Oyinyima 18
18
Ẹnẹyịmavara ô wo oto ozi ọnọrụ yị Abụrahamị
1Ẹkụhị ọnya, ịnị ụmẹ ọọdụ gàaga, dị Abụrahamị yaayịtẹ enoze ajẹngụ anị iruvo ọchị Imamire nị. Ọ mẹ̀ vavọọ ya ịzọọ, dị Ẹnẹyịmavara rẹ sị ẹngụ zụ ọ nị. 2#Ihib 13.2Di Abụrahamị vene re ka anọrụ ẹẹta jẹẹ ọvịdị anị nị. Ó mè re wa di o wuse zwe hụụnị oze ajẹngụ ne tù wa, dị ọ tana tụra ẹtẹ yị wa nị. 3Dị ọ ka, “Nda, aarịhịnị wẹ yị jẹẹ ịzẹnị chee. Ọ kà ẹ̀ 4jẹẹ à ká enyi vẹ dị ẹ̀ sị nyịna ahụ ẹnịnị, dị ẹ̀ yà iruvo ọchị ọnọnị dị ẹ̀ẹ tụ́ ụhwọ. 5Dị Abụrahamị rẹ ka ọnị ee nee sì ịsọyịrị chee vaa yị wa, ẹ̀ẹ raà sị za ayị zụ, dị ẹ vaa na. Ọ kà ẹnịnị ệ yẹ ka ịda ozida ẹnịnị ẹ vẹ aanị nị.” Dị ẹnịnị ka, “Ooho, ọ̀ vavọọ na mẹ̀ ẹ kẹ.” 6Di Abụrahamị wụsẹ ne tù Isera ịnị ajẹngụ dị ọ ka: ọ̀ wụsẹ mọ̄ ayị ene zoza ẹnya ẹẹta, di ò pō o dị ọ sị jị akara. 7Di Abụrahamị wụsẹ nọ ịzị ọ pá ịsụpa hị́, dị ọ sị ozi imaaru ọnya ene zoza dị ọ banyị, dị ọ sị yị ozi ahụ anị ọnya nị. Di ozi ahụ ọnọọ wụsẹ na mẹ̀ ẹ nị. 8Di Abụrahamị na sị ịrẹva ụnọ ana zá ọnịrị enyeenyi anị, dị ọ kụ́ ọ beri ozi imaaru ana a chịnẹ yị wa nị. Dị ọ jẹẹ pè wa ẹ màa rị ịsa iruvo ọchị ịzọọ nị.
9Di aza ẹnẹẹ ka, “Isera ose ẹwụ yọ?” Di Abụrahamị ka, “Ọ yà ịnị ajẹngụ.” 10#Iro 9.9Dị ọnya ịnị ẹnịnị ka: ẹ yị zụ nyị ka ọnị ọ yị vavẹ ve tù ọ ụmẹ aanị ụpọsa, ọnị ee vee tù ka Isera ose anị ô sị ozi ọnọrụ rị ụvọ. Isera ọnị yà ịrẹma oze ajẹngụ ọ tangwa ee batọ. 11Abụrahamị ọnịrị Isera ẹ sị vịra ẹtẹẹtẹrẹ. Isera ọnị ọ yị hyakụ kụkụ re ịsa ọnyẹnẹẹ anị. 12#1 Ipi 3.6Di Isera ee nyinyii tụ́ ịnị ịnẹ dị ọ ka: oni ò si bo, ọva anị o si bo, ọnị ẹẹ kụkụ zụ sụ ara? 13Dị Ẹnẹyịmavara va kà a yị Abụrahamị dị ọ ka, “Sị ẹ vẹ dị Isera ee nyinyi, dị ọ ka ọnị ọ́ọ́ kụkụ zụ ma ozi ọnị mẹ̀ sị vịra aanị? 14#Irk 1.37Áá nyị ịsị ẹ tụ́ akanya yị Ẹnẹyịmavara Ịnị ụmẹ ọnị aa vaa vẹ vee tù ọ, oni ee vee tù ka Isera ộ si ozi rị ụvọ.” 15Di Isera aa kụ́ dị ọ ka ọnị ẹ yi nyinyi. Angwa kụkụ ee hị́ ọ. Dị Ẹnẹyịmavara kà: “Ireche, ô nyinyi.”
Abụrahamị ô da ịpẹ ịrẹyị Isodọmị ọnịrị Igomora
16Anọrụ ẹnẹẹ ệ hụụ ịzọọ, di e zi oze Isodọmị aa na nị. Di Abụrahamị sị wa na tụ́ nị. 17Dị Ẹnẹyịmavara ee rò o dị ọ ka, “Ịsị maa vaa mẹ aanị, máá zụ sị tẹ yị Abụrahamị? 18Abụrahamị ọnọnị ọ vaa vara anẹkụra ọbanyị ana nyị ụkata nị. Avaba anẹhẹ vaa mẹ̀ aduwa ka ò zee yi ẹnị anka o mè zee yi Abụrahamị. 19Mẹ yị vavọọ zụ mẹ. Ma raà nyị Abụrahamị ka ò hú ezi anị ọnịrị aneehi anị ụvọ ka ẹ̀ va tụra oze amị ka ẹ̀ẹ mẹ̀ ịsa ana vọrọ ini eyi ẹmị Ẹnẹyịmavara, dị ẹ̀ẹ mẹ ịzẹyịza. Ọnọọ vaa mẹ ka ịsa ọnị mị ka maa mẹẹ yị Abụrahamị me re oze mẹ̀ ẹ yọ.”
20Dị Ẹnẹyịmavara va kà a yị Abụrahamị dị ọ ka: Ọnị ộ wụ́ aza mèe nowu ka ebira odivi ana anẹkụra Isodọmị ọnịrị Igomora aa mẹ̀ ọ sị banyị ẹnẹmẹhị. 21Ọ kà ọnị ee nee re e àa vị ịzẹyịza ẹ vavọọ aa mẹ anka a mèe nowu anị nị. À yị vị avọọ ọ mẹ vị, dị ọnị yẹ.
Abụrahamị ộ da ịpẹ ịrẹyị Isodọmị
22Dị aza ẹnẹẹ si hu, dị ẹ yaa nọ Isodọmị nị. Di Abụrahamị ọnị kụkụ yị jẹẹ pè Ẹnẹyịmavara nị.
23Di Abụrahamị kà pè Ẹnẹyịmavara dị ọ ka Aanị ka ọ vaa wụ̀ aza ọyịza ọnịrị aza edivii vaa bẹ nị? 24À kà a ka â nyị aza ọyịza ẹvarẹwụ tụ́ ịnị ẹkụra ọnọọ, ọ́ọ́ vaa yịị wụ̀ wa vaa ha nị? Ọ kà yị vaa hụ agụvị aza ọyịza ẹvarẹwụ ẹnẹẹ navọ avaba anẹkụra ọnọọ? 25Ọchị ọnọọ ị́rẹsụ, ọnị ọ yẹ ka ộ yị zụ vavọọ mẹ, ọ ka ọ yị vaa wụ̀ aza ọyịza ọnịrị aza edivii vaa bẹ, dị ahịka ịngọ ọnya ọ vana sị aza ọyịza ọnịrị aza edivi nị. Ọchọnọyịrẹsụ! Ọ kà Ohomorihi ana vị ọmọkarẹyị avaba anẹhẹ, ẹ yị zụ nyị ka ọ yị mẹ̀ ịsa ana vọrọ. 26Dị Ẹnẹyịmavara kà: ọnị òo re ọnịzẹyịza gụ ẹvarẹwụ ịnị ẹkụra ọnọọ, ọnị vaa hụ agụvị ẹnịnị navọ avaba anẹkụra ọnọọ. 27Di Abụrahamị rẹ ka ọnị eteesu ọnịrị atịtọ, ọnị ọ́ọ́ nyị irenu oni ọnị ee sii pè Ẹnẹyịmavara kà ịrẹyị? 28Ọ kà aarịhịnị ọza ọ mā yẹ, dị aza ẹnị ẹẹhị sị jị ha ịnị aza ẹnị ẹvarẹwụ ana vị aza ọyịza, ọ́ọ́ vaa wụ̀ avaba anẹkụra ọnọọ agụvị ẹẹhị ana jị ha aanị? Dị Ẹnẹyịmavara kà: “Àa nyị aza ẹnị ẹbẹẹva tụra ẹẹhị ana vị aza ọyịza, ọnị vaa hụ ụvị ẹnịnị dị ọnị ọ yị wụ anẹkụra ọnọọ va ha.” 29Dị Abụrahamị rẹ kà a yị Ẹnẹyịmavara dị ọ ka, “Àa na vị ka aza ọyịza ẹbẹẹva kẹnẹ e hi ịzọọ yọ?” Dị Ẹnẹyịmavara kà: “Ọnị ọ yị vaa wụ̀ wa agụvị ẹnị ẹbẹẹva ẹnẹẹ.” 30Di Abụrahamị rẹ ka, “Aarịhịnị, nyarị, ọyịkụ, vị ọnị ka oni ò họ̀ use ka àa vị ẹnị ohurẹẹwụ kẹnẹ ẹ vị aza ọyịza e ne re ịzọọ yọ?” Dị Ẹnẹyịmavara rẹ ka, “Ọnị ọ yị vaa wụ̀ anẹkụra ọnọọ ọnị oo re aza ọyịza ohurẹẹwụ ịzọọ.” 31Dị Abụrahamị ka, “Aarịhịnị ọ nyị isuuru yị ọnị, ka vị ọnị ka ọnị ọ̀ họ̀ ka àa na vị aza ẹnị oohu kẹnẹ ẹ vị aza ọyịza ịzọọ yọ?” Dị Ẹnẹyịmavara kà: “Ọnị ọ yị vaa wụ̀ anẹkụra ọnọọ ọnị òo re aza ọyịza oohu ịzọọ.” 32Di Abụrahamị kụkụ ka, “Aarịhịnị, ộ zụ ọgọnị, ọ sị vọrọ ka ọ kụ́ ayị hi ọnị, vị ọnị ka ọnị ọ̀ yaanị họ̀ use ụpẹ ọnya kẹnẹ tụ́ ọ nị. Àa na vị ka aza ẹnị ẹẹwụ pere ẹ vị aza ọyịza ene hi ịzọọ yọ?” Di Ẹnẹyịmavara kà: “Ọnị ọ yị vaa wụ̀ wa agụvị aza ẹnị ẹẹwụ ọnọọ.” 33Ịjị Ẹnẹyịmavara vavọọ sị Abụrahamị pè kà ịrẹyị, dị ọ si hu nị. Di Abụrahamị và nọ ịzị ọ yà nị.
Valgt i Øjeblikket:
Oyinyima 18: EBTP
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Ebira First Bible © Bible Society of Nigeria, 2014.