Matthew 20
20
Waini meko murori moimai rededi vene
1“Adina Sei di ourefeidena amena sana omari bi kono amiye yokoi kana, kaere uriyaku niyori ini waini meko muro rofu amiye moimai reyaganedi moigi boyo. 2Ina venesa uka yokoi maka niyadi denarius yokoi moigedi mina mago. Mina usi bi ini waini murori nifeideyo. 3Meda nemoko 9:00 ri bosi maketi sanari amiye be bi are rei tavoi tavoi regamadi ma vesi 4ina vene rofu niyo, ‘Ya vene ka bosi nai waini meko murori moimai regedi, ma na yaku fore beika bi rama ya magida.’ 5Ye ina vene boyadi. Dudusa meda nemoko 12:00 ma meda nemoko regode uriyenauri bosi ouresi reyo kana reyo. 6Meda nemoko 5:00 kanari nesi veyo be are regasa amegamadi. Resi nikaiteyo, ‘Beika resi beika yokoi rena de mina meda doba are regasa amededi?’ 7Ma nikabai reyadi, ‘Yokoi yaku moimai renadi vo de una niyadi dada.’ Ina yaku niyo, ‘Ya ka bosi nai waini meko murori moimai regedi.’#20.7 Bura bedakai ka ma beika bi buni moigedi nufa.
8“Uriyenau niyori, waini muro biyaguna amiye yaku ini moimai ourefeidena amiye rofu niyo, ‘Moimai rededi vene raka nisi ini fore ma. Ouresi bi gabi moimai reyadi vene siko, ma bogo ouresi moimai reyadi rofu koina niyainedi.’#Lev 19.13; Deut 24.15 9Moimai vene kaere bi meda nemoko 5 kana moimai regi kora reyadi neinei baesi ini denarius yokoi maka moiyadi. 10Ye, ouresi moimai reyadi vene baeyadiri, ini moke moke ina bi moi tora regedi vo niyadi. Idu ina tau vakoi ka denarius yokoi maka moiyadi. 11Mina moigasa waini meko muro amiye rofu mumugu nisi 12niyadi, ‘Mina vene kaere bi gabi baeyadi bi meda nemoko yokoi maka moimai reyadi, idu uni fore kana maro—una kaere bi meda doba ma meda seiri moimai reyafa!’
13“Idu ina vene rofu nikabai reyo, ‘Asini, na bi ya rofu no yokoi de reyaka; ya meda yokoi maka di moimai fore dada moimai regiya di uka yokoi maka be reyafa ba? 14Yi fore moisi di. Nai ura bi gabi moimai reyo amiye di fore magi reida ya maraka kana. 15Mina bi nai fore; na bi nai ura beika regida bi, o ya bi na rofu maunu nisa nai buni reida dada ba?’ ”
16“Ye gabi vene bi ouregedi, ma ourededi vene bi gabi nigedi.”#20.16 Bura bedakai ka adina amiye tau gade vo nido, idu keika keika bi auba redo nufa.#Mt 19.30; Mk 10.31; Lk 13.30
Iesu ini muyena ago rofu uru regode niyo
(Mk 10.32–34; Lk 18.31–34)
17Kamini Jerusalem bogasa idau ini usi dina vene 12 moi etagae risi bogasa sina nimaro, 18“Neidefa, una bi Jerusalem bogifa, ma Amiye di mida siri resi Sei ma amiye utari naivo vene di varika vene ma ago gira oteimana vene rofu magedi. Ina vene yaku kota regedi bi muyeyaine, 19resi tutubena idana vene di vanari aegedi ma nikurusi buburu vai resi satauro ikoko reyaganedi; idu gabi meda regodenuri dudusa dadi rae rego.”
Nono di usa nina
(Mk 10.35–45)
20Kamini Zebedee di mida di nono ini midasa Iesu rofu baeyadi ma ini budari efuka meimisi ini beika ura rededi usa niyo.
21Ma nikaiteyo, “Ya ura reisa bi beika?”
Nikabai reyo, “Nai mida remanu bi yi ourefeidena amena sanari yokoi bi yi vana rama rofu ameinu reyaine ma yokoi bi enana rofu ameinu reyaine.”
22Idu Iesu yaku nikabai reyo, “Ya beika usa nidedi bi ya ya toto. Na biyori irigida mina kana regedi ba?”#20.22 Bura bedakai ka Na babatiso reyo mina kana babatiso moigedi ba? nufa.
Ye nikabai reyadi, “Mina bi buni regifa.”
23Ma niyo, “Na biyori irigida kana irigedi,#20.23 Bura bedakai ka ma na babatiso reyo mina kana babatiso moigedi nufa. idu nai vana rama rofu ma enana rofu ameinu rena di vava bi na yaku de ya magida. Mina bi kaere kaere nai Baba yaku ina rofu dogo reyo maka.”
24Ye amiye 10 mina neidesi uba dubuisa rofu gubuyo reyadi. 25Idu Iesu yaku raka nisi niegogo resi niyo, “Ya ya diba tutubena idana vene di ourefeidena vene yaku ini vene fafau ini vava moi raga rededi, ma ini tora vene ini vava dudu beika vegu rigedi amiye ini gabireri ago gira nidedi.#Lk 22.25–26 26Ye yi fogori bi makai de; idu kaere yi fogori ini ura tora nigo vonisi, ina bi yi naivo rena amiye nigo;#Mt 23.11; Mk 9.35; Lk 22.26 27ma kaere yi fogori ouregi ura redo, bi yi moimai rei tavoi redo amiye nigo— 28Amiye di mida deyo kana, diya amiye yaku naivo regedi, idu amiye di naivo regi ma ini vegu magi, amiye tau di vegu no reyadi voi regika.”
Iesu ne taufa amiye remanu moi buni riyo
(Mk 10.46–52; Lk 18.35–43)
29Kamini Jericho feresi yakuyadiri, amiye tau gade usi boyadi. 30Ne taufa amiye remanu bi ida negau amegasa Iesu bae boyo neidesi raka niyadi, “Varika amiye, David di tutubena, una iriyeduka re!”
31Idu amiye tau gade yaku emaradi babo niyagane vo niyadi, idu besa raka niyadi, “Varika amiye, David di tutubena, una iriyeduka re!”
32Ye Iesu are resi raka nisi niyo, “Ya ura rededi bi na yaku beika ya rofu regida?”
33Nikabai reyadi, “Varika amiye, una ura resifa bi dudusa gagani vegifa!”
34Mina resi ina vene rofu iriyeduka resi ini nemoko avaka moiyo ma evade dudusa gagani veyadi ma ina usi boyadi.
Dewis Presennol:
Matthew 20: kqc
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2016, Wycliffe Bible Translators, Inc. All rights reserved.