Mark 13
13
Jesus Tipi-Wak̇aƞ Ki Okajujupi Kte Ki Iwoglake
(Matthew 24.1, 2; Luke 21.5, 6)
1Jesus Tipi-Wak̇aƞ etaƞhaƞ iyaye yuk̇aƞ ihakab-uƞpi ki wanje leye, "Waunspewiċakiya, Waƞyaƞka yo! Inyaƞ na tipi kagapi ki lila waṡteṡte yelo!"
2Jesus awiċayupte, "Tipi waṡteṡte kaġapi ki lena waƞlakapi hwo? Le inyaƞ waƞjilaḣċi ki ayuṡtaƞpi kte ṡni; eyaṡ inyaƞ ki iyuha kaḣ'ogiyayapi ktelo."
Oteḣikiƞ Kte Na Teḣiya Kiċiċuwapi Kte
(Matthew 24.3-14; Luke 21.7-19)
3Yuƞk̇aƞ Tipi-Wakaƞ ki he samṗaya Jesus K̇aƞta Paha akaƞl yaƞka he, hehaƞl Peter na James na John na Andrew iyatayela iyuƞġapi, 4ċa "le tohaƞtu kte ki tokeṡke sloluƞyapi kta hwo?” eyapi.
5Jesus awiċayupte, "Waktapo na ognaṡ nignaya waċiƞpi ktelo. 6Wiċaṡa lila ota iwomaglakapi kte na leyapi kte, 'He miye yelo!' eyapi kte, na wiċagnayapi kte. 7Nakun okiċize ki nayaḣ'uƞ na onayaḣ'uƞ ki inaġiiċiyapi ṡni yo. 8Makoċe ki kiċiza unpi kte na ṫawowitaƞ ki k̇o ahiiċ'iṫakpepi ktelo. Makoċe ki naċaƞċaƞ kte na wiċaakiḣaƞpi ktelo. Lena wiċoḣaƞ ki hokṡiyuha sʹe wiċayazaƞ ktelo.
9Waktaya unpi ognaṡ oniyuspapi na niyasupi kte. 10Eyaṡ makoċe oihaƞke ṡnihaƞni woṫaiƞ ki le tuwekayeṡ wahokuƞwiċakiyapi ktelo. 11Nakuƞ oniyuspapi naiƞṡ niyasupi kte eyaṡ itok̇apiṡni yo, tokṡa taku ehiƞkte ki he Woniya-wak̇aƞ etaƞhaƞ u kte. 12Wicaṡa ki suƞkaku ki enaḣc̄i ktewiċakiyapi kte na atewiċayapi ki iƞṡʹeya wak̇aƞyeja ṫawapi ki ktewiċakiyapi kte. Wak̇aƞyeja ki nakuƞ huƞku na atkuku ki ktewiċakiyapi ktelo. 13Miye ṫaƞtaƞhaƞ uƞ tuweki iyuha waḣtenilapi kte ṡni. Eyaṡ wiċamayalapi ki oihaƞke waƞilya ni yauƞpi ktelo.
Le Takuwaƞ Ihaƞkeya Ṡica Ċa
(Matthew 24.15-28; Luke 21.20-24)
14“Taku waƞ 'Le Ihaƞkeya Ṡiċa' ċa he el iyowaja ṡni eyaṡ el najiƞ." "Hehaƞl tona Judea etaƞhaƞpi hena pahatakiya naṗapi ktelo. 15Tuwa tipi ki tic̄e kta najiƞ he oḣaƞk̇oya tima gni na takuni ikikc̄u okihi kte ṡni. 16Wiċaṡa waƞji oblaya ta uƞ ki he ekayeṡ tipi ekta inaḣni gni na ogle ikikc̄u okihi kte ṡni. 17Aƞpetu ki hena oteḣikiƞ ktelo, wiƞyaƞ eya igluṡʹakapi ki hena epi na etaƞ hokṡic̄ala yuhapi ki hena! 18Wak̇aƞṫaƞka ċekiyapo, waniyetu el lena taku ki heċetu kte ṡni! 19Oteḣikiƞ kte ki le tohaƞtaƞ mak̇a ki le kaġe ki hetaƞhaƞ na aƞpetu lehaƞyaƞ, mak̇a ki lel akaƞ takuni iyeċec̄a kte ṡni. 20Eyaṡ Wak̇aƞṫaƞka aƞpetu ki hena yupteċela, heċuƞ ṡni ki tuweni ni kte ṡni. Ho heuƞ oyate eya wiċakaḣniġe ki hena uƞ iyowalya aƞpetu ki hena yupteċela.
21“Ho hehaƞl, tuwa leniċiyapi haƞtaƞṡ el nuġe yuze ṡni yo, ‘Waƞyaƞkapo, le Wanikiya ki e!’ naiƞṡ, ‘Waƞyaƞkapo, he e yelo!’ ċetʹuƞglapo. 22Wiċaṡa-wak̇aƞ-waayaṫaƞiƞ na Wanikiya heċapi keya aṫaƞicʹiyapi kte. Hena nakuƞ waasniyaƞpi kte ki heuƞ wiċagnayaƞpi kte, okihi pic̄a ki, Wak̇anṫaƞka oyate waṡte ki hena k̇o wiċagnayapi kte. 23Waktapo! Lena iṫokab oċic̄iyakapelo.”
Wiċaṡa Ċiƞhiƞtku Ki Hiyuyapi
(Matthew 24.29-31; Luke 21.25-28)
24“Oteḣike ki lena ohakab aƞpetu tona ki ataeyaṡ wi ki aṫaƞiƞ kte ṡni, na haƞhepi wi ki hehaƞyaƞ iyoyaƞpa kte ṡni. 25Wiċaḣpi ki hena hiƞḣpayiƞ kte, na maḣpiya ki etaƞhaƞ taku okawiƞġe ki hena ipaweḣ iyayiƞ kte. 26Ho na hehaƞl Ċiƞhiƞtku ki aṫaƞiƞicʹiyiƞ kte, maḣpiyataƞhaƞ ṫawowaṡʹake ki, na wowitaƞ gluha u kte. 27Ogligle wak̇aƞ eya kuta hiyuwiċayiƞ kte ki hena ṫate uye topa ki hena iyayapi, na Wak̇aƞṫaƞka tona wiċaglaḣniġe ki hena mak̇a owaƞc̄aya wiċapahipi kte.
Le Ṫamnioḣpe Ċaƞ Ki Hetaƞhaƞ Wounspe Iyaċupi Kte
(Matthew 24.32-35; Luke 21.29-33)
28“Ċaƞ el waskuyec̄a iċaġe ki hena etaƞhaƞ wauƞnispepi. Tohaƞl, wana ċaƞwape ki ṫo na nuṡnujela ki hehaƞl wana bloketu ki u kta ċa slolyayapi kte. 29Ho hel iyeċel, lena waƞlakapi ki wana ik̇aƞyela u, ċa hehaƞtu ċa wana igluwiƞyeyapi kte heċa. 30Kiksuyapo, taku eya iwowaglake ki lena awaċinṡniya uƞpi ṡniyo, iċiƞ hena iyeċetu kte, na wiċoiċaġe ki le huƞḣ waƞyaƞkapi kte. 31Maḣpiya na makoċe ki iyatakuƞni kte eyaṡ miṫaoiye ki tohaƞtu kte.
Le Tohaƞl Oihaƞkiƞ Kte Ki Tuweni Slolyiƞ Kte Ṡni
(Matthew 24.36-44)
32“Le tohaƞl oihaƞkiƞ kte ki tuweni slolyiƞ kte ṡni, nakuƞ ogligle wak̇aƞ ki na Ċiƞhiƞtku ki, ekeyaṡ slolyapi kte ṡni. Ate eċela aƞpetu na owaṗe tohaƞtu ki hena slolyiƞ kte. 33Ċa, waktaya uƞpo, iċiƞ tohaƞtu kte ki he slolyayapi kte ṡni. 34Le wiyaċiƞpi ki he, iṫoṡ tuwa omani yiƞ kte, ṫawowaṡi ki ena yaƞkapi kte, na iyohila wawiċaṡi kte, nahaƞ waƞji tiyopa awaƞyaƞke ṡi kte. 35Wakta uƞpo, iċiƞ tohaƞtu kte ki slolyayapi ṡni, uƞgna ḣtayetu ehaƞtu, naiƞṡ haƞċokaƞyaƞ, naiƞṡ aƞpo ki, naiƞṡ wi hinaṗe ki ehaƞl tiwahe iṫaƞċaƞ ki gli ktelo. 36Uƞgnahela gli ki, iṡtima yaḣpayapi ktelo. 37Taku eċiċiyapi ki he iyuha hewiċawakiyelo, ki he ‘Wakta unpo!’”
Valgt i Øjeblikket:
Mark 13: LKTNT20
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© American Bible Society