Gha ta Wəshi 33
33
Zhakob kabegeme le Ɛzawə
1Kafe ke Zhakob sha ghə ne, mpəɗə yɛ Ɛzawə le zhili gwəmsə wəfaɗe kase shɛ. Pa ŋkɛ neheyi ŋwale kwelɛ yɛ Lɛya, Rashɛl le ka kwaterashi nyi bake. 2Pa ŋkɛ beteyi ka kwaterashi nyi bake te kema le ŋwalea nci, zhɛne yɛ Lɛya le ŋwalea nta kwa sebe ta nci, nda keɗaŋe yɛ Rashɛl le Zhozɛf. 3Ma gheŋkɛ le ghəa ŋkɛ, pa ŋkɛ dzatenyɛ te kema ta nci. Mberefaŋe zhigəa ŋkɛ kaŋa ghə mbe hɛɗi nda tentsehe ŋkɛ yitea wəza meghekɛ. 4Tereŋe Ɛzawə kase shɛ le hwɛ. Kelawe sha dzeve yitea welɛ ve, həməwə ŋkɛ shɛ. Ntake hɛ kanehwene. 5Ma kwa kafete ghə Ɛzawə kanakɛ mi le ŋwale ne, ma ke: «Wa mbeli nyi kwatera wəmbəa ŋa nyi wa?» Ma ke Zhakob shɛ: «Ŋwale nyi ndeke nda Shala ke nde mene slene ta ŋa.»
6Pa ka kwaterashi hendeke geva le ŋwalea nci ba'a gwəɗəŋənji. 7Pa yɛ Lɛya le ŋwalea nta hendeke geva perə, gwəɗəŋə hɛ. Ma kwa sebe ta nci, ntəŋə yɛ Zhozɛf le Rashɛl kamene tsagha shɛ. 8Ma ke Ɛzawə: «Wa yatemene na le yɛ wəvəsəa wəshi keseɗa nyi begeme nyi 'ya le hɛ wa?» -- «Kezha zlaɓa heli na yitea 'ya, nde sleke ɗa», ke Zhakob shɛ. 9Ma ke Ɛzawə shɛ: «Kwele kwele wəshi va 'ya wəza meyɛ ɗa! Sərəakɛ ŋa ŋa.» 10Ma ke Zhakob: «Ewə, təhwə təhwə ŋa 'ya. Ma kenza nde kazlaɓa heli na le 'ya ne, yɛte wəsə gəmə nya ve ŋa 'ya. Kwa nza ŋkɛ ne, nahe begeme ta ɗa le gha kenza kala wəsə nya begeme 'ya le Shala, nahe na kekemaneve ɗa megela. 11Kelete wəsə gəmə nya keleke ŋa 'ya təhwə təhwə, kwa nza ŋkɛ nahe Shala kezlaɓa le 'ya, nahe 'ya kekemave pɛtɛa wəshi.»
Pa Zhakob təməsəte ŋkɛ, pa Ɛzawə yɛte. 12Ma ke Ɛzawə: «Sate dzeghwa ɓə. Mbe kema ta ŋa tedzeghwa 'ya.» 13Ma ke Zhakob zhɛnete: «Nde sleke ɗa, nahe na keɗepe ka dewə ŋelia ŋwale, timɛti ba'a sla nyi nza ŋwale yitea hɛ ya va 'ya. Ma kembave nda dzeghwa mbeli ke hɛ mbe hɛ kwetɛŋe ne, mɛke tenza hɛ. 14Təhwə təhwə ŋa 'ya nde sleke ɗa, kwiɗi te kema ta nde mene slene ta ŋa. 'Ya le ŋa ɗa ne, zayɛ tedzeghwa 'ya kala dzeghwa ta wəshi keseɗa nyi mbe kema va 'ya ba'a kala ŋa ŋwale, pa te və nya tentsehe 'ya sha gha te hɛɗia Sɛyir.» 15Ma ke Ɛzawə: «Kaɗe 'ya kasərəakɛ kweci mbeli nyi kebeghe ɗa yitea gha.» Ma ke Zhakob shɛ: «Kezha wa wa? Ɗema ta ŋa kekemaneve ɗa megela.»
16Te vecia shɛnyɛ ne, tewətelɛwe Ɛzawə zhɛneghe geva kadzembe Sɛyir. 17Ma Zhakob le ŋa ŋkɛ ne, cape ŋkɛ kadzembe Səwkot. Pa ŋkɛ ŋate ghɛ mbe kaŋa ŋkɛ ba'a yɛ ghwəlia wəshi keseɗa ta ŋkɛ. Vatse hekate nda slə mbeli ke ŋkwa shɛ kaSəwkot, geze ta ŋkɛ, “Yɛ ghwəli”.
Zhakob kanza terasle yitea Sishɛm
18Kwelɛŋe zhɛneke geva Zhakob se mbe Mɛzopotami nya pelɛghə kadzembe meleme ta Sishɛm, te hɛɗia Kanan. Pa ŋkɛ nzanyɛ terasle yitea melemea shɛ. 19Pa ŋkɛ pave kwete wəve kadəɓərəa mze kwa tɛawetɛa gwəmsə va ka shihɛnyɛa Hamor nya keŋslete Sishɛm, pa ŋkɛ mɓete cɛ lekwesa ta ŋkɛ te. 20Pa ŋkɛ pate reghwetɛ nya hekate nda slə ŋkɛ “KaƐl, Shala ta Israyɛl” te ŋkwa shɛ.
Valgt i Øjeblikket:
Gha ta Wəshi 33: BEKDC12
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
La Bible en langue Kapsiki avec les livres deutérocanoniques © Alliance Biblique du Cameroun 2012.