Oyinyima 13
13
Abụramị ọnịrị Ịrọọtị ệ hahi
1Abụramị ộ sị ose anị, dị ọ kụ́ avaba ogu ọnị ọ nyị dị ẹnịrị Ịrọọtị hụrẹ Ijipiti dị ẹ nọ eyi ụvẹtẹ ịnị ẹtẹ Ikanaani nị. 2Abụramị vị ọzọbanyị ẹtẹẹtẹrẹ. Ộ nyị imaaru, ọnịrị atẹmẹ beri ẹvụ dị ọ rẹ nyị igooru ọnịrị enyusẹ ẹkẹhị-ẹkẹhị nị. 3Abụramị ộ hụrẹ ịzọọ dị ọ na pooro na ngụ Ịbẹtẹrị ịzị ọ vịdị jị ajẹngụ tụ́ nị. Ajẹngụ ọnọọ vị ana yà ịnị akakana Ịbẹtẹrị ọnịrị Àyị. 4Ô vịdị mẹ aha ịsọvọ tụ́ ịzọọ, dị aa hẹkẹ Ẹnẹyịmavara ịzọọ nị. 5Ịrọọtị ọnị ọnịrị Abụramị zi ọnị ọ rẹ nyị imaaru ẹtẹẹtẹrẹ ọnịrị atẹmẹ beri ẹvụ. Avọọ ọ mẹ̀ rẹ nyị aza ana aa dụ ọ na nị. 6Ẹtẹ ọnọọ ọ yị kụkụ dọ ẹnịrị Abụramị. Ogu ẹnịnị ọ sị rụrụ baaba, avị ene hi ịzọọ ọ yị kụkụ hụ ịsụpa ẹnịnị gà rị. 7Di aza ana aa kụ́ ịsụpa Abụramị rị ọnịrị aza ana aa kụ́ Ịrọọtị rị kụkụ aa zyaazị nị. Ụmẹ ọnọọ Anikenaani ọnịrị Aniperizi nịnị ẹnị re hi ịnị ẹtẹ ọnọọ.
8Ẹkụhị ọnya di Abụramị va hị́ Ịrọọtị dị ọ kà a yọ ka: Ẹ yị vọrọ ka ọnịrị ọ ọ̀ọ zyaazị. Ọ kà a yị rẹ vọrọ ka aza ana aa kụ́ ịsụpa ọnịrị ọ rị ẹ̀ẹ zyaazị. Ọ kà ộ yẹ ka anda ẹnị vị nị. 9Dị ọ rẹ ka aanị ka ẹ yị vị ẹtẹ ọ tịtẹ ẹnị re aanị. Ọ kà ọ da okokooro anị oni èe sì dị ọ̀ọ nọ ịzọọ dị ọnị ọ rẹ yà aha anị. Ọ kà ọọ ka ọnị aa sị eyi ụvọrị, dị ọnị sị eyi ụvọha. Ọ̀ọ va ka ọnị aa sị eyi ụvọha, dị ọnị sị eyi ụvọrị. 10#Oyn 2.10Di Ịrọọtị kana eyi ré ẹtẹ ọnọọ, huu na ngụ Izowa nị di o re ka ô hunẹnẹ nị. Ẹtẹ anị ô zoza ẹtẹẹtẹrẹ vị ọ sị mẹẹ anka ụbazị Ẹnẹyịmavara, anka ẹtẹ Ijipiti. Avọọ ẹtẹ ọnọọ mẹ̀ yà di Ẹnẹyịmavara va kụ́ anẹkụra Isodọmị ọnịrị Igomora kwooze nị. 11Di Ịrọọtị ka ọnị aa sị avaba ini ozi Ijodani, dị ọ kà nọ eyi ọnị ọyịị̄ zịị vẹ ịzọọ nị. Avọọ ọnịrị Abụramị mẹ̀ há ẹngụ hi nị. 12Dị Abụramị ọnị yà ịnị ẹtẹ Ikanaani, dị Ịrọọtị ọnị aa ku udii ngụ ịnị ẹkụra ene hi ịzọọ zị, dị ọ jị ajẹngụ tụ́ ọgụrị Isodọmị nị.
13Ama Anisodọmị vị aza edivi hangụ-hangụ, dị ẹ nyayịnẹ aa mẹ̀ ebira odivii ene du Ẹnẹyịmavara ayị nị. 14Ịrọọtị mẹ̀ vavọọ sị hụụ ịda Abụramị, dị Ẹnẹyịmavara va kà a yị Abụramị dị ọ ka: Ọ kụ̀rà eyi tụ́ ẹba, di ò re ẹtẹ kara ẹngụ. 15#Ụkọ 7.5Ọ kà avaba ẹtẹ ọnị ọ maanị re aanị ọnị ne beri Ụnanka anị ịrẹma-ịrẹma ọnị vaa sịị yị, dị ọ vị ẹẹnịnị pooro zịna-zịna nị. 16Ọ kà ọnị vaa mẹ ka ịpa anị ẹ̀ rụrụ anka ezi ene hi ịnị ẹhẹ. Ọ kà ọza ana àa zụ za ezi ịrịka ọ rẹ va zụụ za ịpa anị nịnị ịrịka nị. 17Dị ọ rẹ ka ọ̀ kwẹẹtẹ dị ọ̀ maanị che ẹtẹ ọnọọ ajaajẹẹ ọnịrị ẹvẹnẹ-ẹvẹnẹ na para hu. Ọ kà ọnị ọnị vaa sịị yị nị. 18Dị Abụramị kú ajẹngụ anị dị ọ va yà iruvo ọchị. Ụbazị Edẹnị: A ka ụbazị Ẹnẹyịmavara, aroni Imamire ịnị ẹkụra Ihebirọnị nị. Dị ọ mẹ aha ịsọvọ tụ́ ịzọọ yị Ẹnẹyịmavara nị.
Valgt i Øjeblikket:
Oyinyima 13: EBTP
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Ebira First Bible © Bible Society of Nigeria, 2014.