma dǝɓ ah so ɓyaŋ ɓǝ kal ma kǝpelle: We David, mo kwo syak tǝ ɓe. 40Yesu so uu faa nyi za ka mo zaŋra ko ge ne ko. Ne cok rǝ̃ǝ mo ge dai wo Yesu, so fii ko: 41Mo 'yah me joŋ fẽe nyi mo ne? Zyii faa: Dǝɓlii, me 'yah me kwo cokki. 42So Yesu faa nyi ko: Mo gyo, iŋ ɓo gbǝr nahnǝn nyi mo ɓe. 43Ne pel sǝ kal tǝ kwan cokki, so syee ge mor Yesu ne joŋ osoko nyi Masǝŋ. Ne cok za mo kwora ɓǝ ah mo joŋ naiko, so yiira Masǝŋ ne lii ɓǝǝ daŋ.
Právě zvoleno:
LUKAS 18: MUAR
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Bible Moundang © Alliance Biblique du Tchad, 1996.