Lukà 17
17
Nuvuɛ̃wɔ̀wɔ
(Màt 18.6-7, 21-22; Mrk 9.42)
1Yesù gblɔ̃ na yebe nukplaviwo be: “Ènu kèwo la dɔ̃ àmè ɖo ènuvuɛ̃ mèawo mu la dokpò vava ò. Vɔ̀a, hèlu na àmè kè la dɔ̃ àmè ɖo ènuvuɛ̃ mèa. 2E la nyɔ na ɛ̀ be woa sɔ ète bla ɖo èkɔ̀ na ɛ̀, eye woa sɔ ɛ̀ dãŋùgbe ɖo àpù mè, wu ne bèa nyi àfɔ̀klɛ̃ na ɖèvi kèawo dòmètɔ ɖèka. 3Mì kpɔ mìa ɖokoe ji nyuɛ̃ ɖe.”
“Ne nɔ̀vi wò jè àgɔ̀#17.3 Ŋɔ̀ŋlɔ̃ buwo be: ne nɔ̀vi wò jè àgɔ̀a, gbe è na ɛ̀. do wòa, gbe è na ɛ̀; ne e ɖɔ̀lì èdɛ̃a, sɔ kè è. 4Ne e jè àgɔ̀ do wò zè adrɛ̃, gbè ɖèka, eye be trɔva gbɔ wò zè adrɛ̃, gblɔ̃ be: 'Mù jè àgɔ̀a', sɔ kè è.”
Xɔ̀sè
5 *Àmèdɔ̃dɔ̃awo gblɔ̃ na Tɔhonɔ̀ be: “Do xɔ̀sè, xɔ̀sè ji na mi.” 6Tɔhonɔ̀ gblɔ̃ be: “Ne, lè nyàwo toto mèa, mì ɖo xɔ̀sè sìgbè lokòku nènea, mì la to na vòti kèa be: 'Hɔ̃ so èkè ji; ne wòa yì mìɔ̃ lè àpù mè', eye àtia la sè mìabe ègbè.”
Sumɔvi kè wɔ̀ yebe èdɔa
7“Mìa dòmètɔ kɛ ye, ne e ɖo sumɔ̃vi kè dènà àgblè na ɛ̀, àlo kpɔna èlãwo ji na ɛ̀, eye, ne sumɔ̃via so àgblè va àxomèa, e la to na ɛ̀ be: 'Va nɔ̀ ànyi ne wòa ɖù ènu kudo mù zè ɖèka' ò? 8Mu ɖe ye be la to na ɛ̀ bòhũ be: 'Wɔ̀ ènu ɖùɖu nyè na mù. Sã àvɔ ɖo àlì, ne wòa sumɔ mù. Ma ɖù, ma nù gbɔ̀xue; e yomè a, wò cã wò la ɖù, la nù' òa? 9Eye ne sumɔ̃via wɔ̀ ènu kèwo yebe àpetɔ biɔ ɛ̀a cã ɖe, àpetɔa la do àkpe na ɛ̀a? 10Mìawo cã a, ne mì wɔ̀ ènu kèwo keŋu Mawu ɖo na mìa, mì gblɔ̃ be: 'Sumɔvi kpò ye mi nyi; ènu kè mi ɖo la wɔ̀a, ye mi wɔ̀.'”
Yesù dà èdɔ̀ na èkpònɔ̀ èwo
11E va jɔ̀ be Yesù le yì Yèruzàlɛm, eye be to Sàmarìa ku Galilea dòmè. 12Kè be le ɖo kɔpe ɖe mèa, èkpònɔ̀ èwo va dogò è. Wo nɔ̀tè lè àzɔ̀ge, 13do àpa gblɔ̃ be: “Àpetɔ Yesù, ku ŋuzĩzĩ na mi.” 14Kè Yesù kpɔ woa, e to na wo be: “Mì yì sɔ mìa ɖokoewo fiɔ mawunɔwo.” Eye wàlɛbɛ kè wo le yìa, woabe ŋutiwo kɔ̀. 15Vɔ̀a, àmè ɖèka lè woa dòmè, ekè be kpɔ be èdɔ̀a vɔ̀ na yèa, e trɔva le kafu Mawu kudo ègbè lelele. 16E va jè èklò lè Yesù be ŋùkɔ̀, cɔ̃ ŋùmè ànyi, lè yebe àfɔ̀wo nu, do àkpe na ɛ̀. Ŋusù kèa nyi Sàmarìatɔ. 17Eye, Yesù biɔ ɛ̀ be: “Mu nyi àmè èwo be ŋuti ye kɔ̀a? Àmè àsiɖèkɛ kpɔ̀tɛawo ɖe? 18Eŋuã, àmè ɖe mu gbà lè woa dòmè kè la trɔva na gogo Mawu, tovò lè àmèjro kèa ŋuti ò a?” 19Eye Yesù gblɔ̃ na ŋusùa be: “Sitè ne wòa joyì, xɔ̀sè wòa hlùɛ̃ wò gã.”
Mawu be fìɔɖùɖua be vava
(Màt 24.23-28, 37-41)
20Farizìwo va biɔ Yesù be: “Gà kɛ mè Mawu be fìɔɖùɖua la va ɖo ò.” E ɖo e ŋuti na wo be: “Mawu be fìɔɖùɖua mu nyi ènu kè wo la teŋu kpɔ kudo ŋùkuvi ò. 21Wo mu teŋu gblɔ̃ be: 'E lè fikè', àlo: 'E lè funu ò.' Đo Mawu be fìɔɖùɖua lè mìa dòmè vɔ̀.”
22E gbà gblɔ̃ na yebe nukplaviwo be: “Àzãwo gbãnà ekèwo mè mì la jro be yèwoa kpɔ *Àgbètɔ be Èvia be àzãwo dòmètɔ ɖèka lè, vɔ̀a, mì mu la kpɔ ɛ̀ ò. 23Àmèwo la to na mì be: 'E lè fikè', àlo: 'E lè funu!' Vɔ̀a, mì mu gbà yì ò, mì mu gbà ci ji jè yomè na wo ò. 24Đo sìgbè àlekè ye èjikèzò klɛ̃na èzò so jiŋùkusi be àkpa ɖe yìnà àkpa bua, nènea ke ye *Àgbètɔ be Èvia be vavaa la nyi lè yebe àzã gbèa yeŋu. 25Vɔ̀a, keŋu gbɔ̀xue ènu kèa la jɔ̀ a, e ɖo la kpe èfũ sùgbɔ eye jìjimè kèa la gbe è. 26Ènu kè jɔ̀ lè Nɔa be hùenua, ke ye la jɔ̀ lè Àgbètɔ be Èvia be àzãwo gbè. 27Wo le ɖù, le nù, wo le kplɔ̀ nyɔ̃nùwo, wo le na àsu nyɔ̃nùwo kaka va na àzã kè gbè Nɔa ɖo àɖakàhũa mè, eye èsì ɖɔ, crɔ̃ woawo keŋu. 28Ènu kè jɔ̀ lè Lɔt be hùenua cã la jɔ̀. Đo lè Lɔt be hùenua, àmèwo le ɖù, le nù; wo le plè ènu, le sà ènu, le do ènu, le tù èxɔ̀. 29Vɔ̀a, lè àzã kè gbè Lɔt to lè Sodɔ̀m-a, Mawu na, èzò kudo èzòkpe jà so jiŋùkusi va crɔ̃ àmè kèwo ci èdùa mèawo. 30Wàlɛbɛ kè Àgbètɔ be Èvia la ɖè ye ɖokoe fiɔa, nènea ke ye ènuwo la nyi.”
31“Lè àzã ŋua gbèa, àmè kè lè èxɔ̀ta, eye yebe ènuwo lè èxɔ̀a mèa, mu gbà ɖì be yèa yì fɔ̀ wo ò. Nène a ke ye àmè kè lè àgblè mèa cã mu gbà trɔva ŋùgbe ò. 32Mì ɖo ŋùkuvi ènu kè jɔ̀ ɖo Lɔt be èsrɔ̃ jia. 33Àmè kè la ji be yèa hlùɛ̃ yèbe àgbè gãa, la bu ì, eye, àmè kè la bu ìa, la hlùɛ̃ ɛ̀ gã. 34Mù le to na mì be, lè èzã ŋua mèa, àmè èvè la mlɔ̃ àba ɖèka ji, eye wo la sɔ àmè ɖèka jo, la gble àmè èvègɔ̃a ɖɛ. 35Nyɔ̃nù èvè la nɔ̀ tù ènuku ɖo èdù, eye wo la sɔ àmè ɖèka, la gble àmè èvègɔ̃a ɖɛ. [ 36Ŋusù èvè la nɔ̀ àgblè mè, eye wo la sɔ àmè ɖèka, la gble àmè èvègɔ̃a ɖɛ.]” 37Yesù be nukplaviwo biɔ ɛ̀ be: “Tɔhonɔ̀, fikɛ ye ènu kèawo la jɔ̀ lè ò?” Eye, e ɖo e ŋuti na wo be: “Àfi kè ènu kuku lèa, ye àklàsuwo bɔ̀nà ɖo.”
Valgt i Øjeblikket:
Lukà 17: GEN
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Mina Bible © Bible Society of Togo, 2014.