Jɛnɛsis 3
3
Gbɔmɔ toigbele
1 #
Kpoj 12.9; 20.2 Onufu ji kooloo ko ni le ŋaa fe kooloi fɛɛ ni Nuŋtsɔ Nyɔŋmɔ bɔ lɛ. Ebi yoo lɛ akɛ, “Lɛɛlɛŋ akɛ Nyɔŋmɔ kɛɛ akɛ trom lɛ mli tsei ayibii lɛ fɛɛ lɛ nyɛkaye lɛ?” 2#Jɛn 2.16 Ni yoo lɛ kɛɛ onufu lɛ akɛ, “Trom lɛ mli tsei ayibii lɛ wɔyeɔ, 3shi Nyɔŋmɔ kɛɛ tso ni yɔɔ trom lɛ teŋ lɛ nɔ yibii lɛ, ‘Nyɛkayea, ni nyɛkataa he tete, kɛjeee nakai lɛ nyɛbaagboi.’ ” 4#Yoh 8.44 Onufu lɛ kɛɛ yoo lɛ akɛ, “Jeee gboimɔ nyɛaagboi; 5shi moŋ le Nyɔŋmɔ le akɛ gbi nɔ ni nyɛaaye eko lɛ, nyɛhiŋmɛi aaagbele, ni nyɛaatsɔ̃mɔ tamɔ lɛ, ni nyɛaale ekpakpa kɛ efɔŋ.” 6#Yak 1.14; 1 Tim 2.14 No hewɔ lɛ be ni yoo lɛ na akɛ tso lɛ hi hã yeli ni efeɔ hiŋmɛi akɔnɔ ni tso lɛ baa mɔ tsine ni ehãa mɔ leɔ nii lɛ, etse enɔ yibii lɛ eko ni eye ni ehã ewu lɛ ni kɛ lɛ yɔɔ lɛ hu eko ni eye. 7Kɛkɛ ni amɛyi enyɔ lɛ fɛɛ amɛhiŋmɛi gbele ni amɛna akɛ amɛnyiɛ yayai. Amɛkpɛ agbãmi baa amɛkɛfee mama amɛkɛha amɛhe.
8 #
Yer 23.24
Amɛnu Nuŋtsɔ Nyɔŋmɔ he ni enyiɛ trom lɛ mli be ni gbɛkɛnaashi kɔɔyɔɔ shwie lɛ; ni Adam kɛ eŋa lɛ tee amɛhe yɛ trom lɛ mli tsei lɛ ateŋ koni Nuŋtsɔ Nyɔŋmɔ akana amɛ. 9Shi Nuŋtsɔ Nyɔŋmɔ tsɛ Adam ni ebi lɛ akɛ, “Nɛgbɛ oyɔɔ?” 10Ni Adam kɛɛ, “Minu ohe yɛ trom lɛ mli, ni mishe gbeyei ejaakɛ minyiɛ yayai ni miyatee mihe.” 11Nyɔŋmɔ bi lɛ akɛ, “Namɔ kɛɛ bo akɛ onyiɛ yayai? Te tso lɛ ni miwo bo he kitã akɛ okaye eyibii lɛ eko lɛ, no oye nɛɛ?” 12Ni Adam kɛɛ akɛ, “Yoo lɛ ni okɛfata mihe lɛ, lɛ ehã mi tso lɛ yibii lɛ eko ni miye.” 13#2 Kor 11.3; 1 Tim 2.14 Nuŋtsɔ Nyɔŋmɔ kɛɛ yoo lɛ akɛ, “Mɛni ofee nɛɛ?” Ni yoo lɛ kɛɛ, “Onufu lɛ ni laka mi ni miye.”
Nyɔŋmɔ kojomɔ
14 #
Yes 65.25
No hewɔ lɛ, Nuŋtsɔ Nyɔŋmɔ kɛɛ onufu lɛ akɛ, “Enɛ ni ofee hewɔ lɛ, alomɔ bo yɛ shĩaŋ kooloi kɛ ŋaŋ kooloi fɛɛ ateŋ. Omusu nɔ ooonyiɛ, ni sũ oooye owala gbii abɔ fɛɛ. 15#Gal 4.4; 1 Yoh 3.8; Kpoj 12.17 Mikɛ nyɛɛ aaaŋmɛ bo kɛ yoo lɛ teŋ, kɛ oshwiei kɛ eshwiei ateŋ. Eshwiei aaatswa oyitso nɔ, ni bo hu oshwiei aaakɔ̃ enane tsitsi.”
16Yoo lɛ, lɛ lɛ ekɛɛ lɛ akɛ, “Hã mahã ohe ajara bo, yɛ omusuhiɛmɔ mli. Hejaramɔ mli ooofɔ bii yɛ; owu lɛ sɛɛgbɛ oootao, ni lɛ eeeye onɔ.”
17 #
Heb 6.8
Ni Adam lɛ, ekɛɛ lɛ akɛ, “Akɛni obo oŋa lɛ toi ni oye tso lɛ ni miwo bo he kitã akɛ okaye eyibii lɛ eko lɛ hewɔ lɛ, alomɔ shikpɔŋ sũ yɛ ohewɔ. Hejaramɔ okɛaana enɔ nii oye owala gbii abɔ fɛɛ. 18Ŋmei kɛ aŋɛ̃ŋlɛ̃ eeewo ehã bo, ni ŋa nɔ baa oooye. 19#2 Tes 3.10 Ohiɛ latsaa mli oooye nii yɛ kɛyaashi beyinɔ ni oooku osɛɛ kɛaatee shikpɔŋ sũ mli; ejaakɛ emli ajie bo kɛjɛ; sũ ji bo, ni sũ mli nɔŋŋ oooku osɛɛ kɛaatee.”
20Adam wo eŋa lɛ gbɛi akɛ Hawa ejaakɛ lɛ ji adesai fɛɛ anyɛ. 21Kɛkɛ ni Nuŋtsɔ Nyɔŋmɔ kɛ kooloo hewolo fee atadei ehã Adam kɛ eŋa lɛ, ni ekɛwo amɛ.
Ashwie Adam kɛ Hawa kɛje Trom lɛ mli
22 #
Kpoj 22.14
Ni Nuŋtsɔ Nyɔŋmɔ kɛɛ, “Naa, gbɔmɔ lɛ etsɔ̃ tamɔ wɔteŋ mɔ kome, ni ele ekpakpa kɛ efɔŋ. Agbɛnɛ, eko lɛ eeekpã enine mli ni etse wala tso lɛ yibii lɛ eko ni eye koni ehiɛ akã kɛya naanɔ.” 23Enɛ hewɔ lɛ, Nuŋtsɔ Nyɔŋmɔ shwie lɛ kɛje Eden trom lɛ mli koni eyahu shikpɔŋ, nɔ mli ni ajie lɛ kɛjɛ lɛ. 24#Eze 10.1-22 Ni Nuŋtsɔ Nyɔŋmɔ shwie Adam, ni ekɛ kerubim kɛ klante ni miifo ehe ni kpɛlɛɔ tamɔ la to Eden trom lɛ hiɛ yɛ bokãgbɛ koni ebu gbɛ ni yaa wala tso lɛ he lɛ he.
Valgt i Øjeblikket:
Jɛnɛsis 3: NEGAB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Bible in Ga Language © Bible Society of Ghana, 2020.