Ioan 20
20
Y bedd gwag
1Yn blygeiniol ar ddydd cyntaf yr wythnos, a hithau’n dywyll, fe ddaeth Mair o Fagdala at y bedd a gwelodd fod y garreg wedi ei symud oddi ar y bedd. 2Rhedodd at Simon Pedr a’r disgybl arall yr oedd yr Iesu yn ei garu, ac meddai, “Maen nhw wedi cymryd y Meistr allan o’r bedd, a wyddom ni ddim lle maen nhw wedi’i roi ef.”
3Felly dyma Pedr a’r disgybl arall yn cychwyn allan i fynd at y bedd. 4Roedd y ddau yn rhedeg gyda’i gilydd, ond fe redodd y disgybl arall yn gynt na Phedr, a chyrraedd y bedd o’i flaen. 5Wrth blygu i lawr fe welodd y llieiniau ar lawr, ond aeth ef ddim i mewn. 6Yna daeth Simon Pedr ar ei ôl a mynd mewn i’r bedd. Gwelodd y llieiniau ar lawr, 7a’r cadach a oedd dros ei ben, ond nid oedd hwn gyda’r llieiniau, roedd wedi ei blygu mewn man ar wahân. 8Yna aeth y disgybl arall, a gyrhaeddodd gyntaf, i mewn hefyd, ac fe welodd ac fe gredodd; 9roedden nhw eto heb ddeall yr Ysgrythur a ddywedai fod rhaid iddo godi o farw. 10Felly dyma’r disgyblion yn mynd i ffwrdd drachefn.
Yr Iesu’n ymddangos i Fair o Fagdala
11Roedd Mair yn sefyll tu allan i’r bedd yn wylo. Fel roedd yn wylo, plygodd i edrych i mewn i’r bedd, 12a gwelodd ddau angel mewn gwyn yn eistedd. Roedd un wrth y pen a’r llall wrth y traed lle rhoddwyd corff yr Iesu. 13Medden nhw wrthi, “Wraig, pam rwyt ti’n wylo?”
“Am eu bod nhw wedi dwyn fy Meistr,” meddai, “ac am na wn i ddim ble maen nhw wedi ei roi ef.”
14Wrth ddweud hyn dyma hi’n troi, a gwelodd yr Iesu yn sefyll yno; doedd hi ddim yn gwybod mai’r Iesu oedd ef. 15Meddai’r Iesu wrthi, “Wraig, pam rwyt ti’n wylo? Am bwy rwyt ti’n chwilio?”
“Syr,” meddai wrtho, gan feddwl mai’r garddwr oedd ef, “os wyt ti wedi mynd ag ef i ffwrdd, dywed wrthyf fi ble rhoist ti ef, ac fe af ag ef i ffwrdd.”
16Ac meddai’r Iesu wrthi, “Mair!”
A dyma hi’n troi ato a’i gyfarch yn iaith yr Iddewon, “Rabboni.” (Golyga’r gair, ‘Athro’.)
17Meddai’r Iesu, “Paid â chyffwrdd â mi, oherwydd dwyf fi ddim eto wedi esgyn at y Tad. Dos at fy mrodyr a dweud wrthyn nhw drosof fi, ‘Rwy’n esgyn at fy Nhad i, a’ch Tad chithau; at fy Nuw i a’ch Duw chithau’.”
18Aeth Mair o Fagdala â’r newydd i’r disgyblion. “Rwyf wedi gweld y Meistr,” ebe hi, a dywedodd ei fod wedi llefaru y pethau hyn wrthi.
Ymddangos i’r disgyblion
19Yn hwyr y dydd hwnnw, y cyntaf o’r wythnos, roedd y drysau lle roedd y disgyblion wedi eu cloi rhag ofn yr Iddewon. A daeth yr Iesu a sefyll yn eu canol.
“Tangnefedd i chi,” meddai.
20Ar ôl dweud hyn, dangosodd ei ddwylo a’i ystlys iddyn nhw. Pan welodd y disgyblion yr Iesu fe’u meddiannwyd gan lawenydd.
21“Tangnefedd i chi,” meddai’r Iesu wrthyn nhw eto. “Fel mae’r Tad wedi f’anfon i, felly rwyf finnau yn eich anfon chi.” 22Yna gan anadlu arnyn nhw, meddai,
“Derbyniwch yr Ysbryd Glân. 23Os maddeuwch chi bechodau unrhyw un, yna fe fydd wedi derbyn maddeuant; os na faddeuwch chi i rywun fydd ef ddim wedi cael maddeuant.”
Yr Iesu a Thomas
24Pan ddaeth yr Iesu, doedd Thomas, un o’r deuddeg (a elwid y ‘gefell’) ddim gyda’r gweddill. 25Felly meddai’r disgyblion eraill wrtho, “Rydym ni wedi gweld y Meistr.”
Ymateb Thomas oedd, “Os na welaf i ôl yr hoelion ar ei ddwylo; os na chaf i roi fy mys lle roedd yr hoelion, a rhoi fy llaw yn ei ystlys, wnaf fi ddim credu.”
26Wyth niwrnod yn ddiweddarach, roedd ei ddisgyblion eto i mewn, a Thomas gyda nhw. Ac er bod y drysau ynghlo, fe ddaeth yr Iesu a sefyll yn eu canol a dweud, “Tangnefedd i chi.”
27Yna meddai wrth Thomas, “Rho dy fys fan hyn, ac edrych ar fy nwylo i; estyn dy law, a rho hi ar fy ystlys, paid â bod heb gredu, ond yn credu.”
28A dywedodd Thomas, “Fy Arglwydd a’m Duw.”
29Meddai’r Iesu, “Ai am i ti fy ngweld i y credaist ti? Llawen yw’r rhai na welson mohonof fi erioed, ac eto sy’n credu.”
Pwrpas y llyfr
30Roedd yna lawer o arwyddion eraill a wnaeth yr Iesu yng ngŵydd ei ddisgyblion, ond does dim sôn amdanyn nhw yn y llyfr hwn.
31Mae’r rhai sydd yma wedi eu hysgrifennu i chi gael credu mai’r Iesu yw’r Crist, Mab Duw, a thrwy’r gred hon fe gewch chi fywyd nefol drwy ei enw.
Dewis Presennol:
Ioan 20: FfN
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Cymdeithas y Beibl 1971
© British and Foreign Bible Society 1971