Matayo 8
8
1Eneki’nd’okitaka ena lingonji, bik’ike bon’ato bamokIla. 2Ko lenda, boto onoyaaki la nkangi en’okenge aoya oyoosamela, ate, Nkolo, yombo olanga nd’oho, onsongisa. 3Ko Yesu aociedya likasa linande, amosuka, ate, Lalanga, songwaka. Isasanga aosongwa ena nkangi enande en’okenge. 4Yesu amosumola, ate, Lenda, tasumolake boto’omoko; coaka mboka ene, oyotume eneyali nkanga, ko lekya toma tatoki Mose okodyaka yoka ndembi eneyal’iyo.
5Eneki Yesu ofolaka Kapalanauma, capitaine emoi aoya eneyal’ende, ko amoonda, 6ate, Nkolo, bosali’onami aeci en’ola la nkangi ena nkenyenyala, ko aok’efafo mene. 7Ko Yesu amosumola, ate, Nongoya oyoikya. 8Capitaine amokutwela, ate, Nkolo, mpakoli lacin’e otua en’otumb’onami: tenda nko yoi kei, ko bosali’onami angika. 9Lacin’emi nkoho, kang’ato’amoi bayali ena liko linami, emamene nde nde la soldats ena lifoka linami; lasumol’one, Coaka, ko aocoa; ko lasumol’okina, Yaka, ko aoya; ko lasumola boombo’onami, Ila yok’one, ko aila. 10Eneki Yesu ookaka, aofefa, ko aosumol’iyo banokilaki, ate, Solosolo, lakosumol’ino, ena Yisalaele mene ntene imeedyo inileki ine tu. 11Ko lakosumol’ino, bato bike bangoya ena Est l’ena Ouest, ko bangokisase la Abalayama la Isaka la Yakobo ena lifoka lina loola; 12ohonde ban’ana lifoka bangofusama en’ilima en’anza; bilelo bina mposoli la nkenyanya en’aino bangoyala meho. 13Koko Yesu aosumola capitaine, ate, Ombocoa, yoi yilame I’e yok’onok’oimedyaka. Ko bosali’onande aikyama nk’ena heure eho.
14Eneki Yesu otuaka en’otumba bona Petelo, aena nyango en’ooli bona Petelo aeci la nkangi en’efefe. 15Ko aosuka likasa linand, ko nkangi en’efefe emocika, ko ende aetwa, ko amasaela. 16Koko la likolo baoya l’ato bike banayaaki la bademona; ko ende aofodya bademona la yoi lina ntenda, ko amaiky’iyatu banayaaki la nkangi; 17lacina yoi linaliki Yesaya, bosumoli, otendaka yilame, ate, Endamene aotamba tongitongi toniso, ko aotola nkangi iniso.
18Eneki Yesu oenaka bik’ike bon’ato baosusana eneyali ende, ailaki, ate baleke lose. 19Ko botengi’omoi bon’ekanda aoya oyosumola, ate, Bolaki, nongokokila bili bon’etaketaka bonaco’e. 20Yesu amosumola, ate, Bembanga beyali l’ekole beniyo, ko mpulu ina liko iyali l’aocu; ohonde Bon’on’oto afan’edye en’amby’ende bote’onande. 21Ko omoi bon’akili’anande amolokwela, ate, Nkolo, ompe etelo ncu oyokunja bafango’onami en’oso. 22Koko Yesu amosumola, ate, Onkile, cikela ban’ewedi bakunje ban’ewedi baniyoamene.
23Eneki’nd’oyokelaka en’atu, bakili’anande bamokila nko meho. 24Ko lenda, lofongo lona lokolo mene lokumba ena lose, ko boatu bomatsa yina l’afukumo bana lose; koko ende aeci l’ilo. 25Ko bakili’anande baoy’eneyal’ende bamoetola, Mbo, Nkolo, otoikya, towa! 26Ko amalokwela, ate, In’anayali l’imeedyo nk’isisali kei, bok’ofolu lanai? Enem’end’oetwa, aofekya lofongo ko l’asi bana lose, ko baoyalama mwi nkwaho. 27Koko bato’aho baofefa, iy’ate, Boto’one and’oya? Lofongo la basi bana lose bamimedy’ende!
28Eneki’nd’olekaka en’ili bona lose, aoyela en’onyanga bona Ba-Ngandala, ko bato’afe banayaaki la bademona baukana l’ende, baoya nk’ena nketa, bato bana bolema mene, efan’oto onetisa ena mboka eho. 29Ko lenda, baololomwa, Mbo, Iso l’e, Bon ona Yakomba, tond’oya? Omoya nde oyotoenya bino kuma esike etayele? 30Koko botonga bona nsombo bon’okolo boyaaki meho en’osana, iyale toma. 31Ko bademona bamoonda, iy’ate, Yomb’otofodya, ototome en’otonga bona nsombo. 32Ende amasumola, ate, Bombocoa. Ko baofola, ko baotua ena nsombo; ko lenda, botonga bona nsombo bohotu bokita lingonji la mbango, bokwela lose, ko nsombo yowa ena lose. 33Ko iy’analeyaki nsombo toma baolota, ko baocoa mboka iniyo en’onyanga, baosumol’ato baoyi bahatu, ko la yoi lin’ilamaki eneyali bato’aho banayaaki la bademona. 34Ko lenda, bonyanga bohotu baofola oyukana la Yesu; ko enem’iy’oen’ende, bamoonda lacina aume en’onyang’oniyo.
Valgt i Øjeblikket:
Matayo 8: BBY62
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Bokanda Bona Yakomba Bon’ototo © Alliance Biblique de la R. D. Congo, 1962