ATITI AWM ANGCHEI NAI 32
32
Jakob ly Esaw hawi avum ai nai angveirym nai
1Jakob ly khuleaung chei nai lam y kani pri amtaw thai naichi hawi avum. 2Kani pri amtaw thai naichi ai niu baly Jakob my, “Hini meingtym ly Tameuh i awm naira ne,” nanai thui i, Mahanaim, #32.2 Mahanaim: Hebrai leu y “tai nyhrei” nanai sai ne. nanai amyn pathi bo.
3Jakob ly Edom pri y awm nai mymy i amjo Esaw teng y satang thai hai yb ai nai mo mang y pato man bo. 4Mymy ly savaichi teng y, “Nang i miseaung kai Jakob ly Labana teng y awm nai, vai naini kang vawi teang nai bo. 5Kai ly sichi, keaungngo kano kasauchi, beramchi, ma-ichi hawi miseaungchi awm; kai ly nang i meimai kahawi nga ai nai athang khai nai deaungkho y, nang teng y satang kang thai hai man nai ne, nanai amti pi u,” napi.
6Savaichi ly Jakob teng y tym u ali teang nai khala y, “Ngamjo Esaw teng y kaichi tym i, ni ly nang hawi avum ai nai ang jeu dudu veng bo. Mymy hawi vanrei khumi leaung chungvai palyhrei py hawi nai ne,” napi. 7Huna nai khala Jakob ly jei nai kaso tahyn theu i, mymy hawi vanrei awm nai khumichi ai phy nyhrei palawn bo; mymy i beramchi, sichi, ma-ichi, kula-iuchi ai py phy nyhrei palawn teang. 8Ati mana nai mo nabaly, “Esaw my tiu lawh baly angchei i nai pajau vui teu i py, kangkhym i nai ly lawira nga ai,” nanai dawn nai ne.
9Naibaly Jakob ly “Kai i amsi Abraham hawi kai i ampo Isaka i Tameuh, kai i chiu sa nai tangai pi kyh ba! Areng nang my ly kai ai, nangmy i pri, nangmy i amjo amnauchi teng y vawi teang, nang i tako nai tleirei y kaimy kang pahawi ai. 10Nang i miseaung kai teng y nang my patei pi nai pahen naira hawi ka-ym awm naira py, kai hawi ataing y nai ne. Jordan tavo angpeang nai khala y, kai teng y cheaungvawi harei awm khyh. Vai kai ly hini phy nyhreichi hawi kavawi ali teang nai bo. 11Kai i amjo Esaw teng i nai kai ai atleu kyh ba, kai ly khri pa-rei paleung mawn na bo. Deaungdichi hawi neampachychi ai py, kaichi bawibawi ai py ang tiu iy ang padei pawn ai nai ni ly ang jeu nai bo. 12Nang i chei naira tleirei y kaimy kang pahawi ai, pangli spryh kamta nang i kangpreangchi kang peung hai ai, nanai nangmy adeu nai leu ai ly pany pi jo kyh ba,” nanai takeng bo.#AA 22.17
13-15Hu y vumrei jei i, Jakob my amjo Esaw i vui langseaung mi-i nu chungvai nyhrei hawi katai apomrei, beram nu chungvai nyhrei hawi katai apomrei, Kula-iu nu choprawi phairei, si nu vui palyhrei hawi katai horei, keaungngo kano kasau nu apomrei hawi katai horei, 16huna nai kamta phy takhra iy, phy ha harei nai y miseaung leaung leaungrei khai. Mymy ly nichi teng y, “Kai i mo mang y tako u man ly phy ha harei akhan rawm naimy ka-thui tako u,” napi. 17Mymy ly tako man ai nai miseaung teng y, “Kai i amjo Esaw hawi avum nai kha y, ‘Nang i yhmkeung ly ami mo? Ma y chei ai nai mo? Hini tawnbawichi ly ami i nai mo?,’ nanai ang deng lawh baly, 18Hini bawibawichi ly ‘Nang i miseaung Jakob i ne. Mymy ly areng Esaw ai langseaung pei ai nai ang pato man nai ne, mymy ly kangkhym y awm jo rai tapi,’ ” napi. 19Hunai kamta pa-nyh i nai ai py, pa-thom i nai ai py, tawnbawi kanghuchi ai lu sa nai keungchi teng y, “hini ly Esaw hawi avum nai khala y nangchi thui pi ai nai leu ne, nanai leu pei bawibawi bo. 20Nangchi my, ‘Nang i miseaung Jakob ly kangkhym y awm jo rai, tapi,’ ” napi. Jakob ly “Hini langseaungchi deaungkho y kai ly lawira kanga ai, mymy hawi avum nai khala kai ai ang pahen ai,” nanai dawn nai ne. 21Mymy ly langseaung syn naichi ai mo mang y pato chum baly huni vum ly anawn nai tai theung y i bo.
Peniel meingtym y Jakob ani nai
22Huni vum y my Jakob ly ang thau i ajuni ai py, aju katheangni ai py, chapo leaung holai hareichi ai py, Jabbok tavo vai mang y angpeang hai bo. 23Aju chanauchi hawi vanrei, yhmtheaung bawibawichi ai py tavo vai mang y tha nai ne. 24#Hos 12.3–4 Mymy leaungrei kangkhym y awm jo.
Huna nai khala, khumi leaungrei tym i mymy hawi khutawi pa-rei ani bo. 25Huni khumi ly pajau y ai nai pany nai khala, amprai naimy Jakob i tangkeang y theaung i athlengthlai vui bo. 26Huni khumi ly “Khutawi ai bo i, kai ai patlaw jau,” napi.
Jakob my, “Kai ai amtheaung hai y baly kang patleaung y leang,” napi.
27Huni khumi my, “Nang i amyn ly mana mo?” nanai deng;
Mymy ly “Jakob,” napi.
28 #
AA 35.10
Huni khumi my, “Nang i amyn ly Jakob, nanai kang palau y ai. Nang ly khumi hawi py, Tameuh hawi py ani i nangmy pajau bo; hunai deaungkho y nang i amyn ly Israela#32.28 Israela: Hebrai leu y “Tameuh hawi ani” ti y baly “Tameuh my ni” nanai sai ne. ne sy,” napi.
29 #
Tara chih 13.17–18
Jakob my, “Nang i amyn kai ai thui pi kyh,” napi.
Na i py nimy ly “Ati mana nai kai i amyn pany ai nai ngai mo?” napi. Naibaly mymy ly Jakob ai amtheaung hai bo.
30Jakob my, “Kai ly mo atha leungtang naimy Tameuh ai kaniu i py kai ly heng jo rai,” nanai thui iy, huni meingtym ai Peniel, nanai amyn patho bo.#32.30 Peniel: Hebrai leu y “Tameuh i meimai,” nanai sai ne. 31Jakob ly Peniel meingtym i theu nai khala kani si bo; ni ly tangkeang athli nai deaungkho y, ta-krawm ta-krawm naimy tako nai ne. 32Vaini khrairei Israela kangpreangchi ly tangkeangra i atho vui cho y; ati mana nai mo nabaly Jakob i tangkeang lengli y theaung thlei vui nai deaungkho y ne.
Valgt i Øjeblikket:
ATITI AWM ANGCHEI NAI 32: KCL02
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Khumi Common Language Bible © Bible Society of Myanmar, 2005.