Logo YouVersion
Eicon Chwilio

मत्ती 3

3
ऱील सछैंज़्‍याव यूहन्‍ना
(मर्कूस १:१-८; लूका ३:१-१८; यूहन्‍ना १:१९-२८)
1नकिन तछा ऱील सछैंज़्‍याव यूहन्‍ना यहूदियालाव बनल अइ लिद यासथैहुक्‍यो, 2“स्‍वर्गताव राज्‍या सो हुरिके। जेपापलाई ऱास्‍द परमेस्‍वरए ल्‍योदा जेयुँ फर्कैचिके।”
3आव ऱील सछैंज़्‍याव यूहन्‍नाए उजूँनी यसैया अगमबक्ताए अइ लिद सर्द ओनैज़्‍याव,
“तोबोए ओर्गा बनल अइ लिद उक़िज़्याव थास्‍रिज़्‍या,
‘हुरिज़्‍याव प्रभुए ओयेम बनैद गाँत्‍या गुँतीलाई सदाँचिके।’ ”#यसै ४०:३
4यूहन्‍ना ऊँतए ओसनए क्‍वा ओक्‍वाइसिज़्‍याव, ओवाँःत स्‍यालोए वाँःफो ओपो·सिज़्‍याव। नोए स॰ल॰र कोस्‍योर ओराकैज़्‍याव, ज़ेंराए राप उज़्‍युज़्‍याव।#२ राज १:८ 5नोए ओल्‍योक यरूसलेमलावर, यहूदिया खन्‍दलावर स़ोनो यर्दन भै जीदाङावर ओपो·स ज़ ओपाँ थैना याहुज़्‍याव। 6नोराए सु सु यादोव यापाप यूहन्‍नालाई है यादोक ते यूहन्‍नाए यर्दन भैल यासछैंक्‍यो।
7फरिसीर स़ोनो सदुकीर यासछैंसिहुज़्‍याव रँःद यूहन्‍नाए नोरालाई, “ए घुलए ओथोर, जे परमेस्‍वरए उरिसनी धोंःन्‍या सुए है ओदाचिउ? 8जे साचो ज़ परमेस्‍वरए ल्‍योदा जेयुँ फर्कैन्‍या ल्‍यो ताकिन साचो हो मिताव य़ेन ब दाव ताके। 9जे फरी, ‘गेपुर्खा अब्राहामनी ज़ परमेस्‍वरए ओज़ार ताद गेले,’ है जेमालिदी ब ताए। ङा साचो है ङादाचिज़्‍या, परमेस्‍वरए सींर लुँरानी तादी ब अब्राहामए ओथोर याजैधुव। 10किताव तोबो मिँए चाव सै माझाःज़्‍याव सींर धलैद मेंःल ओराख्‍याज़्‍याव, हिताव ज़ परमेस्‍वरए ब धलैन्‍याए जूँनी ओरोवा सींए ओजराक झाःद नैव। 11ङा ते परमेस्‍वरए ल्‍योदा जेयुँ जेफर्कैवनी ऱील ङासछैंचिज़्‍या। खाली ङा ङाछींनी ङाकिन ओसक्ती ल्‍यो तोबो हुरिज़्‍या। ङा होए ओपोला हाइद्यान्‍या स्‍यासो ब ङामाले। होए परमेस्‍वरए छैंव उपुरूस स़ोनो मेंःनी सछैंचिरिज़्‍याव। 12होए गेदा भरी नाङलील च्‍याप्‍द चाव भरी धन्‍सारल झाःद पुल भरिलाई खर्क ज़ माजिप्‍तिन्‍या मेंःल म़ुन्‍या ले,” है लिद यासथैक्‍यो।
येसु ऱील ओसछैंसिउ
(मर्कूस १:९-११; लूका ३:२१-२२; यूहन्‍ना १:३२-३४)
13हाःत ज़ येसु ब गालीलनी हुद यर्दन भैल यूहन्‍नाए ल्‍योक सछैंसिहुके। 14यूहन्‍नाए येसुलाई भैंःद मायाद, “ङानी माःक, बुरू ङा ची नँनी सछैंसिउ परिन्‍या,” है ओदोक ते, 15येसुए, “आख पै नँनी ज़ जैव ताके। परमेस्‍वरए ओपैंज़्याव मिताव प़ाइँ य़ेन गिन सयो·द्याव ज़ परिके,” है ओदोक ते, यूहन्‍ना भैंःके। 16येसु सछैंसिद ऱीनी उपुलुसो प़ाइँना ज़ नम फैसिद परमेस्‍वरए उपुरूस कुइतम मिताव भुर्हुद ओक्‍याँत उच़ुसिज़्याव रँःक्‍यो। 17हाःत ज़ नमतिन तोबो गा अइ लिद थास्‍के, “आव ङायुँलाव ङाज़ा ज़। आवलाई रँःद ङायुँ होलाँ ताज़्‍या,” है लिके।

Dewis Presennol:

मत्ती 3: NKham

Uwcholeuo

Rhanna

Copi

None

Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda