Matthew 13
13
Tsaküvao dzüh züve
1Sünhasü Jisu celüno pari de dzüküzho shico bata. 2Süsa thüma kro küzho püh vori die Püce künguyi ta, süna Pu püzu pühlü lü die bayi, mo thüma krooe dzüküzho Poo bata. 3Süsa Pü züvelü mha kükro pükoce po die sü: Yhei, Tsaküvami püh tsava tozu die prü: 4Mo pu tsava sü tice; tsa hu rütu shoshi prüta, sidie mürako vori die süko patiyita. 5Mo hu rütu sü uzü ve kümo kütsütsürolü prü ta, mo cejü zü müsüh kümo na süko tsü mha süri ta. 6Süri süko u me tsü kümüsühlü lü kümo na tüna süri phrü khriva. 7Süsari hu rütu tsahu dolü prüta, sidie tsahuko masüri die süko gükhriva. 8Süri hu rütu cejü zü küvelü prüyi die u se hu se krapüh, hu se heshorüh mo hu se sühmüri jiyi. 9Thüma kühopühri unyi ne die rünyiyi küvemi po rünyiyi te.
Züve po küsüo co
10Süsa müthaküyiko vori uco kütso die; No dipühna kükremice züve poyo la? zita. 11Pu süko zü küla die po küti; Kükrenamoli neko po tüyo zü kümüsühko seyi küve khasü eli püko ce khasü mo, zisü. 12Kükrenamoli thüma kühopühri mha püce kübao kha pü prü sasü to; mo pü ne küthi sayi to, süri thüma kühopühri mha püce ba kümoo kha pü prü sa küsüo mori püce kübao ri khi süh tato. 13Süsü na I pukoce züve lüno mha po süyo, kükrenamoli puko pe yori ngoyi yo mo, rünyiyo ri seyi yomo; mori lü kükre riyi yomo zo tina. 14Mo süko dzüh thazü Isayae: Nekoe kürünyie rünyi to, eli seyi lho zoto, Mo neko küpe pe zoto, eli ngoyi lho zoto, 15Süze thüma hiko u mülü rüdü te, uni ri künito te, mo puko mhü ri kamate; Kükrenamoli, püko mhü püh ngoyi, Mo puko ni püh rünyiyi, Mo puko mülü püh lüyi, sidie thülü küdeyi die apo püko thi küsührho küva kümüprüh na, zi die po püh kümütao thitsühyi küto na. 16Eli neko mhü didüri thü pü kekrenamoli süo mha ngo tina mu neni dithedü thüjo pü sü süo mhakhü se tina. 17I nekoce potü süto, sadzühküsemi kükro ri mo kümathomi kükro ri neko küngoko hi ngo nyi shüh vori, eli süko ngoyi mote, mo puko neko rünyi kütiko rünyi nyi vori eli puko süko rünyiyi mote.
Jisue tsaküvao züve co po küsü
18Süna neko tsaküvao züve rünyi sü phite. 19Thüma kühopühri küde züo rünyiyi, eli pü süo lü kükreyi mo küva lü küsüo vori die tsa pü mülü lü prüh küsüo khi püh tatayo. Hiohi tsa shoshico prü kütao zo. 20Mo mi tsava püh kütsütsürolü sü küvao zoe; zü süo seyi mütha pu nü die züh mhayi yo. 21Süri pulü pü me kra mve kümo na dopüh libi bayi yo, sidie züo na kümüzhe küti mo kümüthi kümünyi vori küyice pu rülele die pu nümo la tayo. 22Süsari tsa rütu tsahu dolü lü kütao ri pu züo seyi zori tsüdo cejü hilü rüleko, mo mi müsü kümüsü ceneko külüko tho züo whu müdi la vayo, sidie use rüthiyi mo tayo. 23Mo mi tsava püh cejü zü küvelü sü küyio zoe züo rünyiyi die püco seyi yo, mo pü se rüthiyi die hu se krapüh, hu se hieshorüh mo hu se sühmüri jiyi yo, zita.
Zotshü tsa püh küzüve küsü
24Pu züve kükre püh po puko ka die sü, Tüyo küde mipühno tsaküve püh pu yilü prüh küsü bizo. 25Eli pu vo züh küta sa pu ngomümi zotshü tsa püh atalha dolü prüh sü va die tata. 26Sidie süko tsü süri die use ri rüthi pari küyice zotshü se ri ngo pari ta. 27Sücesü yi nyepoo ne cetamiko vori die pu yisü, Küzhoo, no tsa küve mpa püh n yilü prüh sü mo me? Sülize dibi die zotshüko ri tsü süri ta? 28Püsükoce po die, ngomümi püh tho hizi küva zo zisü, süce pü cetako pu yisü Süze no hako po vo süko pa küngu va küto n müdo me? zisü. 29Eli pu süko yisü, süzi su, kükrenamoli neko zotshüko pa küvoce atalhako ri pa küva kümüprüh na. 30Yi kürüh tü vori kümothe püko po Ihü ba zoyi te, yikürüh tü vori lize I yikürühko ce, neko zotshüko pa künguyi müra die süko pha küngu püh vo melü müto vate, eli atalhakoe küngu püh vo alha celü süyite, zisüto, zita.
Gakre tsa püh küzüve küsü
31Pu züve kükrepüh püh pukoce po la die sü, Tüyo küde gakresi püh bi zo, mi püh ne süo khipüh vo pü yilü prüh sü; 32Tsa hihi kükreko dolü pusi künyitho püh zo, eli pü tsü süri tice tizhe ga dolü kürükrütho püh thi die süri sühbo bi tayo, sidie tüyo rako vori pü co koyo u rüsühthi thi tayo.
Khre püh küzüve küsü
33Pu züve kükre püh pukoce po lasü; Tüyo küde khre bi zo, thünopümi püh süo süh vo thü kümüde rha küchu süh jü sü die thü süo pu pari tsoyi kümothe küva püh müzü ti bizo. 34Jisue mha hiko mütülü küzüve po püh thüma kroo kasü; Pue küzüve mo die mhapühri po püh pukoce sü shemo. 35Süosü kükrenamoli thazü sadzühküseo po; I ata taga püh züve poto; I cejü thiyi prühlüno küva püh kümüta kümükhrühko po süto; zipüh küma züko thitsühyi küto na.
Jisu zotshü tsa züveo küic. Küsü
36Süsa Jisu thüma kroo khava die celü lüta süce Pü müthaküyiko Püce lüri di sü; yilü zotshü coo po münu püh hako ka süte; zita. 37Pu süko zü küla die sü; Tsa küve prüh küsü mao sü thümanuo zo. 38Yi süo cejüo zo; tsa küveko sü küdenuko zo, mo zotshü tsa kosü küsüo nüneko zo. 39Tsa süo prüh küsüo sü küsüo zo: Yikürüh sü cejü hio küla zo, mo yikürühmiko sü tüyoshoyimiko zo. 40Süze zotshüko rhüh küngu püh vo melü müto küva bi, cejü hio küla ri sü bi zito. 41Thümanüo Pü shoyimi kütsüh sü die süko po vo Pu küde balü mha thi kümüsüko mo küsüküthiko mütü phu künguyi to. 42Sidie süko khapüh melü kügü vato, sülü kra mo uhu thüzhepü bato. 43Süsa kümathokoe u Poo küde balü vepüh tünace bi ba tato. Kühopühri uni küne mi sümi po rünyi yite.
Küva püh küma cene
44Tüyo küdee yipro pühlü cene küva püh kümüzü bizo; mipüh ne vo sü ngoyi die küvapüh ma die pü künüpü celü vori die pü mha küneküdi zhüh püh vori süo khri küyi bizo.
Ti ma kürüh püh küzüve küsü
45Süsa ri tüyo küde lhethomi püh ti ma kürühpü phu tayo küti bizo; 46Pü vo ti ma kürüh süo ngo küyice pü celü vori die pu mha mütü zhüh pü vo süo khriyi ta.
Khuma püh küzüve küsü
47Süsari tüyo küdee khuma püh kügü pühdzüküzholü sü die khu kükrekre küti bo küngu küyi bizo. 48Süo chu küyice, puko süo süsa püvo dzüküzho poyo bayi die ucoko küda püh mhabühlü süyi mo uco kümoko püh kügü vayo. 49Vo thüma lhü külaco ri sübi zoto, tüyo shoyimi vori die kümathoko dolüno kürüzüko küda kre züh tata to. 50Sidie süko kügü püh me kümüre küthilü sü vato, sidie sülüno kra mo uhü thüzhe pü bata to. 51Neko zü hiko co mütü seyi ba me? zita. Mo püko Pu yisü, izo, zita.
Mhabüh pühlü mha küsa mo kügwü kha küsü
52Mo Pü süko yisü, Süna lüsiküseko kühopühri tüyo küdenumi thi küto na cipüh müthayi kütami püh mipüh ne pü celü mhabühlü mha küsa mo kügwü lha püh küpari bizo, zita.
Nazarethlü Jisu kümüla
53Süsa Jisu züve hiko potsüh küva sa thüthi sülüno tata. 54Süze Pu Pu tho Pü rünalü vori küyice, Pü süko synagogue lü mi mütha. Sücesü mi ungo thi die sü; thüma hiohi dipühceo no mhase hiko mo u malhü mhatho küku hiko ngoyi ta la ha? 55Hihi süh mhatho küthio nu zo mo me? Püzu ri Mary zo mo me? Süze pü sazühneko James mo Joseph mo Simon mo Judah hiko mo me? 56Süze pü lipüneko ri u züh bazo mo me? Sülize Pu dipühceno mha hiko ngoyi ta? 57Sidie püko pü yo u nümota, eli Jisu püko yisü, sadzühküsemi pü tho pü rünalü mo pü tho pü cekrolü zo kümosa kükrera mi pü rho kümo di; zita. 58Sidie püko mülü kümu na pü sülü küku mhatho kükro thisü mu ta.
Valgt i Øjeblikket:
Matthew 13: NAG5BSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Chakhesang Chokri Naga New Testament © Bible Society of India, 2015. Used by permission. All rights reserved worldwide.