GENESIS 5
5
Adam Suante
1Hiai Adam suante tuanna laibu ahi. Pathian in mi a siam ni’n Pathian batpih in amah a bawl hi. 2Pasal leh numei in amau a siam a; amau a vualzawl a, amau siam a a om ni un a min uh Adam, a sa hi. 3Adam in kum za leh sawmthum a hih in amah mah bang, a kibatpih ngei tapa a nei a; a min Seth a sa hi. 4Seth a neih nung in Adam kum za giat a damlai a; tanu leh tapate a neilai hi. 5Adam damsung tengteng kum za kua leh sawmthum ahi a; huchi in a sita hi.
6Seth in kum za leh nga a hih in, tapa Enos a nei hi. 7Enosh a neih nung in Seth kum za giat leh sagih a damlai a, tanu leh tapate a neilai hi. 8Seth damsung tengteng kum za kua leh sawmlehnih ahi a; huchi in a sita hi.
9Enosh in kum sawmkua a hih in tapa Kenan a nei hi. 10Kenan a neih nung in Enosh kum za giat leh sawmlehnga a damlai a, tanu leh tapate a neilai hi. 11Enosh damsung tengteng kum za kua leh nga ahi a, huchi in a sita hi.
12Kenan in kum sawmsagih a hih in, tapa Mahalaleel a nei hi. 13Mahalaleel a neih nung in Kenan kum za giat leh sawmli a damlai a, tanu leh tapate a neilai hi. 14Kenan damsung tengteng kum za kua leh sawm ahi a; huchi in a sita hi.
15Mahalaleel kum sawmguk leh nga a hih in tapa Jared a nei hi. 16Jared a neih nung in Mahalaleel kum za giat leh sawmthum a damlai a, tanu leh tapate a neilai hi. 17Mahalaleel damsung tengteng kum za giat leh sawmkua leh nga ahi a, huchi in a sita hi.
18Jared in kum za leh sawmguk leh nih a hih in tapa Enok a nei hi. 19Enok a neih nung in Jared kum za giat a damlai a, tanu leh tapate a neilai hi. 20Jared damsung tengteng kum za kua leh sawmguk leh nih ahi a, huchi in a sita hi.
21Enok in kum sawmguk leh nga a hih in, tapa Methusel a nei hi. 22Methusel a neih nung in Enok kum za thum sung Pathian toh a tonkhawm ua, tanu leh tapate a neilai hi. 23Enok damsung tengteng kum za thum leh sawmguk leh nga ahi. 24Pathian toh Enok a tonkhawm ua, amah a omta kei a; Pathian in a lata hi.
25Methusel in kum za leh sawmgiat leh sagih a hih in tapa Lamek a nei hi. 26Lamek a neih nung in Methusel kum za sagih leh sawmgiat leh nih a damlai a, tanu leh tapate a neilai hi. 27Methusel damsung tengteng kum za kua leh sawmguk leh kua ahi a, huchi in a sita hi.
28Lamek in kum za leh sawmgiat leh nih a hih in tapa a nei hi. 29Hiai ngeingei in Toupa hamsiat khum leitung ziak a i nasepna leh khut a i sepgimna ah a hon lungmuan ding, chi’n, a min Noah a sa hi. 30Noah a neih nung in Lamek kum za nga leh sawmkua leh nga a damlai a, tanu leh tapate a neilai hi. 31Lamek damsung tengteng kum za sagih leh sawmsagih leh sagih ahi a; huchi in a sita hi.
32Noah kum za nga a upa ahi. Noah in Shem, Ham leh Japheth a nei hi.
Valgt i Øjeblikket:
GENESIS 5: PAITBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.