Shiyanso 42
42
Avamaame va Yusufu viiluta ku Misili
1UYaakobo wáganile kipulikha kiija ku Misili kuna shakiilya, baheene wávajovela avanaakwe, “Vayaa, mbona mululuveele khanji muloleelana hela? 2Napulikha kiija ku Misili kuna shakiilya, ndeeno luti ukho mutugulile, baheene tikulushe kiifwa ni njala.”
3Baheene, avavaha ishumi va Yusufu, vaaluta ku Misili kigula ishakiilya. 4Leelo, uYaakobo asikhamulesheele uBenyamini umunangʼana wa Yusufu alute na vamaame ku Misili, kwa kiiva akhahiivile wáaja, “Wuli, imfwa nda yimwaje umwanangu nikhagaha shi?” 5Ndeeno, avaana va Isilaheli vaafikha ku Misili, woope vaava vavaamo na vaanu vina vakhandi viiluta kigula ishakiilya, kwa kiiva hata inyi ya Kanaani yoope yikhandi yigwile injala inkhome.
6Uluhaavi ulo, uYusufu akhandi muyimililaaji mukhome wa nyi ya Misili, yumwene yuna akhandi ikivagusisa avaanu woona ishakiilya. Avamaame va Yusufu vaganile kifikha, baheene vamufugamila uYusufu mbakha pansi. 7UYusufu wávaaga avamaame wávamanya, leelo wáyigaha ngaja asivameenye. Baheene wávaposa kwa wukhali wáaja, “Omwe muhumile kwi?” Woope vamugomosesa vaajova, “Tihumile ku nyi ya Kanaani, tiyinsile kigula ishakiilya.”
8UYusufu hata nda wávamanyaga avamaame, leelo aveene vasikhamumanyile umwene. 9Apo, baheene uYusufu wákumbukha amalooto gaakwe aga paanyuma ulwa vavaha vaakwe, baheene wávajovela, “Omwe muli vatandilaaji, muyinsile kiyiseesa inyi yeesu, baheene mumanye uluvala pina pangaya vayangalilaaji va wulugu.” 10Leelo, avamaame vamujovela, “Wee mutwa weesu ndaali! Lusili ndeeno! Ose ti vavanda vaakho, tayinsa kigula ishakiilya. 11Ose woona tili vaana va muunu yumo, ose tisili vadehi, khanji ose tisili vatandilaaji.”
12Leelo, uYusufu wáyitenekha kivajova, “Ndaali! Omwe muyinsile kiyiseesa inyi yeesu, baheene mumanye uluvala luna lungaya vayangalilaaji va wulugu.” 13Avavaha vaakwe vamujovela, “Ose ti vavanda vaakho, kunyeesu tikhandi tili ishumi na vavili, vaana va muunu yumo, tiikhala ku nyi ya Kanaani. Lino, umunangʼana weesu uwa nkwangu asigeele kukhaaya nu wiheesu, uyunji wáfwisaga.”
14Hata ndeeno, uYusufu wávajovela, “Ngaja shina naatala kivajovela, omwe muli vatandilaaji hela! 15Lino hambi nikivajela ndeeni, shiyooli nikiyiyiiga kwa litaawa lya Falawo, musipoola apa nda asiyinsile umunangʼana weenyu yula. 16Mufilishi yumo, alute amuleete umunangʼana weenyu, omwe mu vanji mudindilwe mukhati. Apo baheene nimanye amaswi aga, nda mwijova ga shiyooli. Nda lusili ndeeno, nikiyiyiiga kwa litaawa lya Falawo, omwe muli vatandilaaji.” 17Baheene uYusufu wávadindila woona mukhati kwa nsiku sitatu.
18Ilijuva lya wutatu uYusufu wávajovela, “One nikimuyinatila uNguluvi. Lino nda mwisakula kipona, gahi ngaja shina nikivajova. 19Nda mwijova shiyooli, yumonga asigale mukhati, avanji vavatwalile ishakiilya avalukholo lwenyu vina viilava ni njala. 20Leelo, mbakha munileetele umunangʼana weenyu, baheene niyiitishe amaswi geenyu nda ga shiyooli, baheene omwe musiibudwa.” Vayiitikha kigaha ngaja shina akhandi avajoveele.
21Apo, baheene vayansa kijovelana kwa shilogolo shaanave, “Shiyooli, tamunanjilaga umunangʼana weesu uYusufu. Tikhagaajile amalava gaakwe na shina akhandi ingʼuula, leelo tisikhageene hata kimupuliisa, ili lilyene lina lyapinsa amalava aga.” 22Apo, uLubeni wávajovela, “Navajovelaga kiija, ‘Musikhamugahilaji uwunansi umunangʼana weesu.’ Leelo musikhanipuliishe! Lino tilafisiwa kwa kiiva ya danda yaakwe.”
23Uluhaavi ulo, vasikhameenye kiija, uYusufu akhandi ipulikha amaswi goona gina vakhandi vilogola, kwa kiiva uYusufu akhandi ilogola nawo kwa kishilila umuganulaaji wa shilogolo shaanave. 24UYusufu wáaluta pashipata, wáyansa kikhoola. Baheene wáatina khanji pala kilogola nawo. Wálajisa kiija uSimiyoni akhatwe na kipinywa baaho pa vamaame.
Avamaame va Yusufu viiwuya ku Kanaani
25UYusufu wálajisa amafukho ga vamaame gaviikhwe ishakiilya, ni hela isa shila muunu sitinisiwe mu mafukho gaanave, na vapeelwe ishakiilya isha mu nsila. Avavanda vaakwe vaagaha shishila shina akhandi avalajiise. 26Lino, avamaame va Yusufu vayangasa amasigo pa dogovi, baheene vayansa kiwuukha.
27Vaganile kifikha uluvala ulwa kituuya, yumo wádindula umufukho gwakwe kiija ayipeele idogovi yaakwe ishakiilya, apo wáswigaga wáganile kisaaga ihela saakwe sikwali pashaanya mu mufukho. 28Apo, wávajovela avamaame, “Loleeli, ihela sangu sitinisiiwe! Isi apa sili mu mufukho!” Avamaame vaganile kipulikha ndeeno, baheene inumbula saanave satungumeele, vayansa kiloleelana kuno vitetema viija, “Lujowo lushi ulu luna wátusenjela uNguluvi?”
29Vaganile kifikha kwa Yaakobo uwihaanave ukho ku nyi ya Kanaani, baheene vamujovela goona gina gavapataga ku Misili vaaja, 30“Umulongosaaji yula uwa nyi ya Misili wálogola noose kwa nkhalasi, wátujovela ose tili vatandilaaji va nyi yaakwe. 31Leelo, ose tamujovela taaja, ‘Ose tisili vatandilaaji, tili vaanu va shiyooli. 32Ose tili vaana va muunu yumo, tikhandi tili ishumi na vavili. Ulukholo lwesu yumonga wáfwisaga, na umunangʼana weesu yumo asigeele nu wiheesu kukhaaya ku Kanaani.’
33“Apo, baheene umukhome yula wátujovela wáaja, ‘Nisivamanye kiija musili vadehi nda mugahe ndeeni. Mumusigase umuyeenyu yumo apa, mu vanji muvatwalile ishakiilya avaanu veenyu vina viilava ni njala. 34Leelo, mumuleete umunangʼana weenyu, baheene hambi niimanya kiija, omwe muli vaanu va shiyooli na musili vatandilaaji. Nda mugahe ndeeno, nisivaleshele umameenyu, na musiive mwigula na kigusa ifiinu mu nyi yeesu muno.’”
35Vaganile kiyansa kikunula ishakiilya kihuma mu mafukho gaanave, shila muunu wáshaagaga ishihagato shidoodo sha hela mu shakiilya! Vaganile kiwona ndeeno, aveene nu wihaanave, inumbula saanave satungumeele mandu. 36Apo, baheene uYaakobo wávajovela, “Omwe mukinigaha niyase avanangu! UYusufu akwasiina, uSimiyoni akwasiina. Na lino mwisakula mumutoole uBenyamini. Goona ago ganipatile yuune!”
37ULubeni wámujovela uwihaanave, “Nipeela uBenyamini ave mu mawokho gangu, nisimuyangalile wunofu na nisimutinie kunyaakho muumi. Nda nisikhamutinia uBenyamini, uvabudaje avanangu vavili.” 38Leelo, uYaakobo wámujovela uLubeni, “Umwanangu asiiluta noomwe ukho. Umuvaha waakwe uYusufu wáfwisaga, ndeeno asigeele mwene duguli hela kwa nyina. Nigogolweshe mandu. Nda apate amavi mu nsila, nikwiliile kingʼuula mbakha kiifwa.”
Valgt i Øjeblikket:
Shiyanso 42: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.