Luke 5
5
1Hnupakteq Boiyesuq khoeq Genetaraeq mlaetbaenga a'om tuna Khlaung haqkhaw Boipaw plauya án hnyinai tawiq ya yaq phaela án lo. 2Yaqkiyoeng Boiyesuq loeq mlaetbaenga a'khaen khoeq ngawman hlui longhneiq a'hmuq. Ngawmansaw haqkhaw yaqhniq hlui haq hyaq uk loeqteq ngawman dun poek haq ánbawt tun. 3Boiyesuq khaw yaq hlui haq tau wa khoeq Siqmou hluiya kawi loeqteq hlui khoeq mlaet baengoeng a'mkhaai khoeq a'hau. Yaqkiyoeng Boiyesuq khaw hluiya ngung loeqteq khlaung haqla a'mcokhaung haq. 4A'mcok hau haq kiloeq Siqmou wa hlui khoeq tui a'mthuk pa'toeng mtoeiq tiloeq poek khlawqe taeng a'hau. 5Siqmou loeqkhaw Boi yoe, keiloeq yanblaiq yaicong yaica suihang loeqkhaw thaekak khaw laqaq hang. Seiloeqkhaw Boi loeq keiya amtoeq nak loeq poek ka'khlawq ba lai taeng amsauki ba. 6Siqmou loeq yaq khlaung haqkhaw poek khlawq uk loeq ngaw a'nman bala teq poek haq tak poeiq waiqong ngaw thaengthaeng ánman laq. 7Yaqklongoeng yaqhniq loeq a'coe hluiya a'nmoeiq khoeq khlaung haqla yaqhniqa ánkuwai khoeq ánbaeki. Yaqhniq khaw án phaw loeq hlui longhneiqa dingding ánthoena hlui mlupwaiqong a'phlaet. 8Nei kha a'phlaet khoeqhaq a'hmuq laq khoeq Siqmou Petaruq khaw Boiyesuq ok kho wa ngung loeqteq Boi yoe kei khoeq a'plaet mawq ka'phlaet klongoeng keihma khoeq soti loeq cite taeng a'hau. 9A'klong teq Yaqdoe a'coe khlaung haq doeloeq yaqhniq a'nman khoeq ngaw thaengthaeng so uk loeqteq nana a'nmauqnauk klongoeng a'phlaet. 10Yaqtauwa Siqmou a'yapui hoeiq a'nphlaet khoeq Zebadae caw hoeiq Yakouq loeq Yawhan khaw anpaw. Yaqkiyoeng Boiyesuq loeqkhaw Siqmou wa keiqai tiq to ta'koeiq mcaq loeqteq nang loeq khlaung haqkhoeq kei ta'paiq phlaet uk loeqteq kei hnu amtoemi haqlai tawiq ya na'sai laqai taeng a'hau. 11Yaqkiyoeng yaqhniq loeq hlui haqkhoeq konga taung uk loeqteq a'moeiq khoeq hyaq poeiq uk loeqteq Boiyesuq hnu a'ntoemi.
Boiyesuq loeq a'mno poemak mniq a'mboei paek khoeq klong 12Yaqkiyoeng Boiyesuq khoeq mloeq mloeqaka a'moeiq tuna a'pum blaiq a'mno poeiq khoeq khlaung poemak khaw yaqa a'moeiq. Yaq loeq Boiyesuqa a'hmuq loeq Boi hmaungkauma Bok loeqteq Boi yoe, Boi na'mlung a'moeiq nak loeq kei mniq klok ong amsai hme taeng a'khawqi. 13Yaqkhowa Boiyesuq loeqkhaw yaq khlaunga a'kutoeng hmlaem loeqteq keiloeq ka'loeyi, klokcaek taeng a'hau loeq yaq a'mno khoeq saksang a'klok toeq. 14Yaqkiyoeng Boiloeqkhaw yaqa nei na'miq a'klok khoeq klong a'niya khaw hau wai tiq taeng a'sin kiyoeng Yahaenpaw hma citi loeq sauksi a'phlaetai tawiya nanga nang plaqi hoete. Yaqkiyoeng nang mniq a'klok tawiq ya Mawse peinyata a'moeiq khakhut puzaw hoete taeng a'hau. 15Seiloeqkhaw Boiyesuq sa'tau khoeq omdun ta'kuma a'hyayi poeiq klongoeng khlaung haqkhaw Boiyesuq loeq a'mcok hau haqkhoeq a'nkhawm louqi yai khoeq tawiq ya kaiyaq uk saw haqkhaw a'nmniqa khoeq a'klokai tawiq ya a'nlo. 16Seiloeqkhaw Boi khoeq khlaung haq hma khoeq sot loeqteq a'thin hiq duna suq a'tongi yai a'ciqthiq.
Boiyesuq loeq a'plaet mawq poemak plaet hloeq loeqteq a'mniq a'mboei paek khoeq klong 17Hnupakteq Boiyesuq loeq a'mcok hau tuna Galilae plei, Yudaq plei, Yeruqsalein mloeqa a'moeiq khoeq nam haqla khoeq a'nlo khoeq Phariqsae loeq klamhmotsaw haqkhaw yaq duna hngung uk loeqteq a'nom. A'mniq a'mboei noeng khoeq Boipaw a'tat khaw khlaung haq mniq a'klokai tawiq ya Boiyesuq oeng a'moeiq. 18Yaqduna Boiyesuq a'moeiq tuna khlaung Boengak loeq lilaeksaw poemak doengoeng laet uk loeqteq Boi hmaungkauma ánkhlawqai án sai. 19Seiloeqkhaw imduka khlaung thaengthaeng a'nmoeiq klongoeng ánlodun lawm moeiqyaqa teq imteiq mkhau uk loeqteq Boiyesuq hmaungkauma doengoeng laet uk loeqteq ánkhlawq. 20Yaq khlaung haqloeq Boiya nana a'nmyumi khoeq so haqloeq teq yaq khlaunga yapuiyoe nang na'plaet haq kamhloeq hni taeng a'hau. 21Yaqateq Phariqsae haq klam hmotsaw haqloeq Boipawa lawn loeqteq a'hau khoeq a'ni yoe? Boipaw a khoeq lawi loeqteq a'ni loeqkhaw a'plaet hloeq uk loeq laqaq uk taeng án mkhin. 22Seiloeqkhaw Boiyesuq loeq yaqhniq mkhin a'hmawt haq klongoeng yaqhniqa nanghniq mlunga piya na'nmyangi naukoe? 23Nang na'plaet ka'mhloeq hni taeng má hau khoeqloeq tho tiloeq cite taeng má hau khoeq baung plau a'lawi haekoe? 24Seiloeqkhaw khlaungcaw loeq nei somdaeka a'moeiq khoeq a'plaet haq a'hloeq noeng khoeq a'khwai a'moeiq khoeq nanghniqa ka'mphlaq haqlai taeng hau loeqteq, yaq lilaeksawa keiloeq nanga ka'mhauwai, thowe, nang doeng hlok tiloeq ima cit hne taeng a'hau. 25Yaqkha a'hau loeq saksang yaqklaung khaw khlaung hmaungma tho loeqteq yaq a'hyong nauk khoeq doeng hlok loeqteq Boipaw a hmlokthoq loeqteq ima a'plan toeq. 26Khlaung haq loeqkhaw mauk nauk uk loeqteq nana a'mauk nauk pha khoeq hmuqlong ka'hniq loeq ta'hnupa kán hmuq laqhni taeng hau uk loeqteq Boipaw a ánhmloqthaq.
Boiyesuq loeq Lewiqa yaq ta'paiq a'phlaetai khoeq tawiq ya a'baeki 27Yaqhaq a'phlaet poeiq kiyoeng Boiyesuq khaw yaqa khoeq sot loeqteq lewiq taeng a'ming a'moeiq khoeq a'kawn koksaw poemak khoeq a'khawn kokdun taiya a'ngung khoeq a'hmuq. Boiyesuq loeqkhaw kei hnu woeng amtoemiye taeng a'hau. 28Yaqklongoeng lewiq khaw yaqbi hyaq loeqteq Boiyesuq hui tu a'toemi.
A'plaet mawq haqloeng a'ei khoeq klong 29Yaqkiloeq ei-ok pawi laenoeng lewiq loeq yaq ima Boiyesuq loeq yaq ta'paiq haqla buq a'hyoeq haq. A'coe a'khon koksaw loeq koei haq khaw a'muq buq eiya án lo. 30Phariqsae haq klam hmotsaw haqloeq Boi ta'paiq haqla nanghniq loeq nei a'khawn koksaw loeq a'coe pawi yaq uk khoeq haqloeng piya a'nei-ok homoe taeng a'nsaw a'nhloknauk. 31Boiyesuq loeq a'msauki haq ba khoeq teq a'kaiyisaw haqloeq sa'lawon loeyiyaq uk. Kaiyaqsaw haqloeq noeng sa'lawon a'nloeyi. 32Khlaungpawi haq tawiq ya kei ka'lo khoeq seiyaq. Seiloeqkhaw pawi yaq khoeq khlaung haq a'plaeta khoeq sa'diq a'nlaq ba lai tawiq ya ka'lo khoeq noeng taeng a'hau haq.
Ei án hmuti khoeq klongoeng Boiyesuq a'hiq a'laqi khoeq klong 33Phariqsae haq klam hmotsaw haqloeq Boiyesuqa Yawhan loeq yaq ta'paiq haqloeq ei hmuti uk loeqteq ta'nak ta'nak suq an tongi theiq. Phariqsae ta'paiq haqkhaw yaq khakhut án sai theiq. Seiloeqkhaw nang ta'paiq haqteq ei-ok uk loeqteq a'coe haq khut piya ei-ok songiya uk koe? taeng án hiq. 34Boiyesuq loeqkhaw koeipawiya lo saw haqkhoeq cawthapaw hui tu án moeiq kho wa ei án hmuti noengai moe? Yaqkhakhut a'ni loeqkhaw saiyaq uk. 35Seiloeqkhaw cawthapaw khoeq yaqhniq hma khoeq a'nciqi pui nauk khing phaw loeq yaqhniq loeq ei ok ta'ong ei a'nsongi yai taeng a'hau haq. 36Yaqkiyoeng Boiyesuq loeq yaqhniqa pung pungak amthumi nauk haqkhoeq teq a'ni loeqkhaw wawtphaem khoeq wawtcaq thawoeng bu hlaq. A'bu nak loeqkhaw wawtphaem khoeq bat poeiq loeqteq a'tak poeiq yai. 37Ca'pyeit wai a'tha khoeq sa'libuphaema a'ni loeqkhaw thoenak. Yaqkha a'thoen loeq ca'byeit hau thawoeng sa'libuphaem bat poeiq loeqteq ca'byeit haung khaw a'bo poeiq yai. 38Yaqklongoeng ca'byeit haungtha khoeq sa'libu tha a noeng a'thoen laqai. 39Ca'byeit haungphaem a'ok kisaw khoeq ca'byeit haungphaem a'aep taeng hau loeqteq ca'byeit haungtha a'ok kai khoeq mlung moeiqcaq taeng a'hau haq.
Dewis Presennol:
Luke 5: ctpv-rv
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.