Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወእንዘ ይወርድ እምደብር ተለውዎ ሰብእ ብዙኃን። ወናሁ መጽአ አሐዱ ብእሲ ዘለምጽ ወቀርበ ኀቤሁ ወሰገደ ሎቱ እንዘ ይብል እግዚኦ እመሰ ፈቀድከ ትክል አንጽሖትየ። ወሰፍሐ እዴሁ ወገሠሦ ወይቤሎ እፈቅድ ንጻሕ ወነጽሐ እምለምጹ በጊዜሃ። ወይቤሎ እግዚእ ኢየሱስ ዑቅ ኢትንግር ወኢለመኑሂ ወባሕቱ ሑር ወአፍትን ርእሰከ ለካህን ወአብእ መባአከ በእንተ ዘነጻሕከ በከመ አዘዘ ሙሴ ከመ ይኩን ስምዐ ላዕሌሆሙ።

ወበዊኦ ቅፍርናሆም መጽአ ኀቤሁ መስፍነ ምእት። ወይቤሎ እግዚኦ ብቍዐኒ ድዉይ ወልድየ ወይሰክብ ውስተ ቤት ወመፃጕዕ ወጥቀ ጽዑር። ወይቤሎ እግዚእ ኢየሱስ ነየ እመጽእ አነ ወእፌውሶ። ወአውሥአ ሐቤ ምእት ወይቤ እግዚኦ ኢይደልወኒ ከመ አንተ ትባእ ታሕተ ጠፈረ ቤትየ ዳእሙ አዝዝ በቃልከ ወየሐዩ ወልድየ። እስመ አነሂ ብእሲ መኰንን አነ ወብየ ሐራ ዘእኴንን ወእብሎ ለዝ ሑር ወየሐውር ወለካልኡኒ ነዓ ወይመጽእ ወለገብርየኒ ግበር ከመዝ ወይገብር። ወሰሚዖ እግዚእ ኢየሱስ አንከረ ወተመዪጦ ይቤሎሙ ለእለ ይተልውዎ አማን እብለክሙ ኢረከብኩ ከመዝ ዘየአምን በውስተ ኵሉ እስራኤል። ወባሕቱ እብለክሙ ብዙኃን ይመጽኡ እምሥራቅ ወእምዕራብ ወይረፍቁ ውስተ ሕፅነ አብርሃም ይስሐቅ ወያዕቆብ በመንግሥተ ሰማያት። ወለውሉደ መንግሥትሰ ያወፅእዎሙ ውስተ ጸናፌ ጽልመት ኀበ ሀሎ ብካይ ወሐቅየ ስነን። ወይቤሎ እግዚእ ኢየሱስ ለውእቱ ሐቤ ምእት ሑርኬ ወበከመ ተአመንከ ይኩንከ ወሐይወ ወልዱ በይእቲ ሰዓት ወገቢኦ መስፍን ውስተ ቤቱ ረከቦ ለቍልዔሁ ሐዪዎ።

ወበዊኦ እግዚእ ኢየሱስ ቤቶ ለጴጥሮስ ረከባ ለሐማተ ጴጥሮስ እንዘ ትሰክብ ወትፈፅን። ወገሠሣ ወአኀዛ እዴሃ ወኀደጋ ፈፀንታ ወተንሥአት ወተልእከቶሙ።

ወምሴተ ከዊኖ አምጽኡ ኀቤሁ ብዙኃነ እለ አጋንንት ወአውፅኦሙ ለመናፍስት በቃሉ ወፈወሰ ኵሎ ድዉያነ። ከመ ይትፈጸም ቃለ ኢሳይያስ ነቢይ ዘይቤ «ውእቱ ነሥአ ደዌነ ወጾረ ሕማመነ።» ወሶበ ርእየ እግዚእ ኢየሱስ ብዙኃነ ሰብአ ዘተለውዎ አዘዘ ከመ ይሑሩ ማዕዶተ ባሕር።

ወመጽአ ኀቤሁ አሐዱ ጸሓፊ ወይቤሎ ሊቅ እትሉከኑ ኀበ ሖርከ። ወይቤሎ እግዚእ ኢየሱስ ለቈናጽልኒ ግበብ ቦሙ ወለአዕዋፈ ሰማይኒ ምጽላል ቦሙ ወለወልደ ዕጓለ እመሕያውሰ አልቦቱ ኀበ ያሰምክ ርእሶ። ወይቤሎ ካልእ እምአርዳኢሁ እግዚኦ አብሐኒ ቅድመ እሑር ወእቅብሮ ለአቡየ። ወይቤሎ እግዚእ ኢየሱስ አንተሰ ትልወኒ ወኅድጎሙ ለምዉታን ይቅብሩ ምዉታኒሆሙ።

ወዐሪጎ ውስተ ሐመር ተለውዎ አርዳኢሁ። ወናሁ ዐቢይ ድልቅልቅ ኮነ በውስተ ባሕር እስከ ሶበ ይደፍኖ ለሐመር ማዕበለ ባሕር ወውእቱሰ ይነውም። ወቀርቡ አርዳኢሁ ወአንቅህዎ ወይቤልዎ እግዚኦ አድኅነነ ከመ ኢንሙት። ወይቤሎሙ ምንት ያፈርሀክሙ አንትሙ ሕጹጻነ ሃይማኖት ወተንሢኦ ገሠጾሙ ለነፋሳትኒ ወለማዕበለ ባሕር ወኮነ ዐቢይ ዛኅን። ወአንከሩ ሰብእ ወይቤሉ መኑ እንጋ ውእቱ ዝንቱ ዘይትኤዘዙ ሎቱ ባሕርኒ ወነፋሳትኒ።

ወበጺሖ ማዕዶተ ብሔረ ጌርጌሴኖን ተቀበልዎ ክልኤቱ እለ አጋንንት ወፂኦሙ እመቃብራት ወእኩያን ጥቀ እሙንቱ ወኢያበውሑ መኑሂ ይኅልፍ እንተ ይእቲ ፍኖት። ወሶበ ርእይዎ ጸርሑ እንዘ ይብሉ ምንት ብነ ምስሌከ ኢየሱስ ወልደ እግዚአብሔር ሕያው መጻእከኑ ዝየሂ ትስድደነ ወትሣቅየነ ዘእንበለ ይብጻሕ ጊዜሁ። ወቦ ህየ መራዕየ አሕርው ብዙኅ ይትረዐዩ ርኁቀ እምኔሆሙ። ወአስተብቍዕዎ እሙንቱ አጋንንት ወይቤልዎ እመሰ ታወፅአነ ፈንወነ ከመ ንባእ ዲበ መራዕየ አሕርው። ወይቤሎሙ ሑሩ ወወፂኦሙ ሖሩ ወቦኡ ውስተ አሕርው ወአብዱ ኵሉ መራዕየ አሕርው ወሮጹ ወጸድፉ ውስተ ባሕር ወሞቱ ውስተ ማይ። ወጐዩ ኖሎት ወአተዉ ሀገረ ወዜነዉ ለሰብእ ኵሎ ዘኮነ ወበእንተ እለ አጋንንትሂ። ወናሁ ወፅኡ ኵሉ እለ ውስተ ሀገር ይትቀበልዎ ለእግዚእ ኢየሱስ ወሶበ ርእይዎ አስተብቍዕዎ ይኅልፍ እምደወሎሙ።

Gwranda ar ወንጌል ዘማቴዎስ 8