Gha ta Wəshi 31
31
Zhakob kahwɛ shave ki ghɛa Laban
1Pa Zhakob fate kageze ŋwalea Laban, ma ke hɛ: «Nahe Zhakob kefəhwe wəshia yiteyɛ ɓəmə, le wəshia yiteyɛ ɓəmə ndəkwə ghəa ŋkɛ ŋkɛ.» 2Ma newe ke Zhakob sha kema ta Laban ne, mba ntishɛ ta ŋkɛ kala nya ghalanza we. 3Tagha gɛ, ma ke Mahwətə gezete nda ke Zhakob: «Zhɛneghe geva kadzete hɛɗia ka shihɛ ŋa, te ŋkwa nya nza hwelefe ta ŋa, le gha tenza 'ya.»
4Pa Zhakob hekaghe yɛ Lɛya le Rashɛl kadzemte te ŋkwa nya nza wəshi keseɗa. 5Ma ke sha hɛ: «Ma newe 'ya ne, mba ntishɛ ta n'yɛ kala nya ghalanza le yiteyɛ ŋayɛ we. Ama le 'ya Shala ta yiteyɛ ɗa. 6Gheyɛ le ghəa ŋayɛ ne, nahe yɛ keɗepe le pɛtɛa berete ta ɗa se 'ya kamene nda slene ke yiteyɛ ŋayɛ. 7Ma yiteyɛ ŋayɛ ne, nahe ŋkɛ kese kamene ɗa mbəɗəkwə, meŋe zhigə zhɛremte meleɓe ta ɗa ŋkɛ, ama kepelakɛ Shala kamene ɗa wəsə kwa ndiremi ŋkɛ we. 8Ma kwa gezete yiteyɛ ŋayɛ: ‹Wəshi keseɗa nyi jiɓe jiɓe yateŋ'we na kameleɓe ta ŋa› ke ne, pɛtɛ wəshi keseɗa kaya ŋwale jiɓe jiɓe. Ma kwa gezete ŋkɛ: ‹Wəshi keseɗa nyi galawe galawe yateŋ'we na kameleɓe ta ŋa› ke ne, pɛtɛ wəshi keseɗa kaya ŋwale galawe galawe. 9Shala nde fəhwe wəshi keseɗa ta ŋkɛ va yiteyɛ ŋayɛ ba'a nde fəave ɗa hɛ. 10Ma mbe və nya vale wəshi keseɗa ne, wa nya wəsə nya nakɛ 'ya nya te shiwə nya: ma gamea lɛmə keɗema zhɛfa lɛmə nyi kevale ŋemi ne, galawe, bawe keɗema jiɓe ya dzeyi te hɛ. 11Ma ke nde ghwene ta Shala sha 'ya te shiwə: ‹Zhakob!› Ma 'ya zhɛnete: ‹Wa nya 'ya nya.› 12Ma ke zhɛkwa: ‹Kafete ghə kanewe gamea lɛmə ba'a zhɛfa lɛmə nyi galawe galawe, jiɓe jiɓe ba'a nyi bawe bawe nyi, kwa nza ŋkɛ nahe 'ya kenakɛ wəsə nya mene ŋa Laban. 13'Ya ya kaShala nya kencɛte ŋa geva mbe Bɛtɛl, te ŋkwa nya mɓete gɛaŋa na ba'a nya shekaghe n'yi na kənə, te ŋkwa shɛ menete ɗa meɗe mɛ na. Ma tsetsenya ne, slə ŋa te hɛɗi nya kadzete hɛɗia hwelefe ta ŋa.›» 14Ma ke yɛ Rashɛl le Lɛya zhɛnete nda: «Kwete bela ta wəsə kezeme ghɛ shɛ va ghen'yɛ ki ghɛa yiteyɛ n'yɛ zhɛkwa na? 15Ashɛ kala ka mentiɓə zhɛrete n'yɛ ŋkɛ kwa pamte n'yɛ ŋkɛ ba'a kwa zehwe wəshi nyi kese mbe ghen'yɛ ŋkɛ wəka? 16Ma mcɛlə nyi fəhwe Shala va yiteyɛ n'yɛ ne, zhigə ŋa n'yɛ le ŋwalea n'yɛ. Menete wəsə nya gezete Shala tsetsenya.»
17Tagha gɛ ne, pelɛhetɛme Zhakob sate te ŋkwa, pa ŋkɛ fəame ŋwale ba'a mia ŋkɛ pelɛ zlegweməa lɛmə. 18Pa ŋkɛ fəte wəshi keseɗa ta ŋkɛ ba'a pɛtɛa wəshi nyi kemave ŋkɛ mbe Mɛzopotami nya pelɛghə kezha zhɛre geva kalə sha ghɛa yitenyɛ Izak, te hɛɗia Kanan. 19Ma Laban le ŋa ŋkɛ ne, nahe ŋkɛ kelə katsehe shintia timɛtia ŋkɛ. Pa Rashɛl ghərəhwe wəshi nyi zhɛrete yitenyɛ kashala. 20Pa Zhakob slənyɛ teghərə yitea Laban, nde Aram, kaɗema kese ŋkɛ kageze nda. 21Pa ŋkɛ hwɛnyɛ le zhike ŋa ŋkɛ wəshi ba'a jivenyɛ te hələa Efrate kahe kahe. Kwetere wəmbəa ŋkɛ, ntəŋə ŋkɛ dzeme laka ghweme nyi mbe Gala'ad.
22Ma te kwa mahekene ta hɛ, pa mbeli gezete nda ke Laban nahe Zhakob kehwɛnyɛ. 23Pa ŋkɛ hekakɛ ka kesaka yitenyɛ, cape hɛ yitea keka Zhakob kahɛ mberefaŋe. Pa hɛ kekave hwa ghweme nyi mbe Gala'ad. 24Ama heviɗi ne, pa Shala ncɛte nda geva ke Laban nde Aram, ma ke shɛ: «Yagha na tegeze nda kwete ghena ke Zhakob.»
25Pa Laban kekave Zhakob nya kemɓete cɛ lekwesa ta ŋkɛ hwa ghweme. Tsagha shɛ yɛ Laban le mbelia ŋkɛ mɓete ŋa nci hwa ghweme nyi mbe Gala'ad. 26Ma ke Laban sha Zhakob: «Wa wəsə nya menete nya na wa? Nahe na keghwetete laka fəhwe ŋwalea kwɛa ɗa kala ka kwaterashi nyi kese mbeli hwa mpa. 27Yitea wa hwɛ ŋa na tewəfərə ba'a ghərəve hweŋkwa na kala nya wa? Ma ya nahe na kegezete ɗa ne, katepele ŋa 'ya kaslə le zlama ba'a le cimə yitea yɛ dɛŋwə le ŋgwəleŋə. 28Ama kepelakɛ ɗa na kahəməwə ŋwalea kwɛa ɗa ba'a ka shihɛ ɗa we. Tagha ne, kala gezhi menete na kaganda. 29Wərə 'ya kamenete ŋayɛ wəsə kwa ndiremi, ama ma ke Shala ta ka shihɛ ŋayɛ sha 'ya mshena heviɗi: ‹Yagha na tegeze nda kwete ghena ke Zhakob.› 30Ma tsetsenya kwa slə ŋa na le dera le dera kalə sha ghɛa yiteyɛ ŋa ne, yitea wa ghərəhwe yɛ shala ta ɗa na wa?» 31Ma ke Zhakob sha Laban: «Ghazlənə nde zhɛte ɗa, ma zəzə 'ya, katefəhwe ŋwalea kwɛa ŋa na va 'ya. 32Ma wəndə nya ntsate yɛ shala ta ŋa na ve ne, kanza ŋkɛ teghweme we. Newemte wəshia ŋa hwa wəshi ɗa kwa kema ta mbelia ɓə shɛ na fəte hɛ.» Keɗepete Zhakob Rashɛl nde ghərəhwe yɛ shala ta ŋkɛ we.
33Pa Laban newemte ŋkwa nya mbe cɛ lekwesa ta Zhakob, ŋa Lɛya ba'a ŋa kwatera nyi bake, ama kentsate wəsə ŋkɛ mbe we. Cape ŋkɛ shave mbe cɛ lekwesa ta Lɛya kezha dzembe ŋa Rashɛl. 34Nda ma gɛ, Rashɛl nde ghərəhwe wəshi nyi zhɛrete ŋkɛ kashala ba'a nde fəyi hɛ mbeyitere serede nya ntishɛ mbeli te pelɛ zlegwemə, pa nde ntishɛ nda te. Pɛtɛ Laban newemte cɛ lekwesa kaɗema kenakɛ wəsə. 35Ma ke Rashɛl sha yitenyɛ: «Yita yawe, hwepema wənə na kwa ɗema 'ya kesate kwa kema ta ŋa ma. Kwa nza ŋkɛ ne, shewə 'ya va wəshi.»
Pɛtɛ zelemte ŋkwa Laban, ama kentsate wəshi nyi zhɛrete ŋkɛ kashala ŋkɛ we. 36Mɓɛke Zhakob hwepete wənə, ma ke ndeke nda fete ke Laban: «Wa fete ta ɗa wa? Wa wəsə kwa ndiremi nya menete 'ya nda keka ɗa na le wənə le wənə wa? 37Ma kwa newemte wəshia ɗa na pɛtɛ ne, nahe na kenakɛ wəsə nya ki ghɛa ŋa ya kwetɛŋe na? Ncɛte ɗa kwa kema ta mbelia ŋa ba'a mbelia ɗa nda neghate ɓə fete hɛ. 38Va bakemsə menete 'ya le gha, kegha timɛti ŋa keɗema kwia ŋa kabereɗe we! Kegha 'ya kazehwe game hwa wəshi keseɗa ta ŋa we. 39Kegha 'ya kakeleke ŋa wəsə keseɗa nya peslekɛ wəshi nyi hwa gamba we, kwa ghəa ɗa nza za ta ŋkɛ. Wəsə keseɗa nya ghərəhwe mbeli heveci keɗema heviɗi ne, ka'yɛwe na kezha ŋsle 'ya. 40Kasa yaka 'ya va hwələ heveci ba'a va ntasle heviɗi, kakele ɗa hɛ we. 41Va bakemsə menete 'ya ki ghɛa ŋa: va meŋe wəfaɗeghəmbe menete 'ya kamene slene kadzembe ŋwalea kwɛa ŋa, va ŋkwaŋe kaya wəshi ŋa, meŋe zhigə se na kazhɛre meleɓe ta ɗa. 42Ma keɗema Shala ta shi ɗa Abraham, Shala nya kendeke nda ghazlənə ke yiteyɛ ɗa Izak kese le 'ya ne, nza pala pala tesərə ɗa na kaslə. Ama nahe Shala kenakɛ yaka nya sahwe 'ya ba'a leɓe ta ɗa va slene nya menete ŋa 'ya. Pa ŋkɛ neghamte fete yitea 'ya mshena heviɗi.» 43Ma ke Laban zhɛnete nda ke Zhakob: «Ŋa ɗa ŋwalea kwɛ nyi, ŋa ɗa ŋwalea nci, ŋa ɗa wəshi keseɗa nyi, pɛtɛ wəshi nyi newe nyi na teke kaŋa ɗa. Wa wəsə nya nza 'ya kamenete ɓeshi kaŋa ŋwalea kwɛa ɗa le ŋwalea nci tse wa? 44Mbara ɓə, menete ɓə jikə geva bake ɓə, nza nde negha fete kwelɛ gheɓə.»
45Laŋe Zhakob kelete pelɛ, gepe ŋkɛ mɓete kagɛaŋa. 46Kwetere wəmbəa ŋkɛ, pa ŋkɛ gezete nda ke mbelia ŋkɛ kezha tseha pelɛ. Pa hɛ tsehave hɛ ba'a tsenete hɛ te ŋkwa nya kwetɛŋe. Pa hɛ zehwe wəshi kezeme te pelɛ nyi tsenetea shɛhɛ. 47Pa Laban hekate nda slə ke ŋkwa shɛ kaYegar-Sahadəwta, ama Galɛd hekate nda slə Zhakob. 48Ma ke Laban: «Tsene ta pelɛ nya ya kande negha fete kwelɛ gheɓə ɓeshi.» Vatse hekate nda slə mbeli kaGalɛd. 49Pa mbeli hekate nda slə kaMispa perə. Kwa nza ŋkɛ ne, ma ke Laban gezete: «Nza Mahwətə kande ya ɓə te və nya ɗema mə kanakɛ ghəa ɓə. 50Ma kendave na kasa nda yaka ke ŋwalea kwɛa ɗa, ma kewəmeve kweci na mi kadzeghəa ŋwalea kwɛa ɗa, wəndə ŋelɛ nde tenegha ɓə fete we, ama Shala le ghəa ŋkɛ.»
51Ma ke Laban sha Zhakob zhɛkwa: «Newema pelɛ nyi tsenete nyi 'ya kwelɛ gheɓə, newema gɛaŋa nya. 52Yɛ tsene ta pelɛ nya le gɛaŋa nya ya kaka negha fete kwele gheɓə. Kazeme 'ya kafela kaɗema 'ya kazlake hɛ kalə sha gha le wəsə kwa ndiremi, kazeme ɗa fela na kaɗema na kazlake hɛ kase sha 'ya le wəsə kwa ndiremi perə. 53Nza Shala ta Abraham le Shala ta Nahor kaka negha fete kwelɛ gheɓə.» Ghenci ka se kaShala ta yiteyɛa nci.
Pa Zhakob zemete fela le Shala nya kendeke nda ghazlənə ke yitenyɛ Izak. 54Ma kwa sebe ta ŋkɛ, pa Zhakob dzeghekɛ melɛ pelɛ ghweme, pa ŋkɛ hekake mbelia ŋkɛ yitea wəsə kezeme. Ma kwa zehwe wəsə kezeme hɛ, pa hɛ hɛnji pelɛ ghwemea shɛ.
Valgt i Øjeblikket:
Gha ta Wəshi 31: BEKDC12
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
La Bible en langue Kapsiki avec les livres deutérocanoniques © Alliance Biblique du Cameroun 2012.
Gha ta Wəshi 31
31
Zhakob kahwɛ shave ki ghɛa Laban
1Pa Zhakob fate kageze ŋwalea Laban, ma ke hɛ: «Nahe Zhakob kefəhwe wəshia yiteyɛ ɓəmə, le wəshia yiteyɛ ɓəmə ndəkwə ghəa ŋkɛ ŋkɛ.» 2Ma newe ke Zhakob sha kema ta Laban ne, mba ntishɛ ta ŋkɛ kala nya ghalanza we. 3Tagha gɛ, ma ke Mahwətə gezete nda ke Zhakob: «Zhɛneghe geva kadzete hɛɗia ka shihɛ ŋa, te ŋkwa nya nza hwelefe ta ŋa, le gha tenza 'ya.»
4Pa Zhakob hekaghe yɛ Lɛya le Rashɛl kadzemte te ŋkwa nya nza wəshi keseɗa. 5Ma ke sha hɛ: «Ma newe 'ya ne, mba ntishɛ ta n'yɛ kala nya ghalanza le yiteyɛ ŋayɛ we. Ama le 'ya Shala ta yiteyɛ ɗa. 6Gheyɛ le ghəa ŋayɛ ne, nahe yɛ keɗepe le pɛtɛa berete ta ɗa se 'ya kamene nda slene ke yiteyɛ ŋayɛ. 7Ma yiteyɛ ŋayɛ ne, nahe ŋkɛ kese kamene ɗa mbəɗəkwə, meŋe zhigə zhɛremte meleɓe ta ɗa ŋkɛ, ama kepelakɛ Shala kamene ɗa wəsə kwa ndiremi ŋkɛ we. 8Ma kwa gezete yiteyɛ ŋayɛ: ‹Wəshi keseɗa nyi jiɓe jiɓe yateŋ'we na kameleɓe ta ŋa› ke ne, pɛtɛ wəshi keseɗa kaya ŋwale jiɓe jiɓe. Ma kwa gezete ŋkɛ: ‹Wəshi keseɗa nyi galawe galawe yateŋ'we na kameleɓe ta ŋa› ke ne, pɛtɛ wəshi keseɗa kaya ŋwale galawe galawe. 9Shala nde fəhwe wəshi keseɗa ta ŋkɛ va yiteyɛ ŋayɛ ba'a nde fəave ɗa hɛ. 10Ma mbe və nya vale wəshi keseɗa ne, wa nya wəsə nya nakɛ 'ya nya te shiwə nya: ma gamea lɛmə keɗema zhɛfa lɛmə nyi kevale ŋemi ne, galawe, bawe keɗema jiɓe ya dzeyi te hɛ. 11Ma ke nde ghwene ta Shala sha 'ya te shiwə: ‹Zhakob!› Ma 'ya zhɛnete: ‹Wa nya 'ya nya.› 12Ma ke zhɛkwa: ‹Kafete ghə kanewe gamea lɛmə ba'a zhɛfa lɛmə nyi galawe galawe, jiɓe jiɓe ba'a nyi bawe bawe nyi, kwa nza ŋkɛ nahe 'ya kenakɛ wəsə nya mene ŋa Laban. 13'Ya ya kaShala nya kencɛte ŋa geva mbe Bɛtɛl, te ŋkwa nya mɓete gɛaŋa na ba'a nya shekaghe n'yi na kənə, te ŋkwa shɛ menete ɗa meɗe mɛ na. Ma tsetsenya ne, slə ŋa te hɛɗi nya kadzete hɛɗia hwelefe ta ŋa.›» 14Ma ke yɛ Rashɛl le Lɛya zhɛnete nda: «Kwete bela ta wəsə kezeme ghɛ shɛ va ghen'yɛ ki ghɛa yiteyɛ n'yɛ zhɛkwa na? 15Ashɛ kala ka mentiɓə zhɛrete n'yɛ ŋkɛ kwa pamte n'yɛ ŋkɛ ba'a kwa zehwe wəshi nyi kese mbe ghen'yɛ ŋkɛ wəka? 16Ma mcɛlə nyi fəhwe Shala va yiteyɛ n'yɛ ne, zhigə ŋa n'yɛ le ŋwalea n'yɛ. Menete wəsə nya gezete Shala tsetsenya.»
17Tagha gɛ ne, pelɛhetɛme Zhakob sate te ŋkwa, pa ŋkɛ fəame ŋwale ba'a mia ŋkɛ pelɛ zlegweməa lɛmə. 18Pa ŋkɛ fəte wəshi keseɗa ta ŋkɛ ba'a pɛtɛa wəshi nyi kemave ŋkɛ mbe Mɛzopotami nya pelɛghə kezha zhɛre geva kalə sha ghɛa yitenyɛ Izak, te hɛɗia Kanan. 19Ma Laban le ŋa ŋkɛ ne, nahe ŋkɛ kelə katsehe shintia timɛtia ŋkɛ. Pa Rashɛl ghərəhwe wəshi nyi zhɛrete yitenyɛ kashala. 20Pa Zhakob slənyɛ teghərə yitea Laban, nde Aram, kaɗema kese ŋkɛ kageze nda. 21Pa ŋkɛ hwɛnyɛ le zhike ŋa ŋkɛ wəshi ba'a jivenyɛ te hələa Efrate kahe kahe. Kwetere wəmbəa ŋkɛ, ntəŋə ŋkɛ dzeme laka ghweme nyi mbe Gala'ad.
22Ma te kwa mahekene ta hɛ, pa mbeli gezete nda ke Laban nahe Zhakob kehwɛnyɛ. 23Pa ŋkɛ hekakɛ ka kesaka yitenyɛ, cape hɛ yitea keka Zhakob kahɛ mberefaŋe. Pa hɛ kekave hwa ghweme nyi mbe Gala'ad. 24Ama heviɗi ne, pa Shala ncɛte nda geva ke Laban nde Aram, ma ke shɛ: «Yagha na tegeze nda kwete ghena ke Zhakob.»
25Pa Laban kekave Zhakob nya kemɓete cɛ lekwesa ta ŋkɛ hwa ghweme. Tsagha shɛ yɛ Laban le mbelia ŋkɛ mɓete ŋa nci hwa ghweme nyi mbe Gala'ad. 26Ma ke Laban sha Zhakob: «Wa wəsə nya menete nya na wa? Nahe na keghwetete laka fəhwe ŋwalea kwɛa ɗa kala ka kwaterashi nyi kese mbeli hwa mpa. 27Yitea wa hwɛ ŋa na tewəfərə ba'a ghərəve hweŋkwa na kala nya wa? Ma ya nahe na kegezete ɗa ne, katepele ŋa 'ya kaslə le zlama ba'a le cimə yitea yɛ dɛŋwə le ŋgwəleŋə. 28Ama kepelakɛ ɗa na kahəməwə ŋwalea kwɛa ɗa ba'a ka shihɛ ɗa we. Tagha ne, kala gezhi menete na kaganda. 29Wərə 'ya kamenete ŋayɛ wəsə kwa ndiremi, ama ma ke Shala ta ka shihɛ ŋayɛ sha 'ya mshena heviɗi: ‹Yagha na tegeze nda kwete ghena ke Zhakob.› 30Ma tsetsenya kwa slə ŋa na le dera le dera kalə sha ghɛa yiteyɛ ŋa ne, yitea wa ghərəhwe yɛ shala ta ɗa na wa?» 31Ma ke Zhakob sha Laban: «Ghazlənə nde zhɛte ɗa, ma zəzə 'ya, katefəhwe ŋwalea kwɛa ŋa na va 'ya. 32Ma wəndə nya ntsate yɛ shala ta ŋa na ve ne, kanza ŋkɛ teghweme we. Newemte wəshia ŋa hwa wəshi ɗa kwa kema ta mbelia ɓə shɛ na fəte hɛ.» Keɗepete Zhakob Rashɛl nde ghərəhwe yɛ shala ta ŋkɛ we.
33Pa Laban newemte ŋkwa nya mbe cɛ lekwesa ta Zhakob, ŋa Lɛya ba'a ŋa kwatera nyi bake, ama kentsate wəsə ŋkɛ mbe we. Cape ŋkɛ shave mbe cɛ lekwesa ta Lɛya kezha dzembe ŋa Rashɛl. 34Nda ma gɛ, Rashɛl nde ghərəhwe wəshi nyi zhɛrete ŋkɛ kashala ba'a nde fəyi hɛ mbeyitere serede nya ntishɛ mbeli te pelɛ zlegwemə, pa nde ntishɛ nda te. Pɛtɛ Laban newemte cɛ lekwesa kaɗema kenakɛ wəsə. 35Ma ke Rashɛl sha yitenyɛ: «Yita yawe, hwepema wənə na kwa ɗema 'ya kesate kwa kema ta ŋa ma. Kwa nza ŋkɛ ne, shewə 'ya va wəshi.»
Pɛtɛ zelemte ŋkwa Laban, ama kentsate wəshi nyi zhɛrete ŋkɛ kashala ŋkɛ we. 36Mɓɛke Zhakob hwepete wənə, ma ke ndeke nda fete ke Laban: «Wa fete ta ɗa wa? Wa wəsə kwa ndiremi nya menete 'ya nda keka ɗa na le wənə le wənə wa? 37Ma kwa newemte wəshia ɗa na pɛtɛ ne, nahe na kenakɛ wəsə nya ki ghɛa ŋa ya kwetɛŋe na? Ncɛte ɗa kwa kema ta mbelia ŋa ba'a mbelia ɗa nda neghate ɓə fete hɛ. 38Va bakemsə menete 'ya le gha, kegha timɛti ŋa keɗema kwia ŋa kabereɗe we! Kegha 'ya kazehwe game hwa wəshi keseɗa ta ŋa we. 39Kegha 'ya kakeleke ŋa wəsə keseɗa nya peslekɛ wəshi nyi hwa gamba we, kwa ghəa ɗa nza za ta ŋkɛ. Wəsə keseɗa nya ghərəhwe mbeli heveci keɗema heviɗi ne, ka'yɛwe na kezha ŋsle 'ya. 40Kasa yaka 'ya va hwələ heveci ba'a va ntasle heviɗi, kakele ɗa hɛ we. 41Va bakemsə menete 'ya ki ghɛa ŋa: va meŋe wəfaɗeghəmbe menete 'ya kamene slene kadzembe ŋwalea kwɛa ŋa, va ŋkwaŋe kaya wəshi ŋa, meŋe zhigə se na kazhɛre meleɓe ta ɗa. 42Ma keɗema Shala ta shi ɗa Abraham, Shala nya kendeke nda ghazlənə ke yiteyɛ ɗa Izak kese le 'ya ne, nza pala pala tesərə ɗa na kaslə. Ama nahe Shala kenakɛ yaka nya sahwe 'ya ba'a leɓe ta ɗa va slene nya menete ŋa 'ya. Pa ŋkɛ neghamte fete yitea 'ya mshena heviɗi.» 43Ma ke Laban zhɛnete nda ke Zhakob: «Ŋa ɗa ŋwalea kwɛ nyi, ŋa ɗa ŋwalea nci, ŋa ɗa wəshi keseɗa nyi, pɛtɛ wəshi nyi newe nyi na teke kaŋa ɗa. Wa wəsə nya nza 'ya kamenete ɓeshi kaŋa ŋwalea kwɛa ɗa le ŋwalea nci tse wa? 44Mbara ɓə, menete ɓə jikə geva bake ɓə, nza nde negha fete kwelɛ gheɓə.»
45Laŋe Zhakob kelete pelɛ, gepe ŋkɛ mɓete kagɛaŋa. 46Kwetere wəmbəa ŋkɛ, pa ŋkɛ gezete nda ke mbelia ŋkɛ kezha tseha pelɛ. Pa hɛ tsehave hɛ ba'a tsenete hɛ te ŋkwa nya kwetɛŋe. Pa hɛ zehwe wəshi kezeme te pelɛ nyi tsenetea shɛhɛ. 47Pa Laban hekate nda slə ke ŋkwa shɛ kaYegar-Sahadəwta, ama Galɛd hekate nda slə Zhakob. 48Ma ke Laban: «Tsene ta pelɛ nya ya kande negha fete kwelɛ gheɓə ɓeshi.» Vatse hekate nda slə mbeli kaGalɛd. 49Pa mbeli hekate nda slə kaMispa perə. Kwa nza ŋkɛ ne, ma ke Laban gezete: «Nza Mahwətə kande ya ɓə te və nya ɗema mə kanakɛ ghəa ɓə. 50Ma kendave na kasa nda yaka ke ŋwalea kwɛa ɗa, ma kewəmeve kweci na mi kadzeghəa ŋwalea kwɛa ɗa, wəndə ŋelɛ nde tenegha ɓə fete we, ama Shala le ghəa ŋkɛ.»
51Ma ke Laban sha Zhakob zhɛkwa: «Newema pelɛ nyi tsenete nyi 'ya kwelɛ gheɓə, newema gɛaŋa nya. 52Yɛ tsene ta pelɛ nya le gɛaŋa nya ya kaka negha fete kwele gheɓə. Kazeme 'ya kafela kaɗema 'ya kazlake hɛ kalə sha gha le wəsə kwa ndiremi, kazeme ɗa fela na kaɗema na kazlake hɛ kase sha 'ya le wəsə kwa ndiremi perə. 53Nza Shala ta Abraham le Shala ta Nahor kaka negha fete kwelɛ gheɓə.» Ghenci ka se kaShala ta yiteyɛa nci.
Pa Zhakob zemete fela le Shala nya kendeke nda ghazlənə ke yitenyɛ Izak. 54Ma kwa sebe ta ŋkɛ, pa Zhakob dzeghekɛ melɛ pelɛ ghweme, pa ŋkɛ hekake mbelia ŋkɛ yitea wəsə kezeme. Ma kwa zehwe wəsə kezeme hɛ, pa hɛ hɛnji pelɛ ghwemea shɛ.
Valgt i Øjeblikket:
:
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
La Bible en langue Kapsiki avec les livres deutérocanoniques © Alliance Biblique du Cameroun 2012.