METHIU 8
8
Jisu in Reichii Akna Amthrat
(Mak 1:40–45; Luk 5:12–16)
1Jisu in muul inkhatnata atrumlai mii khalmo tam in aknu anjuih. 2#Met 9:18; 15:25; 18:26; 20:20; Mak 1:40–44; Luk 5:12–14; Jon 9:38Che anve, reichii kop mii khat in thlenga Jisu ta mathruunna ason, “Akpu, nangin nimdon veileva keita namthrat chektung.” 3Chunna Jisu in akut jamma apalche amahta ason, “Keiin kamdon: thra veirosa.” Che kak hang achunna reichii kopkha thrasa. 4#Mak 3:12; 5:43; 7:36; 8:30; 9:9Che Jisu in akuunga ason, “Anro, nangin tukhat kuungkho tongnohro: chuta inlenga thiimpu ankuunga nitak mamuhro, che Moses trongthuun nujuih a nithratna kutthol kat a matheih eiro.”
Raalmii Reija Akpuui Roijuihta Amthrat
(Luk 7:1–10)
5 #
Luk 7:1–10; Jon 4:46–53 Ipekva Jisu in Kaparnaum aluutlai, raalmii reijapuui inkhat in thlenga akuunga mathruunna ason, 6“Akpu, kei roijuih inkhat apangnem thia inchek cheknoh a intolh a am.” 7Che Jisu in amahkuunga ason, “Keiin thlenga kamthrattu.” 8Raalmii reijapuui in amsang, “Akpu, nangin keiinna nithlengnatu keivah matik chanoh ang. Chuta trong inkhatru nison in kei roijuih in thratu. 9Alamva keikho akchek amneh inkhatva athlanga ammangche raalmii in kei kithlanga ammei. Chunna keiin raalmii in khat kuunga ‘Sehro’ ta kison in amah in seh. Aktlei in khat kuunga ‘Varo’ kitih in amah in vaa, kei roijuih inkhatta ‘Mah i tlohro’ kitih in amah in atloh.” 10Jisu in mahchuta atheihlai salungkhousa, che amah akjuih ankuunga asonei, “Keiin nannihta atak a kisonchou, mainang malot aja i Israel ankaar akho tuuknoh ang. 11#Luk 13:28–29Keiin nannihta kitihchou, mah chuvah kulkung leh kulrel nata miitam thlengtuei, che Abraham, Aisaak leh Jakob in kurung huunna ah inbokjou tuei. 12Chuta kurung huunna asaeiva apaal anthimna a alontuei. Mahchunna traptruuia anha amikettu.” 13Mahchuche Jisu in raalmii reijapuuita ason, “Inlengrosa, nangin nimlot kharella nangkuungah tlung veisaso.” Che mahlaital pung achunna amah roijuihchu thrasa.
Jisu in Miitam Annatnata Amthratei
(Mak 1:29–34; Luk 4:38–41)
14 #
Mak 1:29–34; Luk 4:38–41; Met 4:23–24 Ipekva Jisu in Pitar innsuungah aluutlai, Pitar akmeivaa anu atlun intolh a am amuh. 15Che Jisu in akut apal invah atlun in amahpei. Chunnata inthoua anmahta rou atloh ei. 16Khulouhram aphah in khousaar chuung miitam Jisu kuung anthlen. Che amah in trongkhat sonna khousaarta amnommei, che akna miitamta amthratei. 17Amah in inih marnop, natna satna anaamte alohpeita ringraan Isaiah in asonkha tlungsa.
Jisu Aknu Akjuih mii
(Luk 9:57–62)
18 #
Luk 9:57–60; Mak 4:35; Luk 8:22 Pekva mii khalmo tam in amahta anlom amuhlai, aktlei khatting sehnatu jathang amlanei. 19Cheva ringjih lulok inkhat in thlenga ason, “Lulok, nangin niseh nilonna anaamte khanna keikho nakjuihtang.” 20Jisu in akuunga ason, “Uiiramuiivaa ankhur am, marvaanna vakho anbu am, chuta miivaa Asa kupava amah akang asihnatukho amnoh.” 21Chunna aroi inkhat in akuunga ason, “Akpu, keiin akthi kipata matsah a seh a phuummaantang.” 22#Met 9:9; Jon 1:43; 21:19Chuta Jisu in amahkuunga ason, “Keijuihro, akthi khavah akthi in phuumeiso.”
Jisu in Khuleh Thli Amngeih
(Mak 4:35–41; Luk 8:22–25)
23 #
Mak 4:36–41; Luk 8:22–25 Pekva Jisu in mulichung achuunglai aroiin anjuih. 24Che kak hang achunna tuiiboom chunga aktrang khusuur thliraang amthronpei, cheva mulichu tuiisolh in aphahpei, chuta Jisu vah inna amsa. 25Chunna amah aroi in akuunga thlenga amahta mathoua antih, “Akpu, kanikalro! Thisamsung.” 26#Met 6:30; 14:31; 16:8Chuta ankuunga asonei, “Malot trangnoh eio, jarelna intrichoume?” Che Jisu in inthoua thlileh tuiiboomta asaal. Cheva daichritsa. 27Che salungkhoua antihpei, “Thlileh tuiiboom inkho asonta amijuih i jakangmii meio?”
Jisu in Khousaar Chuungmiita Amthrat
(Mak 5:1–20; Luk 8:26–39)
28 #
Mak 5:1–17; Luk 8:26–37 Jisu in saraalkhat a Kadarenes ramma asehlai, trihkhopna vei khousaar chuung mii innih rusuunnata thleng antuukpiei. Mahchu tukhat inkho van ancheknohna lam. 29#Mak 1:24; Jon 2:4Cheva kak hanga anmah in kchirra onga antih, “Ringpu Asa kupa Jisu, kannih kuunga jangtlohtang nitihme? Kanlahnatu lai athlengnoh maa a kannihta kanimlah tangta onna thlengcheme?” 30Anmah ankuungnata ste inlabeb a vokjaam anthlai saa a ammei. 31Chunna khousaar in Jisu kuunga ngenna anson, “Nangin kanimnom chele vokjaam ankuunga kanluutnatu kanijaro.” 32Chunna Jisu in ankuunga asonei, “Vaave”. Mahlai anmah in mii ningnata inthruh a vokjaam ankaara luutsei, che kak hanga vokjaam in tuiipiia tlaanna anjungche tuiia inlaak a thisei. 33Vokjaam akselmii in intha tlaanna aksuuk thlouleh khousaar asuurmi atak a aksuukthlouta khuuboomma luut a antongpei. 34Che anve, khuuboomna mii eiin Jisu ta intuukpinatu sehsei. Cheva anmah in Jisu ta anmuh in anramnata mathlah a asehnatu annoolpei.
Valgt i Øjeblikket:
METHIU 8: TARAOBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.