Rukaxi 20
20
Ketsutsi heitserie kemɨrexeiyakai
(Ruk 20:1-8 – Mat 21:23-27, Mar 11:27-33)
1Merikɨtsɨ heiwa teɨteri tiwa'ɨkitɨakaku tuki 'amɨpa kuraruyarita, niuki 'aixɨa manuyɨne wakuxaxatɨwakaku, mawari wewiwamete tewa'aitɨwamete meta 'inɨarikɨ memɨte'ɨkitametetɨkai meta 'ukirawetsixi hurawa mekaniukɨne. 2Mɨpaɨ mekatenita'iwawiya:
—Ketatineutaxatɨa, ¿Hakewa miemekɨ heitserie pehexeiyatɨ mɨya pepɨtiyuriene? ¿Kemɨ'ane mɨkɨ heitserie pɨmatsi'upitɨa?
3Ketsutsi mɨpaɨ katiniwaruta'eiya:
—Netatsiere nepɨxeta'iwawiya xeme. Yaxekeneteneutahɨawi: 4Wani kemɨti'ɨyanekai, ¿taheima timiemetɨkai, nutsu teɨteri wahetsɨa pɨmiemetɨkai?
5Mɨkɨ, mɨpaɨ mekateniyutahɨawekaitɨni: «Xɨka tame mɨpaɨ te'utiyuani: “Taheima makawe pipitɨakai”, mɨkɨ mɨpaɨ pɨtatitahɨawe: “Merikɨte, titayari yuri xekate'ita'eriri”. 6Xɨkata mɨpaɨ te'utiyuani: “Teɨteri mepipitɨakai”, yunaitɨ teɨteri tetekɨ mepɨtatsitituaxa, yuri memɨte'eriekɨ kename Wani Kakaɨyari niukameya hɨkɨtɨkai».
7Hikɨ mɨpaɨ mekatenita'eiya:
—'Atsitepɨkatemate hakewa mieme mepitɨariekai.
8Mɨkɨta mɨpaɨ katiniwarutahɨawe:
—Merikɨte, neta 'atsinepɨkatixetahɨawe kemɨ'ane heitserie mɨnetsi'upitɨa yanemɨtiyurienenikɨ 'ikɨ naime.
Te'ɨwiyamete 'axamemɨte'u'iyari niukiyari
(Ruk 20:9-19 – Mat 21:33-46, Mar 12:1-12)
9Merikɨtsɨta kaniwarutaxatɨani teɨteri 'ikɨ 'ɨxatsi 'inɨarikɨ mɨtikuxata mɨpaɨ 'utaitɨ:
—Tewi kaxie haraweriyari kaniutawewieni, te'ɨwiyamete kaniwaruhɨritɨani wakwetatɨatɨ, hikɨ 'ateewa paitɨ kaneyani mɨixa heuyehunike. 10Hikɨ tukari 'aye'aku matikwakwaxetsie, xeime ti'uximayatame kaniutanɨ'ani te'ɨwiyamete wahetsɨa memiyetuirienikɨ harawerita timieme yapaɨmeme kutsiyari hetsiemieme. Peru te'ɨwiyamete mekanitiwaxɨani meta yumaweme mekanenɨ'ani. 11Hikɨ tawarita xeime ti'uximayatame kaniutanɨ'ani, peru mɨkɨta mekaneitiwaxɨani, mekanititieni meta yumaweme mekanenɨ'ani. 12Tawari hairieka xeime kaniutanɨ'ani, mɨkɨta mekanixuritɨani meta mekaneyeweiya.
13»Hikɨ kaxie haraweriyari kutsiyari mɨpaɨ kaniutayɨni: “¿Keri netiyurieni? Neniwe nepanunɨ'ani neminaki'erie, yurikɨ mɨkɨ hɨrixɨa mekanetimakakuni”. 14Peru, kepauka te'ɨwiyamete memixei, niuki mekaniutixɨatɨatɨkɨne mɨpaɨ me'utiyuatɨ: “'Ikɨ hetsie 'arike katininakimɨkɨ kutsiyari tipiinieya. Hikɨmɨ tepimieni, tita hetsiena mɨtinakekekai tapiini pɨrayani”. 15Hikɨ haraweri warie mekaneikahɨani meta mekanimieni.
»¿Kewayurieni haraweri kutsiyari? 16Kaninuamɨkɨ, kaniwakwimɨkɨ mɨkɨ te'ɨwiyamete, hipame pɨta kaniwahɨritɨamɨkɨ yuharaweri».
Mɨkɨ memɨ'enanakai mɨpaɨ mekaniutiyuani:
—Mɨpaɨ mɨkatiniuyɨnike.
17'Iya waxeiyatɨ mɨpaɨ kaniutayɨni:
—Merikɨte, xɨka mɨpaɨ katiuyɨni, ¿titayari 'ipaɨ raine 'utɨarika:
»“Mɨkɨ teté memitixani'eri kii wewiwamete,
mɨkɨ teté 'itsikina mieme kanayani”?
18Yunaitɨ mɨkɨ tetetsie memɨkaxɨrieni mepɨtanexɨani, xɨka mɨkɨ teté xeime hetsie 'ukaweni, kwauni xeikɨa pɨtanexɨani».
19Merikɨtsɨ 'ana mɨkɨ 'inɨarikɨ memɨte'ɨkitametetɨkai meta mawari wewiwamete tewa'aitɨwamete mekatenikuwautɨwekaitɨni kememɨte'iwiyakɨ, mɨpaɨ metehetimaika mɨkɨ mɨwaxatakaikɨ mɨkɨ 'ɨxatsi hepaɨtsita ti'ɨkitatɨ, peru mekaniwamakarɨkaitɨni teɨteri.
Kuwiyexinu tuminieya
(Ruk 20:20-26 – Mat 22:15-22, Mar 12:13-17)
20Hikɨ me'itihupienike mekaniwarutanɨ'ani 'awie nenieremete teɨteri heitseriemekɨ yamemɨtekahu wahepaɨ meteyumaikame. Me'iwiyame niukieyakɨ mekaniyetuanikekaitɨni, kuwexinaruri mita'iwawiyakɨ 'itsɨkame.
21Hikɨ mɨkɨ mekaniku'iwawiyakaitɨni mɨpaɨ me'utiyuatɨ:
—Ti'ɨkitame, tame tepɨtemate 'ekɨ heitseriemekɨ pepɨtikuxata, heitseriemekɨ pepɨti'ɨkita. Yɨkɨ pepɨkatiwaxeiya teɨteri, matsi Kakaɨyari huyeya hepaɨtsita pepɨti'ɨkita yurikɨ. 22¿Ti'aitame Tsetsaxi tumini kemɨtiwawa, 'aixɨa ti'ane temɨteyutuaka nutsu pɨkatixaɨ?
23Timaitɨ kememɨte'i'irɨwiyakai, mɨpaɨ katiniwarutahɨawe:
—Titayari xenete'inɨatatɨwe. 24Tumini xekeneneuxeitsitɨa. ¿Kepai ramu'u pɨra'uxa, kepai pɨra'utɨarika?
Mɨkɨ mɨpaɨ mekatenitahɨawe:
—Tsetsaxi mu'uya kanihɨkɨtɨni meta pɨ'utɨarikaya.
25Mɨpaɨ katiniwarutahɨawe:
—Kamɨtsɨ xeketeneyetua Tsetsaxi hetsɨa tita Tsetsaxi hetsɨa mɨtimieme, meta xeketeneyetua Kakaɨyari hetsɨa tita Kakaɨyari hetsɨa mɨtimieme.
26Mepɨyutatexi niukieyatsie me'iwiyakutɨ teɨteri wahɨxie, mehɨxiyatɨ mɨya mɨtiwarutahɨawixɨkɨ, kayuwatɨ mekaniutamare.
Mɨkite kememɨte'anuku'uni hepaɨtsita
(Ruk 20:27-40 – Mat 22:23-33, Mar 12:18-27)
27Merikɨtsɨ hipatɨ tsarutseutsixi mekaniu'axɨani, mɨpaɨ memutiyuanekai kename mɨkite meka'anuku'uwe, hikɨ mɨpaɨ mekatenita'iwawiya:
28—Ti'ɨkitame, Muitsexi mɨpaɨ katiniu'utɨani tahetsiemieme, tewi xɨka 'umɨni xɨka 'uka 'uku'eirieni tɨɨri kawarayexeiyawetɨ, mutaya kanitiwitɨmɨkɨ yukwe, tɨɨri mɨwarayexeiya matsieya nuiwarieya memakɨnekɨ. 29Merikɨtsɨ 'amenititekaitɨni 'iwamarixi 'atahuta meyupaɨmetɨ. Wamatsika 'utineɨkeka kaniumɨni tɨɨri kawarayexeiyawetɨ. 30Hikɨ hutarieka mieme 31meta hairieka mieme mekanitiwitɨni mɨkɨ 'uka, mɨpaɨ yaxeikɨa 'atahutatɨ yunaitɨ mekaniukwini tɨɨri mekawarayexeiyaka. 32'Imatɨrieka, kaniumɨnita 'uka. 33Merikɨte, kepauka xeniu memanuku'uni, 'atahutatɨ memitiwitɨ, ¿kemɨ'ane ra'ɨya pɨrayani?
34Hikɨ Ketsutsi mɨpaɨ katiniwarutahɨawe:
—Hikɨ miemete teɨteri mepɨneneɨke mepɨwikie. 35Mɨkɨ wahetsie mɨtinake mɨkɨ kwie mɨhekwatsie memaye'axɨanikɨ, wahetsie mɨtinake memanuku'unikɨ mɨkite watsata, mɨkɨ mepɨkatineɨkixɨani meta mepɨkatiwikitɨariexɨani. 36Mɨkɨ meta, 'ana mepɨkayɨwaweni tawari memɨkwinikɨ, Kakaɨyari niukieya tuayametemama wahepaɨ mepɨ'aneneni. Matsi Kakaɨyari niwemama mekanihɨkɨtɨni, mɨkɨ memanuku'uikɨ. 37Mɨkite kememɨte'anuku'uni, mɨpaɨta Muitsexi katiniu'ɨkita, yuxapatsie hakewa 'ɨtsi maxaxata, mana Ti'aitame mɨpaɨ pɨrahɨawe: “'Apɨrahami, 'Itsahaki meta Kakuwu wakakaɨyari”. 38'Ayumieme mɨkite pɨkawaxata kename wakakaɨyari maine, memayeyuyuri pɨta wakakaɨyari kaniyuxatani, tsepa memukwi, yunaitɨ mɨkɨ mepayeneniere hepaɨtsitana.
39Hikɨ mɨkɨ 'inɨarikɨ memɨte'ɨkitametetɨkai hipatɨ mɨpaɨ mekatenitahɨawe:
—Ti'ɨkitame, 'aixɨa pepaine.
40Hikɨ tawariri mepɨkayuwaɨri tixaɨtɨkɨ memɨte'ita'iwawiyakɨ.
Kɨritsitu kemɨ'ane pɨranuiwari
(Ruk 20:41-47 – Mat 22:41–23:7, Mar 12:35-40)
41Hikɨ mɨpaɨ katiniwarutahɨawe Ketsutsi:
—¿Titayari mɨpaɨ mete'utiyuane kename Kɨritsitu Rawiri nuiwarieya hɨkɨ? 42Mɨkɨ Rawiri tɨtɨ kwikari xapayaritsie mɨpaɨ kanaineni:
»“Ti'aitame mɨpaɨ katiniutahɨawe Neti'aitɨwame:
‘Netserieta kenakani,
43ne nekaniwaka'unamɨkɨ memɨmatsi'aye'unie,
'ahɨxie nekaniwa'atɨamɨkɨ’ ”.
44Rawiri “Neti'aitɨwame” Kɨritsitu katiniuterɨwani, ¿kehapaɨtɨtɨ nu'aya pɨhɨkɨtɨni?»
45Merikɨtsɨ yunaitɨ teɨteri me'i'eniekaku mɨpaɨ katiniwarutahɨawe teyɨ'ɨkitɨwamete:
46—Xekeneyukweriwayurieka mɨkɨ 'inɨarikɨ memɨte'ɨkitamete wahepaɨtsita. Mɨkɨ pɨwanake 'etɨtɨme me'anakatɨtɨ memeu'uwanikɨ, meta yemekɨ pɨwanake waɨritsika memɨpitɨarienikɨ kiekari hixɨapa meta teɨteri wahɨxie memayaxekɨ tuki 'etsimɨpepeta, meta kiekame 'aurie memayaxekɨ 'ixɨararipa. 47Mɨkɨ wiuratsixi wapiini mepɨtewarutixɨtɨiri, meta 'emepɨteheutetere meyunenewietɨ mɨkamatsiɨkɨnikɨ kememɨteyurie. Mɨkɨ wahetsie matsi waɨkawa katinahɨiyamɨkɨ.
Dewis Presennol:
Rukaxi 20: hch
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2020, Wycliffe Bible Translators, Inc.