Matalikilo 4
4
Kaini mbwaakajaya Abelo
1Lino Adamu wakaswanana a-Eva banakwe, nkabela wakaminta, wazyala Kaini, wati, Ndajana muntu kuli-Jehova. 2Alimwi wakazyala lwabili, wazyala munyina Abelo. Nkabela Abelo wakaba sikweembela imbelele, pele Kaini wakaba sikupanda nyika. 3Lino necakaba ciindi, Kaini wakaletela Jehova cituuzyo camicelo yanyika. 4#Kul 13:12; 34:19; Lev 27:26; My 18:17; Tus 3:9; Bab 6:21Alakwe Abelo wakaleta kabalwebalwe wambelele amafuta aazyo. Lino Jehova wakabotelwa Abelo acituuzyo cakwe, 5#Heb 11:4; Matl 3:16pele Kaini acituuzyo cakwe takwakamubotelwa pe. Nkabela Kaini wakakalala loko, abusyu bwakwe bwakasyulungana. 6Mpawo Jehova wakaambila Kaini kuti, Ino wakalalilanzi? Nkaambonzi busyu bwako bulisyulungene? 7Na wacita kabotu, sa tokooyoonyampuzigwa na? Pele na tociti kabotu, zibi zilakubutilila kumulyango, Lino uyoosukama nduwe, nkabela uyoomweendelezya.
8 #
Mt 23:35; Lk 11:51; 1 Joh 3:12-15; Jud 1:11 Lino Kaini wakaambila munyina Abelo kuti, Atweende musokwe. Nkabela nebakali musokwe, Kaini wakanyampukila Abelo munyina, wamujaya. 9Elyo Jehova wakabuzya Kaini kuti, Uli kuli Abelo mwanike wako? Wakaamba kuti, Nsimubwene pe. Sa ndime sikulela mwanike wangu? 10#Heb 12:24; Ciy 6:10Lino wakati, Ma! Wacitanzi? Ijwi lyabulowa bwamwanike wako lilandikwiilila kuzwa muvu. 11#Dt 28:15-20; Gal 3:10; Job 16:18Lino sunu wajana lutuko kuvu elyo ndilyonya ilyanywa bulowa bwamwanike wako buzwa kujanza lyako. 12Nozoolima ivu, talikooyookupa limbi inguzu zyalyo. Uyooba sikweendeenda asimutuntuli ansi. 13Mpawo Kaini wakaambila Jehova kuti, Kuumwa kwangu nkunjumwide nkupati kampatila. 14Ncobeni buzuba obuno wanditanda kuzwa kunyika, aboobo njoosiswa kumeso aako, Njooba sikweendeenda asimutuntuli munyika, nkabela kufumbwa muntu uundijana uyoondijaya. 15#Ezk 9:4,6Mpawo Jehova wakamwaambila kuti, Mbubo, Kufumbwa muntu uujaya Kaini uyooindulwidwa kupegwa mulandu ziindi zili musanu azibili, Nkabela Jehova wakabikila Kaini citondezyo, kuti umwi aumwi uumujana atamujayi.
Mizukulu ya-Kaini
16 #
2 Bam 13:23; 24:20; Jer 23:39; 52:3 Lino Kaini wakazwa kubusyu bwa-Jehova, waakukala munyika yaNodi iili kujwe lya-Edeni. 17#Int 49:11Elyo Kaini wakaswanana amukaakwe, nkabela wakaminta, wazyala Enoki. Alimwi wakayaka munzi, lino oyo munzi wakauulika izina lya-Enoki mbubonya mbuli izina lyamwaanakwe. 18Lino Enoki alakwe wakazyalilwa Iradi, alakwe Iradi wakazyala Mehujaeli, alakwe Mehujaeli wakazyala Metusaeli, alakwe Metusaeli wakazyala Lameki. 19Lino Lameki wakakwata banakazi bobile; izina lya umwi kali Ada, azina lyawabili kali Zila. 20Nkabela Ada ngowakazyala jabali, ngonguwe wisaabo boonse bakala mumatente akweembela iŋombe. 21Azina lyamwanike wakwe kali Jubali, ngonguwe wisaabo boonse balizya kantimbwa anyeele. 22Alakwe Zila wakazyala Tubala-Kaini, ngonguwe iwakali kufula zibelesyo zyoonse zyamukuba azyabutale. Amucizi wa-Tubela-Kaini kali Naama.
23Lino Lameki wakaambila banakazi bakwe kuti,
Ada a-Zila, amuswiilile ijwi lyangu.
Nubanakazi ba-Lameki amuteelele majwi angu.
Nkaambo ndajaya muntu iwakandiyasa,
Ndanyonyoona mulombe nkaambo kakunduuma.
24Kaini ulatemwa mulandu ziindi zili musanu azibili.
Sa Lameki takooyootemwa ziindi zili makumi aali musanu aabili amusanu azibili na?
Seti mbwaakazyalwa
25Lino Adamu wakaswanana alimwi abanakwe, nkabela wakazyala mwana mulombe. Lino wakamuulika izina lya-Seti, nkaambo wakati, Leza wandipa mwana umbi mucibaka ca-Abelo, Kaini ngwaakajaya. 26#Matl 6:2; 1 Bam 18:24; Int 116:17; Joel 2:32; Zef 3:9; Joh 1:12; Inc 15:17; 1 Kor 1:2Alakwe Seti wakazyalilwa mwana, nkabela wakamuulika izina lya-Enosi. Mpoonya awo bantu bakatalika kukomba muzina lya-Jehova.
Dewis Presennol:
Matalikilo 4: Ibbaib63
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible in Tonga (Zambia) © United Bible Societies, 1963.