Ñwaè' Matïìyoè 12
12
1À m ba nfè' anà Jisòs à ce jɛ̀r nyʉ̀ mmbomntaa Nyʉ̀, a caa à ŋkʉ̀ msaŋ mò'. Njè à m ce yaŋ ŋgǎa yɛ'ni yì buu. Wowèe a tee btu msaŋ a ce ye. 2Bèe Farìsi a ka' yɛ wa'a, a laa nè ye enɛ̂, “Yɛ̂, ŋgǎa yɛ'ni yò buu a ce gèe yuu ce ncir yi byemi enɛ a gee nyʉ̀ mmbomntaa Nyʉ̀ ka'.” 3E laa nè wowèe enɛ̂, “Wèe à be be' yuu ce Dɛvìd à m gèe à nfè' ce njè à m ce yaŋ ye ker ba bèe ce a wowèe a m ba nà ka' a? 4E m dù mbe Ndàp Nyʉ̀ a lor brɛ̌d ce a m fa nè Nyʉ̀ a ye, a fa bɛr nè bèe ce a wowèe a m ba. Ncir yi m byemi enɛ e ye ka', kɛ̀ enɛ bèe ce e m ba a wowèe a ye foŋ ka'. Bèe ce yi m ba enɛ a ye à m ku ba ba ŋgǎa taŋshi taŋshì. 5Mbò wèe à be be' foŋ mbe ŋwà' mncir enɛ ŋgǎa taŋshi taŋshì embe Ndàp Nyʉ̀ a ke bʉ' ncir mmbomntaa Nyʉ̀ ke' ba fàa nè wowèe ka' a? 6M ce suŋ wèe mɛnɛ yuu mo' ce yi càa Nyʉ̀ yi yu mbena. 7Wèe à m ba riŋ mbùu efa blàa ce Ŋwǎ' Nyʉ̀ yi làa enɛ̂, ‘Yuu ce m ce kòŋ yu ŋkoosimnse, ke' ba taŋshì ka'’ nà, wèe à m ba làa weenɛ ŋwɛ̀ ce e gèe yuu bebep ka' yu ŋwɛ̀ mbembep ka'. 8Yi yu enɛ Muu Ŋwɛ̀ yu Tàr ce e tʉr mmbomntaa Nyʉ̀.”
9E m lò embo, a du a niŋ mbe yàp ndap rloo. 10Ŋwɛ̀ mò' à m ba mbo ce li rkoo mo' li m kwe. Bèe mo' ce a m ba mbo a bipshì nè Jisòs enɛ̂, “Wà' ncir yi byemi enɛ a gee tɛ ŋwɛ̀ ke'se nyʉ̀ mmbomntaa Nyʉ̀ a?” Wowèe a m bipshi wa'a enɛ e ka' faa nlàa tɛ wowèe a bo sa' ye enɛ e bʉ' ncir. 11E laa nè wowèe enɛ̂, “Yu nda efa wěe mʉ ce e ka' tʉr njèe, e gwe njep bè'tè nyʉ̀ mmbomntaa Nyʉ̀, e ke' koo enjo, fʉr mbe ŋkʉ̀ ka'? 12Ŋwɛ̀ à lùu ntaa a caa njèe. Banɛ ncir yi byemi enɛ ŋwɛ̀ gee yuu bòŋboŋ nyʉ̀ mmbomntaa Nyʉ̀.” 13E ka' làa wa'a, a laa nè ŋwɛ̀ ce li rkoo li m kwe nà enɛ̂, “Mà' lo rkoo kùyɛɛ.” E ma', li kʉtì rbòŋboŋ, a ba àmbò lì ce li m kwe yi ka' nà. 14Bèe Farìsi a fʉʉ njepmbè a cu mcʉ̀, a seesi àmbò a be koo Jisòs yʉ.
15Jisòs à ka' rìŋ enɛ a ce cu mcʉ̀ tɛ a bo yʉ ye, a lǒ àfo. Bèe magòr a m dù a yě mbùu, e gee bèe wɛɛwɛ ce a m ce yaŋ a ke'sè. 16E laa nè wowèe enɛ a fa dù suŋ bèe enɛ e yu Muu Nyʉ̀ ka'. 17Ca yi m ba wa' tɛ yuu ce Àsayà ŋwɛ̀ ncep ntuu Nyʉ̀ à m làa, yi bo ghɛɛte njo. 18E m làa enɛ̂,
“Yɛ̂, yà ŋwɛ̀ rfà' ce mɛ̀ ce,
ŋwɛ̀ ce mɛ̀ kòŋ sê, a ce yu' rbòŋ nè ye.
M be sùusi ya yʉ' mbe yě ndù tɛ e suŋ àmbò la rsa' nè bèe enje jɛɛ.
19E be sɛr mnsɛr a bèe, kɛ̀ waani ka'.
Ŋwɛ̀ mò' be yu' yì njèndoŋ à btase ka'.
20E be kep ŋke' ce yi bʉʉti ka',
kɛ̀ liisi lam ce e ce fa ŋgɛ' ka', caar tɛ e gee tɛ rsa' mini li so.
21Bto' wɛɛwɛ vi be lɛ̀ yap ntee ba njep ye.”
22Bèe a m vʉ̀ nè ŋwɛ̀ mò' ce e m fèp, a ba lʉr, yʉ' nyʉ̀rkà' yi ba njep ye. Jisòs à gee e ke'sè, a kɛ' a ce làa, a ce yɛ buu foŋ. 23Bèe wɛɛwɛ a m bɛ̀ɛŋger sê, a laa enɛ̂, “Wà' ŋwɛ̀ ca yu Muu Dɛvìd a?” 24Bèe Farìsi a ka' yu' wa'a, a laa enɛ̂, “Ŋwɛ̀ ca ce fʉr byʉ' mnyʉ̌mkà' enjep bèe ba à ŋger Bɛsɛbùl ce e yu ŋkʉʉ mnyʉ̌mkà'.” 25Jisòs à m ku riŋ yuu ce wowèe a ce kwà'shi, a laa nè wowèe enɛ̂, “To' yi ka' gapni, ke' ba cǔu mo'sir ka' banɛ to' anà yi be sà'ŋger, gwè. Rla' li ka' gapni, ke' ba cǔu mo'sir ka', ndap gapnì, ke' ba cǔu mo'sir ka' banɛ àde' rla' anà li tɛɛ ka', ndap anà tɛɛ ka' foŋ. 26Satàn ka' ce fʉr Satàn enjep bèe banɛ ŋgàpni yi yu nje nyòr Satàn. Yi ka' ba wa'a, banɛ àde' yi to' yi ka' tɛɛ à njɛ̌ɛ kɛ? 27M ka' ba ce fʉr byʉ' mnyʉ̌mkà' anà ba à ŋger Bɛsɛbùl, banɛ bèe wee a ce fʉr yap byʉ' anà enjep bèe ba à ŋger nda? Banɛ be kù sa' ba yè bèe sa' wèe. 28M ka' ce fʉr byʉ' mnyʉ̌mkà' enjep bèe ba à ŋger Yʉ' Nyʉ̀ banɛ kʉʉ Nyʉ̀ yi vʉ̀ nè wèe. 29Yi yu enɛ àde' ŋwɛ̀ niŋ mbe ndàp ŋwɛ̀ ŋger kwɛ' yì buu du àgho ka', ce ka' tɛ ba enɛ e ba kɛ' a kur ŋwɛ̀ anà wɛɛ, ka' niŋ mbo kwɛ̀' yì buu, dù àgho ka'? 30Ŋwɛ̀ ce e ka' tɛ ba wèr ye ka', banɛ ŋgàŋ yu yà ŋwɛ̀ bbàa. Ŋwɛ̀ ce e ka' tɛ ce baashi wèr ye ka', banɛ ŋgàŋ ce da'si da'si. 31Banɛ m ce suŋ wèe mɛnɛ Nyʉ̀ be fòosi bèe efa buu bbebep wɛɛwɛ ce wowèe a gèe, ker ba buu bbebep ce wowèe a làa. À ka' ba yi àmbò ŋwɛ̀ ce e bepsi rlii Yʉ' Rara, àde' Nyʉ̀ foosì ŋgàŋ ka'. 32A be fòosi ŋwɛ̀ ce e ka' laa yuu bebep kuu Muu Ŋwɛ̀. Ŋwɛ̀ ce e ka' laa yuu bebep kuu ba Yʉ' Rara banɛ a be fòosi ŋgàŋ ka', ka' à nfě' sè'ni na, kɛ̀ à nfè' ce e bii ka' ba ɛ̀.
33“Wèe à ba rìŋ enɛ mbàŋ ce yi ka' ba bòŋboŋ, banɛ ce yi yu bòŋboŋ. Mbàŋ ce yi ka' ba bebep, banɛ ce yi yu bebep foŋ. A ke rìŋ ce ba nè mbàŋ ce anà. 34Wèe ce wèe yu boo bfî, àde' wèe ce wèe yu běe bbebep, laa yuu bòŋboŋ à njɛ̌ɛ kɛ? Yi yu wa' njobè' ŋwɛ̀ e ke làa ba efa ku' buu ce vi ruu njep yě ntee. 35Ŋwɛ̌ mbòŋmboŋ e ke fʉr buu bbòŋboŋ efa buu bbòŋboŋ ce vi yu njep yě ntee, ŋwɛ̌ mbembep fʉr buu bbebep efa buu bbebep ce vi yu njep yě ntee. 36M ce suŋ wèe mɛnɛ be kèe ba à nǒŋ mnsa' tɛ bèe a laa yuu kùu blàa bcicì wɛɛwɛ ce wowèe a m làa, 37njobè' wo blàa vi be kèe fʉr wɛ̀ efa mnsa' tɛ wo blàa vi gee tɛ à gwe mnsa'.”
38Ŋgǎa ryɛ'ni mncir ba bèe Farìsi a laa nè ye enɛ̂, “Ŋwɛ̀ ryɛ'nì, wèr ce kòŋ wernɛ à duŋshi ncòo mò' tɛ wèr yɛ.” 39E beesì a laa nè wowèe enɛ̂, “Ŋgʉ̀ bèe ce a yu ŋgǎa bsàrbuu, a ba mini nè Nyʉ̀ ka' na a ce làa enɛ m duŋshi wowèe ncòo. M be dùŋshi wowèe ncòo mò' caa efa ncòo yì Jonà ŋwɛ̀ ncep ntuu Nyʉ̀ ka'. 40Àmbò Jonà à m cu njep rbʉ̌ nca ce e m kù' sê, à mnǒŋ btaar nà, Muu Ŋwɛ̀ ye ye be cu njep mʉ̀ nshe à mnǒŋ btaar. 41Běe à rla' Nenɛvì a be kèe tɛɛ à nòŋ mnsa' a ŋgʉ̀ bèe yǐ sè'ni na, làa enɛ wowèe a gèe yuu bebep njobè' Jonà à m fè'shi blǎa Nyʉ̀ nè wowèe, wowèe a kupsè a ma' yàp buu bbebep. Yɛ nè, yuu mo' yi yu mbena sè'ni na ce yi càa Jonà. 42Njeŋwɛ̀ ce e m ce sa' to' embà mbùu-ŋgòŋ be kèe nàti tɛɛ mbekì à nòŋ mnsa', làa enɛ ŋgʉ̀ bèe e sè'ni na a gèe yuu bebep, njobè' e m vʉ̀ yi ba à njìsàp sê, à ryu' blǎa bfee ce Solomʉ̀n à m ce làa. Yɛ nè, yuu mo' yi yu mbena sè'ni na ce yi càa Solomʉ̀n.
43“Yʉ' bebep yi ke fʉʉ enjep ŋwɛ̀ kashi à ŋgǒŋ yuur à rròo dǐ' rlʉ̀shì. Yi ka' roo yɛ ka', 44yi laa enɛ̂, ‘M be kʉti mbe ndàp ce mɛ̀ m fʉʉ embo nà.’ Yi ce kʉti, yɛ ndap anà ba mbòmmbo, a yɛ̂r, kupshi, e ce raa. 45Yi yɛ wa'a, ker du vʉ nè byʉ' mmo' vi sàambâ, ce vi bep a caa yi, a wowèe a niŋ cu mbo, ŋgàŋ misi bep caa àmbò e m ba entombì. A mbò yi be kèe ba nè ŋgʉ̀ běe bbebep e sè'ni wa'a.”
46Jisòs à ka' kù bii ce làa nè bèe, yì ma ba bfʉr vi a vʉ̂, a tɛɛ njepmbè a ce kòŋ à rlàa yuu nè ye. 47Ŋwɛ̀ mò' à laa nè ye enɛ̂, “Yɛ̂, yò ma ba bfʉr wo a tɛɛ njepmbè a ce ròo à ryɛ wɛ̀.” 48E beesì a laa nè ŋwɛ̀ anà enɛ̂, “Yà ma yu nda, bfʉr wa à ba wèe kɛ?” 49E naa yi bo a duŋshi ŋgǎa yɛ'ni yì buu àgho, a laa enɛ̂, “Yɛ̂, a yà ma ba bfʉr wa na. 50Ŋwɛ̀ ce e ka' gee yuu ce yà Ta ce e yu mbe bùu ce kòŋ, banɛ ŋgàŋ yu nfʉrà, a ba njar yà, a ba yà mâ.”
Valgt i Øjeblikket:
Ñwaè' Matïìyoè 12: LNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Limbum New Testament © Bible Society of Cameroon, 2003.