Kîam 17
17
Kûrua, rûrî rûûri rwa kîrîkanîro
1Rîrîa Aburamu aarî na ûkûrû wa mîaka mîrongo kenda na kenda (99), Ngai-Mûnene nîwamumîrîre na akîmwîra atîrî, “Nînie Ngai mwene vinya wonthe. Mbathîkagîra na wîthagîrwe ûrî mûthingu vîndî cionthe. 2Nîngaarûtha kîrîkanîro nawe na ngûve njiarwa nyîngî.” 3Aburamu nîwakuamîrîrie na agîturumithia ûthiû wake nthî. Nake Ngai nîwamwîrire atîrî, 4“Nîngûrûtha kîrîkanîro nawe atî: we nîûgaatuîka îthe wa ndûrîrî nyîngî. 5#Aro 4.17 Ndûgûcoka gwîtagwa Aburamu rîngî. Ûgetagwa Iburahimu nîûndû nîngaagûtua îthe wa ndûrîrî nyîngî. 6Nîngaakûva njiarwa nyîngî, na amwe a njiarwa icio nîmagaatuîka athamaki.
7 #
Luka 1.55
“Nîngavingia kîrîkanîro gîakwa nawe wana kûrî njiarwa ciaku irîa igaaûka. Kîrîkanîro kîu gîgaatûûra tene na tene. Nîngaatuîka Ngai waku na nduîke Ngai wa njiarwa ciaku. 8#Ciîko 7.5 Nîngaakûva vûrûri ûyû mûgeni ûtûûraga ûtuîke waku vamwe na njiarwa ciaku. Vûrûri wonthe wa Kanaani ûgaatuîka wa njiarwa ciaku tene na tene na nîngaatuîka Ngai wao.”
9Nake Ngai nîwerire Iburahimu atîrî, “We na njiarwa ciaku wa vamwe na njiarwa irîa igaûka nwanginya mûvingagie kîrîkanîro gîakwa nginya tene na tene. 10#Ciîko 7.8; Aro 4.11 Kîrîkanîro kîrîa we na njiarwa ciaku mwagîrîrwe nî kûvingia nî gîkî: nwanginya mûrwithagie mûndûmûrûme wa wonthe gatagatîrî kenyu. 11Mûkaaruaga gîkonde Kîam îgûrû gîa ciîga cia ûciari na rûu nîruo rûkethagîrwa rûrî rûûri rwa kîrîkanîro gîakwa namue. 12Twana tuonthe twenyu twa tûvîcî tûrî na ûkûrû wa mîthenya înana, wa vamwe na twana twa ngombo kana twa ageni tûrîa tûciarîrîtwe kwenyu tûkaarwithagua. 13Tûvîcî tuonthe tûkarwithagua rûrî rûûri rwa kwonania atî kîrîkanîro gîakwa nawe nî gîa tene na tene. 14Mûndûmûrûme wa wonthe ûtarî mûruu, ndakethagîrwa arî ûmwe wa andû akwa nîûndû ke tî mûvingiu kîrîkanîro gîakwa.”
15Ngai nîwerire Iburahimu atîrî, “Ndûgetaga mûkaguo Sarai; kuuma rîu agetagwa Sara. 16Nîngûmûrathima na ndûme agûciarîre kavîcî, na ndûme atuîke ng'ina wa ndûrîrî nyîngî. Njiarwarî ciake nîgûkaauma athamaki.”
17Iburahimu nîwenamîrîrie ûthiû wake ûkîvutia nthî, na akîambîrîria kûtheka akîîyûragia atîrî, “Mûndûmûrûme wa ûkûrû wa mîaka îgana nwa agîe mwana? Sara nwa agîe mwana arî na ûkûrû wa mîaka mîrongo kenda?” 18Iburahimu nîwaûririe Ngai atîrî, “Nîkwa ûtangîtîkîra Ishumaeli atuîke wa kûngaa?”
19Nwatî Ngai nîwerire Iburahimu atîrî, “Naarî. Mûkaguo Sara nîagaagûciarîra mwana wa kavîcî na ûgaagatuîra rîîtwa Isaka. Nîngaavingia kîrîkanîro gîakwa nake wana njiarwa ciake tene na tene. 20Nîmbîguîte mûkîmbûria ûvoro wîgiî Ishumaeli. Kwoguo nîngaamûrathima na nîmûve ciana nyîngî na njiarwa nyîngî. Nîagaatuîka îthe wa athamaki îkûmi na aîrî na nîmûtue rûrîrî rûnene. 21Nwatî nîngavingia kîrîkanîro gîakwa na Isaka, ûrîa ûgaaciarwa nî Sara mavinda wata mama mwaka ûcio wîngî.” 22Na rîrîa Ngai aarîkirie kwarîria Iburahimu, nîwathiîre.
23Mûthenya wa ûcio Iburahimu nîwaruithirie Ishumaeli, arûme arîa engî onthe maarî gwake mûciî, wa vamwe na ngombo irîa ciaciarîrîtwe gwake mûciî wana irîa ciagûrîtwe. Na njîra îo, Iburahimu nîwathîkîre Ngai. 24Iburahimu aaruire arî na ûkûrû wa mîaka mîrongo kenda na kenda, 25nake mûvîcî Ishumaeli aaruithirue arî na ûkûrû wa mîaka îkûmi na îthatû. 26Oîrî maaruithirue mûthenya ûmwe, 27wa vamwe na arûme onthe a gwake mûciî, na arîa maaciarîrîtwe gwake mûciî marî ngombo wana arîa maagûrîtwe.
Valgt i Øjeblikket:
Kîam 17: KKB
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
©Bible Society of Kenya, 2019