Luke 1
1
1Ka'khaeki laq khoeq Tawphiluq oe, ma'hniq hma a'phlaet khoeq mauknaukpha klong haqkhoeq 2A'mcaq ta'koeiq nei klong haq a'hmuq laq saw haqloeq Boipaw hmuqlong a'sai louq saw haqloeq án hau hoet khoeq khakhut khlaung haqloeq má hniq hma caw a'myok haq. 3Yaqklongoeng kei loeqkhaw a'phlaet poeiq kikhoeq klong awlum ka'caetba kiloeq 4Nanghniq loeq nán mcoqki hni khoeq klong haq a'layi nakkhoeq nán hmotai tawiq ya nanghniqa nei khakhut a'pawilanga caw ka'yok laq khoeq a'phlate. 5Yudaq plei a'uksuk khoeq Herouq mang laukthauka Yahaenpaw A'biyaq tapa khoeq Zakhariq taeng Yahaenpaw poemak a'moeiq. Yaq a'peha Aeliqsabaet khaw Ayoung taeng án hau khoeq Yahaenpaw myoewa a'kom khoeq khlaung a'phlaet. 6Yaqhniq poemhneiq loeq Boipaw peinyat haq an kyangi klongoeng Boipaw hmaungkauma khlaungpawi hoeiq an phlaet. 7Seiloeqkhaw Aeliqsabaet khoeq a'mlungnu a'phlaet klongoeng yaqhniqa an caw moeiqtheiqaq. Yaqhniq poemhniq khoeq an sauk khaw a'cang hni. 8Hnupakteq Zakhariq khoeq yaqhniq up a'hlaiq án klawqa teq Boipaw hmaungkauma Yahaenpaw hmuqlong a'sai tuna 9Yahaenpaw haq thumcan a'moeiq khakhut a'mluq án yuqiya teq yaqloeq Boipawa wotpyuq dun kyong duka won loeqteq a'awt haq siloeqteq a'samai tawiqya a'hlaiq a'klawq. 10Yaqkhakhut Zakhariq loeq a'awt haq a'si tuna khlaung haqkhaw Boipaw a wotpyuq dun kyongwaenga suq án tongi. 11Yaqkiyoeng Boipaw loeq a'hloeq khoeq mehon saw khoeq a'awt haq án sidun saet pa'toeng ya loeqteq a'om khoeq Zakhariqa a'mphlaqi. 12Yaqkha a'mphlaqi khoeq Zakhariq loeq a'hmuqa teq nana a'pahaiyi poeiq. 13Boipaw mehon saw loeqkhaw a'mkeiqai tiq Zakhariq oe. Piyawoenakateq nang suq na'tongi thai khoeq Boipaw loeq a'yauk hni. Na'peha Aeliqsabaet loeq a'caw pa'taw caw a'taukiyai. Yaq na'caw ming khoeq Yawhan taeng na'sui laqai. 14Yaq sa'mi caw a'moeiq khoeq khinga nanghniq mlung a'oeqcaq khakhut khlaung haqkhaw án oeqcaq pawqai. 15Pi klongoeng naka Yawhan khoeq Boipaw hmaungkauma a'laen khoeq khlaung a'phlaetai. Yaq loeq ca'pyeit wai loeq lak pikhowakhaw ohlaq. A'nu hoen duka a'moeiq ta'koeiq cimcai muikhlaw khoeq yaq hui tu a'moeiq yai. 16Yaq loeq Iqtayelaq khlaungmyoe haqkhoeq sa'diq laq uk loeqteq yaqhniq Boipaw a'phlaet khoeq a'sauk a'haeng khoeq Boi hma a'thaw haq balai. 17Yawhan khoeq a'cimcai khoeq Pa'rawphaeq Eliyaq khakhut a'khwaiana loeq a'tat moeiq loeqteq Boipaw hmaungkauma a'klanyangsaw a'phlaetai. Yaq loeq nupaw loeq a'caw haqkhaw plan loeq toyisauk mtoeq haq ba loeqteq hnyini theiqaq uk saw haqla khaw a'pawi khoeq klong a'mcok hau haq balai. Yaqklongoeng khlaung haqkhaw Boipaw a'lo khoeq khinga a'klanyangi caen án moeiq yai taeng a'hau. 18Yaqateq Zakhariq loeqkhaw kei khaw ka'cang hni. Ka'peha khaw a'sauk a'cang hni klongoeng nei kha a'phlaetai khoeq kha ka'hmotai yoe? taeng mehon sawa a'hau. 19Yaq mehon saw loeqkhaw kei khoeq Boipaw hmaungkauma a'bisaipaek saw Gabelaq ka'phlaet. Nang hma lo hang loeqteq nei sa'taung pawi khoeq ka'mhmyaukai khoeq tawiqya a'teiq ka'laqi khoeq khlaung ka'phlaet. 20Yaqklongoeng nang loeq kei plau a'myumiyaqti klongoeng nei haq a'phlaet hmaungkaum sawyi noen ta'ong na'awqai. Kei plau khaw a'khing a'phaw loeq a'luiqyai taeng a'hau. 21Zakhariq loeq Boipaw mehon saw khoeq Boipawa wotpyuq dun kyong duka an soiyi tuna a'planga khoeq khlaung haqloeq Zakhariqa án cong. Yaq khlaung haq loeqkhaw Boipaw a wotpyuq dun kyong duka Zakhariq a'piya a'kla hni yoe? taeng án mauk nauk. 22Zakhariq planga a'soq ba loeq yaqhniqa soiyipuinauk haq khoq saqa teq Boipawa wotpyuq dun kyong duka na'maek uwaq hmupai nakkhoeq yaqhniq loeq án yaukcuk. Zakhariq khaw soiyi khoq saqa teq a'kut long haqloeng noeng a'liklong a'mphlaqi haq taek. 23Yaqkiyoeng Zakhariq khaw Boipaw a wotpyuq dun kyong duka a'bisaiyai khoeq bikawi haq a'mcawn kiloeq ima a'ciq toeq. 24A'khing a'tawncaw a'kla loeq Zakhariq peha Aeliqsabaet khaw a'hoen mawqateq yaq hna'taw khoeq kha'khlaw khlawhngaw blaiq khlaung haq tau wa citaq. 25Eliqsabaet loeqkhaw Boipaw loeq keiya ka'hoen mawqai khoeq a'khwai a'mpaek hni, Boipaw loeq a'hmoi a'mpaek hni klongoeng khlaung haqloeq a'mnuinauk haq duka khoeq ka'loet hni taeng a'hau. 26Aeliqsabaet a'hoen mawq khoeq khlawsoq a'moeiq loeq Boipaw loeq Boipaw mehon saw Gabelaqa Galilae plei Nazaraeq mloeqa teiq loeqteq 27Mariq taeng a'ming a'moeiq khoeq hngaukhngucaw poemak hma citloeq sa'taung a'hmyauk hoet sauk a'mtoeq. Mariq khoeq Dawoeiq mang myoewa a'kom khoeq Yawtaqa án paeki khoeq khlaung a'phlaet. 28Boipaw mehon saw loeqkhaw sa'taung a'hiq kiyoeng Mariqa Boipaw khoeq nang huitu moeiq loeqteq yaqhma khoeq a'laen khoeq hmaensei khaw nanga a'mphlaq hni taeng a'hau. 29Seiloeqkhaw Mariq loeq Boipaw mehon saw plau a'yauk loeq pi a'hau woe taeng yawcuwaq. 30Yaqkiyoeng mehon saw loeqkhaw pikhaw keiqai tiq Mariq oe. Boipaw loeq nanga a'hmawi a'mpaek hni. 31Nang khoeq hoen mawq tiloeqteq na'caw pa'taw caw na'taukiyai. Yaq ming khoeq Yesuq taeng a'ming na'paek laqai. 32Yaqkhoeq a'laen khoeq khlaung poemak phlaet loeqteq a'laenlang khoeq Boipaw caw taen án baekiyai. Boipaw loeqkhoeq yaq a'hampaw Dawoeiq mang khakhut yaq khlaung myoewa a'thinoen khoeq a'khwai a'paekai. 33Yaq loeq Yakouq myoe haqkhoeq daedae a'thin cong haqlai. Yaq khomcaeng khaw a'msum moeiq ta'ong daedae a'moeiq yai. 34Yaqkiyoeng Mariq loeqkhaw kei khoeq hngaukhngu ka'phlaet klongoeng nei haqkhoeq kha a'phlaet noenai yoe? taeng mehon sawa a'hiq. 35Mehon saw loeqkhaw cimcai muikhlaw khoeq nang hma lo loeqteq a'laenlang khoeq Boipaw a'tatoeng nanga a'mkupai. Yaqklongoeng yaq a'cimcai khoeq caw khoeq Boipawcaw taeng án baekiyai. 36Khlaung haqloeq a'caw tawyi theiqaq taeng án hau khoeq nang na'mawq Aeliqsabaet khaw a'hoen mawq khoeq towa khlawsoq a'moeiq hni. 37Boipaw loeq sainoengaq khoeq pikhaw moeiqyaq taeng a'hau. 38Yaqkiyoeng Mariq loeq kei khoeq Boipaw mya poemak ka'phlaet. Nang loeq keiya a'mhau khakhut Boipaw loeq a'loyi khut phlaet bacaek taeng mehon sawa a'hau. Yaqkiyoeng mehon saw khaw Mariq hma khoeq sot loeqteq a'ciq toeq. 39A'tawncaw a'moeiq loeq Mariq khaw ca'langi poeiq loeqteq Zakhariq omdun a'phlaet khoeq Yudaq pleiya a'moeiq khoeq tonghon mloeqcawa a'ciq. 40Yaq dun a'phaw loeq Zakhariq ima won loeqteq yaq paeha Aeliqsabaeta sa'taung a'hiq. 41Mariq loeq sa'taung a'hiq khoeq thai Aelisabaet loeq a'yauk kho wa a'hoen duka khoeq sa'mi caw khaw a'dawn. Aeliqsabaet khaw cimcai muikhlawong oeqcaq loeqteq Boipaw a a'mhlokthaq toeq. 42Aelisabaet loeq Mariqa Boipaw loeq nanga a'coe hna'taw haq thauka a'mpawinauk loeqteq nanga a'moeiq yai khoeq caw khaw a'pawi nauk a'laqi. 43Kei Boinu kei hma a'lo khoeq kyezu pi klongoeng keiloeq ka'laqi yoe? 44Nang loeq sa'taung a'mhiq thai a'yauka teq ka'hoen duka khoeq sa'mi caw khaw oeqcaq loeqteq a'dawn. 45Boipaw loeq a'hau khoeq plau a'sikcang taeng na'myumi klongoeng nang khoeq nana na'oeqcaq taeng a'thai bau woeng mpoq loeqteq a'hau. 46Yaqkiyoeng Mariq loeqkhaw kei mlung loeq Boipaw a ka'mhmloqthaq. 47Kei muikhlaw khoeq keiya a'mklawn khoeq Boipaw hma noeng a'oeqcaq. 48Kei khoeq a'naem haek khoeq Boipaw mya phlaet hang loeqkhaw Boipaw loeq a'hmyoeqaq. To ta'koeiq mcaq loeqteq a'lo wai khoeq caw ta'kum loeq keiya Boipaw pa'si a'laqi khoeq khlaung taeng a'mhau haqlai. 49A'tatoeng a'luiq khoeq Boipaw loeq mauknaukpha kyezu khoeq keiya a'msai hni. Yaq Boipaw ming khoeq a'cimcai hni. 50Boipaw hmyaensi khaw Boipaw a a'nkeiqhleiq a'nmkhoeqbyoeqi khoeq khlaung a'nmyoe a'ncaeng awluma a'taungi yai. 51A'nmlung a'hawni saw haqkhaw Boipaw a'thatoeng án cau poeiq yai. 52Boipaw loeq Hnyangphalang haqla yaqhniq nawna khoeq mkhom haq loeqteq a'mlung mhnaemisaw haqla a'mhlokthaq haqlai. 53Buq loeq a'boeqisaw haqla a'pawi khoeq ei ok paek haqloeq teq sa'thi haqla a'kut hongoeng a'teiq haq hni. 54Boipaw loeq a'mhmyaensi nauk haqkhoeq sa'diq laq uk loeqteq Boipaw bi a'sai louq saw Iqtayelaq khlaungmyoe haqla a'thin cong haq hni. 55Boipaw loeq kei hampaw a'phlaet khoeq Abarahan hma a'lo khoeq a'myoe a'caenga ka'diq a'paek haq khut saukak a'thin cong haq taeng Boipaw a ka'mhlokthaq. 56Mariq khaw Aelisabaetoeng khlawthum baung an omhom kiyoeng yaq ima a'ciqba toeq. 57Yaqkiyoeng Aeliqsabaet khaw a'caw a'taukiyai khing a'phaw loeq a'cawu pa'taw caw a'tauki. 58Aelisabaet imcaengpui haqloeq yaq myoesaw haqkhaw yaq hna'taw hona Boipaw hmyaensi a'laenoeng khoeq án hmuq khlongoeng yaq huitu án oeqcaq pawq. 59Sa'mi caw a'moeiq khoeq hnupsaet a'kla kiyoeng sa'micawa a'yephyhli meingala án paekai khoeq khlaung haq lo uk loeqteq sa'micawa Zakhariq taeng khoeq a'paw mingoeng án sui. 60Seiloeqkhaw sa'micawnu Aelisabaet loeq seiyaq yaqa Yawhan taeng khoeq mingoeng noeng ma'sui laqai taeng a'hau haq. 61Khlaung haq loeqkhaw yaq hna'tawa na'myoe duka nei bong ming teq moeiq yaq taeng án hau. 62Yaqklongoeng yaqhniq loeqkhaw sa'micawpaw a'phlaet khoeq Zakhariqa án kut long phlaqi uk loeqteq a'ming kha na'paek waiq yoe? taeng án hiq. 63Zakhariq loeqkhaw coksangphung chapak hiqi haq loeqteq yaq a'caw ming khoeq Yawhan a'phlaet taeng a'youka teq a'hmuq saw khlaung haq loeqkhaw nana án mauknauk. 64Yaqkiyoeng Zakhariq khaw saksang soiyi noeng ba loeqteq Boipaw a a'mhloqthaq toeq. 65Imcaengpui haqloeq myoesaw haqloeq yaqkha a'phlaet khoeqhaq án hmuq loeq án pahaiyi poeiq toeq. Khlaung awlum loeqkhaw yaq sa'taung khoeq Yudaq plei tonghona omdun ta'kuma án cauk toeq. 66Yaq sa'taung yauk saw khlaung haq ta'kum loeq nei sa'mi caw a'bau loeq pi bong khlaung a'phlaeta yoe? taeng hmotwaiq uk loeqteq án soiyi nauk. Piyawoe naka Boipaw a'tat khoeq sa'mi caw hui tu a'moeiq. 67Yaqkiyoeng cimcai muikhlaw khoeq Zakhariq hma kom loeqteq Zakhariq loeq Pa'rawphaeq plau woeng a'hau khoeq teq 68Iqtayelaq khlaungmyoe haq Boi a'phlaet khoeq Boipaw kyezu ka'hmlokthaq. Yaqkhoeq khlaungmyoe haq a'klawnai khoeq a'lo hni. 69Boipaw loeq yaq mya Dawoeiq hma a'kom khoeq a'tat a'laen khoeq a'klawn saw khoeq ka'hniq awlum tawiq ya a'mpaek haq hni. 70A'hnyoema Boipaw loeq a'cimcai khoeq Pa'rawphaeq haqla a'hau haq khakhut 71Nei a'tat a'laen khoeq a'klawn saw Boi loeq khlaungsei haq kuta khoeq a'mklon haqkhoeq tanaq keihniqa a'munisaw haq tau wa khoeqkhaw loet ong amsai paek haq hni. 72Boipaw loeq yaqhmyaesiyoeng keihniq hamnu hampaw haqla a'paek hoet khoeq ka'diq khaw a'taungi yai. 73Boipaw loeq ka'hniq hampaw a'phlaet khoeq Abarahana a'paek khoeq ka'diq a'moeiq khakhut, 74Keihniqa pawiyaq a'msai haqkhoeq khlaungsei haq kuta khoeq a'mhloeq haq loeqteq 75Keihniq kán sauk a'haeng sauksi Boipaw hmaungkauma pawicai cimcai uk hang loeqteq Boipawa kán mkhoeqbyoeqi laqai. 76Yaqkiyoeng Zakhariq loeq a'cawpawa nang khoeq a'hlung haek khoeq Boipaw Pa'rawphaeq taeng a'mbaeki uk loeqteq Boi a'lo dun laum khaw a'hmaungkauma klanyang paek saw khaw na'phlaetai. 77Boipaw loeq khlaung haqkhoeq a'plaeta hloeq haqloeq teq a'klawn haqlai klong khaw nang loeq khlaung haqla na'hau haqlai. 78Keihniq Boipaw hmyaensi khoeq mehona ka'ni a'lang khut keihniq hona lang loeqteq 79a'hyung dun loeq du dun lika a'om laq saw haq hona lang loeqteq keihniq kho khaw a'yaedam dun lauma a'mthaw paek haq lai. 80Sa'micaw khaw bau loeqteq a'muikhlaw a'yungtha woeng luiq loeqteq Iqtayelaq khlaungmyoe haq hmaungkauma a'lo hmaungkaum tau duka a'om.
Dewis Presennol:
Luke 1: ctpv-rv
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.