Shiyanso 41
41
UYusufu iganula amalooto ga Falawo
1Gaganile kishila maakha gavili, uFalawo wáloota ayiimile mu mbalamo ya mukhoga gwa Nayili. 2Wásaaga ingʼombe fungati inofu sina sineneepe mandu, sitanamukha kihuma mu mukhoga, baheene sayansa kiilya amasole. 3Baheene sayinsa ingʼombe isinji fungati, sina sigandile mandu, sayiima palubali ya mukhoga, nkholeela ni ngʼombe sila sina sineneepe. 4Baheene ingʼombe fungati imbi sila sina sigandile, sasilya ingʼombe fungati sila sina sineneepe. Baaho uFalawo wálamukha mu tulo.
5Lwaganile kishila uluhaavi ludoodo, uFalawo wáagona khanji. Wáganile kigona, wáloota ulwa wuvili. Wágaaga amahoojo fungati makhome manofu, gapongwele mu liseeguve limo. 6Baheene wágaaga khanji amahoojo aganji amanyeehe fungati, gina gayumisiiwe ni lipepo ilikhali kihuma ku lunyikha. 7Baheene amahoojo gala fungati gina manofu, gaamilwa na mahoojo gala fungati amanyeehe. UFalawo wáganile kilamukha, wáamanya kiija wáava iloota hela.
8Ulwamilaawu njine, uFalawo wáava atungumeele. Baheene wávashemeela avalagulaaji woona na vaanu woona avanya luhala ava ku Misili. UFalawo wávajovela amalooto gaakwe, leelo, kusiina umuunu hata yumo, yuna wáganulaga amalooto gaakwe. 9Apo, umungʼwesaaji umukhome wa fingʼwelwa, wámujovela uFalawo, “Wee mutwa, iminsiyaano nakumbukha uwunansi wangu! 10Uluhaavi lula luna ukhandi utukhalaliile one nu mutelekhaaji umukhome wa makhaate gaakho, watudindilaga kwa mukhome wa vasulukhali va wuyangalilaaji waakho. 11Ishilo shimonga, one nu muyangu talootaga, shila muunu amalooto gaakwe, kukhandi kuna wuganulaaji wuna wuli paayo. 12Mukhati mula, mukhandi muna mudiimi yumonga wa Vahebulaniya, muvanda wa mukhome wa vayangalilaaji vaakho. Taganile kimujovela amalooto geesu, wátuganulilaga shila muunu shina akhandi alootile. 13Uwuganulaaji waakwe, waava ngaja shishila shina akhandi aganwile. One natinisiwaagwa ku nsengo yangu nu mutelekhaaji wa makhaate wátumbikhwagwa pa mupishi.”
14Baheene uFalawo wálajisa kiija uYusufu aleetwe, vamuhumya nyangu mu shifungo. Wásheeta inyele, wáfwala amenda aganji, baheene wáaluta pa Falawo. 15Wáganile kifikha kwa Falawo, uFalawo wámujovela uYusufu wáajova, “Naloota, leelo kusiina umuunu yuna akwiliile kiganula amalooto gangu. Lino napulikha kiija, owe ukwiliile kiganula amalooto.” 16UYusufu wámujovela uFalawo, “One nigaya wutawulilwa uwa kiganula, leelo uNguluvi asikupeele uwuganulaaji wa kiyivatamya inumbula yaakho.”
17Baheene uFalawo wámujovela uYusufu, “Nalootaga niyiimile mu mbalamo ya mukhoga gwa Nayili. 18Nasaaga ingʼombe fungati inofu sina sineneepe mandu, sitanamukha kihuma mu mukhoga, sayansa kiilya amasole. 19Naganile kisaaga iso, sayinsa ingʼombe isinji sina sigandile mandu, khanji sina mavili mavi mandu. Ingʼombe shina sila, one nisinasaagaje hata gwalimo pa Misili apa. 20Baheene ingʼombe fungati sila isa wutasi sina sineneepe mandu, saliiwa ni ngʼombe fungati sina sigandile mandu. 21Leelo ingʼombe iso sina sigandile, saganile kisilya ingʼombe sila sina sineneepe, sasigala shishila kusiina umuunu yuna akwiliile kimanya kiija, sasilya ingʼombe sila sina sineneepe mandu. Baheene natindimukha. 22Naganaga kigona khanji, naloota ulwa wuvili, nagaaga amahoojo fungati amanofu aga mbumbulu, goona galembwile mu liseeguve limo. 23Apo, baheene galembula amahoojo aganji fungati amanyeehe mandu, gina ganyaalile kwa kiiva gapujiilwe ni lifushe lina liihuma ku lunyikha. 24Amahoojo fungati amanofu gala, gaamilwa na mahoojo fungati amanyeehe. Amalooto ago navajovelaga avalagulaaji woona, leelo kusiina hata yumo yuna wániganulilaga amalooto gangu.”
25Apo, baheene uYusufu wámujovela uFalawo wáajova, “Amalooto gaakho goona uwuganulaaji waakwe wuwuumo. UNguluvi wávawonensa injowo sina hambi ikisisenga uluhaavi luulu ulwa nkholeela. 26Ingʼombe fungati sina sineneepe mandu, uluganulo lwakwe maakha fungati, na mahoojo amakhome mandu, uluganulo lwakwe, maakha fungati. Amalooto ago, uwuganulaaji waakwe wuwuumo. 27Ingʼombe fungati sila sina mbi sigandile mandu, sina sifwata sila sina sineneepe mandu, na mahoojo gala fungati amanyeehe mandu na gina ganyaalile kwa lifushe, uluganulo lwakwe, maakha fungati aga njala. 28Ngaja shina nakujovela Falawo kiija, uNguluvi wakuwonensa injowo sina asisisenje lilino. 29Puliisa, kukhava na maakha fungati aga mota nkhome, mu nyi yoona iya Misili. 30Leelo, kumwandi gakhayinsa amaakha aganji fungati aga njala inkhome na maakha gala aga mota, gasikhakumbukhwa. Injala iyo, yikhayinanga inyi yoona iya Misili. 31Imota yina yili mu nyi yisikhakumbukhwa, kwa kiiva injala yina yikhagwa, yikhava nkhome mandu. 32Kiiva amalooto gaakho gayiwuyiilila ulwa wuvili, iliswi ilyo uNguluvi wáliwonensa, asiligahe nyangu.
33“Lino wee Falawo, mubaagula umuunu umunya lugoto nu luhala, umuviishe ave muyimililaaji wa nyi ya Misili. 34Khanji ugahe ndeeni, ubaagule avayimililaaji vina vasiyimiilile inyi ya Misili. Insengo yaanave yive kikungaania ishipuga shimo mu fipuga fisaanu ifya nkungulo yoona iya Misili mu luhaavi ulu ulwa maakha fungati aga mota. 35Uvalajise avaanu awo vakungaanie ishakiilya shoona isha nkungulo, uluhaavi lwa maakha fungati gina giyinsa aga mota. Imbumbulu iso, sive mu wutawulilwa waakho, siviikhwe mu fihenje mu majumbi. 36Ishakiilya isho shiviikhwe, kwa kiiva ya maakha fungati aga njala, yina yikhagwa mu Misili, kiija inyi yisilaave yinangwe.”
UYusufu iviikhwa ave muyimililaaji
37Iliswi ilyo lyava linofu kwa Falawo na kwa vavanda vaakwe woona. 38Baheene uFalawo wávaposa avavanda vaakwe, “Tisimwaje kwi umuunu uyunji ngaja uyu, umunya numbula ya Nguluvi?” 39Baheene wámujovela uYusufu, “Kwa kiiva uNguluvi wákuwonensa aga goona, kusiina umuunu uyunji umunya luhala nu wumanyi ngaja owe. 40Lino owe usiive muyangalilaaji wa livansa lyangu, na vaanu vangu woona vakhava vifwata amalajiso gaakho. Pa shitengo sha wutwa hela, one nikhava mukhome kikushila owe.” 41Baheene uFalawo wáyitenekha wáajova, “Lino nakubaagula uve muyimililaaji wa nyi yoona ya Misili.” 42Apo uFalawo wáyaawula ipete yaakwe inya shimanyilo sha shitwa mu ludole lwakwe, baheene wámufwasa uYusufu mu ludole. Khanji, wámufwasa amenda amanofu mandu nu lunyolo lwa sahaabu mu nsingo. 43Wámuyangasa uYusufu mu mutukha yaakwe iya wuvili, yina yikwehwa ni falaasi. Avaanu valongola pamwandi ya Yusufu kuno vilyova viija, “Fugamaji!”
Ndeeno uFalawo wámuviikha uYusufu ave muyimililaaji wa nyi yoona iya Misili.
44Apo, uFalawo wámujovela uYusufu, “One yuune Falawo, mutwa! Leelo mu nyi yoona iyi iya Misili, umuunu yoyoona asikhagahaga shiinu shoshoona bila wutawulilwa waakho.” 45Baheene uFalawo wámutambulila uYusufu ilitaawa lya Shimisili ilya Safenati-Paneya. Wámutwasa uAsenati, umwali wa Potifeela, umutambule wa ku lijumbi lya Oni, ave mudala waakwe. Apo, uYusufu wáyansa kipilima inyi yoona iya Misili.
46Uluhaavi luna akhandi iyansa kimusenjela insengo uFalawo umutwa wa ku Misili, uYusufu akhandi ana maakha mashumi gatatu. UYusufu wáahuma kukhaaya kwa Falawo, wáaluta kiseesa inyi yoona iya Misili. 47Amaakha ago fungati ga shakiilya shinshi mandu, ishakiilya shamotekha mandu mu magunda goona aga ku Misili. 48UYusufu wákungaania ishakiilya shoona isha maakha ago fungati aga shakiilya shinshi mandu. Shila lijumbi lya Misili, saviikhwa imbumbulu sina sakungulwagwa kihuma mu magunda ga mulubali lwa lijumbi ilyo. 49Wákungaania imbumbulu nyinshi mandu, ngaja luhankha lwa mu mbalamo ya bahali. Wáalekha hata kivasa, kwa kiiva akhandi akungeenie mbumbulu nyinshi.
50Pina gasinayanse amaakha ga njala, uAsenati umwali wa Potifeela umutambule wa ku lijumbi lya Oni, akhandi amusaviile uYusufu avaana vavili ava shidiimi. 51UYusufu wámutambulila umwanaakwe uwa wutasi ilitaawa ilya Manaase,#41:51 Manaase: Litaawa lya Shihebulaniya. Uluganulo lwakwe, yula yuna wánipinsa kisaamwa. kwa kiiva wájovile, “UNguluvi wánigaha nisaamwe amalava gangu goona khabisa, hata avalukholo lwangu ava nanda ya daada.” 52Umwana wa wuvili wámutambulila ilitaawa lya Efulahimu,#41:52 Efulahimu: Litaawa lya Shihebulaniya. Uluganulo lwakwe, lusawo lukhome. kwa kiiva wájovile, “UNguluvi anipeelile ulusawo mu nyi ya malava gangu.”
53Amaakha fungati aga shakiilya shinshi mandu gaganile kisila ku Misili, 54baheene amaakha aganji fungati aga njala gayansa, ngaja shina uYusufu akhandi alogwele. Injala yaagwa inyi isinji soona, leelo inyi iya Misili yikhandi yina shakiilya. 55Avaanu ava ku Misili vaganile kimala ifyakiilya fyanave, vaaluta kimulomba uFalawo avapeele ishakiilya. Woope uFalawo wávajovela aVamisili, “Lutaji kwa Yusufu, shina hambi ikivajovela, gahaji.”
56Injala yaganile kiyalaalila nyi yoona, baheene uYusufu wádindula ifihenje fyona, wáyansa kivagusisa aVamisili ishakiilya. 57Avaanu kihuma nyi soona, vayinsa ku Misili kwa Yusufu kigula ishakiilya, kwa kiiva injala yikhandi nkhome mandu, yiyalaliile nyi soona.
Valgt i Øjeblikket:
Shiyanso 41: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.