ATITI AWM ANGCHEI NAI 38
38
Juda hawi Tamar
1Huni neng khala y Juda ly amjo amnauchi ai khai su iy, Adulam pri i khumi Hirah napi nai teng y awm ai nai chei bo. 2Hu y Juda ly Shua napi nai khumi i chaniu Kanan cheng anglo ai avum i mymy ly ni hawi apom nai ne. 3Naibaly aju ly Era napi nai chapo leaungrei sa. 4Huni bo y deaungdi aniu bi i Onan napi nai chapo leaungrei ai tapen bi. 5Huni bo y Selah napi nai chapo leaungrei ai tapen taleang bi. Huni chapo ai tapen nai thym y Juda ly Akhazi mary y awm nai ne.
6Juda ly chapo chalu Era ai Tamar napi nai neampachy hawi apom hai bo. 7Era ly Areng i mei ka-niu y hawi y naira sa nai deaungkho y Areng my niu ngai y i padei vui nai ne. 8Naibaly Juda my Era i amnau Onan ai, “Nang ly ngamjo i yhmtheaung amtym ai nai keung ne nai deaungkho y, nang i sa ai avo naichi ly angym pa-rei so; hunai baly ngamjo i kangpreangchi peung ai mang,” napi. 9Na i py Onan ly mymy hawi nga nai deaungdi ly mymy i vui ne y ai nanai pany, hunai deaungkho y mymy ly amjo i aju hawi i ahawi teu i py taheaung tui ai ly angam mang y paleaung vui bo. Hunai kamta amjo i vui chanauchi ngo y pa-rei sa nai ne. 10Onan ly Areng i kangai so y nai deaungkho y, ni ai ly Areng my ngai y i, ni ai py deung dawi hai vui bo. 11Huna nai khala Juda ly lengngo Tamar teng y, “Kai i chapo Selah thawndeang cheang y ryrei ly ngampo teng y vawi ali teang iy hu y lumai ateaung jo rai,” napi. Ati mana nai mo nabaly amjochi kamta Selah py deung dawi teang lawh na, nanai jei hai nai deaungkho y ne. Naibaly Tamar ly ampo i yhm y vawi ali teang bo.
12Huni bo kani kra y naimy Juda i aju ly dei bo. Mymy ly paleung si nai rym nai neng y, mymy i ahawi Adulam cheng Hirah hawi my i beramchi ai mui vau ai nai Timnah mary y chei hawi bo. 13Khumi leaungrei my Tamar teng y, ngamprang ly mymy i beram mui vau ai nai Timnah mary mang y chei jo, nanai amti pi. 14Naibaly mymy ly lumai ateaung nai ateaungchi aleng vui iy meimai y nidan amym naimy Enaim mary apai pa-khora y ateh; huni ly Timnah mang y chei nai lam y awm nai mary ne. Mymy ly Juda i chapo katheang keh Selah thawndeang cheang i py mymy hawi apom hai y ai, nanai pany nai deaungkho y hunai kamta sa nai ne.
15Juda ly ni ai niu nai khala y bima, nanai palawn; ati mana nai mo nabaly mymy ly meimai amym vui i ma y nai ne. 16Juda ly lamteng y ateh nai neampachy teng y chei tapai iy, “Ani i ahawi sina; nang ly vang majirei hnei ai mo?” napi. (Mymy ly lengngo, nanai pany y nai ne.)
Neampachy my, “Nang ly kai ai ati pei ai mo?” napi.
17Juda ly “Kaimy i tawnbawi kanghu theung i mi-i cho harei kang pei ai,” napi.
Neampachy my, “Hawi mang, nang i pei nai mi-i cho tym y ryrei ly leu khaw hai ai nai kai ai sai sairei pei ai nai tla ai,” napi.
18Juda my, “Kaimy leu khaw hai ai nai, ati kang pei ai mo?” nanai deng.
Neampachy my ly “Nang i atawi nai cheaungvawi, vuinawn ang vawi, pajawp typ nai ka-ma-ra phai pei,” napi. Mymy ly neampachy teng y pei pi bo. Naibaly i ahawi i neampachy ly deaungdi aniu nai ne. 19Tamar ly yhm y vawi ali i mei y atleang nai nidan ly alei vui iy, lumai ateaung baichuchi amchiu ali teang bo.
20Juda ly mymy i ahawi Hirah ai mi-i cho la hai iy neampachy teng y khamcha khai nai vawnchi ly la teang iy, vawi teang ai nai pato nai ne; na i py Hirah ly huni neampachy ai hau keaung bo. 21Mymy ly Enaim mary i khumichi teng y, “Lam teng y ateh reng nai bima ly ma y mo?” nanai deng.
Nichi my, “Hini lam y bima, nanai ly by y leang,” nanai pathang u.
22Mymy ly Juda teng y vawi ali teang i, “Kai ly huni neampachy ai hau keaung bo. Hu i khumichi py, huni meingtym y bima by vai y leang ang napi,” napi.
23Juda ly “Kai i vawn kry phai kry jo teu sy. Khumichi my panui hai na. Kai ly ni ai vang pei pi ai nai atho sa teu i py, nang ly ni hawi avum pajau y bo,” napi.
24Lo thomrei awm nai khala y khumi leaungrei my Juda teng y, “Nang i lengngo Tamar ly bima kamta amlawn nai y, mymy ly vai deaungdi aniu lawh bo, nanai amti pi.
Juda my, “Tuni neampachy ai ly angam mang y patheu iy mai y patawi veng,” nanai leu pei.
25Tamar ai angam mang y patheu u nai khala y, Tamar my amprang teng y, “Khen cham, hini pajawp typ nai ka-ma-ra hawi, vui nawn ang vawi py, cheaungvawi py ami i nai mo? Hini khumi my kai ai deaungdi aniu hai nai ne,” napi.
26Juda ly mymy i vawn ai ma i, “Hini neampachy i thui nai ly teng khyp bo. Kai naini kaimy i chapo Selah hawi apom hai ai nai leu adeu nai taphra nai keung ne lawh bo,” napi. Naibaly Juda ly huni neampachy hawi i ahawi bi y leang bo.
27Huni neampachy ly tapen ai nai neng tym nai khala y, mymy ly deaungdi kangphi tapen ai nai amny bo. 28Tapen nai thym y, deaungdi leaungrei ly kiu theu man; tapen hai nai keung my amkhaw praw iy kalang kamleng akhen hai i, “Hini tapen man ai,” napi. 29Na i py deaungdicho ly kiu ajiu teang vui; kamphira i leaungrei naini theu man lawh. Naibaly tapen hai nai keung my, “Nang ly hina nai kamta kamjau kamteang theu lawh moh!” napi. Hunai deaungkho y ni ai ly Perez, nanai amyn pathi bo. #38.29 Perez: Hebrai leu y “ie piu vui” nanai sai ne. 30Naibaly amnau py kiu y khen pi nai kalang kamleng hawi my tapen; huna nai y ni ai ly Zerah, nanai amyn pathi bo. #38.30 Zerah: Hebrai leu y “khawn kanito si teang y” nanai sai ne.
Valgt i Øjeblikket:
ATITI AWM ANGCHEI NAI 38: KCL02
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Khumi Common Language Bible © Bible Society of Myanmar, 2005.