Mātaio 12
12
Te tūranga nō runga i te Sābati
(Māreko 2.23-28; Luka 6.1-5)
1 #
Deut 23.25
I taua tuātau ra tō Iēsū 'aere'anga nā roto i te au koro sītona ra i te Sābati, kua pongi 'oki tāna au pipi, ē kua 'akamata i'ora i te 'uti'uti mai i ēta'i 'ua sītona ē kai i'ora. 2I te kite'anga te au Phārīsea i tēia, kua nā kō maira rātou ki a Iēsū, “Inā, tē rave nei tā'au pipi i te mea tikakore i te Ture kia rave i te Sābati.”
3 #
1 Sam 21.1-6
Kua pa'u atura a Iēsū, “Kāre āina kōtou i tatau i tā Dāvida i rave, i aia ē tōna au taeake i te mate pongi'anga? 4#Lev 24.9Kua tomo aia ki roto i te 'are o te Atua, ē kua kai aia ma tōna au taeake i te au varāoa o te aroaro ko tei kore i tika i te Ture kia kai rātou, māri 'ua rā nā te kau ta'unga anake ra. 5#Num 28.9,10Mē kāre rā, kāre āina kōtou i tatau i tei roto i te Ture ra ē, i te au Sābati ra tē 'akanoanoa nei te kau ta'unga i roto i te 'iero i te rā Sābati ē tē ti'amā ra rāi rātou? 6Tē karanga atu nei rā au ki a kōtou, tei konei tēta'i tei ma'ata atu i te 'iero. 7#a: Māt 9.13; b: Hos 6.6Nāringa kōtou i kite i te 'āite'anga o ēia nei tuatua ra ē, ‘Ko te aro'a tāku e anoano, kāre ko te 'ātinga,’ kāre i a kōtou e 'aka'apa mai i te aronga 'arakore. 8Ko te Tamaiti 'oki a te Tangata nei, ko te 'Atu rāi ia o te Sābati.”
Ko te tangata rima 'akamate
(Māreko 3.1-6; Luka 6.6-11)
9Mei taua ngā'i atura aia, 'aere atura a Iēsū ki roto i tō rātou sūnago, 10ē inā, tei reira tēta'i tangata rima 'akamate. I te kimi'anga atu i tēta'i rāvenga 'ei tāpepe atu i a Iēsū, kua ui maira rātou ki aia, “'E tika āina i te Ture kia 'akaora i te rā Sābati?”
11 #
Luk 14.5
Kua karanga atura aia ki a rātou, “Mē 'e 'okota'i māmoe a tēta'i 'ua atu i a kōtou na, ē kua topa ki roto i tēta'i rua i te rā Sābati, kāre āina kōtou e rave atu i te reira, ka kika mai ei ki runga? 12Mei te a'a roa atu tō tēta'i tangata pu'apinga i tō tēta'i māmoe! Ē nō reira, 'e mea tika i te Ture kia rave i te meitaki i te rā Sābati.” 13Kua karanga atura a Iēsū ki taua tangata i reira ra, “Ka 'akatika maina i tō rima.” Kua 'akatika roa maira aia, ē kua ora tākiri rava akera, mei tēta'i katoa ra i te meitaki. 14Kua 'aere atura te au Phārīsea ki va'o ē kua kotikoti kupenga e 'akapē'ea i te tā i a Iēsū.
Te tāvini 'iki'ia e te Atua
15I te nakiro'anga a Iēsū i tēianei mea, kua 'aere kē atura aia mei taua ngā'i ra. 'E mānganui tei āru atu i aia, ē kua 'akaora atura aia i tō rātou au maki kātoatoa, 16ma te 'akamatakite atu i a rātou ē, auraka rātou e 'a'aki ē ko 'ai aia. 17Ko te 'akatupu'anga tēia i tei tuatua'ia mai nā roto i a Īsaia peroveta ra i te nā kō'anga maira ē,
18 #
Isa 42.1-4
“Inā! Tēia taku tāvini tei 'iki'ia e au ra,
ko tāku i 'akaperepere, kua rekareka rava tōku ngākau i aia.
Ka tuku au i tōku Vaerua ki runga i aia,
ē nāna e tuku atu i te tuatua tau ki te au bāsileia.
19Kāre aia e taumārō atu ē kāre e 'akateitei atu i te reo,
ē kāre tēta'i 'ua atu e 'akarongo i tōna reo i te au arāta'a ra.
20Ko tēta'i kāka'o paruparu ra, kāre aia e 'a'ati,
ē te lāmepa matemate ra, kāre aia e tīnai,
kia 'akatupu rava aia i te tuatua tau kia 'autū ra.
21Ē i roto i tōna ingoa e tuku ei te au bāsileia i tō rātou mānakonako'anga.”
Ko Iēsū ē Bēlezebūba
(Māreko 3.20-30; Luka 11.14-23; 12.10)
22Kua 'apai maira rātou ki a Iēsū i tēta'i tangata uru'ia e te dēmoni. 'E matapō 'oki aia ē te mūrare. Kua 'akaora atura a Iēsū i aia, kia rauka i aia i te tuatua ē te kite. 23Kua vā 'ua i'ora te tangata tini kātoatoa ē kua nā kō akera, “Kāre āinei tēia ē ko te tamaiti a Dāvida?”
24 #
Māt 9.34; 10.25 Kia 'akarongo akera rā te au Phārīsea i tēia mea nei, kua nā kō maira rātou, “I nā roto 'ua i te mana o Bēlezebūba, te tūtara o te au dēmoni ra, i rauka ai i tēianei tangata i te tuaru atu i te au dēmoni ki va'o.”
25Kua kite atura a Iēsū i tō rātou manako, ē kua nā kō atura ki a rātou, “Ko te bāsileia i mavete i aia 'ua'orāi, e pou ia. Ē ko te 'ōire, mē kāre ra, ko te ngutu'are tangata i mavete i aia 'ua'orāi, kāre ia e mou. 26Mē tuaru a Sātani i a Sātani ki va'o, kua mavete aia i aia 'ua'orāi. Ka 'akapē'ea i reira tōna bāsileia e mou ei? 27Ē mē tē tuaru nei au i te au dēmoni ki va'o i te mana o Bēlezebūba ra, nō 'ai te mana i tuaru ei tō kōtou au tangata i a rātou ki va'o? Ē nō reira, ko rātou ia tō kōtou au 'akavā. 28Mei te mea rā ē, tē tuaru nei au i te au dēmoni ki va'o ki te Vaerua o te Atua, kua roko'ia i'o nei kōtou i reira e te bāsileia o te Atua. 29E 'akapē'ea e rauka ai i tēta'i 'ua atu tangata i te tomo atu ki roto i te 'are o tēta'i tangata māro'iro'i ē te rave atu i tōna au 'apinga, māri 'ua kia nā mua aia i te tāpekapeka atu i te tangata māro'iro'i ra? 'Ei reira e rauka ai i aia i te 'aru atu i tōna 'are.
30 #
Mār 9.40
“Ko ia tei kore i konei i āku nei, 'e 'enemi ia nōku; ē ko ia tei kore māua e 'akaputuputu kāpipiti, tē 'akapue'urikiriki kē ra aia. 31Ē nō reira, e 'akakite atu au ki a kōtou: e 'akakore'ia te au 'ara rava rāi ē te 'akakino Atua a te au tangata nei; kāre rā te 'akakino i te Vaerua ra e 'akakore'ia. 32#Luk 12.10Ko tēta'i 'ua atu tangata tei tuatua kino i te Tamaiti a te Tangata nei, e 'akakore'ia tāna 'ara; kāreka tēta'i 'ua atu tangata tei tuatua kino i te Vaerua Tapu ra, kāre tāna 'ara e 'akakore'ia i tēianei ao, ē kāre katoa 'oki i te ao ā muri atu.”
Tēta'i pū rākau ē tōna au 'ua
(Luka 6.43-45)
33 #
Māt 7.20; Luk 6.44 “Kia 'ākono meitaki'ia tēta'i pū rākau ra, ka meitaki katoa ia tōna au 'ua; mē kāre rā, kia kore e 'ākono meitaki'ia tēta'i pū rākau ra, ka kino katoa ia tōna au 'ua. Ka kitea'ia rāi te tū o tēta'i pū rākau i runga i tōna au 'ua. 34#a: Māt 3.7; 23.33; Luk 3.7; b: Māt 15.18; Luk 6.45Ē kōtou, te 'anaunga vīpera ē, 'e a'a e tikāi i a kōtou, te aronga kino nei, kia tuatua mai i tēta'i 'ua atu mea meitaki? Nō te kī 'oki o te ngākau ra e tuatua ai te va'a. 35E tuku mai te tangata meitaki i te au mea meitaki mei roto mai i te meitaki i 'akaputu'ia i roto i aia; ē, e tuku mai te tangata kino ra i te au mea kino mei roto mai i te kino i 'akaputu'ia i roto i aia.
36“Tē 'akakite atu nei rā au ki a kōtou ē, ka 'akavā'ia te au tangata rava rāi i te rā o te 'akavā'anga ra, nō te au tuatua pu'apingakore kātoatoa i tuatua'ia e rātou. 37I tā'au ra au tuatua 'oki e 'akaora'ia ai koe, ē i tā'au ra au tuatua e 'aka'apa'ia ai koe.”
Te mānono'anga nō tēta'i semeio
(Māreko 8.1-12; Luka 11.29-32)
38 #
Māt 16.1; Mār 8.11; Luk 11.16 Kua tuatua maira i reira ēta'i Phārīsea ē te au Pū'āpi'i Ture ki a Iēsū, nā kō maira, “E te Pū'āpi'i, tē 'inangaro nei mātou kia kite i tēta'i 'akairo ūmere tikāi mei a koe maina.”
39 #
Māt 16.4; Mār 8.12 Kua pa'u atura aia, “'E uki kino ē te 'akaturi tēia e pati mai nei i tēta'i 'akairo ūmere tikāi. Kāre tākiri rā ia e 'ōronga'ia atu, māri rā i te 'akairo o te peroveta ra i a Iōna. 40#Ion 1.17Mei a Iōna 'oki i roto i te kōpū o tēta'i ika ma'atama'ata e toru ao ē e toru 'oki pō, mei te toru ao ē te toru pō katoa te Tamaiti a te Tangata nei ki raro i te 'enua ra.
41 #
Ion 3.5
“E tū katoa mai te au tangata o Nīneve ki runga i te 'akavā'anga ra ma tēianei uki ē ka 'aka'apa mai i a rātou, nō te mea, kua tatarā'ara rātou i te ako'anga'ia atu rātou e Iōna; ē inā, tei konei tēta'i tei ma'ata atu i a Iōna. 42#1 Arik 10.1-10; 2 Par 9.1-12E tū katoa mai te ariki va'ine nō 'apatonga ki runga i te 'akavā'anga ra ma tēianei uki ē ka 'aka'apa mai i a rātou, nō te mea, i 'aere mai aia mei te 'openga mai o tēianei ao e 'akarongo i te tuatua pakari a Sōlomona; ē inā, tei konei tēta'i tei ma'ata atu i a Sōlomona.”
Te 'oki'anga mai o te vaerua vi'ivi'i
(Luka 11.24-26)
43“Kia riro mai tēta'i vaerua vi'ivi'i ki va'o mei roto mai i tēta'i tangata, kua 'ā'āere 'ua i'ora ia nā te au ngā'i pāpā marō ra i te kimi'anga i te 'akangāro'i'anga, ē kāre akera e kitea. 44I reira aia e nā kō ei, ‘Ka 'oki au ki te 'are i 'akaruke'ia e au.’ Kia tae mai aia ra, kite i'ora aia ē, kāre e no'o'ia 'aka'ou ana, kua oti i te purūmu'ia, ē kua 'akamānea'ia ia. 45Kua 'aere atura aia e rave maira e 'itu au vaerua kino ma'ata atu i aia 'ua'orāi, ē kua 'aere atura rātou ki roto e no'o ki reira. Kino ma'ata 'ua atura te tūranga 'openga o taua tangata ra i tei muatangāna ra. Ka pērā katoa 'oki tēianei uki tangata kikino.”
Tō Iēsū metua va'ine ē tōna au taeake
(Māreko 3.31-35; Luka 8.19-21)
46I a Iēsū e tuatua ra ki te urupū tangata ra, inā, tē tū 'ua maira tōna metua va'ine ē tōna au taeake i va'o ra, tē 'inangaro maira i te tuatua ki aia. 47Kua karanga atura tēta'i o te au tangata ra ki aia, “Inā, tē tū 'ua maira tō metua va'ine ē tō 'ai taeake i va'o, tē 'inangaro maira i te tuatua mai ki a koe.”
48Kua pa'u atura a Iēsū, “Ko 'ai tōku metua va'ine, ē ko 'ai tōku 'ai taeake?” 49Kua nā kō atura aia, i aia e to'u ra ki tāna au pipi, “Ko tēia tōku metua va'ine ē tōku 'ai taeake! 50Ko tēta'i 'ua atu tangata ra tei 'ākono i te anoano o tōku Metua i te ao ra, ko tōku ia taeake ē taku tua'ine ē taku metua va'ine.”
Valgt i Øjeblikket:
Mātaio 12: CIMRNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Cook Island Maori Revised New Testament © Bible Society of the South Pacific, 2021.