Mātaio 26
26
Te kotikoti'anga kupenga nō te tā i a Iēsū
(Māreko 14.1-2; Luka 22.1-2; Ioane 11.45-53)
1Ē kia oti akera a Iēsū i tēia katoa nei tuatua'anga, kua nā kō maira aia ki tāna au pipi, 2#Exo 12.1-27“Kua kite kōtou ē, mei te rua rā toe e tae ei ki te Pāsa, ē 'ei reira te Tamaiti a te Tangata nei e tuku'ia ai kia 'akasātauro'ia.”
3I reira kua putuputu maira te kau ta'unga nunui ē te aronga pakari o te 'iti tangata ra ki roto i te 'are o te Ta'unga Ma'ata ra, ko tei karanga'ia ko Kaiāpha. 4Ē kua kotikoti kupenga i'ora rātou kia rauka tā rātou pikika'a i a Iēsū ka tāmate ei rātou i aia. 5Kua nā kō akera rā rātou, “Auraka i te rā 'ōro'a nei, ko te 'ōrure'au ā'ea te tangata.”
Tō Iēsū 'akamā'inu'anga'ia i Bētānia
(Māreko 14.3-9; Ioane 12.1-8)
6Ē tei Bētānia a Iēsū, tei te ngutu'are o Simona lēpera ra, 7#Luk 7.37,38kua 'aere maira tēta'i va'ine ki aia ma tēta'i pi'a 'alabata, 'e manongi 'oko ma'ata, ē kua riringi ki runga a'o i tō Iēsū ūpoko, i aia i no'o i te kaingākai ra. 8E kite akera tāna au pipi, kua riri ma'ata i'ora, nā kō akera, “'E a'a tēia manongi i kaimoumou'ia ai? 9Nō te mea, 'e moni ma'ata te ka rauka mai kia 'oko'ia, ē ka 'apai atu ei nā te puta'ua.”
10E kite akera a Iēsū, kua nā kō atura ki a rātou, “'E a'a kōtou i tāmanamanatā mai ei i tēianei va'ine? 'E 'anga'anga meitaki tāna i rave mai ki āku nei. 11#Deut 15.11E no'o tāmou 'oki te aronga puta'ua ki ō kōtou nei, ko au rā, kāre ia au e no'o tāmou ki ō kōtou nei. 12Ē ko tēianei manongi tāna i riringi ki runga a'o i tōku kōpapa, ko tāna ia rāvenga nō tōku nei tanumanga. 13Koia mou tāku e karanga atu ki a kōtou nei: Te au ngā'i katoa e tūtū'ia ai tēianei 'ēvangelia i te ao katoa nei, ka tuatua katoa'ia tā tēianei va'ine i rave nei, 'ei manako'anga atu i aia.”
Tē 'akatika nei a Iūda kia tuku pikika'a atu i a Iēsū
(Māreko 14.10-11; Luka 22.3-6)
14Tēta'i o te tino nga'uru mā rua ra ko Iūda Ikariota, 'aere atura ki te kau ta'unga nunui ra, 15#Zek 11.12nā kō atura, “'E a'a tā kōtou ka 'ō mai nāku, ē nāku e tuku atu i a Iēsū ki a kōtou na?” Kua 'akatinamou maira rātou e toru nga'uru moni 'ārio nāna. 16Ē mei reira mai rāi tōna kimi'anga i tēta'i vā e tau kia tuku atu i aia ki a rātou ra.
Te kai'anga a Iēsū i te Pāsa ma tāna au pipi
(Māreko 14.12-21; Luka 22.7-14,21-23; Ioane 13.21-30)
17E tae akera ki te rā mua o te Kai 'Aka'ōpuekore'ia ra, kua 'aere maira te au pipi ki a Iēsū ra, nā kō maira, “'Ei 'ea koe e anoano ei kia 'ākonokono mātou i te Pāsa kia kai koe?” 18Kua pa'u atura aia, “Ka 'aere atu kōrua ki roto i te 'ōire ki a mea ra, e karanga atu ki aia, ‘Tē tuatua maira te Pū'āpi'i, tē vaitata mai nei tōku ora, 'ei a koe na e kai ei au i te Pāsa ē tāku au pipi katoa.’ ”
19Ē kua pērā atura te au pipi mei tā Iēsū i 'akaue ra, ē kua 'ākonokono i'ora i te Pāsa.
20E a'ia'i i'ora, kua no'o atura aia ki raro ma te tino nga'uru mā rua katoa ra. 21Ē tē kaikai ra rātou, kua nā kō atura aia, “Koia mou tāku e karanga atu ki a kōtou nei, ko tēta'i i ō kōtou nei ka tuku pikika'a i āku.”
22Kua taitaiā ma'ata rava atura rātou, ē kua 'akamata atura rātou rava rāi i te ui tātakita'i mai ki aia, “E te 'Atu, ko au āinei?”
23 #
Sal 41.9
Kua pa'u atura aia, nā kō atura, “Ko te ka tuku kāpipiti ō māua rima ki roto i te mereki nei, nāna e tuku pikika'a atu i āku. 24Tē 'aere nei rāi te Tamaiti a te Tangata mei tei tātā'ia nōna ra; inārā, 'e 'ae 'oki taua tangata ra tei tuku pikika'a i te Tamaiti a te Tangata nei. 'E ngari ake te reira tangata nāringa kāre aia i 'ānau mai.”
25Ē kua ui katoa maira a Iūda, te ka tuku pikika'a atu i aia ra, nā kō maira, “E Rabi, ko au āina?”
Kua pa'u atura a Iēsū ki aia, “Ko tā'au ia tuatua.”
Te kaingākai a te 'Atu
(Māreko 14.22-26; Luka 22.14-20; 1 Kōrīnētia 11.23-25)
26Ē tē kaikai ra a Iēsū ē tāna au pipi, kua rave i'ora aia i te mānga, ē kua 'akameitaki atura, vāvā'i i'ora, tuku atura ki te au pipi, nā kō atura, “Ka rave, ka kai; ko tōku kōpapa tēia.”
27Ē kua rave i'ora aia i te kapu ē kua 'akameitaki atura, tuku atura ki a rātou, nā kō atura, “Ka inu kōtou kātoatoa mei roto mai i te reira, 28#a: Exo 24.8; b: Ier 31.31-34nō te mea, ko tōku toto tēia nō te kōreromotu ra, tei 'akamaringi'ia nō te tangata 'e mānganui kia matara te au 'ara. 29E 'akakite atu au ki a kōtou, mei tēianei atu, kāre au e inu 'aka'ou mei roto mai i te 'ua vine nei, e tae 'ua atu ki te rā e inu ei au i te uaina 'ōu ma kōtou katoa i roto i te bāsileia o taku Metua.”
30Ē kia oti akera tēta'i 'īmene, 'aere atura rātou ki va'o ki te Maunga o te Ōlive.
Tē toto'u nei a Iēsū i tā Pētero 'u'una'anga i te Mesia
(Māreko 14.27-31; Luka 22.31-34; Ioane 13.36-38)
31 #
Zek 13.7
I reira, kua karanga atura a Iēsū ki tāna au pipi, “'Ei tēianei pō e maitu ei kōtou kātoatoa i āku nei. Kua oti 'oki i te tātā'ia, ‘E pāpā au i te tiaki, ē ka pue'urikiriki kē 'oki te au māmoe o te 'ānana.’ 32#Māt 28.16I muri ake i tōku tū'aka'ou'anga maira, e nā mua au i a kōtou i te 'aere ki Galilea.”
33Kua tuatua maira a Pētero ki aia, nā kō maira, “Noa atu ē ka maitu te tangata kātoatoa i a koe, kāre tākiri au e maitu.”
34Kua nā kō maira a Iēsū ki aia, “Koia mou tāku e karanga atu ki a koe nei; i tēianei pō, i mua ake ka kākaoa ai te moa, ka tūtoru ō'ou 'u'una'anga i āku.”
35Kua pa'u atura a Pētero ki aia, “Noa atu ē ka 'inangaro'ia au kia mate au ē koe katoa, kāre au e 'u'una i a koe.”
Ē kua pērā kātoatoa rāi te au pipi.
Tā Iēsū pure i Getesemane
(Māreko 14.32-42; Luka 22.39-46)
36I reira, 'aere atura a Iēsū ma rātou katoa ki tēta'i ngā'i ko Getesemane te ingoa, ē kua nā kō maira aia ki tāna au pipi, “E no'o kōtou i konei, kia 'aere au ki kō akera e pure.” 37Ē kua arataki katoa atura aia i a Pētero ē ngā tamariki a Zebedaio ra, ē kua taitaiā i'ora aia, ē roko'ia atura e te teia'a tukituki ra. 38Kua tuatua maira aia ki a rātou, “Kua pini rava tōku vaerua i te mamae mate ma'ata. E no'o i konei, e ara katoa kōtou.”
39E 'aere atura aia ki mua iti i'o, tīpapa i'ora ki raro ma te pure, nā kō atura, “E taku Metua, mē ka tika, kia 'apai kē'ia atu tēianei kapu mei āku nei. Inārā, auraka kia tupu tōku anoano, ko tō'ou rā.”
40Ē kia 'oki maira aia ki te au pipi, kitea maira tē moe ra rātou, ē kua nā kō maira aia ki a Pētero, “'E a'a 'oki tēnā? Kāre e rauka i a kōtou kia ara 'ua ake tātou 'e 'okota'i 'ua ake ora? 41E ara, ē e pure 'oki, kia kore kōtou e roko'ia e te tīmata'anga. Kua tika 'oki i te vaerua, tē parukā 'ua nei rā te kōpapa.”
42'Aere 'aka'ou atura a Iēsū, ko te tūrua ia, kua pure i'ora aia, nā kō atura, “E taku Metua, mē kāre tēianei kapu e 'apai kē'ia atu mei āku nei, māri 'ua, kia inu rāi au i te reira, kia tupu rāi tō'ou anoano.” 43Ē kia 'oki mai aia ra, kitea 'aka'ou maira, tē moe rāi rātou; kua teima'a 'oki tō rātou mata.
44E vai'o i'ora i a rātou, 'aere 'aka'ou atura aia e pure, ko te tūtoru ia i te pure'anga o taua pure ra. 45I reira, kua 'oki maira aia ki tāna au pipi, kua nā kō maira ki a rātou, “E moe rā, e 'akangāro'i nō te toe'anga o te tuātau. Inā, kua vaitata te ora ē ka tuku'ia te Tamaiti a te Tangata nei ki roto i te rima o te aronga 'ara ra. 46Ka tū, ka 'aere tātou. Inā, tē vaitata mai nei aia te ka tuku pikika'a i āku nei.”
Tē 'opu'ia nei a Iēsū
(Māreko 14.43-50; Luka 22.47-53; Ioane 18.3-12)
47Ē i a Iēsū rāi e tuatua ra, inā, ko Iūda maira, tēta'i o te tino nga'uru mā rua ra, ē tēta'i urupū tangata ma'ata ma te koke ē te rākau, nō kō mai i te kau ta'unga nunui ē te aronga pakari o te 'iti tangata ra. 48Ē ko tei tuku pikika'a i aia, kua tuku ana i tēta'i 'akairo ki a rātou, nā kō atura, “Ko te tangata tāku e 'ongi atu, koia ia. Ka 'opu atu kōtou i aia!”
49Kua 'aere tika atura aia ki a Iēsū, nā kō atura, “Kia orana koe, e te Pū'āpi'i,” ē kua 'ongi atura i aia. 50Kua karanga i'ora a Iēsū ki aia, “E tama, i 'aere mai koe i te a'a?”
Kua 'akavaitata maira rātou, kua tuku maira i te rima ki runga i a Iēsū, 'opu maira i aia. 51Ē inā, tēta'i i ō Iēsū ra, kua rave i'ora i tāna koke, unu'i akera; tā atura i te tāvini o te Ta'unga Ma'ata ra, motu kē atura tōna taringa. 52Kua karanga atura a Iēsū ki aia, “Ka momono ana i tā'au koke ki roto i te va'ī. Ko tēta'i 'ua atu tei rave i te koke ra, ka mate ia i te koke. 53Kāre āina koe e manako ē, 'e tika i āku kia pati ki taku Metua, ē nāna e 'ōronga mai ki āku i tēianei 'e ma'ata 'ua atu i te rau nga'uru mā rua te manotini o te 'āngela? 54E 'akapē'ea i'ora rā e tupu ei te tuatua i tātā'ia ra ē, kia pērā'ia e tikāi?”
55 #
Luk 19.47; 21.37 I reira tō Iēsū tuatua'anga mai ki taua aronga ma'ata ra ē, “I 'aere mai 'oki kōtou e 'opu i āku, ma te koke ē te rākau, mei te mea ē 'e keiā au? I no'o 'ua ana 'oki au i rotopū i a kōtou i te au rā katoa, i te 'āpi'i'anga i roto i te 'iero, ē kāre 'ua kōtou i 'opu mai i āku. 56Inārā, tē 'akatupu'ia nei tēia au mea kātoatoa kia tupu ra te tuatua a te au peroveta i tātā'ia ra.”
I reira, kua 'akaruke i'ora te au pipi rava rāi i aia, 'oro atura.
Tē tū nei a Iēsū ki mua i te Kōnitara
(Māreko 14.53-65; Luka 22.54-55,63-71; Ioane 18.13-14,19-24)
57Ē te aronga i 'opu i a Iēsū ra, arataki atura rātou i aia ki te 'are o Kaiāpha te Ta'unga Ma'ata ra, te ngā'i i putuputu mai ei te au Pū'āpi'i Ture ē te aronga pakari. 58Ē kua āru atura a Pētero i aia i muri roa, e tae 'ua atura ki te koro o te Ta'unga Ma'ata ra, tomo atura ki roto, no'o i'ora ma te aronga tāvini katoa kia kite aia i te 'openga. 59Ē tē kimi ra te kau ta'unga nunui ē te Sūnēderi katoa i te 'aka'apa'anga pikika'a i a Iēsū kia tā tākiri i aia. 60Ē noa atu 'oki 'e mānganui te au kite pikika'a i 'aere mai, kāre rāi tēta'i 'aka'apa'anga pikika'a i kitea. Ē i muri ake, kua 'aere maira 'e tokorua kite pikika'a, 61#Ioa 2.19nā kō maira, “I tuatua mai ana 'oki tēianei tangata, ‘'E tika i āku i te vāvā'i i te nao o te Atua nei, ē i roto i te toru rā e 'akatū'ia e au.’ ”
62Kua tū akera te Ta'unga Ma'ata ra ki runga, kua nā kō maira ki a Iēsū, “Kāre koe e pa'u mai? 'E a'a tā tēia ngā tangata nei tāpepe'anga mai ki a koe nei?” 63Inārā, kua mūtēkī 'ua a Iēsū. Kua tuatua maira te Ta'unga Ma'ata ra ki aia, nā kō maira, “Tē 'akataputo'u'ia nei koe e au ki te Atua ora ra ē, e 'akakite mai koe ki a mātou nei ē, ko koe āina te Mesia, te Tamaiti a te Atua?”
64 #
Dan 7.13
Kua pa'u atura a Iēsū ki aia, “Ko tā'au ia e tuatua maira. Inārā, tē karanga atu nei au ki a kōtou, mei tēianei atu ka kite kōtou i te Tamaiti a te Tangata i te no'o'anga i te rima katau o tei Mana ra ē te 'aere'anga mai nā runga i te tiao rangi!”
65 #
Lev 24.16
I reira, kua 'a'ae te Ta'unga Ma'ata i tōna kāka'u, nā kō atura, “Kua 'akakino Atua aia! 'E a'a 'ua atu rāi tātou ka 'inangaro ei i te au kite? Inā, kua 'akarongo 'ua kōtou i tāna 'akakino'anga Atua. 66'E a'a tō kōtou manako?”
Ē kua pa'u maira rātou, “E tau i aia te mate!”
67 #
Isa 50.6
I reira, kua tūtu'a atura rātou i te 'uāvare ki tōna mata, e moto atura 'oki i aia; ēta'i aronga kua papaki atura i aia, 68nā kō atura, “E 'akakite maina, e te Mesia, ko 'ai tei papaki i a koe na?”
Tō Pētero 'u'una'anga i a Iēsū
(Māreko 14.66-72; Luka 22.56-62; Ioane 18.15-18,25-27)
69Tē no'o 'ua ra a Pētero ki va'o i roto i te koro, ē kua 'aere maira tēta'i tamā'ine tāvini ki aia ra, nā kō maira, “Ko koe katoa ē Iēsū o Galilea ra.”
70Kua 'u'una 'ua ra a Pētero i te reira ki mua i a rātou rava rāi, nā kō atura, “Kāre rava au i kite i tā'au e tuatua maina.”
71Ē i te 'aere'anga ki va'o ra, kua 'ākara maira tēta'i tamā'ine kē i aia, nā kō atura ki te aronga e no'o i reira, “I a Iēsū o Nāzarēta katoa tēianei tangata.”
72Ē kua 'u'una 'aka'ou i'ora a Pētero ma te taputo'u, “Kāre tākiri au i kite i tēnā na tangata.”
73E roa iti akera, kua 'akavaitata maira te aronga i tū i reira ki a Pētero ra ē kua nā kō maira ki aia, “Koia mou, nō rātou tikāi koe, tē kitea'ia nei koe e tō'ou reo.”
74I reira, kua 'akamata aia i te tao 'ua ē te taputo'u, “Kāre tākiri au i kite i tēnā na tangata.”
Ē i taua 'ati'anga rāi kua kākaoa i'ora te moa. 75Ē kua ma'ara i'ora a Pētero i te tuatua tā Iēsū i 'akakite mai ki aia ra ē, “I mua ake ka kākaoa ai te moa, ka tūtoru ō'ou 'u'una'anga i āku.” E 'aere atura a Pētero ki va'o, ē kua auē ma'ata 'ua atura.
Valgt i Øjeblikket:
Mātaio 26: CIMRNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Cook Island Maori Revised New Testament © Bible Society of the South Pacific, 2021.
Mātaio 26
26
Te kotikoti'anga kupenga nō te tā i a Iēsū
(Māreko 14.1-2; Luka 22.1-2; Ioane 11.45-53)
1Ē kia oti akera a Iēsū i tēia katoa nei tuatua'anga, kua nā kō maira aia ki tāna au pipi, 2#Exo 12.1-27“Kua kite kōtou ē, mei te rua rā toe e tae ei ki te Pāsa, ē 'ei reira te Tamaiti a te Tangata nei e tuku'ia ai kia 'akasātauro'ia.”
3I reira kua putuputu maira te kau ta'unga nunui ē te aronga pakari o te 'iti tangata ra ki roto i te 'are o te Ta'unga Ma'ata ra, ko tei karanga'ia ko Kaiāpha. 4Ē kua kotikoti kupenga i'ora rātou kia rauka tā rātou pikika'a i a Iēsū ka tāmate ei rātou i aia. 5Kua nā kō akera rā rātou, “Auraka i te rā 'ōro'a nei, ko te 'ōrure'au ā'ea te tangata.”
Tō Iēsū 'akamā'inu'anga'ia i Bētānia
(Māreko 14.3-9; Ioane 12.1-8)
6Ē tei Bētānia a Iēsū, tei te ngutu'are o Simona lēpera ra, 7#Luk 7.37,38kua 'aere maira tēta'i va'ine ki aia ma tēta'i pi'a 'alabata, 'e manongi 'oko ma'ata, ē kua riringi ki runga a'o i tō Iēsū ūpoko, i aia i no'o i te kaingākai ra. 8E kite akera tāna au pipi, kua riri ma'ata i'ora, nā kō akera, “'E a'a tēia manongi i kaimoumou'ia ai? 9Nō te mea, 'e moni ma'ata te ka rauka mai kia 'oko'ia, ē ka 'apai atu ei nā te puta'ua.”
10E kite akera a Iēsū, kua nā kō atura ki a rātou, “'E a'a kōtou i tāmanamanatā mai ei i tēianei va'ine? 'E 'anga'anga meitaki tāna i rave mai ki āku nei. 11#Deut 15.11E no'o tāmou 'oki te aronga puta'ua ki ō kōtou nei, ko au rā, kāre ia au e no'o tāmou ki ō kōtou nei. 12Ē ko tēianei manongi tāna i riringi ki runga a'o i tōku kōpapa, ko tāna ia rāvenga nō tōku nei tanumanga. 13Koia mou tāku e karanga atu ki a kōtou nei: Te au ngā'i katoa e tūtū'ia ai tēianei 'ēvangelia i te ao katoa nei, ka tuatua katoa'ia tā tēianei va'ine i rave nei, 'ei manako'anga atu i aia.”
Tē 'akatika nei a Iūda kia tuku pikika'a atu i a Iēsū
(Māreko 14.10-11; Luka 22.3-6)
14Tēta'i o te tino nga'uru mā rua ra ko Iūda Ikariota, 'aere atura ki te kau ta'unga nunui ra, 15#Zek 11.12nā kō atura, “'E a'a tā kōtou ka 'ō mai nāku, ē nāku e tuku atu i a Iēsū ki a kōtou na?” Kua 'akatinamou maira rātou e toru nga'uru moni 'ārio nāna. 16Ē mei reira mai rāi tōna kimi'anga i tēta'i vā e tau kia tuku atu i aia ki a rātou ra.
Te kai'anga a Iēsū i te Pāsa ma tāna au pipi
(Māreko 14.12-21; Luka 22.7-14,21-23; Ioane 13.21-30)
17E tae akera ki te rā mua o te Kai 'Aka'ōpuekore'ia ra, kua 'aere maira te au pipi ki a Iēsū ra, nā kō maira, “'Ei 'ea koe e anoano ei kia 'ākonokono mātou i te Pāsa kia kai koe?” 18Kua pa'u atura aia, “Ka 'aere atu kōrua ki roto i te 'ōire ki a mea ra, e karanga atu ki aia, ‘Tē tuatua maira te Pū'āpi'i, tē vaitata mai nei tōku ora, 'ei a koe na e kai ei au i te Pāsa ē tāku au pipi katoa.’ ”
19Ē kua pērā atura te au pipi mei tā Iēsū i 'akaue ra, ē kua 'ākonokono i'ora i te Pāsa.
20E a'ia'i i'ora, kua no'o atura aia ki raro ma te tino nga'uru mā rua katoa ra. 21Ē tē kaikai ra rātou, kua nā kō atura aia, “Koia mou tāku e karanga atu ki a kōtou nei, ko tēta'i i ō kōtou nei ka tuku pikika'a i āku.”
22Kua taitaiā ma'ata rava atura rātou, ē kua 'akamata atura rātou rava rāi i te ui tātakita'i mai ki aia, “E te 'Atu, ko au āinei?”
23 #
Sal 41.9
Kua pa'u atura aia, nā kō atura, “Ko te ka tuku kāpipiti ō māua rima ki roto i te mereki nei, nāna e tuku pikika'a atu i āku. 24Tē 'aere nei rāi te Tamaiti a te Tangata mei tei tātā'ia nōna ra; inārā, 'e 'ae 'oki taua tangata ra tei tuku pikika'a i te Tamaiti a te Tangata nei. 'E ngari ake te reira tangata nāringa kāre aia i 'ānau mai.”
25Ē kua ui katoa maira a Iūda, te ka tuku pikika'a atu i aia ra, nā kō maira, “E Rabi, ko au āina?”
Kua pa'u atura a Iēsū ki aia, “Ko tā'au ia tuatua.”
Te kaingākai a te 'Atu
(Māreko 14.22-26; Luka 22.14-20; 1 Kōrīnētia 11.23-25)
26Ē tē kaikai ra a Iēsū ē tāna au pipi, kua rave i'ora aia i te mānga, ē kua 'akameitaki atura, vāvā'i i'ora, tuku atura ki te au pipi, nā kō atura, “Ka rave, ka kai; ko tōku kōpapa tēia.”
27Ē kua rave i'ora aia i te kapu ē kua 'akameitaki atura, tuku atura ki a rātou, nā kō atura, “Ka inu kōtou kātoatoa mei roto mai i te reira, 28#a: Exo 24.8; b: Ier 31.31-34nō te mea, ko tōku toto tēia nō te kōreromotu ra, tei 'akamaringi'ia nō te tangata 'e mānganui kia matara te au 'ara. 29E 'akakite atu au ki a kōtou, mei tēianei atu, kāre au e inu 'aka'ou mei roto mai i te 'ua vine nei, e tae 'ua atu ki te rā e inu ei au i te uaina 'ōu ma kōtou katoa i roto i te bāsileia o taku Metua.”
30Ē kia oti akera tēta'i 'īmene, 'aere atura rātou ki va'o ki te Maunga o te Ōlive.
Tē toto'u nei a Iēsū i tā Pētero 'u'una'anga i te Mesia
(Māreko 14.27-31; Luka 22.31-34; Ioane 13.36-38)
31 #
Zek 13.7
I reira, kua karanga atura a Iēsū ki tāna au pipi, “'Ei tēianei pō e maitu ei kōtou kātoatoa i āku nei. Kua oti 'oki i te tātā'ia, ‘E pāpā au i te tiaki, ē ka pue'urikiriki kē 'oki te au māmoe o te 'ānana.’ 32#Māt 28.16I muri ake i tōku tū'aka'ou'anga maira, e nā mua au i a kōtou i te 'aere ki Galilea.”
33Kua tuatua maira a Pētero ki aia, nā kō maira, “Noa atu ē ka maitu te tangata kātoatoa i a koe, kāre tākiri au e maitu.”
34Kua nā kō maira a Iēsū ki aia, “Koia mou tāku e karanga atu ki a koe nei; i tēianei pō, i mua ake ka kākaoa ai te moa, ka tūtoru ō'ou 'u'una'anga i āku.”
35Kua pa'u atura a Pētero ki aia, “Noa atu ē ka 'inangaro'ia au kia mate au ē koe katoa, kāre au e 'u'una i a koe.”
Ē kua pērā kātoatoa rāi te au pipi.
Tā Iēsū pure i Getesemane
(Māreko 14.32-42; Luka 22.39-46)
36I reira, 'aere atura a Iēsū ma rātou katoa ki tēta'i ngā'i ko Getesemane te ingoa, ē kua nā kō maira aia ki tāna au pipi, “E no'o kōtou i konei, kia 'aere au ki kō akera e pure.” 37Ē kua arataki katoa atura aia i a Pētero ē ngā tamariki a Zebedaio ra, ē kua taitaiā i'ora aia, ē roko'ia atura e te teia'a tukituki ra. 38Kua tuatua maira aia ki a rātou, “Kua pini rava tōku vaerua i te mamae mate ma'ata. E no'o i konei, e ara katoa kōtou.”
39E 'aere atura aia ki mua iti i'o, tīpapa i'ora ki raro ma te pure, nā kō atura, “E taku Metua, mē ka tika, kia 'apai kē'ia atu tēianei kapu mei āku nei. Inārā, auraka kia tupu tōku anoano, ko tō'ou rā.”
40Ē kia 'oki maira aia ki te au pipi, kitea maira tē moe ra rātou, ē kua nā kō maira aia ki a Pētero, “'E a'a 'oki tēnā? Kāre e rauka i a kōtou kia ara 'ua ake tātou 'e 'okota'i 'ua ake ora? 41E ara, ē e pure 'oki, kia kore kōtou e roko'ia e te tīmata'anga. Kua tika 'oki i te vaerua, tē parukā 'ua nei rā te kōpapa.”
42'Aere 'aka'ou atura a Iēsū, ko te tūrua ia, kua pure i'ora aia, nā kō atura, “E taku Metua, mē kāre tēianei kapu e 'apai kē'ia atu mei āku nei, māri 'ua, kia inu rāi au i te reira, kia tupu rāi tō'ou anoano.” 43Ē kia 'oki mai aia ra, kitea 'aka'ou maira, tē moe rāi rātou; kua teima'a 'oki tō rātou mata.
44E vai'o i'ora i a rātou, 'aere 'aka'ou atura aia e pure, ko te tūtoru ia i te pure'anga o taua pure ra. 45I reira, kua 'oki maira aia ki tāna au pipi, kua nā kō maira ki a rātou, “E moe rā, e 'akangāro'i nō te toe'anga o te tuātau. Inā, kua vaitata te ora ē ka tuku'ia te Tamaiti a te Tangata nei ki roto i te rima o te aronga 'ara ra. 46Ka tū, ka 'aere tātou. Inā, tē vaitata mai nei aia te ka tuku pikika'a i āku nei.”
Tē 'opu'ia nei a Iēsū
(Māreko 14.43-50; Luka 22.47-53; Ioane 18.3-12)
47Ē i a Iēsū rāi e tuatua ra, inā, ko Iūda maira, tēta'i o te tino nga'uru mā rua ra, ē tēta'i urupū tangata ma'ata ma te koke ē te rākau, nō kō mai i te kau ta'unga nunui ē te aronga pakari o te 'iti tangata ra. 48Ē ko tei tuku pikika'a i aia, kua tuku ana i tēta'i 'akairo ki a rātou, nā kō atura, “Ko te tangata tāku e 'ongi atu, koia ia. Ka 'opu atu kōtou i aia!”
49Kua 'aere tika atura aia ki a Iēsū, nā kō atura, “Kia orana koe, e te Pū'āpi'i,” ē kua 'ongi atura i aia. 50Kua karanga i'ora a Iēsū ki aia, “E tama, i 'aere mai koe i te a'a?”
Kua 'akavaitata maira rātou, kua tuku maira i te rima ki runga i a Iēsū, 'opu maira i aia. 51Ē inā, tēta'i i ō Iēsū ra, kua rave i'ora i tāna koke, unu'i akera; tā atura i te tāvini o te Ta'unga Ma'ata ra, motu kē atura tōna taringa. 52Kua karanga atura a Iēsū ki aia, “Ka momono ana i tā'au koke ki roto i te va'ī. Ko tēta'i 'ua atu tei rave i te koke ra, ka mate ia i te koke. 53Kāre āina koe e manako ē, 'e tika i āku kia pati ki taku Metua, ē nāna e 'ōronga mai ki āku i tēianei 'e ma'ata 'ua atu i te rau nga'uru mā rua te manotini o te 'āngela? 54E 'akapē'ea i'ora rā e tupu ei te tuatua i tātā'ia ra ē, kia pērā'ia e tikāi?”
55 #
Luk 19.47; 21.37 I reira tō Iēsū tuatua'anga mai ki taua aronga ma'ata ra ē, “I 'aere mai 'oki kōtou e 'opu i āku, ma te koke ē te rākau, mei te mea ē 'e keiā au? I no'o 'ua ana 'oki au i rotopū i a kōtou i te au rā katoa, i te 'āpi'i'anga i roto i te 'iero, ē kāre 'ua kōtou i 'opu mai i āku. 56Inārā, tē 'akatupu'ia nei tēia au mea kātoatoa kia tupu ra te tuatua a te au peroveta i tātā'ia ra.”
I reira, kua 'akaruke i'ora te au pipi rava rāi i aia, 'oro atura.
Tē tū nei a Iēsū ki mua i te Kōnitara
(Māreko 14.53-65; Luka 22.54-55,63-71; Ioane 18.13-14,19-24)
57Ē te aronga i 'opu i a Iēsū ra, arataki atura rātou i aia ki te 'are o Kaiāpha te Ta'unga Ma'ata ra, te ngā'i i putuputu mai ei te au Pū'āpi'i Ture ē te aronga pakari. 58Ē kua āru atura a Pētero i aia i muri roa, e tae 'ua atura ki te koro o te Ta'unga Ma'ata ra, tomo atura ki roto, no'o i'ora ma te aronga tāvini katoa kia kite aia i te 'openga. 59Ē tē kimi ra te kau ta'unga nunui ē te Sūnēderi katoa i te 'aka'apa'anga pikika'a i a Iēsū kia tā tākiri i aia. 60Ē noa atu 'oki 'e mānganui te au kite pikika'a i 'aere mai, kāre rāi tēta'i 'aka'apa'anga pikika'a i kitea. Ē i muri ake, kua 'aere maira 'e tokorua kite pikika'a, 61#Ioa 2.19nā kō maira, “I tuatua mai ana 'oki tēianei tangata, ‘'E tika i āku i te vāvā'i i te nao o te Atua nei, ē i roto i te toru rā e 'akatū'ia e au.’ ”
62Kua tū akera te Ta'unga Ma'ata ra ki runga, kua nā kō maira ki a Iēsū, “Kāre koe e pa'u mai? 'E a'a tā tēia ngā tangata nei tāpepe'anga mai ki a koe nei?” 63Inārā, kua mūtēkī 'ua a Iēsū. Kua tuatua maira te Ta'unga Ma'ata ra ki aia, nā kō maira, “Tē 'akataputo'u'ia nei koe e au ki te Atua ora ra ē, e 'akakite mai koe ki a mātou nei ē, ko koe āina te Mesia, te Tamaiti a te Atua?”
64 #
Dan 7.13
Kua pa'u atura a Iēsū ki aia, “Ko tā'au ia e tuatua maira. Inārā, tē karanga atu nei au ki a kōtou, mei tēianei atu ka kite kōtou i te Tamaiti a te Tangata i te no'o'anga i te rima katau o tei Mana ra ē te 'aere'anga mai nā runga i te tiao rangi!”
65 #
Lev 24.16
I reira, kua 'a'ae te Ta'unga Ma'ata i tōna kāka'u, nā kō atura, “Kua 'akakino Atua aia! 'E a'a 'ua atu rāi tātou ka 'inangaro ei i te au kite? Inā, kua 'akarongo 'ua kōtou i tāna 'akakino'anga Atua. 66'E a'a tō kōtou manako?”
Ē kua pa'u maira rātou, “E tau i aia te mate!”
67 #
Isa 50.6
I reira, kua tūtu'a atura rātou i te 'uāvare ki tōna mata, e moto atura 'oki i aia; ēta'i aronga kua papaki atura i aia, 68nā kō atura, “E 'akakite maina, e te Mesia, ko 'ai tei papaki i a koe na?”
Tō Pētero 'u'una'anga i a Iēsū
(Māreko 14.66-72; Luka 22.56-62; Ioane 18.15-18,25-27)
69Tē no'o 'ua ra a Pētero ki va'o i roto i te koro, ē kua 'aere maira tēta'i tamā'ine tāvini ki aia ra, nā kō maira, “Ko koe katoa ē Iēsū o Galilea ra.”
70Kua 'u'una 'ua ra a Pētero i te reira ki mua i a rātou rava rāi, nā kō atura, “Kāre rava au i kite i tā'au e tuatua maina.”
71Ē i te 'aere'anga ki va'o ra, kua 'ākara maira tēta'i tamā'ine kē i aia, nā kō atura ki te aronga e no'o i reira, “I a Iēsū o Nāzarēta katoa tēianei tangata.”
72Ē kua 'u'una 'aka'ou i'ora a Pētero ma te taputo'u, “Kāre tākiri au i kite i tēnā na tangata.”
73E roa iti akera, kua 'akavaitata maira te aronga i tū i reira ki a Pētero ra ē kua nā kō maira ki aia, “Koia mou, nō rātou tikāi koe, tē kitea'ia nei koe e tō'ou reo.”
74I reira, kua 'akamata aia i te tao 'ua ē te taputo'u, “Kāre tākiri au i kite i tēnā na tangata.”
Ē i taua 'ati'anga rāi kua kākaoa i'ora te moa. 75Ē kua ma'ara i'ora a Pētero i te tuatua tā Iēsū i 'akakite mai ki aia ra ē, “I mua ake ka kākaoa ai te moa, ka tūtoru ō'ou 'u'una'anga i āku.” E 'aere atura a Pētero ki va'o, ē kua auē ma'ata 'ua atura.
Valgt i Øjeblikket:
:
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Cook Island Maori Revised New Testament © Bible Society of the South Pacific, 2021.