Māreko 14
14
Te kimi'anga rāvenga pikika'a kia tāmate'ia a Iēsū
(Mātaio 26.1-5; Luka 22.1-2; Ioane 11.45-53)
1 #
Exo 12.1-27
E rua atura te pō toe e tae ei te Pāsa ra ē te Kai 'Aka'ōpuekore'ia ra. Tē kimi ra 'oki te kau ta'unga nunui ē te au Pū'āpi'i Ture i tā rātou rāvenga pikika'a i a Iēsū, kia rauka aia i a rātou ka tāmate atu ei. 2Kua nā kō rā rātou, “Auraka i te rā 'ōro'a nei, ko te 'ōrure'au ā'ea te tangata.”
Tō Iēsū 'akamā'inu'anga'ia i Bētānia
(Mātaio 26.6-13; Ioane 12.1-8)
3 #
Luk 7.37,38 Ē tei Bētānia a Iēsū i te kaingākai i te 'are o Simona lēpera ra, kua 'aere maira tēta'i va'ine ma tēta'i pi'a 'alabata, 'e manongi nārito, 'e mea 'oko ma'ata. Kua vāvā'i i'ora aia i te pi'a, e riringi maira i te manongi ki runga a'o i tō Iēsū ūpoko. 4Riri akera tēta'i pae i roto i a rātou 'ua'orāi, nā kō akera, “'E a'a tēianei manongi i kaimoumou'ia ai? 5Nō te mea, e toru 'ānere i te moni 'ārio ē 'e ma'ata atu 'oki te ka rauka mai kia 'oko'ia tēia manongi ra, kia 'apai atu nā te puta'ua.” Kua 'aka'apa i'ora rātou i aia.
6Kua karanga atura a Iēsū, “Vai'o atu i aia. 'E a'a kōtou i tāmanamanatā mai ei i aia? 'E 'anga'anga meitaki tāna i rave mai ki āku nei. 7#Deut 15.11E no'o tāmou 'oki te aronga puta'ua ki ō kōtou nei, ē kia 'inangaro ra, ē ka rauka i a kōtou i te tākinga meitaki atu i a rātou i tēta'i 'ua atu taime; ko au nei rā, kāre ia au e no'o tāmou ki ō kōtou nei. 8Kua rave aia i tei tau i aia kia rave; kua 'aere takere mai aia e 'akamā'inu i tōku kōpapa nei nō te tanumanga. 9Koia mou tāku e karanga atu ki a kōtou nei, te au ngā'i katoa e tūtū'ia ai tēianei 'ēvangelia i te ao katoa nei, e tuatua katoa'ia tā tēianei va'ine i rave nei 'ei manako'anga atu i aia.”
Tē 'akatika nei a Iūda kia tuku pikika'a atu i a Iēsū
(Mātaio 26.14-16; Luka 22.3-6)
10'Aere atura tēta'i o te tino nga'uru mā rua ra, ko Iūda Ikariota, ki te kau ta'unga nunui ra kia tuku atu aia i a Iēsū ki a rātou. 11E kite akera rātou, mareka rava atura, 'akatau i'ora ē e 'ō mai i te moni nāna. Kua kimi atura aia i tāna rāvenga e tau kia tuku atu aia i a Iēsū.
Te kai'anga a Iēsū i te Pāsa ma tāna au pipi
(Mātaio 26.17-25; Luka 22.7-14,21-23; Ioane 13.21-30)
12E tae akera ki te rā mua o te Kai 'Aka'ōpuekore'ia ra e tā'ia ai te au punua māmoe nō te Pāsa ra, kua nā kō maira tāna au pipi ki a Iēsū, “E 'aere mātou ki 'ea e 'ākonokono ei i te Pāsa kia kai koe?”
13Kua tono atura aia i e tokorua pipi āna ra, nā kō atura ki a rāua, “Ka 'aere kōrua ki te 'ōire ra, ē e 'ārāvei mai tēta'i tangata i a kōrua tē 'apai ra i te 'āriki vai. E āru atu kōrua i aia, 14ē i te ngā'i i tomo'ia atu e ia ra, e karanga atu kōrua ki te pū o te 'are, ‘Tē ui maira te Pū'āpi'i, tei 'ea te pi'a manu'iri kia kai au i te Pāsa ē tāku au pipi katoa?’ 15Ē nāna e 'akakite mai i tēta'i pi'a ma'ata tei runga, kua papa takere; 'ei reira kōrua e 'ākonokono ei nā tātou.”
16'Aere atura aua ngā pipi ra ki roto i te 'ōire, ē kua kitea'ia e rāua mei tāna i 'akakite mai ki a rāua ra. Ē kua 'ākonokono i'ora rāua i te Pāsa.
17E a'ia'i atura, kua 'aere maira a Iēsū ē te tino nga'uru mā rua ra. 18#Sal 41.9Tē no'o ra rātou ē tē kaikai ra, kua karanga atura a Iēsū, “Koia mou tāku e karanga atu ki a kōtou nei, ka riro tēta'i o kōtou nei, e kai katoa i tā tātou kaingākai nei, i te tuku pikika'a mai i āku.”
19Kua taitaiā ma'ata rava atura rātou, ē kua ui tātakita'i maira rātou ki aia, tēta'i i muri ake i tēta'i, “Ko au āinei?”
20Kua karanga atura aia ki a rātou, nā kō atura, “'Okota'i o te tino nga'uru mā rua nei, ko tei tūto'u kāpipiti ō māua rima ki roto i te kapu nei. 21Tē 'aere nei rāi 'oki te Tamaiti a te Tangata nei mei tei tātā'ia nōna ra; inārā, 'e 'ae 'oki taua tangata ra tei tuku pikika'a i te Tamaiti a te Tangata nei. 'E ngari ake te reira tangata nāringa kāre i 'ānau'ia mai.”
Te kaingākai a te 'Atu
(Mātaio 26.26-30; Luka 22.14-20; 1 Kōrīnētia 11.23-25)
22Ē tē kaikai ra rātou, kua rave i'ora a Iēsū i te mānga, kua 'akameitaki atura, vāvā'i i'ora, tuku atura ki te au pipi, nā kō atura, “Ka rave, ko tōku kōpapa tēia.”
23Kua rave i'ora aia i te kapu, e oti akera i te 'akameitaki, tuku atura ki a rātou ra. Kua inu i'ora rātou rava rāi. 24#a: Exo 24.8; b: Ier 31.31-34Kua nā kō atura aia ki a rātou, “Ko tōku toto tēia nō te kōreromotu ra, tei 'akamaringi'ia nō te tangata 'e mānganui. 25Koia mou tāku e karanga atu ki a kōtou nei, kāre rava au e inu 'aka'ou mei roto mai i te 'ua vine nei e tae 'ua atu ki te rā e inu ei au i te uaina 'ōu i roto i te bāsileia o te Atua ra.”
26Ē kia oti akera tēta'i 'īmene, 'aere atura rātou ki va'o ki te Maunga o te Ōlive.
Tē toto'u nei a Iēsū i tā Pētero 'u'una'anga
(Mātaio 26.31-35; Luka 22.31-34; Ioane 13.36-38)
27 #
Zek 13.7
Kua karanga atura a Iēsū ki tāna au pipi, “E maitu ei kōtou katoa. Kua oti 'oki i te tātā'ia ē, ‘E pāpā au i te tiaki, ē ka pue'urikiriki kē 'oki te au māmoe.’ 28#Māt 28.16Inārā, i muri ake i tōku tū'aka'ou'anga maira, e nā mua au i a kōtou i te 'aere ki Galilea.”
29Kua tuatua maira a Pētero ki aia i reira, “Noa atu ē ka maitu te tangata kātoatoa, kāre tākiri au nei.”
30Kua nā kō atura a Iēsū ki aia, “Koia mou tāku e karanga atu ki a koe, ākōnei 'ei tēia pō nei, kāre e tae ki te rua o te kākaoa'anga moa, ka tūtoru ō'ou 'u'una'anga i āku.”
31Kua tuatua viviki 'ua maira a Pētero, “Ē kia 'inangaro'ia kia mate au ē koe katoa, kāre au e 'u'una i a koe.”
Ē kua pērā maira 'oki rātou rava rāi.
Tā Iēsū pure i Getesemane
(Mātaio 26.36-46; Luka 22.39-46)
32E tae atura a Iēsū ē tāna au pipi ki tēta'i ngā'i, ko Getesemane te ingoa, kua tuatua maira aia ki a rātou, “E no'o kōtou i konei kia pure au.” 33Kua arataki katoa atura aia i a Pētero, i a Iākōbo ē i a Ioane, ē kua ngā'eva i'ora aia ē roko'ia atura e te teia'a tukituki. 34Kua tuatua maira aia ki a rātou, “Kua pini rava tōku vaerua i te mamae mate ma'ata. E no'o kōtou i konei, e ara.”
35'Aere atura aia ki mua iti i'o, tīpapa i'ora ki raro i te one, pure i'ora ē, kia tika ra, kia 'akaora'ia aia i te reira ora. 36Kua nā kō atura, “E Aba, e taku Metua, e tika te au mea katoa i a koe. E tao'i kē atu i tēianei kapu. Kia tupu rā tō'ou anoano, auraka tōku.”
37Kua 'oki maira aia ki tāna au pipi. E kitea maira tē moe ra rātou, kua nā kō maira ki a Pētero, “E Simona, tē moe na koe? Kāre e rauka kia ara koe 'e 'okota'i 'ua ake ora? 38E ara ē e pure 'oki kia kore kōtou e roko'ia e te tīmata'anga. Kua tika 'oki te vaerua, tē parukā 'ua nei rā te kōpapa.”
39Kua 'aere 'aka'ou atura aia ē kua pure, 'okota'i rāi 'oki pure. 40Ē kia 'oki 'aka'ou mai aia ra, kitea maira tē moe rāi rātou; i teima'a 'oki tō rātou mata. Ē kāre rava ā rātou 'e tuatua kia tuatua mai ki aia ra.
41Ē kua 'oki 'aka'ou maira aia, ko te tūtoru ia, kua nā kō maira ki a rātou, “Tē moe na kōtou ma te 'akangāro'i nō te toenga o te tuātau? Oti ra 'ua. Kua tae ki te ora. Inā, e tukuna'ia te Tamaiti a te Tangata nei ki te rima o te aronga 'ara. 42Ka tū, ka 'aere tātou. Inā, tē vaitata mai nei aia te ka tuku pikika'a mai i āku nei.”
Tē 'opu'ia nei a Iēsū
(Mātaio 26.47-56; Luka 22.47-53; Ioane 18.3-12)
43'Ei reira ra i a Iēsū rāi e tuatua ra, ko Iūda, tēta'i o te tino nga'uru mā rua ra, kua 'aere maira, ē tēta'i urupū tangata ma te koke ē te rākau nō kō mai i te kau ta'unga nunui, te au Pū'āpi'i Ture ē te aronga pakari ra. 44Ē ko tei tuku pikika'a i aia, kua tuku ana i tēta'i 'akairo ki a rātou, nā kō atura, “Ko te tangata tāku e 'ongi atu, ko ia ia. Ka 'opu atu i aia, ka arataki mārie atu ei.”
45Ē tei te tae'anga mai aia ra, 'aere tika atura ki a Iēsū, nā kō atura, “E te Pū'āpi'i!” ē kua 'ongi atura i aia. 46Kua tuku maira rātou i te rima ki runga i a Iēsū, 'opu maira i aia. 47Kua unu'i akera tēta'i o rātou i tū vaitata a'o i te koke, tāpotu atura i te tāvini o te Ta'unga Ma'ata ra, motu kē atura tōna taringa. 48Kua karanga atura a Iēsū nā kō atura ki a rātou, “I 'aere mai kōtou e 'opu i āku ma te koke ē te rākau, mei te mea ē, 'e keiā ra au. 49#Luk 19.47; 21.37I no'o 'ua ana 'oki au i rotopū i a kōtou i te au rā katoa i te 'āpi'i'anga i roto i te 'iero, kāre 'ua kōtou i 'opu mai i āku. Kia tupu rā te tuatua i tātā'ia ra e tikāi.”
50Kua 'akaruke i'ora rātou katoa i aia, 'oro atura.
51Kua āru maira tēta'i tangata 'ōu i aia, ma te kāka'u i tākai'ia ki runga a'o i aia, kua 'opu'ia maira aia. 52'Akaruke i'ora aia i tōna kāka'u, 'oro 'ua atura ma te kāka'ukore.
Tē tū nei a Iēsū ki mua i te Kōnitara
(Mātaio 26.57-68; Luka 22.54-55,63-71; Ioane 18.13-14,19-24)
53Kua arataki'ia atura a Iēsū ki te Ta'unga Ma'ata ra. Kua putuputu 'oki te kau ta'unga nunui katoa, te aronga pakari ē te au Pū'āpi'i Ture i reira. 54Kua āru atura a Pētero i aia i muri roa, e tae 'ua atu ki roto i te koro o te Ta'unga Ma'ata ra, no'o i'ora ma te aronga tāvini e murumuru i aia 'ua'orāi i te a'i. 55Tē kimi ra 'oki te kau ta'unga nunui ē te Sūnēderi katoa ra i te kite i a Iēsū kia 'aka'apa atu i aia kia mate; kāre rā i kitea. 56'E mānganui 'oki tei tuku mai i te tuatua pikika'a i aia ra, kāre rā tā rātou tuatua i 'āiteite.
57Kua tū akera ēta'i ki runga ē kua tuku maira i te tuatua pikika'a i aia, nā kō maira, 58#Ioa 2.19“Kua 'akarongo mātou i aia i te tuatua'anga ē, ‘E vāvā'i au i tēia nao i 'anga'ia e te rima tangata nei, ē kia pō toru anake, kua 'akatū au i tēta'i tei kore i 'anga'ia e te rima.’ ”
59Kāre katoa tā rātou tuatua i 'āiteite i reira.
60Kua tū akera te Ta'unga Ma'ata ki runga i rotopū i a rātou, ē kua ui ki a Iēsū, nā kō maira, “Kāre koe e pa'u mai? 'E a'a tā tēia ngā tangata nei tāpepe'anga mai ki a koe nei?”
61Tē mūtēkī 'ua rā a Iēsū, kāre i kī 'ua atu. Kua ui 'aka'ou maira te Ta'unga Ma'ata, nā kō maira ki aia, “Ko te Mesia āina koe, te Tamaiti a tei 'Akameitaki'ia?”
62 #
Dan 7.13
Kua pa'u atura a Iēsū, “Ko au ia, ē ka kite kōtou i te Tamaiti a te Tangata nei i te no'o'anga i te rima katau o te Atua Mana Kātoatoa ra, ē te 'aere'anga mai nā runga i te tiao rangi!”
63Kua 'a'ae atura te Ta'unga Ma'ata i tōna kāka'u, ē kua nā kō atura, “'E a'a 'ua atu rāi tātou ka 'inangaro ei i te au kite? 64#Lev 24.16Kua 'akarongo ake nei kōtou i te 'akakino'anga Atua nei! 'E a'a tō kōtou manako?”
Kua tuatua 'aka'apa maira rātou rava rāi i aia ē, ka tau i aia te mate.
65Kua 'akamata atura ēta'i pae i te tūtu'a i te 'uāvare ki runga a'o i aia ē te 'akapūroku maira i ōna mata ē te moto atura i aia, nā kō atura, “E toto'u mai!” E papaki atura te au tāvini i aia ki tō rātou kapu rima.
Tō Pētero 'u'una'anga i a Iēsū
(Mātaio 26.69-75; Luka 22.56-62; Ioane 18.15-18,25-27)
66Ē tē no'o 'ua ra a Pētero ki roto i te koro, kua 'aere maira tēta'i tāvini tamā'ine nō taua Ta'unga Ma'ata ra, 67ē kite atura aia i a Pētero i te murumuru'anga i aia 'ua'orāi, kua tīroi matariki atura i aia, nā kō atura, “Ko koe katoa tēta'i i a Iēsū i Nāzarēta ra.”
68Kua 'u'una i'ora aia, nā kō maira, “Kāre au i kite i aia. Kāre katoa au i nakiro i tā'au i tuatua maina.” 'Aere atura aia ki va'o i te tomo'anga ra. Kākaoa i'ora te moa.
69Ē i te 'ākara'anga i aia kua tuatua akera taua tāvini va'ine ra ki te aronga i tū vaitata a'o ra, “Nō rātou katoa tēianei tangata.” 70Kua 'u'una 'aka'ou i'ora a Pētero.
E roa iti akera, kua tuatua maira te aronga i tū i vaitata ra ki a Pētero, “Koia mou, nō rātou tikāi koe. 'E tangata Galilea 'oki koe.”
71Kua 'akamata i'ora aia i te tao ma te taputo'u, “Kāre tākiri au i kite i tēianei tangata tā kōtou i tuatua na.”
72Kua kākaoa i'ora te moa, ko te rua ia o te kākaoa'anga. Kua 'akama'ara i'ora i a Pētero ē i tuatua mai a Iēsū ki aia ē, “Kāre e tae ki te rua o te kākaoa'anga moa, ka tūtoru ō'ou 'u'una'anga i āku.” Ē i te 'akama'ara'anga i te reira, matemate i'ora aia i te auē.
Valgt i Øjeblikket:
Māreko 14: CIMRNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Cook Island Maori Revised New Testament © Bible Society of the South Pacific, 2021.
Māreko 14
14
Te kimi'anga rāvenga pikika'a kia tāmate'ia a Iēsū
(Mātaio 26.1-5; Luka 22.1-2; Ioane 11.45-53)
1 #
Exo 12.1-27
E rua atura te pō toe e tae ei te Pāsa ra ē te Kai 'Aka'ōpuekore'ia ra. Tē kimi ra 'oki te kau ta'unga nunui ē te au Pū'āpi'i Ture i tā rātou rāvenga pikika'a i a Iēsū, kia rauka aia i a rātou ka tāmate atu ei. 2Kua nā kō rā rātou, “Auraka i te rā 'ōro'a nei, ko te 'ōrure'au ā'ea te tangata.”
Tō Iēsū 'akamā'inu'anga'ia i Bētānia
(Mātaio 26.6-13; Ioane 12.1-8)
3 #
Luk 7.37,38 Ē tei Bētānia a Iēsū i te kaingākai i te 'are o Simona lēpera ra, kua 'aere maira tēta'i va'ine ma tēta'i pi'a 'alabata, 'e manongi nārito, 'e mea 'oko ma'ata. Kua vāvā'i i'ora aia i te pi'a, e riringi maira i te manongi ki runga a'o i tō Iēsū ūpoko. 4Riri akera tēta'i pae i roto i a rātou 'ua'orāi, nā kō akera, “'E a'a tēianei manongi i kaimoumou'ia ai? 5Nō te mea, e toru 'ānere i te moni 'ārio ē 'e ma'ata atu 'oki te ka rauka mai kia 'oko'ia tēia manongi ra, kia 'apai atu nā te puta'ua.” Kua 'aka'apa i'ora rātou i aia.
6Kua karanga atura a Iēsū, “Vai'o atu i aia. 'E a'a kōtou i tāmanamanatā mai ei i aia? 'E 'anga'anga meitaki tāna i rave mai ki āku nei. 7#Deut 15.11E no'o tāmou 'oki te aronga puta'ua ki ō kōtou nei, ē kia 'inangaro ra, ē ka rauka i a kōtou i te tākinga meitaki atu i a rātou i tēta'i 'ua atu taime; ko au nei rā, kāre ia au e no'o tāmou ki ō kōtou nei. 8Kua rave aia i tei tau i aia kia rave; kua 'aere takere mai aia e 'akamā'inu i tōku kōpapa nei nō te tanumanga. 9Koia mou tāku e karanga atu ki a kōtou nei, te au ngā'i katoa e tūtū'ia ai tēianei 'ēvangelia i te ao katoa nei, e tuatua katoa'ia tā tēianei va'ine i rave nei 'ei manako'anga atu i aia.”
Tē 'akatika nei a Iūda kia tuku pikika'a atu i a Iēsū
(Mātaio 26.14-16; Luka 22.3-6)
10'Aere atura tēta'i o te tino nga'uru mā rua ra, ko Iūda Ikariota, ki te kau ta'unga nunui ra kia tuku atu aia i a Iēsū ki a rātou. 11E kite akera rātou, mareka rava atura, 'akatau i'ora ē e 'ō mai i te moni nāna. Kua kimi atura aia i tāna rāvenga e tau kia tuku atu aia i a Iēsū.
Te kai'anga a Iēsū i te Pāsa ma tāna au pipi
(Mātaio 26.17-25; Luka 22.7-14,21-23; Ioane 13.21-30)
12E tae akera ki te rā mua o te Kai 'Aka'ōpuekore'ia ra e tā'ia ai te au punua māmoe nō te Pāsa ra, kua nā kō maira tāna au pipi ki a Iēsū, “E 'aere mātou ki 'ea e 'ākonokono ei i te Pāsa kia kai koe?”
13Kua tono atura aia i e tokorua pipi āna ra, nā kō atura ki a rāua, “Ka 'aere kōrua ki te 'ōire ra, ē e 'ārāvei mai tēta'i tangata i a kōrua tē 'apai ra i te 'āriki vai. E āru atu kōrua i aia, 14ē i te ngā'i i tomo'ia atu e ia ra, e karanga atu kōrua ki te pū o te 'are, ‘Tē ui maira te Pū'āpi'i, tei 'ea te pi'a manu'iri kia kai au i te Pāsa ē tāku au pipi katoa?’ 15Ē nāna e 'akakite mai i tēta'i pi'a ma'ata tei runga, kua papa takere; 'ei reira kōrua e 'ākonokono ei nā tātou.”
16'Aere atura aua ngā pipi ra ki roto i te 'ōire, ē kua kitea'ia e rāua mei tāna i 'akakite mai ki a rāua ra. Ē kua 'ākonokono i'ora rāua i te Pāsa.
17E a'ia'i atura, kua 'aere maira a Iēsū ē te tino nga'uru mā rua ra. 18#Sal 41.9Tē no'o ra rātou ē tē kaikai ra, kua karanga atura a Iēsū, “Koia mou tāku e karanga atu ki a kōtou nei, ka riro tēta'i o kōtou nei, e kai katoa i tā tātou kaingākai nei, i te tuku pikika'a mai i āku.”
19Kua taitaiā ma'ata rava atura rātou, ē kua ui tātakita'i maira rātou ki aia, tēta'i i muri ake i tēta'i, “Ko au āinei?”
20Kua karanga atura aia ki a rātou, nā kō atura, “'Okota'i o te tino nga'uru mā rua nei, ko tei tūto'u kāpipiti ō māua rima ki roto i te kapu nei. 21Tē 'aere nei rāi 'oki te Tamaiti a te Tangata nei mei tei tātā'ia nōna ra; inārā, 'e 'ae 'oki taua tangata ra tei tuku pikika'a i te Tamaiti a te Tangata nei. 'E ngari ake te reira tangata nāringa kāre i 'ānau'ia mai.”
Te kaingākai a te 'Atu
(Mātaio 26.26-30; Luka 22.14-20; 1 Kōrīnētia 11.23-25)
22Ē tē kaikai ra rātou, kua rave i'ora a Iēsū i te mānga, kua 'akameitaki atura, vāvā'i i'ora, tuku atura ki te au pipi, nā kō atura, “Ka rave, ko tōku kōpapa tēia.”
23Kua rave i'ora aia i te kapu, e oti akera i te 'akameitaki, tuku atura ki a rātou ra. Kua inu i'ora rātou rava rāi. 24#a: Exo 24.8; b: Ier 31.31-34Kua nā kō atura aia ki a rātou, “Ko tōku toto tēia nō te kōreromotu ra, tei 'akamaringi'ia nō te tangata 'e mānganui. 25Koia mou tāku e karanga atu ki a kōtou nei, kāre rava au e inu 'aka'ou mei roto mai i te 'ua vine nei e tae 'ua atu ki te rā e inu ei au i te uaina 'ōu i roto i te bāsileia o te Atua ra.”
26Ē kia oti akera tēta'i 'īmene, 'aere atura rātou ki va'o ki te Maunga o te Ōlive.
Tē toto'u nei a Iēsū i tā Pētero 'u'una'anga
(Mātaio 26.31-35; Luka 22.31-34; Ioane 13.36-38)
27 #
Zek 13.7
Kua karanga atura a Iēsū ki tāna au pipi, “E maitu ei kōtou katoa. Kua oti 'oki i te tātā'ia ē, ‘E pāpā au i te tiaki, ē ka pue'urikiriki kē 'oki te au māmoe.’ 28#Māt 28.16Inārā, i muri ake i tōku tū'aka'ou'anga maira, e nā mua au i a kōtou i te 'aere ki Galilea.”
29Kua tuatua maira a Pētero ki aia i reira, “Noa atu ē ka maitu te tangata kātoatoa, kāre tākiri au nei.”
30Kua nā kō atura a Iēsū ki aia, “Koia mou tāku e karanga atu ki a koe, ākōnei 'ei tēia pō nei, kāre e tae ki te rua o te kākaoa'anga moa, ka tūtoru ō'ou 'u'una'anga i āku.”
31Kua tuatua viviki 'ua maira a Pētero, “Ē kia 'inangaro'ia kia mate au ē koe katoa, kāre au e 'u'una i a koe.”
Ē kua pērā maira 'oki rātou rava rāi.
Tā Iēsū pure i Getesemane
(Mātaio 26.36-46; Luka 22.39-46)
32E tae atura a Iēsū ē tāna au pipi ki tēta'i ngā'i, ko Getesemane te ingoa, kua tuatua maira aia ki a rātou, “E no'o kōtou i konei kia pure au.” 33Kua arataki katoa atura aia i a Pētero, i a Iākōbo ē i a Ioane, ē kua ngā'eva i'ora aia ē roko'ia atura e te teia'a tukituki. 34Kua tuatua maira aia ki a rātou, “Kua pini rava tōku vaerua i te mamae mate ma'ata. E no'o kōtou i konei, e ara.”
35'Aere atura aia ki mua iti i'o, tīpapa i'ora ki raro i te one, pure i'ora ē, kia tika ra, kia 'akaora'ia aia i te reira ora. 36Kua nā kō atura, “E Aba, e taku Metua, e tika te au mea katoa i a koe. E tao'i kē atu i tēianei kapu. Kia tupu rā tō'ou anoano, auraka tōku.”
37Kua 'oki maira aia ki tāna au pipi. E kitea maira tē moe ra rātou, kua nā kō maira ki a Pētero, “E Simona, tē moe na koe? Kāre e rauka kia ara koe 'e 'okota'i 'ua ake ora? 38E ara ē e pure 'oki kia kore kōtou e roko'ia e te tīmata'anga. Kua tika 'oki te vaerua, tē parukā 'ua nei rā te kōpapa.”
39Kua 'aere 'aka'ou atura aia ē kua pure, 'okota'i rāi 'oki pure. 40Ē kia 'oki 'aka'ou mai aia ra, kitea maira tē moe rāi rātou; i teima'a 'oki tō rātou mata. Ē kāre rava ā rātou 'e tuatua kia tuatua mai ki aia ra.
41Ē kua 'oki 'aka'ou maira aia, ko te tūtoru ia, kua nā kō maira ki a rātou, “Tē moe na kōtou ma te 'akangāro'i nō te toenga o te tuātau? Oti ra 'ua. Kua tae ki te ora. Inā, e tukuna'ia te Tamaiti a te Tangata nei ki te rima o te aronga 'ara. 42Ka tū, ka 'aere tātou. Inā, tē vaitata mai nei aia te ka tuku pikika'a mai i āku nei.”
Tē 'opu'ia nei a Iēsū
(Mātaio 26.47-56; Luka 22.47-53; Ioane 18.3-12)
43'Ei reira ra i a Iēsū rāi e tuatua ra, ko Iūda, tēta'i o te tino nga'uru mā rua ra, kua 'aere maira, ē tēta'i urupū tangata ma te koke ē te rākau nō kō mai i te kau ta'unga nunui, te au Pū'āpi'i Ture ē te aronga pakari ra. 44Ē ko tei tuku pikika'a i aia, kua tuku ana i tēta'i 'akairo ki a rātou, nā kō atura, “Ko te tangata tāku e 'ongi atu, ko ia ia. Ka 'opu atu i aia, ka arataki mārie atu ei.”
45Ē tei te tae'anga mai aia ra, 'aere tika atura ki a Iēsū, nā kō atura, “E te Pū'āpi'i!” ē kua 'ongi atura i aia. 46Kua tuku maira rātou i te rima ki runga i a Iēsū, 'opu maira i aia. 47Kua unu'i akera tēta'i o rātou i tū vaitata a'o i te koke, tāpotu atura i te tāvini o te Ta'unga Ma'ata ra, motu kē atura tōna taringa. 48Kua karanga atura a Iēsū nā kō atura ki a rātou, “I 'aere mai kōtou e 'opu i āku ma te koke ē te rākau, mei te mea ē, 'e keiā ra au. 49#Luk 19.47; 21.37I no'o 'ua ana 'oki au i rotopū i a kōtou i te au rā katoa i te 'āpi'i'anga i roto i te 'iero, kāre 'ua kōtou i 'opu mai i āku. Kia tupu rā te tuatua i tātā'ia ra e tikāi.”
50Kua 'akaruke i'ora rātou katoa i aia, 'oro atura.
51Kua āru maira tēta'i tangata 'ōu i aia, ma te kāka'u i tākai'ia ki runga a'o i aia, kua 'opu'ia maira aia. 52'Akaruke i'ora aia i tōna kāka'u, 'oro 'ua atura ma te kāka'ukore.
Tē tū nei a Iēsū ki mua i te Kōnitara
(Mātaio 26.57-68; Luka 22.54-55,63-71; Ioane 18.13-14,19-24)
53Kua arataki'ia atura a Iēsū ki te Ta'unga Ma'ata ra. Kua putuputu 'oki te kau ta'unga nunui katoa, te aronga pakari ē te au Pū'āpi'i Ture i reira. 54Kua āru atura a Pētero i aia i muri roa, e tae 'ua atu ki roto i te koro o te Ta'unga Ma'ata ra, no'o i'ora ma te aronga tāvini e murumuru i aia 'ua'orāi i te a'i. 55Tē kimi ra 'oki te kau ta'unga nunui ē te Sūnēderi katoa ra i te kite i a Iēsū kia 'aka'apa atu i aia kia mate; kāre rā i kitea. 56'E mānganui 'oki tei tuku mai i te tuatua pikika'a i aia ra, kāre rā tā rātou tuatua i 'āiteite.
57Kua tū akera ēta'i ki runga ē kua tuku maira i te tuatua pikika'a i aia, nā kō maira, 58#Ioa 2.19“Kua 'akarongo mātou i aia i te tuatua'anga ē, ‘E vāvā'i au i tēia nao i 'anga'ia e te rima tangata nei, ē kia pō toru anake, kua 'akatū au i tēta'i tei kore i 'anga'ia e te rima.’ ”
59Kāre katoa tā rātou tuatua i 'āiteite i reira.
60Kua tū akera te Ta'unga Ma'ata ki runga i rotopū i a rātou, ē kua ui ki a Iēsū, nā kō maira, “Kāre koe e pa'u mai? 'E a'a tā tēia ngā tangata nei tāpepe'anga mai ki a koe nei?”
61Tē mūtēkī 'ua rā a Iēsū, kāre i kī 'ua atu. Kua ui 'aka'ou maira te Ta'unga Ma'ata, nā kō maira ki aia, “Ko te Mesia āina koe, te Tamaiti a tei 'Akameitaki'ia?”
62 #
Dan 7.13
Kua pa'u atura a Iēsū, “Ko au ia, ē ka kite kōtou i te Tamaiti a te Tangata nei i te no'o'anga i te rima katau o te Atua Mana Kātoatoa ra, ē te 'aere'anga mai nā runga i te tiao rangi!”
63Kua 'a'ae atura te Ta'unga Ma'ata i tōna kāka'u, ē kua nā kō atura, “'E a'a 'ua atu rāi tātou ka 'inangaro ei i te au kite? 64#Lev 24.16Kua 'akarongo ake nei kōtou i te 'akakino'anga Atua nei! 'E a'a tō kōtou manako?”
Kua tuatua 'aka'apa maira rātou rava rāi i aia ē, ka tau i aia te mate.
65Kua 'akamata atura ēta'i pae i te tūtu'a i te 'uāvare ki runga a'o i aia ē te 'akapūroku maira i ōna mata ē te moto atura i aia, nā kō atura, “E toto'u mai!” E papaki atura te au tāvini i aia ki tō rātou kapu rima.
Tō Pētero 'u'una'anga i a Iēsū
(Mātaio 26.69-75; Luka 22.56-62; Ioane 18.15-18,25-27)
66Ē tē no'o 'ua ra a Pētero ki roto i te koro, kua 'aere maira tēta'i tāvini tamā'ine nō taua Ta'unga Ma'ata ra, 67ē kite atura aia i a Pētero i te murumuru'anga i aia 'ua'orāi, kua tīroi matariki atura i aia, nā kō atura, “Ko koe katoa tēta'i i a Iēsū i Nāzarēta ra.”
68Kua 'u'una i'ora aia, nā kō maira, “Kāre au i kite i aia. Kāre katoa au i nakiro i tā'au i tuatua maina.” 'Aere atura aia ki va'o i te tomo'anga ra. Kākaoa i'ora te moa.
69Ē i te 'ākara'anga i aia kua tuatua akera taua tāvini va'ine ra ki te aronga i tū vaitata a'o ra, “Nō rātou katoa tēianei tangata.” 70Kua 'u'una 'aka'ou i'ora a Pētero.
E roa iti akera, kua tuatua maira te aronga i tū i vaitata ra ki a Pētero, “Koia mou, nō rātou tikāi koe. 'E tangata Galilea 'oki koe.”
71Kua 'akamata i'ora aia i te tao ma te taputo'u, “Kāre tākiri au i kite i tēianei tangata tā kōtou i tuatua na.”
72Kua kākaoa i'ora te moa, ko te rua ia o te kākaoa'anga. Kua 'akama'ara i'ora i a Pētero ē i tuatua mai a Iēsū ki aia ē, “Kāre e tae ki te rua o te kākaoa'anga moa, ka tūtoru ō'ou 'u'una'anga i āku.” Ē i te 'akama'ara'anga i te reira, matemate i'ora aia i te auē.
Valgt i Øjeblikket:
:
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Cook Island Maori Revised New Testament © Bible Society of the South Pacific, 2021.