Māreko 12
12
Te parabole o te aronga tautāūnga vine
(Mātaio 21.33-46; Luka 20.9-19)
1 #
Isa 5.1,2 Kua 'āpi'i atura a Iēsū i te urupū tangata nā roto i te tuatua parabole, nā kō atura, “Kua 'akatupu tēta'i tangata i te kāingā vine. Kua 'akapini ki te koro, kua kō i'ora i te taomi'angā vine i roto ra, 'akatū i'ora i te 'are tāpapa'anga, tāra'u atura ki te aronga tūtaki'ia, ē 'aere atura ki te 'enua mamao. 2Kia tae akera ki te tuātau tau tikāi, kua tono maira aia i tēta'i tāvini ki taua aronga tautāūnga vine ra kia 'ō mai rātou i tēta'i tu'anga o te au 'ua o te kāingā vine ra. 3Kua 'opu atura rātou i aia, pāpā i'ora, ē kua tuaru atura ma te 'apingakore. 4Kua tono 'aka'ou maira te tangata kāinga i tēta'i tāvini kē. Kua pāpā'ia i'ora tōna ūpoko ē kua rave'ia tēta'i 'anga'anga 'akamā ki runga i aia. 5Kua tono 'aka'ou maira aia i tēta'i, ē kua tāmate rava'ia atura te reira. 'E mānganui 'oki te au tāvini kē i tonokia mai, kua pāpā'ia i'ora tēta'i pae, ē tāmate rava'ia atura 'oki tēta'i pae.
6“Ē i te 'openga i'ora, tē toe ra tāna tamaiti 'okota'i 'ua, 'e tūmanava nāna. Kua tono maira aia i aia ki a rātou ra, nā kō akera, ‘Ka riro rātou i te 'ō'ō mai i taku tamaiti.’ 7Kua 'uri'uri manako i'ora taua tautāūnga ra i rotopū i a rātou 'ua'orāi, ‘Ko te kauono tangata kāinga tēia. 'Aere mai, ka tā tātou i aia, ē ka riro mai te kāinga ki a tātou 'ua'orāi.’ 8Kua 'opu atura rātou i aia, tāmate rava atura, ē titiri atura ki va'o i taua kāingā vine ra.
9“Ka 'akapē'ea maira te 'atu o te kāingā vine ra? Ka riro aia i te 'aere mai e tāmate rava i taua tautāūnga ra, ē ka 'ōronga atu ei i te kāingā vine ki a ēta'i kē. 10#Sal 118.22,23Kāre āina kōtou i tatau ana i tei tātā'ia ra ē,
‘Ko te toka i 'akaruke'ia e te aronga patu 'are ra,
ko ia tei 'akariro'ia 'ei toka ti'avā.
11Nā te 'Atu tēia i rave, ē 'e mea ūmere'ia ia e tātou’?”
12I kimi rāvenga atura te aronga 'aka'aere o te Ngāti Iūda i te 'opu i a Iēsū, nō te mea, kua mārama 'oki rātou ē, nō rātou taua parabole tāna i tuatua ra. Mataku akera rā rātou i te tangata, vai'o atura i aia.
Te ui'anga nō runga i te tūtaki'anga tero
(Mātaio 22.15-22; Luka 20.20-26)
13Ē kua tono maira te kau ta'unga nunui, te au Pū'āpi'i Ture ē te aronga pakari i tēta'i au Phārīsea ē i tēta'i au Hērōdiāni ki a Iēsū 'ei tā'ē'ē i aia i tāna tuatua. 14E tae maira rātou, kua nā kō maira ki aia, “E te Pū'āpi'i, kua kite mātou ē 'e tuatua tika tā'au, ē kāre koe e mataku i tēta'i 'ua atu tangata, nō te mea, kāre koe e piripiri 'ua atu ki te tangata; tē 'āpi'i nei rā koe i te mataara o te Atua ma te tuatua mou. 'E tika āina kia tūtaki tātou i te tero ki a Kaisara, ē auraka āina?”
15Tē kite ra a Iēsū i tō rātou tū tāpikipiki, ē kua nā kō atura ki a rātou, “'E a'a kōtou i tīmata mai ei i āku? Ka 'apai mai ana i tēta'i moni 'ārio kia 'ākara au.”
16Kua 'apai maira 'oki rātou. Ē kua ui atura aia ki a rātou, “Nō 'ai tēia tūtū ē te tātā'anga ki runga a'o?”
Kua pa'u maira rātou, “Nō Kaisara.”
17Kua karanga atura a Iēsū ki a rātou, “E 'apai māri i tā Kaisara ki a Kaisara, ē tā te Atua ki te Atua.” Kua vā 'ua atura rātou i aia.
Te ui'anga nō runga i te tū'aka'ou'anga mei te mate mai
(Mātaio 22.23-33; Luka 20.27-40)
18 #
Anga 23.8
Kua 'aere maira ēta'i Sādukea ra, ko rātou 'oki te aronga tei tuatua ē kāre 'e tū'aka'ou'anga. Ē kua ui maira rātou ki a Iēsū, nā kō maira, 19#Deut 25.5“E te Pū'āpi'i, i tātā mai a Mōse ki a mātou ē, ‘Kia mate te tuakana o tēta'i tangata, tē ora ra te va'ine ē kāre 'e tamariki, e 'akaipoipo te teina i taua va'ine ra, ē e 'aka'uānga i te tamariki nā te tuakana.’ 20E toko'itu tamāroa i te puna 'okota'i. Kua 'akaipoipo te tama mua i te va'ine, ē mate atura, ma te tamarikikore. 21Kua 'akaipoipo i'ora te tokorua i aia, mate atura 'oki aia, ma te tamarikikore rāi; kua pērā katoa te tokotoru. 22Pērā katoa 'oki rātou rava rāi toko'itu, kāre rāi 'e tamariki. Ē i te 'openga i'ora, mate katoa atura te va'ine. 23Kia tae ki te tū'aka'ou'anga ra, kia tū 'aka'ou mai rātou ra, e riro aia 'ei va'ine nā 'ai i taua aronga ra? 'E va'ine 'oki aia nā rātou rava rāi toko'itu.”
24Kua pa'u atura a Iēsū ki a rātou, “Kāre āinei tēia i te mea e tārevakē ei kōtou, ko tō kōtou kitekore i te tuatua i tātā'ia ra ē te mana o te Atua? 25Nō te mea, kia tū'aka'ou rātou mei te mate maira, kāre i a rātou e 'akaipoipo, kāre 'oki e 'ōronga kia 'akaipoipo'ia, e 'āite rā rātou ki te au 'āngela o te ao ra. 26#Exo 3.6Nō runga rā i te aronga mate kia tū'aka'ou rātou, kāre āina kōtou i tatau i roto i te puka a Mōse ra i tā te Atua tuatua ki aia mei roto mai i te pū ngāngā'ere i te nā kō'anga mai, ‘Ko au te Atua nō Āberahāma, ē te Atua nō Īsā'aka, ē te Atua nō Iākōba’? 27Kāre 'oki aia i te Atua nō tei mate, nō tei ora rā. 'E tārevakē ma'ata tō kōtou!”
Te 'akaue'anga ma'ata
(Mātaio 22.33-40; Luka 10.25-28)
28Kua 'aere maira tēta'i Pū'āpi'i Ture tei 'akarongo i te tuatua'anga a Iēsū ē te au Sādukea. Kua kite 'oki aia i te meitaki o tā Iēsū pa'u'anga ki a rātou, ē kua ui maira, “Ko tē'ea tei ma'ata i te au 'akaue'anga katoa?”
29 #
Deut 6.4,5 Kua pa'u atura a Iēsū ki aia, “Ko tēia tei ma'ata: ‘E 'akarongo mai koe, e Īserā'ela, ko te 'Atu, tō tātou Atua ra, 'okota'i 'oki 'Atu. 30E 'inangaro koe i te 'Atu tō'ou Atua ra ma tō ngākau katoa, ma tō vaerua katoa, ma tō manako katoa, ē ma tō ririnui katoa.’ 31#Lev 19.18Ko te rua tēia: ‘E 'inangaro atu koe i tō'ou tangata tupu mei a koe 'ua'orāi.’ Kāre rava 'e 'akaue'anga i ma'ata atu i te reira.”
32 #
Deut 4.35
Kua tuatua maira taua Pū'āpi'i Ture ra ki aia, “'E tika tā'au, e te Pū'āpi'i, kua tuatua mai koe ma te tuatua mou ē, 'Okota'i rava 'oki Atua, kāre atu, ko ia anake rāi. 33#Hos 6.6Ē te 'inangaro atu i aia ma te ngākau katoa, ē ma te kite katoa ē ma te ririnui katoa, ē te 'inangaro atu i te tangata tupu mei aia 'ua'orāi, 'e ma'ata atu ia i te au 'ātinga karakarātio katoa ra ē te 'ātinga kai 'oki.”
34 #
Luk 10.25-28
Kite akera a Iēsū ē, 'e tuatua pakari tāna i tuatua maira, kua nā kō atura ki aia, “Kāre koe i ātea kē atu i te bāsileia o te Atua ra.”
Ē kāre rava atura 'e tangata i tae i te ui 'aka'ou mai ki aia nō te mataku.
Te ui'anga nō runga i te Mesia
(Mātaio 22.41-46; Luka 20.41-44)
35Tē 'āpi'i ra a Iēsū i roto i te 'iero, kua ui atura aia, nā kō atura, “'E a'a te au Pū'āpi'i Ture i 'akakite mai ei ē, ko te Mesia te tamaiti nā Dāvida? 36#Sal 110.1Ko Dāvida 'ua'orāi 'oki tei tuatua ma te Vaerua Tapu ra ē,
‘Kua tuatua atura te 'Atu ki taku 'Atu,
ka no'o koe ki taku rima katau nei
kia 'akariro au i tō au 'enemi 'ei pange vaevae nō'ou.’
37Ē tēianei, ko Dāvida 'ua'orāi tei karanga ki aia ē e ‘'Atu,’ 'e a'a i'ora 'oki te Mesia i riro mai ei 'ei tamaiti nāna?”
Tē 'akamatakite nei a Iēsū nō runga i te au Pū'āpi'i Ture
(Mātaio 23.1-36; Luka 20.45-47)
Ē tē 'akarongo ra te urupū tangata i aia ma te rekareka. 38Kua karanga atura a Iēsū i roto i tāna 'āpi'i'anga ra, “Kia matakite i te au Pū'āpi'i Ture, ko tei 'inangaro i te 'ā'āere ma te kāka'u roroa ē tē navenave kia aro'a'ia i te au ngā'i 'oko'oko'anga ra. 39Ē tē kimikimi nei rātou i te au no'o'anga mēmeitaki i roto i te au sūnago ra ē te au ngā'i ngāteitei i te au kaingākai ra. 40Tē pou nei rā i a rātou te au ngutu'are o te au va'ine taka'ua ra ē tē 'akaroa nei i te pure 'ei tāpikipiki'anga. 'E utunga ma'ata rava 'oki tā rātou.”
Te 'ātinga a te va'ine taka'ua
(Luka 21.1-4)
41Ē tē no'o ra a Iēsū i vaitata a'o i te pi'a 'ātinga ra, 'ākara atura aia i te tangata i te tuku'anga i te moni ki roto i taua pi'a 'ātinga ra. 'E aronga 'apinga nui 'oki 'e mānganui tei tuku mai i te moni ma'ata ki roto. 42Kua 'aere maira tēta'i va'ine 'apingakore, 'e taka'ua 'oki aia, ē kua tuku maira i e rua moni kapa rikiriki ki roto. 43Kua kāpiki atura a Iēsū i tāna au pipi ki aia, nā kō atura ki a rātou, “Koia mou tāku e karanga atu nei ki a kōtou na, 'e ma'ata atu tā te va'ine taka'ua 'apingakore nei i tuku ki roto i te pi'a 'ātinga i taua aronga kātoatoa. 44Nō roto mai 'oki te toenga i tō rātou 'apinga ma'ata tā rātou i tuku mai ki roto; kāreka rā aia, noa atu ē kua ngere aia, kua tuku pou roa mai i tāna e ora ai ki roto.”
Valgt i Øjeblikket:
Māreko 12: CIMRNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Cook Island Maori Revised New Testament © Bible Society of the South Pacific, 2021.