Gha ta Wəshi 30
30
1Ma kwa nakɛ Rashɛl kaɗema nde keyake nda wəzege ke Zhakob ne, ntake zlɛ kazhɛ nda va wəzha ta meghekɛ. Ma ke sha Zhakob: «Ve ɗa ŋwale, keɗema ŋkɛ tsagha ne, katemte 'ya.» 2Pa wənəa Zhakob hwepenyɛ ve, ma ke shɛ: «KaShala veyi ɗa na na? Gheŋkɛ nde fɛa ŋa keya wəzege.» 3Ma ke zhɛnete nda: «Wa nya kwatera ta ɗa Bilha nya, kwiɗi kaɓelahe le ghenta kezha yake ɗa ŋwale nde. Ma tsagha ne, kateŋ'we ŋwale 'ya te zlaɓa ta nta.» 4Pa nde ndeke nda kwatera ta nta Bilha ke Zhakob kamale, ntake ŋkɛ kaɓelahe le.
5Njehe Bilha le hwə, bawe yake nda wəzege teza ke Zhakob. 6Ma ke Rashɛl: «Nahe Shala keneghate ɗa fete! Nahe ŋkɛ kefate səkwə ta ɗa ba'a kendeke ɗa wəzege teza perə.» Vatse hekate nda slə nde kaDan.
7Njehe Bilha, kwatera ta Rashɛl le hwə zhɛkwa, bawe nde yake nda nde bake ta wəzege teza ke Zhakob. 8Ma ke Rashɛl: «Mpa nya dzawe yamenete 'ya le wəzha ta meyɛ ɗa, nahe 'ya kehərəte ŋkwa.» Pa nde ndeke nda slə kaNɛftali.
9Ma kwa nakɛ Lɛya nahe nde keghereŋe keya wəzege ne, pa nde ndeke nda kwatera ta nta Zilpa ke Zhakob kamale. 10Bawe Zilpa nya kakwatera ta Lɛya yake nda wəzege teza ke Zhakob. 11Ma ke Lɛya: «Wa nya Shala te 'ya gɛ!» Pa nde hekate nda slə ke wəzegea shɛ kaGad.
12Bawe Zilpa, kwatera ta Lɛya yake nda nde bake ta wəzege teza ke Zhakob. 13Ma ke Lɛya: «Wa nya zeɗe nza va 'ya gɛ! Tsetsenya gɛ ne, wərə mi kageze zlama ya va 'ya.» Pa nde hekate nda slə kaAsɛr.
14Ma te kwete hɛ vəa ŋkwa nya leke ha mbeli ne, cape Rəbɛn kadzemte kasepa ya ta wəfe nya ɗe ŋkwa mbeli ve. Pa ŋkɛ ndake nda ke meghekɛ Lɛya. Ma ke Rashɛl sha Lɛya: «Nta ɗa ya ta wəfe ta ɗe nya ndake ŋa nya wəzege ta ŋa gi.» 15Ma ke Lɛya zhɛnete nda: «Dewə ŋa za ɗa nya kelehwe nya na nda ɗe na kakele ya ta wəfe ta ɗe nya ndake wəzege ta ɗa na?» Ma ke Rashɛl: «Yawa, hɛyi ŋa viɗi nya Zhakob nda nta ɗa ya ta wəfe ta ɗe nya ndake wəzege ta ŋa na!»
16Ma hetɛhwɛɗi kasheke Zhakob kwamte ne, cape Lɛya kashave shɛ. Ma ke shɛ: «Yitea 'ya tehɛ na ɓeshi, kwa nza ŋkɛ nahe 'ya kepave hweŋkwa te ya ta wəfe ta ɗe nya ndake wəzege ta ɗa.» Pa ŋkɛ hɛnyɛ le te viɗi shɛ. 17Pa Shala fate səkwə ta Lɛya, njehe le hwə zhɛkwa, bawe yake nda wəzege teza nde mcɛfe ke Zhakob. 18Ma ke: «Nahe Shala kendeke ɗa zhɛme kwa ndeke nda kwatera ta ɗa 'ya ke za ɗa.» Pa nde hekate nda slə kaIsakar.
19Njehe Lɛya le hwə zhɛkwa, bawe yake nda nde ŋkwaŋe ta wəzege teza ke Zhakob. 20Ma ke: «Nahe Shala kendeke ɗa wəsə gəmə nya ganyɛ. Ma tsetsenya gɛ ne, kateve zləvə za ɗa te 'ya, kwa yake nda ŋwale tezhili 'ya ŋkwaŋe.» Pa nde hekate nda slə ke wəzegea shɛ kaZabəlon. 21Kwa sebe ta ŋkɛ ne, pa nde yake wəzha makwa nya hekate nda slə nde kaDina.
22Ma ɓiyitsa gɛ, pa Shala zəzəte Rashɛl ba'a fate səkwə ta nta, pa ŋkɛ ndeke nda hweŋkwa keya wəzege. 23Njehe Rashɛl le hwə, bawe nde yake wəzege teza. Ma ke: «Nahe Shala kekelemte hawe te 'ya.» 24Pa nde hekate nda slə ke wəzegea shɛ kaZhozɛf, ma ke: «Hwe Mahwətə ndeke ɗa kwete wəzege teza tse gɛ!»
Zhakob kazhɛre kande mcɛlə
25Ma kwa yake Zhozɛf Rashɛl ne, ma ke Zhakob sha Laban: «Pelave ɗa hweŋkwa kalə sha ghɛa ɗa, kadzete hɛɗia ɗa. 26Pelave ɗa hweŋkwa kaslə le mia ɗa ba'a ŋwalea ɗa. Kadzembe mia shɛhɛ menete ŋa slene 'ya. Nahe na keɗepe slene nya menete ŋa 'ya megela.» 27Ma ke Laban shɛ: «Təhwə təhwə ŋa 'ya, fate ɗa ŋa ɗa. Nahe yɛ shala ta ɗa kencɛte ɗa kewəpi wəpi 'ya va Mahwətə tewəmbəreke gha. 28Gezete ɗa meleɓe ta ŋa shɛ 'ya ŋkikɛ ŋa ŋkɛ.» 29Ma ke Zhakob shɛ: «Nahe na keɗepe slene nya menete ŋa 'ya gha le ghəa ŋa ba'a tsema tsema yate ya wəshi keseɗa ta ŋa yitea 'ya. 30Ɓɛhwɛ wəshi va gha nda se 'ya, pa hɛ mbakete geva yitea 'ya kwele kwele. Nahe Mahwətə kewəpikɛ ŋa se te və nya dzeki ghɛa ŋa 'ya. Ma tsetsenya gɛ ne, hweŋkwa temene slene 'ya kaŋa ghɛa ɗa wa?» 31Ma ke Laban shɛ: «Wa wəsə nya ve ŋa 'ya wa?» Ma ke Zhakob shɛ: «Wəsə shɛ kave ɗa na we. Ma keyɛte wəsə nya tegeze ŋa 'ya na ne, kazhɛne 'ya kanewe ghweme te wəshi keseɗa ta ŋa ba'a kaya hɛ. 32'Ya katedzate hwa pɛtɛa wəshi keseɗa ta ŋa ɓeshi. Katetsene timɛti nyi bawe bawe keɗema nyi jiɓe jiɓe le ɗɛkeɗɛ 'ya pɛtɛ te ŋa nci ŋkwa, tsagha kwi. Kameleɓe ta ɗa tenza hɛ. 33Ma hendɛ, katenewe na kenza nde wəndə ganyɛ 'ya kese na kanewe meleɓe ta ɗa. Pɛtɛa kwi nyi ɗema bawe bawe keɗema jiɓe jiɓe, tsagha timɛti nyi ɗema bawe te hɛ ne, nahe 'ya keghərəhwe hɛ tsagha.» 34Ma ke Laban shɛ: «Ya ndeɗekə, kayɛ 'ya kala nya gezete na.»
35Te vecia shɛnyɛ, pa Laban tseheyi zhɛfa lɛmə nyi galawe galawe keɗema bawe bawe, ŋemia kwi nyi bawe bawe keɗema jiɓe jiɓe ba'a timɛti nyi ɗɛkeɗɛ keɗema gaze te tɛawetɛa te ŋa nci ŋkwa. Pa ŋkɛ dapate nda hɛ te dzeve ke ŋwalea ŋkɛ. 36Kwetere wəmbəa ŋkɛ, pa ŋkɛ ghweneghe hɛ kadzete kwete ŋkwa cakeɗake le Zhakob, hɛ mahekene mene mbeli kadzeghwa. Ma Zhakob le ŋa ŋkɛ ne, kweci wəshi keseɗa ta Laban nyi ketene yaya ŋkɛ.
37Pa Zhakob tsasleve yɛ geta ta wəfe mahekene keghə keghə. Pa ŋkɛ sleslate ŋkwa te zlapələa nci yitea rafete geva hɛ hweliɗiɗi mbe tɛawetɛa. 38Pa ŋkɛ veyi geta nyi hwelɛɗiɗia shɛhɛ kwa ŋkwa kesa yɛmə ta wəshi keseɗa, mbe kema ta nci, kwa nza ŋkɛ kahe kahe vale wəshi kese hɛ kasa yɛmə. 39Ntake wəshi keseɗa nyighɛ kavevale kwa kema ta geta nyighɛ. Ntake ŋemi kaya ŋwale galawe galawe, bawe bawe keɗema jiɓe jiɓe. 40Pa Zhakob tseweyi timɛti te ŋa nci ŋkwa. Pa ŋkɛ zhɛreghe hɛ laka nyi galawe galawe ba'a nyi ɗɛkeɗɛ hwa wəshia Laban. Pa ŋkɛ menete kweci wəvəsə wəshi keseɗa kaŋa ŋkɛ, kaɗema jikə hɛ kadzehwa ŋa Laban. 41Yayata və nya vale wəshi keseɗa nyi tekele nyighɛ ne, nda ve yave geta nyighɛ Zhakob kwa kema ta nci kwa ŋkwa kesa yɛmə kezha vale hɛ kwa kema ta geta shɛhɛ. 42Ama vəa ŋkwa nya nza wəshi keseɗa kepahe pahe ne, kave geta shɛhɛ ŋkɛ we. Ma tsagha, kaŋa Laban nza wəshi keseɗa nyi kepahe pahe, ŋa Zhakob nza nyi kekele kele. 43Nda zhɛre yazhɛre Zhakob kande mcɛlə. Kwele kwele ŋkɛ kemave timɛti ba'a kwi, ka kwaterashi ba'a ka mene slene, zlegweməa lɛmə ba'a kwara lɛmə.
Valgt i Øjeblikket:
Gha ta Wəshi 30: BEKDC12
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
La Bible en langue Kapsiki avec les livres deutérocanoniques © Alliance Biblique du Cameroun 2012.
Gha ta Wəshi 30
30
1Ma kwa nakɛ Rashɛl kaɗema nde keyake nda wəzege ke Zhakob ne, ntake zlɛ kazhɛ nda va wəzha ta meghekɛ. Ma ke sha Zhakob: «Ve ɗa ŋwale, keɗema ŋkɛ tsagha ne, katemte 'ya.» 2Pa wənəa Zhakob hwepenyɛ ve, ma ke shɛ: «KaShala veyi ɗa na na? Gheŋkɛ nde fɛa ŋa keya wəzege.» 3Ma ke zhɛnete nda: «Wa nya kwatera ta ɗa Bilha nya, kwiɗi kaɓelahe le ghenta kezha yake ɗa ŋwale nde. Ma tsagha ne, kateŋ'we ŋwale 'ya te zlaɓa ta nta.» 4Pa nde ndeke nda kwatera ta nta Bilha ke Zhakob kamale, ntake ŋkɛ kaɓelahe le.
5Njehe Bilha le hwə, bawe yake nda wəzege teza ke Zhakob. 6Ma ke Rashɛl: «Nahe Shala keneghate ɗa fete! Nahe ŋkɛ kefate səkwə ta ɗa ba'a kendeke ɗa wəzege teza perə.» Vatse hekate nda slə nde kaDan.
7Njehe Bilha, kwatera ta Rashɛl le hwə zhɛkwa, bawe nde yake nda nde bake ta wəzege teza ke Zhakob. 8Ma ke Rashɛl: «Mpa nya dzawe yamenete 'ya le wəzha ta meyɛ ɗa, nahe 'ya kehərəte ŋkwa.» Pa nde ndeke nda slə kaNɛftali.
9Ma kwa nakɛ Lɛya nahe nde keghereŋe keya wəzege ne, pa nde ndeke nda kwatera ta nta Zilpa ke Zhakob kamale. 10Bawe Zilpa nya kakwatera ta Lɛya yake nda wəzege teza ke Zhakob. 11Ma ke Lɛya: «Wa nya Shala te 'ya gɛ!» Pa nde hekate nda slə ke wəzegea shɛ kaGad.
12Bawe Zilpa, kwatera ta Lɛya yake nda nde bake ta wəzege teza ke Zhakob. 13Ma ke Lɛya: «Wa nya zeɗe nza va 'ya gɛ! Tsetsenya gɛ ne, wərə mi kageze zlama ya va 'ya.» Pa nde hekate nda slə kaAsɛr.
14Ma te kwete hɛ vəa ŋkwa nya leke ha mbeli ne, cape Rəbɛn kadzemte kasepa ya ta wəfe nya ɗe ŋkwa mbeli ve. Pa ŋkɛ ndake nda ke meghekɛ Lɛya. Ma ke Rashɛl sha Lɛya: «Nta ɗa ya ta wəfe ta ɗe nya ndake ŋa nya wəzege ta ŋa gi.» 15Ma ke Lɛya zhɛnete nda: «Dewə ŋa za ɗa nya kelehwe nya na nda ɗe na kakele ya ta wəfe ta ɗe nya ndake wəzege ta ɗa na?» Ma ke Rashɛl: «Yawa, hɛyi ŋa viɗi nya Zhakob nda nta ɗa ya ta wəfe ta ɗe nya ndake wəzege ta ŋa na!»
16Ma hetɛhwɛɗi kasheke Zhakob kwamte ne, cape Lɛya kashave shɛ. Ma ke shɛ: «Yitea 'ya tehɛ na ɓeshi, kwa nza ŋkɛ nahe 'ya kepave hweŋkwa te ya ta wəfe ta ɗe nya ndake wəzege ta ɗa.» Pa ŋkɛ hɛnyɛ le te viɗi shɛ. 17Pa Shala fate səkwə ta Lɛya, njehe le hwə zhɛkwa, bawe yake nda wəzege teza nde mcɛfe ke Zhakob. 18Ma ke: «Nahe Shala kendeke ɗa zhɛme kwa ndeke nda kwatera ta ɗa 'ya ke za ɗa.» Pa nde hekate nda slə kaIsakar.
19Njehe Lɛya le hwə zhɛkwa, bawe yake nda nde ŋkwaŋe ta wəzege teza ke Zhakob. 20Ma ke: «Nahe Shala kendeke ɗa wəsə gəmə nya ganyɛ. Ma tsetsenya gɛ ne, kateve zləvə za ɗa te 'ya, kwa yake nda ŋwale tezhili 'ya ŋkwaŋe.» Pa nde hekate nda slə ke wəzegea shɛ kaZabəlon. 21Kwa sebe ta ŋkɛ ne, pa nde yake wəzha makwa nya hekate nda slə nde kaDina.
22Ma ɓiyitsa gɛ, pa Shala zəzəte Rashɛl ba'a fate səkwə ta nta, pa ŋkɛ ndeke nda hweŋkwa keya wəzege. 23Njehe Rashɛl le hwə, bawe nde yake wəzege teza. Ma ke: «Nahe Shala kekelemte hawe te 'ya.» 24Pa nde hekate nda slə ke wəzegea shɛ kaZhozɛf, ma ke: «Hwe Mahwətə ndeke ɗa kwete wəzege teza tse gɛ!»
Zhakob kazhɛre kande mcɛlə
25Ma kwa yake Zhozɛf Rashɛl ne, ma ke Zhakob sha Laban: «Pelave ɗa hweŋkwa kalə sha ghɛa ɗa, kadzete hɛɗia ɗa. 26Pelave ɗa hweŋkwa kaslə le mia ɗa ba'a ŋwalea ɗa. Kadzembe mia shɛhɛ menete ŋa slene 'ya. Nahe na keɗepe slene nya menete ŋa 'ya megela.» 27Ma ke Laban shɛ: «Təhwə təhwə ŋa 'ya, fate ɗa ŋa ɗa. Nahe yɛ shala ta ɗa kencɛte ɗa kewəpi wəpi 'ya va Mahwətə tewəmbəreke gha. 28Gezete ɗa meleɓe ta ŋa shɛ 'ya ŋkikɛ ŋa ŋkɛ.» 29Ma ke Zhakob shɛ: «Nahe na keɗepe slene nya menete ŋa 'ya gha le ghəa ŋa ba'a tsema tsema yate ya wəshi keseɗa ta ŋa yitea 'ya. 30Ɓɛhwɛ wəshi va gha nda se 'ya, pa hɛ mbakete geva yitea 'ya kwele kwele. Nahe Mahwətə kewəpikɛ ŋa se te və nya dzeki ghɛa ŋa 'ya. Ma tsetsenya gɛ ne, hweŋkwa temene slene 'ya kaŋa ghɛa ɗa wa?» 31Ma ke Laban shɛ: «Wa wəsə nya ve ŋa 'ya wa?» Ma ke Zhakob shɛ: «Wəsə shɛ kave ɗa na we. Ma keyɛte wəsə nya tegeze ŋa 'ya na ne, kazhɛne 'ya kanewe ghweme te wəshi keseɗa ta ŋa ba'a kaya hɛ. 32'Ya katedzate hwa pɛtɛa wəshi keseɗa ta ŋa ɓeshi. Katetsene timɛti nyi bawe bawe keɗema nyi jiɓe jiɓe le ɗɛkeɗɛ 'ya pɛtɛ te ŋa nci ŋkwa, tsagha kwi. Kameleɓe ta ɗa tenza hɛ. 33Ma hendɛ, katenewe na kenza nde wəndə ganyɛ 'ya kese na kanewe meleɓe ta ɗa. Pɛtɛa kwi nyi ɗema bawe bawe keɗema jiɓe jiɓe, tsagha timɛti nyi ɗema bawe te hɛ ne, nahe 'ya keghərəhwe hɛ tsagha.» 34Ma ke Laban shɛ: «Ya ndeɗekə, kayɛ 'ya kala nya gezete na.»
35Te vecia shɛnyɛ, pa Laban tseheyi zhɛfa lɛmə nyi galawe galawe keɗema bawe bawe, ŋemia kwi nyi bawe bawe keɗema jiɓe jiɓe ba'a timɛti nyi ɗɛkeɗɛ keɗema gaze te tɛawetɛa te ŋa nci ŋkwa. Pa ŋkɛ dapate nda hɛ te dzeve ke ŋwalea ŋkɛ. 36Kwetere wəmbəa ŋkɛ, pa ŋkɛ ghweneghe hɛ kadzete kwete ŋkwa cakeɗake le Zhakob, hɛ mahekene mene mbeli kadzeghwa. Ma Zhakob le ŋa ŋkɛ ne, kweci wəshi keseɗa ta Laban nyi ketene yaya ŋkɛ.
37Pa Zhakob tsasleve yɛ geta ta wəfe mahekene keghə keghə. Pa ŋkɛ sleslate ŋkwa te zlapələa nci yitea rafete geva hɛ hweliɗiɗi mbe tɛawetɛa. 38Pa ŋkɛ veyi geta nyi hwelɛɗiɗia shɛhɛ kwa ŋkwa kesa yɛmə ta wəshi keseɗa, mbe kema ta nci, kwa nza ŋkɛ kahe kahe vale wəshi kese hɛ kasa yɛmə. 39Ntake wəshi keseɗa nyighɛ kavevale kwa kema ta geta nyighɛ. Ntake ŋemi kaya ŋwale galawe galawe, bawe bawe keɗema jiɓe jiɓe. 40Pa Zhakob tseweyi timɛti te ŋa nci ŋkwa. Pa ŋkɛ zhɛreghe hɛ laka nyi galawe galawe ba'a nyi ɗɛkeɗɛ hwa wəshia Laban. Pa ŋkɛ menete kweci wəvəsə wəshi keseɗa kaŋa ŋkɛ, kaɗema jikə hɛ kadzehwa ŋa Laban. 41Yayata və nya vale wəshi keseɗa nyi tekele nyighɛ ne, nda ve yave geta nyighɛ Zhakob kwa kema ta nci kwa ŋkwa kesa yɛmə kezha vale hɛ kwa kema ta geta shɛhɛ. 42Ama vəa ŋkwa nya nza wəshi keseɗa kepahe pahe ne, kave geta shɛhɛ ŋkɛ we. Ma tsagha, kaŋa Laban nza wəshi keseɗa nyi kepahe pahe, ŋa Zhakob nza nyi kekele kele. 43Nda zhɛre yazhɛre Zhakob kande mcɛlə. Kwele kwele ŋkɛ kemave timɛti ba'a kwi, ka kwaterashi ba'a ka mene slene, zlegweməa lɛmə ba'a kwara lɛmə.
Valgt i Øjeblikket:
:
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
La Bible en langue Kapsiki avec les livres deutérocanoniques © Alliance Biblique du Cameroun 2012.