Hidin Hopapna 2
2
Hay Na'at Hinan Mi'apituh Algo
1Hidin nagibbuh an limmun Apu Dios di ad lagud ya tun luta ya an namin nadan wada 2ot tumungo i diyen mi'apituh algo ta hidiyey ayna nun'iblayan.#Hebrew 4:4,10 3Ot wagahanah diyen mi'apituh algo an alyonay hidiyey na'anhan an algo te tinungonah din nalpahan an namin nan limmuna.
Hanan Ad Eden
4Ta datuwey na'at hidin nunlumuwan Apu Dios hitun luta ya hi ad lagud. 5Te ma''id ni' ha ta'on hi oha i ha nitanom onu ha namaaggot humango te aggena ni' impiyali ha udan hitun luta ya atbohdin ma''id ni' ha taguh muntanom. 6Mu nanongnan waday liting an tumuluh nan luta ta hiyay munhanong hinan tu'yapna. 7Ya indani ot alan Apu Dios nan pito' ot poklona i han adol di tagu ot hapudanay olong diyen limmuna ya numbalin hi tagu.#1 Kulintu 15:45 8Ot iyamman Apu Dios han garden hi ad Eden an wah nangappit hi tuluwan di algo ot hidiy pangiha''adana i diyen lala'i an limmuna. 9Ot ipahangonahdiy mun'a'aphod an bungbunga"an. Ya hidih nan gawwana ya impahangona nan kayiw an mangdat hi itaguwan ya nan kayiw an mangdat hi abalinan an mamilih nan pohdon hi aton an ta'on on adi miyunnudan hinan pohdon Apu Dios.#Nipa'innila 2:7; 22:2,14 10Ya i diyen garden hi ad Eden ya wada han wangwang an hidiyey mananum hinadan nitanom hidi. Ya hidiyen wangwang ya nagodwagodwa ta nun'opat di wangwang. 11Hay ngadan nan oha ya hi Pison an nangi'wa hi ad Habilah an awadan di balitu'. 12Ya nadan balitu' hidi ya dadiye nan namahmah di abalitu'na. Ya wada bohdiy umat hi dellium ya oniks. 13Ya na'en mi'adwan wangwang ya nungngadan hi Gihon an nangi'wa hi ad Kus. 14Ya nan mi'atlun wangwang ya nungngadan hi Tigris an nangi'wa hi ad Assyria hi nangappit hi tuluwan di algo. Ya nan mi'apat ya nan wangwang an nungngadan hi Euprates.
15Ta e inha''ad Apu Dios hidiyen lala'i hidih nan garden hi ad Eden ta wan hiyay mumpapto' hidi. 16Ot alyona i hiyay, Mabalin an anom nadan bungbunga''an 17an ammuna nan oha an adim anon di bungana. Te hidiye nan mangdat hi abalinan an mamilih nan pohdon an aton an ta'on on adi miyunnudan hinan pohdo' an Dios. Ot ipidwan Apu Dios an alyon i hiyay, Adi mabalin hi anon nan bungan diyen ohan bungbunga"an te anom'e ya umannung an mate'a i diyen olas.#2:17 Hay pinhod nan mate an ibaga ituwe ya mihiwwe i Apu Dios.
Hay Nawadaan Eba
18Indani ya alyon bon Apu Dios di, Adi maphod an mun'ohhah tuwen lala'i. Ot aga ta apyo' ha nipto' hi pun'adwana ta bumoddang i hiya.
19Ya nadan nat'onat'on an animal ya hamuti an limmun Apu Dios ya ena impatigo i diyen lala'i ta ngadanana dida. 20Ya an naminda ya nginadanan diyen lala'i ta hiyay ninaynayun hi ngadanda. Mu ma''id i dadiye ha nipto' hi pun'adwana. 21Ta hay inat mon Apu Dios ya impalo'nah diyen lala'i. Ta on na'allo'an ot to'dangonay ohah nan tungal hi taglangna ot ahina pun'umuton nan lamoh. 22Ot apyonah diyen tungal i han babai ot iyenah nan lala'i. 23Ya alyon nan lala'i di, Anakkaya! Maphod ta ad uwani ya wada ha pun'adwa' i ha paddung'u. Te hay tungalna ya nalpuh adol'u ya ta'on on hay lamohna. Ot hay ngadana ya babai te nalpuh lala'i.
24Ta hiya nan mangahawa'e nan lala'i ya taynana nan a'ammodna ta e middum hinan ahawana ta ayda na'ohhan adol.#Matthew 19:5; Mark 10:7,8; Epesus 5:31 25Ya dadiyen lala'i ya babai ya adida bumain an ta'on on aggeda nunlubung.
Valgt i Øjeblikket:
Hidin Hopapna 2: ifa
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2014, Wycliffe Bible Translators, Inc. All rights reserved.