Shiyanso 38

UYuuda nu Tamaali

1Uluhaavi lula, uYuuda wávalekhaga avamaame, baheene wáaluta kikhala ku Adulami kwa Mwadulami yumonga yuna akhandi itambulwa Hiila. 2Ukho, uYuuda wátangaana nu muhinja yumonga uMukanaani, yuna akhandi mwali wa Shuwa, wámutoola. 3Wáganile kimutoola, umuhinja yula wásumula ulwanda, wáasava umwana wa shidiimi. Woope uYuuda wámutambulila ilitaawa lya Eli. 4Wásumula ulwanda khanji, wáasava umwana uyunji uwa shidiimi, wámutambulila ilitaawa lya Onani. 5Khanji wásumula ulwanda, wáasava umwana umudiimi, ilitaawa lyakwe wámutambulila Sheela. Uluhaavi luna akhandi iisava, vakhandi viikhala ku Kesibu.

6UYuuda wámutwasa uEli, yuna akhandi muswamuve wa wutasi, umudala uyo akhandi itambulwa Tamaali. 7Leelo, uEli akhandi munansi pa Mutwa uNguluvi, ndeeno, uMutwa wámubuda. 8Baheene, uYuuda wámujovela uOnani wáaja, “Muhaala umudala wa muvaha waakho, baheene umusavile avaana.” 9Leelo uOnani wámanyaga kiija, avaana awo vasikhava vaakwe. Lino, shila pina akhandi iigona nu mudala wa muvaha waakwe, wáava ikunula imbeyu saakwe pansi, kiija apootwe kimupeela umuvaha waakwe avaana. 10Ulujowo ulu lwamukhalasa uMutwa uNguluvi, baheene wámubuda woope.

11Apo, uYuuda wámujovela uTamaali umukhamwanaakwe, “Tina kukhaaya kwa wiiho ulute ukhale ngaja mufwile, mbakha umwanangu uSheela pina wáava mukhome.” Kiiva uYuuda akhandi ihiiva kiija, “Hata uSheela akwiliile kiifwa ngaja avavaha vaakwe.” Baheene uTamaali wáawuya kukhaaya kwa wiihe.

12Saganile kishila nsiku nyinshi, umudala wa Yuuda yuna akhandi mwana wa Shuwa, wáafwa. Wáganile kimala ishivembo, uYuuda nu mumanyi waakwe uHiila uMwadulami, vaaluta lumo ku Timuna kwa vaanu vina vakhandi visheena uwaaji wa nkholo saakwe. 13Uluhaavi ulo uTamaali wájovelwa, “Umukweyo ali mu nsila iiluta ku Timuna kisheena uwaaji wa nkholo saakwe.” 14Baheene uTamaali wáyaawula amenda gaakwe aga wufwile, wáyigubikha ni shitambala ku meeho, aleshe kimanyikha. Wáakhala pa shikwilo isha kiyinjila mu lijumbi lya Enayimu, nkholeela ni nsila yina yiiluta ku Timuna. Wágahaga ndeeno, kwa kiiva wáwonaga uSheela wáava mukhome, leelo uYuuda asikhamuhasiise kiiva mudala waakwe.

15UYuuda wáganile kimwaga wáhiivaga kiija uwashimaayi uyu mushemi, kwa kiiva akhandi ayigubiishe ku weeni ni shitambala. 16Kwa kiiva akhandi asimeenye kiija yu mukhamwanaakwe, wábaagukha mu nsila, wámufwata wámulonsa wáaja, “Yinsa lino, nisakula kigona lumo noowe.” Woope wámujovela, “Nda niyiitishe kigona noowe, usinipeele shishi?” 17UYuuda wámujovela, “Nisikupeele inyana mene kihuma mu shipuga shangu.” UTamaali wámujela, “Khomekha ishiinu, baheene nimanye kiija usinipeele inyana mene iyo.” 18Baheene uYuuda wámujovela, “Owe wisakula nikhomeshe shishi?” UTamaali wáaja, “Nipeela ulunyolo ulunya pete ya shimanyilo shaakho nu lukwegu ulo ulwa lishima, luna ulukheete.” UYuuda wámupeela ifiinu ifyo, wáagona nawo, wáapata ulwanda. 19Apo, uTamaali wáawuya kukhaaya, wáyaawula ishitambala shina akhandi ayigubiishe ku mutwe, baheene wáfwala amenda gaakwe aga wufwile.

20UYuuda wámufilikha umumanyi waakwe uMwadulami kiija, atwale inyana mene iya kiposola ifiinu fila fina uYuuda wákhomekhaga kwa washimaayi yula. Leelo asikhamwajile. 21Apo, baheene wávaposa avagoosi ava ku Enayimu, “Ali kwi uwashimaayi umushemi yula yuna akhandi iiva mulubali lwa nsila ya Enayimu?” Baheene vamujovela, “Apa akwasiina uwashimaayi umushemi.” 22Lino, uHiila wáatina kwa Yuuda wámujovela wáaja, “Nisamwaga, avakhaaya ava pala vanijovela kiija, ‘Panu, akwasiina uwashimaayi umushemi.’” 23Baheene uYuuda wáajova, “Lekha asigale ni fiinu ifyo, tisilaave tiyegulwe. Yuuwe waawona ngaja shina namutwalilaga inyana mene, leelo usamwaga.”

24Gaganile kishila meesi gatatu, uYuuda wájovelwa kiija, “Umukhamwana waakho uTamaali mushemi, kwa wushemi waakwe uwo, lino ana lwanda.” Apo, baheene uYuuda wálajisa wáajova, “Mupoosi kunja, anyaanywe nu mooto!” 25Uluhaavi pina vakhandi vikimupoosa kunja, wáfilikha imola iyi kwa mukweye wáaja, “Umunya fiinu ifi yumwene yuna wánipeelaga ulwanda. Loleela wunofu, ipete iyi inya shimanyilo nu lunyolo lwakwe nu lukwegu ulu fya naani?” 26UYuuda wáfimanya ifiinu ifyo baheene wáaja, “UTamaali mugolofu kinishila one, kwa kiiva nagombolaga kimutwasa kwa Sheela umuswamu wangu.” Kihuma ilijuva ilyo, uYuuda asikhagonile khanji nu Tamaali.

27Uluhaavi lwa kisava lwaganile kifikha, yawonekha uTamaali akhandi ana lwanda lwa vaana mapasa. 28Ilijuva pina akhandi iisava, umwana yumonga wáahumya iliwokho lyakwe kunja, baheene umusavisaaji wámupinya nu lunyankha uluduuhu, kuno iijova, “Uyu yumwene wáatala kisawa.” 29Leelo, umwana uyo wáatinia iliwokho lyakwe, woope umaame wáasawa tangusiina. Apo, baheene umusavisaaji yula wáaja, “Kwashi owe waahuma kwa ngufu?” Lino, umwana uyo wátambulilwa ilitaawa lya Peleesi.#38:29 Peleesi: Litaawa lya Shihebulaniya. Uluganulo lwakwe, kihuma kwa ngufu. 30Luhaavi lufupi, umuyine woope wáasawa ana lunyankha luduuhu, wátambulilwa ilitaawa lya Seela.#38:30 Seela: Litaawa lya Shihebulaniya. Uluganulo lwakwe, nduuhu.

Valgt i Øjeblikket:

Shiyanso 38: Shisangu

Markering

Del

Kopiér

Vil du have dine markeringer gemt på tværs af alle dine enheder? Tilmeld dig eller log ind

Læs mere om IShiyanso nu Lufingo uLupya

Shiyanso 38

Populære bibelvers fra
Shiyanso 38

Lyt til Shiyanso 38

Bibel:

Sangu

Oversættelse: IShiyanso nu Lufingo uLupya - Shisangu

Shiyanso 38

Shiyanso 38

Populære bibelvers fra Shiyanso 38

Lyt til Shiyanso 38

Bibel:

Sangu

Oversættelse: IShiyanso nu Lufingo uLupya - Shisangu

Shiyanso 38

Populære bibelvers fra
Shiyanso 38