Mɔl 10
10
Nowa amra mrenya ne mɔ abo zo amra
(1 Edk 1.5-23)
1Nowa amra mrenya Hyɛm, Ham, yɛɛ Gyeefɛte nee bɛ bo zo amra awolɛndoazo ne mɔ ɛne: Azuyilɛ ne anzi Nowa amra ne mɔ wole mralɛ mrenya.
2Gyeefɛte amra mrenya a le: Gomɛ, Meegɔgo, Meedae, Gyeevan, Tubale, Mihyɛke, yɛɛ Taelase. Bɛ bo zo amra a bɛfa bɛ aluma bɛfɛlɛ bɛ la. 3Gomɛ abo zo amra a le menli mɔɔ wɔ Ahyekinaze, Relaefate, yɛɛ Togama la. 4Gyeevan abo zo amra a le menli mɔɔ wɔ Yilaehya, Sepeen, Saepelɛse, yɛɛ Wulodese la. 5Bɛ bo zo amra a le bɛdabɛ mɔɔ bɛdede ɛnweanloa nee mɔɔ dede nyevile ne anu bɔra ne mɔ azo la. Menli ɛhye mɔ amuala le Gyeefɛte abo zo amra. Bɛdɛnlɛdɛnlanle ye mbusua ekpulike ekpulike, asolo ekpulike ko biala maanle nee ye ɛdendɛlɛ.
6Ham amra mrenya a le Kɛhye, Yigyibiti, Lebea, yɛɛ Keena. Bɛ bo zo amra a bɛfa bɛ aluma bɛfɛlɛ bɛ la. 7Kɛhye abo zo amra a le menli mɔɔ wɔ Siba, Havelaa, Sabeta, Releeyamaa, yɛɛ Sabetika la. Releeyamaa abo zo amra a le menli mɔɔ wɔ Hyiba nee Didan la. 8Kɛhye wole Nemelɔdo. Yemɔ a ɔle sonla mɔɔ lumuale yɛle katakyie wɔ ewiade ye anu a. 9Ɔlua Ɛdɛnkɛma moalɛ zo Nemelɔdo yɛle bɔvolɛ kpole kpalɛ, yemɔti a bɛva bɛyɛ mgbanyidwɛkɛ kɛ “Ɛdɛnkɛma ɛmaa ɛyɛ bɔvolɛ kpole kɛ Nemelɔdo la.” 10Alumua ne ɛnee Ɛlɛke, Akade, yɛɛ Kaleni, azuamgbole nsa ɛhye mɔ mɔɔ wɔ Babelonia maanle nu la amuala boka Nemelɔdo maanle ne anwo. 11Ɔvi maanle zɔhane anu ɔhɔle Aselea ɔhɔkyekyele azuamgbole Nenɛvɛ, Rilihɔbo Ɛɛ, Keelaa, 12yɛɛ Relɛsɛn, mɔɔ wɔ Nenɛvɛ nee suakpole Keelaa avinli la. Keelaa le suakpole mɔɔ ɛlie duma a.
13Yigyibiti abo zo amra a le menli mɔɔ wɔ Ledea, Anam, Lɛheebe, Nafetu, 14Patulusu, Kaselu, yɛɛ Kiliti, mɔɔ Filisitiama vi bɛ nuhua la.
15Keena ara nrenya kpanyinli a le Saedɛn. Nzinlii ɔwole Hɛte, bɛ bo zo amra a bɛfa bɛ aluma bɛfɛlɛ bɛ la. 16Keena abo zo amra ne bie mɔ a le Gyibɛsema, Amɔlema, yɛɛ Gɛgahyema. 17Havaema, Akaema, Saenaema, 18Avadema, Zɛmalema, yɛɛ Heematema. Keena abusua ekpulike ekpulike ne mɔ dɛlɛle, 19manle Keenama ɛweɛne ne anloa dwule Saedɛn nyiakɛ mɔɔ kɔ Gilaa mɔɔ zua Gaza la, eza ɔdɛlɛle ɔhɔle aduduleɛ ɔhɔdwule Sodɔm, Gomɔla, Ademaa, yɛɛ Zɛboyem mɔɔ zua Leehya la. 20Menli ɛhye mɔ amuala le Ham abo zo amra. Bɛdɛnlɛdɛnlanle ye mbusua ekpulike ekpulike, asolo ekpulike ko biala maanle nee ye ɛdendɛlɛ.
21Gyeefɛte adiema kpanyinli Hyɛm ɔdaye ɔ bo zo amra a le Hibuluma amuala. 22Hyɛm amra mrenya ne mɔ a le Yilam, Ahyɛ, Apakyehyade, Lɛɛde, yɛɛ Ɛlam. Bɛ bo zo amra a bɛfa bɛ aluma bɛfɛlɛ bɛ la. 23Ɛlam abo zo amra a le menli mɔɔ wɔ Ɛɛze, Hɛle, Gitɛ, yɛɛ Mɛhyɛke la. 24Apakyehyade ara a le Hyila, yɛɛ Hyila ara a le Yibɛ. 25Yibɛ wole mrenya nwiɔ, bɛfɛlɛ ko Pilɛge, ɔluakɛ ye mekɛ zo a ewiade amra anu kpakyekpakyele a, yɛɛ bɛfɛlɛ ko ne Dwɔketan. 26Dwɔketan abo zo amra a le menli mɔɔ wɔ Alemodade, Hyilɛfe, Heezameevɛte, Gyilaa, 27Hadɔlam, Yuzale, Dekelaa, 28Ɔbale, Abemeeyɛle, Hyiba 29Ofɛ, Havelaa, yɛɛ Dwobabe la. Ɛhye mɔ amuala le Dwɔketan abo zo amra. 30Bɛ azɛlɛ mɔɔ bɛdɛnlanle zolɛ la tɛlɛ vi Mihya kɔdwu Sifaa wɔ aduduleɛ maanle ne awoka ne mɔ anu. 31Hyɛm abo zo amra ɛne. Bɛdɛnlɛdɛnlanle ye mbusua ekpulike ekpulike, asolo ekpulike ko biala maanle nee ye ɛdendɛlɛ.
32Nowa amra ne abo zo amra, kɛmɔ bɛ mbusua ekpulike ekpulike ne mɔ de la ɛne. Azuyilɛ ne anzi bɛdele bɛkpondenle ewiade na bɛkyekyele maanle maanle bɛdɛnlɛdɛnlanle nu. Maanle ko biala anu amra le abusua ekpulike ko.
Valgt i Øjeblikket:
Mɔl 10: NB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Bible in Nzema © Bible Society of Ghana, 1998.