Gola - 2019 LIB (NT) Drama

Gola New Testament Translation and Literacy Project © Bible Society in Liberia, 2019.

Kpeiŋ aŋ Fɛlosiì nyaŋ yaà aŋ kààmɔ̀ɔ̀ŋ maŋ Sàwà Dayà nyaŋ bà, naŋ yìwìè ko Jùlusɛ̀làm àŋ naŋ hnè koɓɛ̀ Jisɛ̀i yèè àŋ nauŋ dawè nyààŋ, “Wèè kiìŋ anyùùŋ màŋjɛ̀wɛ̀um nyàŋ fè dè è langiɛ̀ àŋ nèwàènèwe wi nyàŋ naŋ wi juuyè lɛ màŋjɛ̀wɛ? Aŋ fè ngèè pɛɛ gùà màŋ kuàŋ nyiŋ màŋ tɛ̀ɛ̀ è langi wilɛ̀ sùà paŋgàà aŋ jènɛ̀ŋ!”
Wo Jisɛ̀ naŋ nyiŋ woò wààŋ, “Wèè kiìŋ nìŋ giiyà maŋ Sàwà Dayà maŋ maŋhɛɛ yèè nìŋ dè e langiiŋ nɛ̀ maŋjɛ̀wɛ? Wo Dayà wààŋ, ‘Jɔ̀ɔ̀lɔɔ̀ wo dèda mɔɔ̀ŋ yèè wo yèye mɔɔ̀ŋ dìì,’ e kìlà, ‘Wo nyùnɔ̀ɔŋ gbiŋ gboo naanààŋ koɓɛ̀ wo dèdauŋ nɔɔ̀ŋ yèè wo yèyeuŋ nɔɔ̀ŋ wɔ, è do nàŋ nɔ̀ŋ tɛ̀ɛ̀ wèè aŋ jìwà wo nyùùŋ wii.’ Kɛɛ nìŋ naŋ woò nààŋ, sèè wo nyùùŋ gbiŋ wo kɛ̀ɛ̀nɛ̀ŋ e nɛ̀ŋ kìɛŋ e yèɛ wò naŋ weè ɓɛ̀nɛ̀ŋ kìɛŋ wèè e nɔ̀ŋ e kpùùmaŋ koɓɛ̀ wo dèdauŋ nɔɔ̀ŋ ɔ̀ɔ̀ wo yèyeuŋ nɔɔ̀ŋ lɛ, wo woò wààŋ, ‘È yaà e nɛ̀ŋ kìɛ̀ŋ titi koɓɛ̀ Dayài.’ Nààŋ e fè tɛ̀ɛ̀ wèè aŋ jɔ̀ɔ̀lɔ̀ àŋ dèda nyiŋ nyàŋ dìì. E ɗewe kii lɛɛ̀ nìŋ naŋ yaà kàà anyùùŋ nyaŋ lɛ̀, è pɔ̀ɔ̀pɔ̀ɔ̀ e nɛ̀ɛŋ ke mìè Dayàa naŋ woò lɛ, wèè niŋ dè e làŋgì nyɛ̀iŋ biɛ̀ maŋjɛ̀wɛ. Nyɛ̀iŋ nààŋ nyùùŋ fɛ̀ɛ̀ ɗòònààkeì nyɛɛ̀ŋ! E nɛ̀ɛŋ wo kèèlà Dayàa Àzaayà naŋ wa sìngè, yèè wò naŋ woò e nyaàiŋ eiŋ dè lɛ, è yaà wa tɔɔɓaà!
Wo Dayà wààŋ, ‘Anyùùŋ nyɛɛ̀ŋ dɛɛkɛ̀ìm ko nyaàŋ nyiŋ niìŋ,
kɛɛ maŋ jii nyiŋ màŋ bà gbiŋ gò gbɛ̀ɛ̀ è kiim kɔɔ.
E zòòlo nyiŋ nɛ̀ ko nɛ̀ɛ̀ŋ miìŋ è yaà wèè foo,
esaɓù kɛ̀ àŋ kaà maŋ sàwà bànè nyuùŋkpùuŋ, e teenè mààŋ miiŋ nàŋ yaà maŋ sàwàim màŋ!’ ”


Wò Jisɛ̀ naŋ nyààŋ anyùùŋ nyaŋ ko nɛ̀ɛ̀uŋ niìŋ yèè wò naŋ nyiŋ woò wààŋ, “Kumianìim tɛɛ̀, yèè niŋ nyìmàŋ niŋ. E nɛ̀ŋjeɛ̀ kɔ̀àùm kò sùà lɛ, e fòum nyɛ̀nɛ̀ŋ maŋ nɔ̀ŋ wò nyuùŋ gò zɛ̀nɛ̀ŋ, sɔɔ̀ e nɛ̀ɛŋ fuliàùm ko nyààŋ lɛ, tiŋ nàŋ nyɛ̀nɛ̀ùm maŋ nɔ̀ŋ wo nyuùŋ gò zɛ̀nɛ̀ŋ.”
Kpeiŋ anyùùŋ màŋjɛ̀wɛ̀ nyaŋ naŋ hnè ko nɛ̀ɛ̀uŋ niìŋ yèè àŋ nauŋ woò nyààŋ, “Màŋ nyìmàŋ kɛ̀ mùŋ naŋ pɔ̀ɔ̀ aŋ Fɛlosiì nyaŋ ɓɛ̀ɛ e nyaàiŋ dè e yèɛ mùŋ naŋ woò lɛ?”
Wo Jisɛ̀ naŋ nyiŋ fasàì yèè wò naŋ woò wààŋ, “Ke kùù gbiŋ ke yèɛ wo Dèda miɔ̀ŋ ko àìjɛnɛ̀ŋ wo gò nyùàŋ yɛ, kè do nàŋ nɔ̀ŋ fìa nyiŋ. Ɓɔ̀ nìŋ gongò è kii nyiŋ! Àŋ yaà aŋ ɓɛ̀màŋɗì zììlè le fɛ̀ɛ̀ wèè anyuùŋ zììlè le fɛ̀ɛ̀ nyaŋ. Yèè sèè wo nyuùŋ zììlè le fɛ̀ɛ̀ wo sìè wo dàwiuŋ nɔɔ̀ŋ feìŋ wèè wouŋ koà, nyiŋ tìyèe àŋ do nàŋ sɛ̀ɛ̀ ko golo.”
Wo Pììlɛ naŋ gbòò yèè wò naŋ woò wààŋ, “Gɔ̀àì ke kàɓanèɛ sùà e nyaàiŋ dè manɛ̀ŋ maŋ nyɛnɛ̀ŋ wo nyùùŋ fè nɔ̀ŋ è zɛ̀nɛuŋ màŋ.”
Yèè wo Jisɛ̀ naŋ nyiŋ woò wààŋ, “Nyɛ̀iŋ nyɛɛ̀ŋ bà gbiŋ kòò nìŋ nyìmè nɔŋ è keì gbiŋ fèemàŋ, wèè naŋ nyìmàŋ kɛ̀ kiìŋ mìŋ yaà woo? Niŋ nyimààŋ kɛ̀ è nɛ̀ŋjeɛ̀ nìŋ sie ko nyààŋ lɛ kɔ̀à kò suàiŋ niìŋ e kìlà eiŋ fòlà e kɔɔ sùà? Kɛɛ e nɛ̀ɛŋ fuliàìŋ ko nyààŋ lɛ tiŋ nàŋ yewe maŋ jii komaiŋ màŋ diɛŋ, yèè mɛɛ̀ŋ nàŋ nyɛnɛŋ maŋ nɔ̀ŋ wo nyuùŋ gò zɛ̀nɛ̀ŋ. E yìwìà ke jii mɔɛ̀ŋ sùà maŋ gòngo naanààŋ folo, maŋ yè maŋ nyɛ̀nɛ̀ùm maŋ nyɛ̀nɛ̀ŋ maŋ keì mààŋ, nyuùŋ jìwa, e gòngò hmɔŋtu, e kpùlìà maŋ yɛɛ̀ nyɛ̀nɛŋ gò kùwìè ɓɛ̀ɛ̀jàa, maŋ keì naanààŋ gɛ̀wɛɛ̀ zimgbe mààŋ, e wùa, e tòa, yèè e keì kàaɓì gbùwà nyùùŋ ɗì wèè e deèuŋ nɛ̀ e pɔɔ̀. Maŋ keì naanààŋ mɛɛ̀ŋ gbiŋ fòlòùm ko sùà yèè maum nyɛ̀nɛ̀ŋ maŋ nɔ̀ŋ wo nyuùŋ gò zɛ̀nɛ̀ŋ. Kɛɛ sèè mùŋ go gùà le sìwè paŋgàà maŋ jènɛ̀ŋ nààŋ àŋ naŋ woò lɛ, tii e fòum nyɛ̀nɛ̀ŋ wèè maŋ nɔ̀ŋ wò nyuùŋ gò zɛ̀nɛ̀ŋ.”


Wo Jisɛ̀ naŋ kuii yèwè yèè wò naŋ kɔ̀ maŋ kpàlàùŋ kpàlàùŋ maŋ sùà e gbɛ̀ɛ̀ maŋ jawa gbeegbèè maŋ àŋ nyaaŋ Taà yèè ko Sidɔ̀ùŋ. Ko fɛɛ̀feìŋ wo nìe bà, wo nyùùŋ e yìwìà ko Kenàŋ wo yèɔ hewa jòò wɔŋ fuɔŋ wiiŋ sùà wɔ, naŋ hnè ko nɛ̀ɛ̀uŋ niìŋ. Wò naŋ kpààŋ wààŋ, “Kanaà, Jɔ̀àfèlàà Dèèweɔ̀, tɔ̀ɔ̀im ke nyowo! Wo jɔ̀àjɔùŋ miɔ̀ŋ kuwa wo jinàŋ naanààŋ maŋjɛ̀wɛuŋ, yèè kòò wò yaà e keì nyìnga dìì.”
Kɛɛ wo Jisɛ̀ gòuŋ wa ngèè pɛɛ gbòà kɔɔ. Anyùùŋ màŋjɛ̀wɛ̀uŋ nyàŋ naŋ hnè ko nɛ̀ɛ̀uŋ niìŋ yèè àŋ nauŋ pɔwɔ̀ nyààŋ, “Nyɛ̀nɛ̀ŋ wo nìeɔ̀ wo ka, esaɓù kɛ̀ kòò wò kùwà wì maŋjɛ̀wɛ wò yaà kpàaŋ sùà.”
Kpeiŋ wo Jisɛ̀ naŋ nyiŋ fasàì wààŋ, “Wo Dayà naim wa nɔŋ tùɔ̀ŋ koɓɛ̀ anyùùŋ nyaŋ ko Ezɔ̀ɛ̀, esaɓù kɛ̀ àŋ yaà mààŋ ke gbòò aŋ ɓaawaa ke yèɛ naŋ go yɛ̀.”
Kɛɛ wo nìeɔ̀ naŋ hnè yèè wò naŋ dè maŋ gɛ̀ɛ̀nùuŋ màŋ dììnaŋ ko fɛɛ̀fenùuŋ, yèè wò nauŋ pɔwɔ̀ wààŋ, “Kɔ̀nɛɛ̀ŋ, kpùùmàim, Kanaà.”
Yèè wo Jisɛ̀ naŋ fasaì wààŋ, “E fè è tɔ̀ɔ̀nyaàŋ wèè aŋ gè è nɛ̀ŋjè àŋ jɔ̀à kàaiŋ nyàŋ kò siwè nyiŋ niìŋ yèè aŋ niŋ kìɛ̀ŋ aŋ sùùŋ nyaŋ.”
Wo nìeɔ̀ naŋ fasaì wààŋ, “Tii è yaà e tɔ̀ɔ̀nyaàŋ Dàa, kɛɛ aŋ sùùŋ nyaŋ pɛɛ gbuwà wɔŋ gbɛ̀gbɛ̀ɔ dìì nyaŋ, tuɔŋ e nyààŋ kò aŋ kɛ̀ɛ̀nɛŋ nyiŋ nyàŋ aŋ gbìlà.”
Yèè wo Jisɛ̀ nauŋ woò wààŋ, “Nìe wɛɛ̀, mùŋ yaà wo nyuùŋ kɛ̀ɛ̀nɛ̀ŋ e hààwe gbee, weètii e yèɛ mùŋ manaŋ lɛ̀ è do nàŋ hɛɛnɛ̀ŋ weèum.” E tèèngà guùŋ bi sùà nɔŋ, wo jɔ̀àjɔ̀ùŋ nìeɔ̀ naŋ wa jòèyè.

Wo Jisɛ̀ naŋ yèwè koɓɛ̀ wii yèè wò naŋ dòònò wɔŋ Jùwò Galaliìɔ kɔɔ. Kpeiŋ wò naŋ jòwò wɔŋ toò bà dìmɛ̀ yèè wò naŋ jɛi. Anyuùŋ zimgbe naŋ wa hnè koɓɛ̀ Jisɛ̀i. Àŋ naŋ hìɛ̀ŋ anyuùŋ gò ɓɛ̀nɛ̀ŋ kàaiŋ tɛ̀ɛ̀ nyaŋ, anyuùŋ zììlè le fɛ̀ɛ̀ nyaŋ, anyuùŋ kpɔ̀ɔ̀kpɔɔ nyàŋ, anyuùŋ gò ɓɛ̀nɛ̀ŋ gbòa nyàŋ, yèè anyuùŋ kɛ̀ɛ̀nɛ̀ŋ maŋ sàaŋ gɛ̀wɛɛ̀ zimgbe. Àŋ naŋ nyiŋ gɔ̀àì wo Jisɛ̀ ko fɛɛ̀feìŋ, yèè wò naŋ wa sùngò aŋ gbiŋ. E keì bi naŋ wa fòònò anyùùŋ nyaŋ wèè e yèɛ àŋ naŋ wa yɛmɛ̀ yèè àŋ naŋ kòmò lɛ. Anyùùŋ nyaŋ kòò àŋ gbòò wa nyàŋ naŋ gbòò. Anyuùŋ gò ɓɛ̀nɛ̀ŋ kàaiŋ tɛ̀ɛ̀ nyaŋ naŋ jòèyè, anyuùŋ kpɔ̀ɔ̀kpɔɔ nyàŋ naŋ kaaìŋ, yèè anyuùŋ zììlè le fɛ̀ɛ̀ nyaŋ naŋ yɛ̀mɛ̀ dìì. Anyùùŋ nyaŋ gbiŋ naŋ wa tɛ̀nɛ̀ŋ wo Dàyà Ezɔ̀ɛ̀ɔ.


Wo Jisɛ̀ naŋ nyààŋ anyùùŋ màŋjɛ̀wɛ̀uŋ nyàŋ ko nɛ̀ɛ̀uŋ niìŋ yèè wò naŋ nyiŋ woò wààŋ, “Ke nyòwò anyùùŋ nyɛɛ̀ŋ yààìm nyinie esaɓù, àim naàŋ nɔ̀ŋ maŋjɛ̀wɛ wèè e gɔ̀ɛ̀ɛ̀ taai yèè aŋ kuwà è nɛ̀ŋje wèè aŋ jè. Miŋ manàŋ wèè ka nyiŋ dangè aŋ kòà èjìè màŋ gboo nyiŋ màŋ sùà, àŋ wɛ̀i ɓɛ̀nɛ̀ŋ fèngee ke dòmaàŋ diɛŋ sèè àŋ nɔ̀ŋ kɔɔyɛ.”
Anyùùŋ màŋjɛ̀wɛ̀uŋ nyàŋ nauŋ dawè nyààŋ, “Kɛɛ kòò è naiŋ ɓɛ̀nɛ̀ŋ yɛ̀mɛ̀ e nɛ̀ŋje sɛmɛ wèè eiŋ gɔ̀ɔ̀yɛ̀ anyùùŋ nyɛɛ̀ŋ gbiŋ wèè e nyiŋ kpɛ̀lɛ̀ ke fòùngà e diì wòa lɛɛ̀ diɛŋ?”
Wo Jisɛ̀ naŋ nyiŋ dawè wààŋ, “Gbɔ̀ù kpùnàŋ kiìŋ nìŋ kuwa?”
Yèè nyààŋ, “E gbɔ̀ù kpùnàŋ nɔɔnɔŋ le tìyèe yèè aŋ kɛì jɔ̀à.”
Wò Jisɛ̀ naŋ wòò e faaàŋ wèè aŋ jɛi ko dììnaŋ. Yèè wò naŋ ɓèmè e gbɔ̀ù kpùnàŋ nɔɔnɔŋ le tìyèeɛ̀ yèè aŋ kɛ̀ì nyaŋ wò naŋ gè wo Dayà esɛ̀, wò naŋ niŋ nyime nyìmè yèè wò naŋ niŋ fè anyùùŋ màŋjɛ̀wɛ̀uŋ nyàŋ wèè aŋ goonò niŋ anyùùŋ nyaŋ e fèemàŋ. Anyùùŋ màŋjɛ̀wɛ̀ nyaŋ naŋ niŋ gòònò anyùùŋ nyaŋ e fèemàŋ. Anyùùŋ nyaŋ naŋ wa jènɛ̀ŋ aŋ dià. Kpeiŋ anyùùŋ màŋjɛ̀wɛ̀ nyaŋ naŋ tùàŋ e gbɔ̀u kpuu kpùù gbànaàŋ naŋ joo lɛ̀ e dìà maŋ pòùm gbèègbèè nɔɔnɔŋ le tìyèe sùà. Anyùùŋ nyaŋ naŋ wa jè nɛ̀ŋjeɛ̀ nyaŋ àŋ yaà wa anyuùŋ tààsùùŋ tiinàŋ (4,000), e gòiŋ kpɛ̀nɛ̀ŋ àŋ jɔùŋ yèè àŋ jɔ̀àkàiŋ.
Yèè wo Jisɛ̀ naŋ gè anyùùŋ nyaŋ kùàŋ wèè aŋ ka maŋ gboo nyiŋ màŋ sùà, kpeiŋ wò naŋ sɛ̀ɛ̀ wɔŋ gɔ sùà wo nìàŋ wɔŋ juwoɔ̀ wo kà e tiwi feìŋ nɛ e gbɛ̀ɛ̀ ko jawa bà àŋ nyaaŋ ko Magadààŋ.

Gwranda ar Maafiù 15