Gha ta Wəshi 42
42
Zhakob kaghwene ŋwalea ŋkɛ kadzawa Ɛzhipte
1Fa ke Zhakob ne, ha ya shɛ kwa Ɛzhipte. Ma ke sha ŋwalea ŋkɛ: «Wa raberə newe ghəa ŋayɛ kwa ntsə kwa ntsə wa? 2Nahe 'ya kefate ha ya shɛ kwa Ɛzhipte. Dzawa mə shɛ yɛ pave ɓəmə kezha dɛŋe wənəa ɓəmə ba'a kezha ɗema gheɓəmə kampə.» 3Ntəŋə kweci ka kesaka yitenyɛa Zhozɛf meŋe kadzawa Ɛzhipte kapa ha, 4ama kese Zhakob kaghwene Bɛnjamɛn, wəza meghekɛa Zhozɛf kadzawa yitea ka kesaka yitenyɛ we. Kwa nza ŋkɛ «Yagha wəsə kwa ndiremi temenete nda geva», ke mbe ghəa ŋkɛ. 5Hwa'a ŋwalea Israyɛl kapa ha zlaɓe le kweci mbeli, kwa nza ŋkɛ ma ya shɛ dzawe te hɛɗia Kanan.
Zhozɛf kantsə nda ghyana ke ka kesaka yitenyɛ
6Zhozɛf ya kawəndə nya te ghəa hɛɗi, gheŋkɛ nde pamte nda ha ke pɛtɛa ka mentiɓəa sli. Hwa'a ka kesaka yitenyɛ, gwəɗəŋə hɛ mbe kema ta ŋkɛ ntiŋə ghə mbe hɛɗi. 7Dəkwəma ta Zhozɛf te ka kesaka yitenyɛ ne, pa ŋkɛ ɗepete hɛ, ama kese ŋkɛ kancɛ nda ghəa ŋkɛ ke hɛ we. Ma ke mpeɗete nda slene ke hɛ: «Tema se yɛ wa?» Ma ke hɛ shɛ: «Sawa pelɛ hɛɗia Kanan kezha pa wəshi kezeme.»
8Nahe Zhozɛf keɗepete ka kesaka yitenyɛ, ama kezhɛne hɛ kaɗepete ŋkɛ we. 9Tagha gɛ, pa Zhozɛf zəzəte shiwə nya shiwəte ŋkɛ te ghəa nci. Ma ke zhɛkwa: «Mbeli nyi kese kanewe ŋkwa yɛ! Gheyɛ se kezha newe zeweve ta hɛɗi nya.» 10Ma ke hɛ shɛ: «Ewə, nde sleke n'yɛ yawe we, ka mene slene ta ŋa se kezha pave wəshi kezeme nahe. 11Nahe n'yɛ kenza kaŋwalea wəndə nya kwetɛŋe. Kaganda yageze ghen'yɛ! Kenza ghen'yɛ kambeli nyi kese kanewe ŋkwa we.» 12Ma ke sha hɛ: «Tseŋwəa ŋayɛ! Kezha newe zeweve ta hɛɗi se yɛ.» 13Ma ke hɛ: «Tsagha we, ŋwalea wəndə nya kwetɛŋe ghen'yɛ ba'a sawa pelɛ hɛɗia Kanan ghen'yɛ. Ka kesaka yita meŋe bakeghəmbe se ghen'yɛ, mba wəza yiteyɛa n'yɛ nya ɓɛhwɛ pelɛagha yitea yiteyɛa n'yɛ, nahe kwete wəndəa n'yɛ kezanyɛ.» 14Ma ke Zhozɛf sha hɛ: «Nahe 'ya kegezete ŋayɛ, mbeli nyi kese kanewe ŋkwa yɛ. 15Ama katedzeghe ŋayɛ 'ya: le Farawon ne, kazeme ŋayɛ fela 'ya: ashɛ yɛ kaslə te hɛɗi nya keɗema yɛ kekeleke wəza yiteyɛ ŋayɛ nya ɓɛhwɛ kase teke we. 16Ghwenakɛ mə kwete wəndəa ŋayɛ kalə kaheka wəza yiteyɛ ŋayɛ. Ma kweci mbeli ne, kwa daŋgayɛ tenza hɛ. Ma tsagha, katenewe 'ya kenza ŋkɛ kaganda ya va gheyɛ. Kazeme ŋayɛ fela 'ya le Farawon, ma keɗema ŋkɛ tsagha ne, ka se kanewe ŋkwa yɛ.»
17Pa Zhozɛf keseyi hɛ pɛtɛ kwa daŋgayɛ kahɛ mahekene. 18Te kwa mahekene ta hɛ, ma ke sha hɛ: «Wa nya wəsə nya temene yɛ nya kezha mbele mpia ŋayɛ. 'Ya ne, kahawe 'ya va Shala. 19Ma kenza ŋkɛ mbeli nyi tiɗiɗi yɛ ne, nza kwete wəndəa ŋayɛ kwa daŋgayɛ ki ghɛ nya nza nya yɛ. Ma gheyɛ kweci mbeli, fəghe nda mə ha ke mbelia ŋayɛ nyi shewə va ma. 20Ma kwetere wəmbəa ŋkɛ, keleke ɗa mə wəza yiteyɛ ŋayɛ nya ɓɛhwɛ. Ma tsagha, kateɗepe 'ya kaganda yageze yɛ, katempə yɛ we.» Pa hɛ menete tsagha. 21Ma ke hɛ kwelɛ ghəa nci: «Aya! Ɗa ya te gheɓəmə va wəsə nya menete nda gheɓəmə ke wəza yiteyɛ ɓəmə. Nahe gheɓəmə kenakɛ taze ta mehele ta ŋkɛ, nahe ŋkɛ kese katsa ɓəmə təhwətə, ama kese gheɓəmə kafa we. Vatse nda nza ɗa nya te gheɓəmə tsetsenya.» 22Ma ke Rəbɛn sha hɛ: «Ashɛ 'ya kegezete ŋayɛ kezha ɗema yɛ kamene nda wəsə ke wəzege nya wəka? Ama hɛreɗɛ yɛ ɗema fa ɗa. Ma tsetsenya gɛ, kelɛhe ta ŋkɛ yaŋki gheɓəmə.» 23Keɗepe hɛ kafefa Zhozɛf we, kwa nza ŋkɛ ne, wəndə nya kezhɛre ghena ya kwelɛ hɛ. 24Ma tagha gɛ, pa Zhozɛf hendemte geva vare hɛ kalə kanehwene.
Ŋwalea Zhakob kazhɛre geva kadzeme Kanan
Ma kwa zhɛreke geva Zhozɛf ne, pa ŋkɛ gezete nda ke hɛ kezha keseyi Simɛyon. Pa ŋkɛ hwepeyi ŋkɛ kwa zewe lɛ kwa ntsə ta nci. 25Kwa sebe ta ŋkɛ, pa Zhozɛf gezete nda ke mbeli kezha viɗi behwea nci le ha, kezha ve nda cɛdɛa ŋkɛ ke yayata wəndə kwa slibə ba'a kezha ɗave nda wəshi nyi tezeme hɛ kwa hweŋkwa ke hɛ. Pa mbeli menete nda tsagha ke hɛ. 26Pa ka kesaka yita nyighɛ vate wəshi te kwara ta nci, cape hɛ kwa hweŋkwa.
27Ma kwa ghereŋe hɛ kezha hɛ kwa hweŋkwa heviɗi, pa kwete wəndəa nci pelemte behwea ŋkɛ kezha nta nda wəsə kezeme ke kwara ta ŋkɛ, pa ŋkɛ ntsate dala ta ŋkɛ mɛa behwe. 28Ma ke sha ka kesaka yitenyɛ: «Nahe mbeli kezhɛnave ɗa dala ta ɗa! Wa nya kwa behwea ɗa.» Wewəɗike helia nci slanji, ntake ghazlənə kazhɛ nda ke hɛ. Ma ke hɛ kwelɛ ghəa nci: «Wa wəsə nya menete ɓəmə nya Shala wa?»
29Ma kwa ntsehe hɛ te hɛɗia Kanan sha yiteyɛa nci ne, pɛtɛ hɛ ɓelamte nda wəshi nyi kemenete geva. 30Ma ke hɛ: «Kwele kwele mpeɗete n'yɛ slene wəndə nya kesleke hɛɗia shɛ, kambeli nyi kelə kanewe ŋkwa newe n'yɛ ŋkɛ. 31Ma pe n'yɛ zhɛnete nda: Mbeli nyi kese kanewe ŋkwa ghen'yɛ we, ama mbeli nyi tiɗiɗi. 32Kaka kesaka yita meŋe bakeghəmbe se n'yɛ. Nahe kwete wəndəa n'yɛ kezanyɛ, ama mba nya ɓɛhwɛa n'yɛ yitea yiteyɛa n'yɛ pelɛ hɛɗia Kanan. 33Ma ke wəndə nya te ghəa hɛɗia shɛ sha ghen'yɛ: ‹Wa nya tsetse teɗepe 'ya kenza nde kaganda ya va gheyɛ: sərəakɛ ɗa mə kwete wəndəa ŋayɛ teke, fəghe nda mə ha ke mbelia ŋayɛ nyi shewə va ma. 34Kwa sebe ta ŋkɛ, keleke ɗa mə wəza yiteyɛ ŋayɛ nya ɓɛhwɛa shɛ, ma tsagha, kateɗepete 'ya kaɗema yɛ kaka newe ŋkwa, ama kambeli nyi tiɗiɗi. Katepele ŋayɛ wəza yiteyɛ ŋayɛ 'ya ba'a katepele ŋayɛ hweŋkwa 'ya kamene fəli te hɛɗi nya.›» 35Ma kwa betakame wəshi hɛ same kwa behwea nci ne, pa yayata wəndə ntsate slibə cɛdɛa ŋkɛ kwa behwea ŋkɛ. Ma kwa nakɛ cɛdɛa shɛ hɛ le yiteyɛa nci ne, ntake ghazlənə kazhɛ nda ke hɛ. 36Ma ke yiteyɛa nci Zhakob sha hɛ: «Nahe yɛ kezamte ŋwale bake yitea 'ya: bətə Zhozɛf, bətə Simɛyon, zhɛne ne, kaɗe yɛ kakelemte Bɛnjamɛn va 'ya! Kadzeghəa 'ya dzeghə ghena shɛhɛ pɛtɛ!» 37Ma ke Rəbɛn shɛ: «Pa na mpəmte ŋwale tezhilia ɗa nyi bake nyi kekelekema ŋa Bɛnjamɛn 'ya! Dapate ɗa te dzeve, katezhɛneke ŋa ŋkɛ 'ya kase.» 38Ma ke Zhakob zhɛnete nda: «Ewə, kadzawa wəzege ta ɗa yitea gheyɛ we. Nahe wəza meghekɛ kemte, deke gheŋkɛ nde tene va 'ya. Ma kemenete nda geva wəsə kwa ndiremi mbe dzeghwa ta ŋayɛ kehale hale 'ya kala nya ne, katemte ɗa 'ya va zəzə ta beze ghena ta ŋayɛ.»
Valgt i Øjeblikket:
Gha ta Wəshi 42: BEKDC12
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
La Bible en langue Kapsiki avec les livres deutérocanoniques © Alliance Biblique du Cameroun 2012.